ಬಾಗಲಕೋಟೆ: ಇದೊಂದು ನಂಬಿಕೆ ದ್ರೋಹದ ಪ್ರಕರಣ. ಅರ್ಧಾಂಗಿಯೇ ಪತಿಯ ಕೊಂದ ಮೋಸದ ಕತೆ. ಹೆಂಡತಿಯೇ ಸರ್ವಸ್ವ ಎಂದು ತಿಳಿದವನು, ಆಕೆಯಿಂದಲೇ ಮೋಸ ಹೋಗಿ ಪ್ರಾಣ ತೆತ್ತ ವ್ಯಥೆ. ಅಪಘಾತದಲ್ಲಿ ಮೃತಪಟ್ಟಿದ್ದ ಪ್ರಕರಣವನ್ನು (Murder Case) ಪೊಲೀಸರು ಭೇದಿಸಿದ್ದು, ಹೆಂಡತಿಯೇ ಹಂತಕಿ ಎಂಬುದು ಬಯಲಾಗಿದೆ.
ಜಿಲ್ಲೆಯ ಹುನಗುಂದ ತಾಲೂಕಿನ ಕಮತಗಿ ಕ್ರಾಸ್ ಬಳಿ ಜುಲೈ ೨ರಂದು ಮಧ್ಯರಾತ್ರಿ ೧೨ರ ಸುಮಾರಿಗೆ ಪ್ರವೀಣ್ ಸೇಬಣ್ಣವರ (30) ಬೈಕ್ ಅಪಘಾತಕ್ಕೀಡಾಗಿ ಮೃತಪಟ್ಟಿದ್ದರು. ನೋಡಲು ಇದು ಅಪಘಾತ ಎಂದು ಅನ್ನಿಸಿದರೂ ಪೊಲೀಸರು ತನಿಖೆ ನಡೆಸಿದಾಗ ಕೊಲೆ ಎಂಬ ಸ್ಫೋಟಕ ಮಾಹಿತಿಯೊಂದು ಹೊರಗೆ ಬಂದಿದೆ. ಈಗ ಪ್ರವೀಣ್ ಪತ್ನಿ ಹಾಗೂ ಆಕೆಯ ಪ್ರಿಯಕರ ರಾಘವೇಂದ್ರನನ್ನು ಪೊಲೀಸರು ಬಂಧಿಸಿದ್ದಾರೆ.
ಇದನ್ನೂ ಓದಿ | ಶಿವಮೊಗ್ಗದಲ್ಲಿ ಹಾಡಹಗಲೇ ರೌಡಿಶೀಟರ್‌ ಮರ್ಡರ್‌; ಮುಖ್ಯರಸ್ತೆಯಲ್ಲೇ ಮಾರಕಾಸ್ತ್ರಗಳಿಂದ ಕೊಚ್ಚಿ ಕೊಲೆ
ಏನಿದು ಪ್ರಕರಣ?
ಪ್ರವೀಣ್ ಸೇಬಣ್ಣವರ ಅವರ ಜತೆ ನಿತ್ಯಾ ವಿವಾಹವಾಗಿತ್ತು. ಇಬ್ಬರೂ ಅನ್ಯೋನ್ಯವಾಗಿಯೇ ಇದ್ದರು. ಆದರೆ, ಈ ಮಧ್ಯೆ ಪತ್ನಿ ನಿತ್ಯಾಗೆ ರಾಘವೇಂದ್ರ ಎಂಬುವವನ ಮೇಲೆ ಪ್ರೀತಿಯಾಗಿದೆ. ಒಬ್ಬರಿಗೊಬ್ಬರು ಬಿಟ್ಟಿರಲಾರದಷ್ಟು ಪ್ರೀತಿ ಗಟ್ಟಿಯಾಗಿದ್ದು, ತಮ್ಮಿಬ್ಬರ ಸಂಬಂಧಕ್ಕೆ ಪತಿ ಅಡ್ಡಿಯಾಗುತ್ತಾನೆ ಎಂದು ಪ್ರವೀಣ್ ಹತ್ಯೆಗೆ ಇಬ್ಬರೂ ಸೇರಿ ಮಾಸ್ಟರ್‌ ಪ್ಲಾನ್‌ ಮಾಡಿದ್ದರು. ಪ್ರವೀಣ್ ಬೈಕ್‌ನಲ್ಲಿ ಹೊರಡುವಾಗ ನಿತ್ಯಾ ಹಾಗೂ ಪ್ರಿಯಕರ ರಾಘವೇಂದ್ರ ಹಿಂದೆ ಕಾರಿನ ಮೂಲಕ ಪ್ರವೀಣ್ ಅವರನ್ನು ಫಾಲೋ ಮಾಡಿದ್ದಾರೆ.
