ಮೈಸೂರು: ಬುದ್ಧಿ ಹೇಳಿದ ಯುವಕರ ಗುಂಪಿನ ಮೇಲೆಯೇ ಕಾರು ಹತ್ತಿಸಿ ಕೊಲೆಗೆ ಯತ್ನಿಸಿದ ಘಟನೆಯೊಂದು (Murder attempt) ಮೈಸೂರಿನ ಸರಸ್ವತಿಪುರಂನ ಟಿ.ಕೆ. ಬಡಾವಣೆಯ ಜಂಕ್ಷನ್‌ನಲ್ಲಿ ನಡೆದಿದೆ. ಘಟನೆಯಲ್ಲಿ ಮೂವರು ಯುವಕರಿಗೆ ಗಾಯವಾಗಿದ್ದು, ಒಬ್ಬರ ಸ್ಥಿತಿ ಗಂಭೀರವಾಗಿದೆ.
ಇದು ಕಾರುಗಳ ವೇಗದ ಚಾಲನೆಗೆ ಸಂಬಂಧಿಸಿದ ವಿವಾದವಾಗಿದ್ದು, ಹಲ್ಲೆಯಲ್ಲಿ ಕೊನೆಗೊಂಡಿದೆ. ದುಬಾರಿ ಕಾರಿನಲ್ಲಿ ಬಂದ ತಂದೆ ಮತ್ತು ಗೆಳೆಯರ ಬಳಗವಿದ್ದ ಕಾರಿಗೆ ಡಿಕ್ಕಿ ಹೊಡೆಯಲು ಮುಂದಾಗಿದ್ದಾರೆ. ಈ ವೇಳೆ ಜಗಳ ಆರಂಭವಾಗಿದೆ. ಕೊನೆಗೆ ದುಬಾರಿ ಕಾರಿನಲ್ಲಿದ್ದವರು ಯುವಕರ ಮೇಲೆಯೇ ಕಾರು ಹತ್ತಿಸಲು ಮುಂದಾದರು ಎನ್ನಲಾಗಿದೆ.
ವಾಸು ಮತ್ತು ಅವರ ಪುತ್ರ ದರ್ಶನ್ ಅವರು ದುಬಾರಿ ಕಾರಿನಲ್ಲಿದ್ದರು. ಇನ್ನೊಂದು ಕಾರಿನಲ್ಲಿ ಪ್ರಜ್ವಲ್, ರಾಹುಲ್, ಆನಂದ್ ಎಂಬವರಿದ್ದರು. ಒಂದು ಹಂತದಲ್ಲಿ ದುಬಾರಿ ಗೆಳೆಯರ ಕಾರಿಗೆ ಡಿಕ್ಕಿ ಹೊಡೆಯುವ ಹಂತ ತಲುಪಿತ್ತು. ಹೀಗಾಗಿ ಇಷ್ಟೆಲ್ಲ ವೇಗವಾಗಿ ಓಡಿಸಬೇಡಿ ಎಂದು ಯುವಕರು ಬುದ್ಧಿ ಹೇಳಿದರು ಎನ್ನಲಾಗಿದೆ. ಇದರಿಂದ ಸಿಟ್ಟಿಗೆದ್ದ ತಂದೆ ಮತ್ತು ಮಗ ಗೆಳೆಯರ ಗುಂಪಿನ ಮೇಲೆಯೇ ಕಾರು ಹಾಯಿಸಿದ್ದಾರೆ.
ಈ ವೇಳೆ ಮೂವರಿಗೂ ಗಾಯವಾಗಿದ್ದು, ಗಾಯಾಳುಗಳನ್ನು ಮೈಸೂರಿನ ಖಾಸಗಿ ಆಸ್ಪತ್ರೆಗೆ ರವಾನೆ ಮಾಡಲಾಗಿದೆ. ಇವರಲ್ಲಿ ಗಾಯಾಳು ಪ್ರಜ್ವಲ್ ಸ್ಥಿತಿ ಚಿಂತಾಜನಕವಾಗಿದೆ ಎಂದು ಹೇಳಲಾಗಿದೆ. ಸರಸ್ವತಿಪುರಂ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇದನ್ನೂ ಓದಿ | Accident news | ಮಸ್ಕಿಯಲ್ಲಿ ಬೈಕ್- ಬಸ್‌ ಡಿಕ್ಕಿ, ಮೂವರು ಸಾವು