ಬೆಂಗಳೂರು: ತಾಯಿಯೊಬ್ಬರು ಮಗನಿಗೇ ಪೆಟ್ರೋಲ್ ಹಾಕಿ ಬೆಂಕಿ ಹಚ್ಚಿ ಕೊಂದಿರುವ ಘಟನೆ (Murder Case) ನಗರದ ಸೋಲದೇವನಹಳ್ಳಿ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ. ಚಾಂದ್ ಪಾಷ (40) ಕೊಲೆಯಾದ ವ್ಯಕ್ತಿ. ಸೂಫಿಯಾ (60) ಆರೋಪಿ ತಾಯಿಯಾಗಿದ್ದಾರೆ.
ಚಾಂದ್ ಪಾಷ ಪ್ರತಿನಿತ್ಯ ಕುಡಿದು ಹಲ್ಲೆ ಮಾಡುತ್ತಿದ್ದ ಹೆಂಡತಿ ಮತ್ತು ತಾಯಿ ಮೇಲೆ ಹಲ್ಲೆ ಮಾಡುತ್ತಿದ್ದ ಎನ್ನಲಾಗಿದೆ. ಹೀಗಾಗಿ ಹೆಂಡತಿ ಕೂಡ ಬಿಟ್ಟು ಹೋಗಿದ್ದಳು. ಸೋಮವಾರ ಎಂದಿನಂತೆ ಕಂಠಪೂರ್ತಿ ಕುಡಿದು ಚಾಂದ್ ಪಾಷ ಗಲಾಟೆ ಮಾಡಿದ್ದಾನೆ. ಈ ವೇಳೆ ಪೆಟ್ರೋಲ್ ಎರಚಿ ತಾಯಿ ಕೊಲೆ ಮಾಡಿದ್ದಾಳೆ.
ಪೆಟ್ರೋಲ್ ಹಾಕಿ ಬೆಂಕಿ ಹಚ್ಚಿದ್ದರಿಂದ ಚಾಂದ್ ಪಾಷ ದೇಹ ಸಂಪೂರ್ಣ ಸುಟ್ಟುಹೋಗಿದೆ. ಘಟನೆ ಸಂಬಂಧ ಸೋಲದೇವನಹಳ್ಳಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ತಾಯಿ ಸೂಫಿಯಾಳನ್ನು ಪೊಲೀಸರು ಬಂಧಿಸಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ಇದನ್ನೂ ಓದಿ | Murder Case : ದೇಗುಲದಲ್ಲಿ ಪತ್ನಿ ಕಣ್ಣೆದುರೇ ಗಂಡನ ಕೊಲೆ ಕೇಸಿಗೆ ಟ್ವಿಸ್ಟ್ ; ಮುಹೂರ್ತ ಇಟ್ಟದ್ದೇ ಹೆಂಡತಿ?
ಕೋಳಿ ಅಂಗಡಿ ತೆರೆಯಬೇಡಿ ಎಂದ ನಿವೃತ್ತ ಐಟಿಐ ಎಂಜಿನಿಯರ್‌ ಭೀಕರ ಹತ್ಯೆ
ಬೆಂಗಳೂರು: ಕೋಳಿ ಅಂಗಡಿ ವಿಚಾರದಲ್ಲಿ ನಿವೃತ್ತ ಐಟಿಐ ಎಂಜಿನಿಯರ್‌ನನ್ನು ಚಾಕುವಿನಿಂದ ಇರಿದು ಭೀಕರ ಹತ್ಯೆ ಮಾಡಿರುವ ಘಟನೆ ಜೆ.ಪಿ. ನಗರದ 28ನೇ ಕ್ರಾಸ್‌ನಲ್ಲಿ ನಡೆದಿದೆ. ಕೋಳಿ ಅಂಗಡಿ ತೆರೆದರೆ ವಾಸನೆ ಬರುತ್ತದೆ ಎಂದು ಸ್ಥಳೀಯರೊಂದಿಗೆ ಸೇರಿ ಅಂಗಡಿ ತೆರೆಯದಂತೆ ಒತ್ತಡ ಏರಲು ಮುಂದಾಗಿದ್ದರಿಂದ ನಿವೃತ್ತ ಐಟಿಐ ಎಂಜಿನಿಯರ್‌ನನ್ನು ಕೋಳಿ ಅಂಗಡಿ ಮಾಲೀಕ ಹಾಗೂ ಪುತ್ರ ಕೊಲೆ (Murder Case) ಮಾಡಿದ್ದಾರೆ.
ನಿವೃತ್ತ ಐಟಿಐ ಎಂಜಿನಿಯರ್‌ ವೆಂಕಟೇಶ್ ಕೊಲೆಯಾದವರು. ನಾಗರಾಜ್ (58), ಅಭಿಷೇಕ್ (35) ಆರೋಪಿಗಳು. ಮೃತ ವೆಂಕಟೇಶ್ ಪತ್ನಿ ಜತೆ ಜೆಪಿ ನಗರದ 1ನೇ ಹಂತದ 30ನೇ ಕ್ರಾಸ್‌ನಲ್ಲಿನ ನಿವಾಸದಲ್ಲಿ ವಾಸವಿದ್ದರು. ಜತೆಗೆ ಇವರಿಗೆ ಬಸವೇಶ್ವರನಗರದಲ್ಲೂ ಮನೆ ಇತ್ತು.