ಯಾರೂ ಇಲ್ಲದ ಪ್ರದೇಶದಲ್ಲಿ ಕಾರಿನಿಂದ ಬೈಕ್‌ಗೆ ಜೋರಾಗಿ ಡಿಕ್ಕಿ ಹೊಡೆಸಿ ಪರಾರಿಯಾಗಿದ್ದರು. ಅಪಘಾತದಿಂದ ಗಂಭೀರವಾಗಿ ಗಾಯಗೊಂಡರೂ ಪ್ರವೀಣ್ ಕೂಡಲೇ ಪತ್ನಿ ನಿತ್ಯಾಗೆ ಕರೆ ಮಾಡಿದ್ದು, ತಮಗೆ ಅಪಘಾತವಾಗಿದೆ ಎಂದು ತಿಳಿಸುತ್ತಾರೆ. ಆದರೆ, ತಮಗೆ ಅಪಘಾತ ಮಾಡಿದ್ದು ನಿತ್ಯಾ ಎಂಬ ವಿಚಾರ ಅವರಿಗೆ ತೀಳಿದೇ ಇರುವುದಿಲ್ಲ. ಈ ವಿಷಯ ತಿಳಿದ ನಿತ್ಯಾ ಪುನಃ ತನ್ನ ಪ್ರಿಯಕರ ರಾಘವೇಂದ್ರನ ಜತೆ ಕಾರಿನಲ್ಲಿ ಬಂದು ಮತ್ತೊಮ್ಮೆ ಡಿಕ್ಕಿ ಹೊಡೆಸಿದ್ದಾಳೆ. ಬಳಿಕ ಪ್ರವೀಣ್ ಮೃತಪಟ್ಟಿರುವುದು ಖಚಿತವಾದ ಮೇಲೆ ಅಲ್ಲಿಂದ ಇಬ್ಪರೂ ಪರಾರಿಯಾಗಿದ್ದಾರೆ.
ಆದರೆ ಬೈಕ್ ಬಿದ್ದ ಜಾಗ ಹಾಗೂ ಶವದ ಮೇಲಿನ ಗಾಯ ಶಂಕೆ ಮೂಡಿಸಿತ್ತು. ಪೊಲೀಸರು ಪ್ರಕರಣವನ್ನು ಬೆನ್ನಟ್ಟಿದಾಗ ಇದು ಕೊಲೆ ಎಂದು ತಿಳಿದು ಬಂದಿದೆ. ಸಂಶಯದ ಮೇರೆಗೆ ವಿಚಾರಣೆ ನಡೆಸುವಾಗ ನಿತ್ಯಾ ಹಾಗೂ ಆಕೆಯ ಪ್ರಿಯಕರ ರಾಘವೇಂದ್ರ ಮಾಡಿರುವ ಕೃತ್ಯ ಬೆಳಕಿಗೆ ಬಂದಿದೆ. ಇದೀಗ ಪೊಲೀಸರು ಆರೋಪಿಗಳ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ಇದನ್ನೂ ಓದಿ | ಪ್ರಿಯತಮೆಗೆ ಮದುವೆಯಾಗಿದ್ದರೂ ನಾ ನಿನ್ನ ಬಿಡಲಾರೆ ಎಂದ: ಕಡೆಗೆ ಕೊಲೆಯಾಗಿ ಹೋದ