ಕಲಬುರಗಿ: ಬೈಕ್ ಡಿಕ್ಕಿಯಾಗಿ ಎಂಎಲ್‌ಸಿ ಅರವಿಂದ್ ಕುಮಾರ್‌ ಅರಳಿ ಅವರ ತಾಯಿ ನಿಧನರಾಗಿರುವ ಘಟನೆ (Hit and Run Case) ಜಿಲ್ಲೆಯ ಸೇಡಂ ರಿಂಗ್ ರಸ್ತೆ ಬಳಿಯ ಟೊಯೋಟಾ ಕಾರು ಶೋರೂಂ ಬಳಿ ಬುಧವಾರ ನಡೆದಿದೆ. ರಸ್ತೆ ದಾಟುತ್ತಿದ್ದ ವೇಳೆ ವೇಗವಾಗಿ ಬಂದ ಬೈಕ್ ಡಿಕ್ಕಿ ಹೊಡೆದಿದ್ದರಿಂದ ದುರ್ಘಟನೆ ಸಂಭವಿಸಿದೆ.
ವಿಧಾನ ಪರಿಷತ್ ಸದಸ್ಯ ಅರವಿಂದ್ ಕುಮಾರ್‌ ಅರಳಿ ಅವರ ತಾಯಿ ಸುಮಿತ್ರಾಬಾಯಿ ಎಸ್‌. ಅರಳಿ (75) ಮೃತರು. ಕಲಬುರಗಿಯ ಬಿದ್ದಾಪುರ ಕಾಲೋನಿಯಲ್ಲಿ ಅಳಿಯನ ಮನೆಗೆ ಸುಮಿತ್ರಾ ಅವರು ಆಗಮಿಸಿದ್ದ ವೇಳೆ ಅಪಘಾತ ನಡೆದಿದೆ. ಸಂಚಾರಿ ಪೊಲೀಸ್ ಠಾಣೆಯಲ್ಲಿ ಹಿಟ್ ಆ್ಯಂಡ್ ರನ್‌ ಪ್ರಕರಣ ದಾಖಲಾಗಿದೆ.
ಇದನ್ನೂ ಓದಿ | Chikkaballapur News: ಲಾರಿ ಹರಿದು ಇಬ್ಬರು ಸ್ಕೂಟರ್ ಸವಾರರ ದುರ್ಮರಣ
ಮಾಲೂರಿನಲ್ಲಿ ಟಾಟಾ ಸುಮೋ-ಬೈಕ್ ಡಿಕ್ಕಿಯಾಗಿ ಸವಾರ ಸಾವು
ಕೋಲಾರ: ಬೈಕ್ ಮತ್ತು ಟಾಟಾ ಸುಮೋ ಡಿಕ್ಕಿಯಾಗಿ ಸವಾರ ಸ್ಥಳದಲ್ಲೇ ಮೃತಪಟ್ಟಿರುವುದು ಜಿಲ್ಲೆಯ ಮಾಲೂರು ಸಮೀಪ ನಡೆದಿದೆ. ಮಾಲೂರು ತಾಲೂಕಿನ ಭುವನಹಳ್ಳಿಯ ವೆಂಕಟಪತಿ (25) ಮೃತ ಯುವಕ. ಮಾಲೂರಿನಿಂದ ಭುವನಹಳ್ಳಿಗೆ ಬೈಕ್‌ನಲ್ಲಿ ಹೋಗುತ್ತಿದ್ದಾಗ ಅಪಘಾತ ನಡೆದಿದೆ. ಮೃತ ಯುವಕ ವೆಂಕಟಪತಿ ಅನೇಪುರ ಹನುಮಂತಪ್ಪ ಅವರ ಕಾರು ಚಾಲಕನಾಗಿ ಕೆಲಸ ಮಾಡುತ್ತಿದ್ದ. ಸ್ಥಳಕ್ಕೆ ಮಾಲೂರು ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿ, ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ಇದನ್ನೂ ಓದಿ | Child Theft: ಬೆಂಗಳೂರಿಗೆ ಕಾಲಿಟ್ಟ ಮಕ್ಕಳ ಕದಿಯೋ ಬಿಹಾರಿ ಗ್ಯಾಂಗ್; ಇಬ್ಬರ ರಕ್ಷಣೆ
ಚಾಲಕನ ನಿಯಂತ್ರಣ ತಪ್ಪಿ ಮೋರಿಗೆ ಉರುಳಿದ ಕಾರು; ವ್ಯಕ್ತಿ ಸಾವು
ವಿಜಯನಗರ: ಚಾಲಕನ ನಿಯಂತ್ರಣ ತಪ್ಪಿ ರಸ್ತೆ ಪಕ್ಕದ ಮೋರಿಗೆ ಕಾರು ಉರುಳಿದ್ದರಿಂದ ವ್ಯಕ್ತಿಯೊಬ್ಬರು ಮೃತಪಟ್ಟು, ಮತ್ತೊಬ್ಬರಿಗೆ ತೀವ್ರ ಗಾಯಗಳಾಗಿರುವ ಘಟನೆ ಕೂಡ್ಲಿಗಿ ತಾಲೂಕಿನ NH-50ರ ಶಿವಪುರ ಗ್ರಾಮದ ಬಳಿ ನಡೆದಿದೆ. ಹೊಸಪೇಟೆ ನಿವಾಸಿ ಹೇಮಚಂದ್ರಪ್ಪ (68) ಮೃತರು. ಮದುವೆ ಮುಗಿಸಿ ವಾಪಸ್ ತೆರಳುವಾಗ ಅಪಘಾತ ನಡೆದಿದೆ. ಸ್ಥಳಕ್ಕೆ ಕೂಡ್ಲಿಗಿ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸುತ್ತಿದ್ದಾರೆ.