ಬಸವೇಶ್ವರನಗರದಲ್ಲಿ ವೆಂಕಟೇಶ್ ನಿವಾಸದ ಎದುರು ನಾಗರಾಜ್ ಎಂಬಾತ ಕೋಳಿ ಅಂಗಡಿ ತೆರೆಯಲು ಸಿದ್ಧತೆ ನಡೆಸಿದ್ದರು. ಆದರೆ, ಇದರಿಂದ ಗಬ್ಬು ವಾಸನೆ ಬರುತ್ತದೆ ಎಂದು ಸ್ಥಳೀಯರು ಆಕ್ಷೇಪ ವ್ಯಕ್ತಪಡಿಸಿ, ಅಂಗಡಿ ತೆರೆಯಲು ವಿರೋಧ ವ್ಯಕ್ತಪಡಿಸಿದ್ದರು. ಅದೇ ರೀತಿ ಮನೆ ಮುಂದೆ ಕೋಳಿ ಅಂಗಡಿ ತೆರೆಯಲು ವೆಂಕಟೇಶ್ ಅವರಿಗೂ ಇಷ್ಟವಿರಲಿಲ್ಲ. ಹೀಗಾಗಿ ಕಾರ್ಪೊರೇಟರ್‌ ಜತೆ ಮಾತನಾಡಿ ಕೋಳಿ ಅಂಗಡಿ ತೆರೆಯದಂತೆ ಒತ್ತಡ ಏರಲು ಪ್ರಯತ್ನಿಸಿದ್ದಾರೆ. ಇದರಿಂದ ಸಿಟ್ಟಿಗೆದ್ದ ಅಂಗಡಿ ಮಾಲೀಕ, ಮಗನ ಜತೆ ಸೋಮವಾರ ಜೆಪಿ ನಗರದ ವೆಂಕಟೇಶ್ ನಿವಾಸಕ್ಕೆ ಬಂದು ಹತ್ಯೆ ಮಾಡಿದ್ದಾರೆ.
ಮಾತನಾಡಿಸೋ ನೆಪದಲ್ಲಿ ಬಂದು ಹತ್ಯೆಗೈದರು
ಮಾತನಾಡಿಸುವ ನೆಪದಲ್ಲಿ ಮಧ್ಯಾಹ್ನ ಜೆ.ಪಿ.ನಗರದ ವೆಂಕಟೇಶ್ ನಿವಾಸಕ್ಕೆ ಆರೋಪಿಗಳು ಬಂದಿದ್ದಾರೆ. ಅವರಿಗೆ ಕಾಫಿ ಕೊಡಲು ವೆಂಕಟೇಶ್ ಪತ್ನಿಗೆ ತಿಳಿಸಿದ್ದಾರೆ. ಅದರಂತೆ ಕಾಫಿ ತರಲು ಆಕೆ ಹೊಗುತಿದ್ದಂತೆ ಇತ್ತ ತಂದೆ ನಾಗರಾಜ್, ಮಗ ಅಭಿಷೇಕ್ ಇಬ್ಬರೂ ಸೇರಿ ವೆಂಕಟೇಶ್ ಮೇಲೆ ಚಾಕುವಿನಿಂದ ದಾಳಿ ಮಾಡಿ ಹೊಟ್ಟೆಗೆ ಇರಿದಿದ್ದಾರೆ. ಇದರಿಂದ ವೆಂಕಟೇಶ್ ಗಂಭೀರವಾಗಿ ಗಾಯಗೊಂಡು ಮೃತಪಟ್ಟಿದ್ದಾರೆ.
ಇದನ್ನೂ ಓದಿ | Road accident : ಯಮನಂತೆ ಬಂದ ಬಿಬಿಎಂಪಿ ಕಸದ ಲಾರಿ; ರಸ್ತೆ ದಾಟುತ್ತಿದ್ದ ವೃದ್ಧೆ ದಾರುಣ ಬಲಿ
ಸ್ಥಳಕ್ಕೆ ಜೆ.ಪಿ.ನಗರ ಪೊಲೀಸರು ಭೇಟಿ ನೀಡಿ ಪರಿಶೀಲಿಸಿ ಕೊಲೆ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಘಟನೆ ನಡೆದ ಬೆನ್ನಲ್ಲೇ ಆರೋಪಿಗಳಾದ ತಂದೆ, ಮಗ ಇಬ್ಬರೂ ಜೆ.ಪಿ.ನಗರ ಪೊಲೀಸರಿಗೆ ಶರಣಾಗಿದ್ದಾರೆ. ಮೇಲ್ನೋಟಕ್ಕೆ ಕೋಳಿ ಅಂಗಡಿಯ ಜಗಳದ ವಿಚಾರದಲ್ಲಿ ಹತ್ಯೆ ನಡೆದಿದೆ ಎನ್ನಲಾಗಿದೆ. ಆದರೆ ಇದನ್ನು ಹೊರತುಪಡಿಸಿ ಕೊಲೆಗೆ ಬೇರೆ ಏನಾದರೂ ಕಾರಣ ಇದೆಯೇ ಎಂಬ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.