ಬಾಗಲಕೋಟೆ: ಆಕೆ ಗರ್ಭಿಣಿ (Pregnant woman). ಹೊಟ್ಟೆಯೊಳಗಿನ ಮಗುವಿನ ಸ್ಥಿತಿ ಗತಿ ಹೇಗಿದೆ ಎಂದು ತಿಳಿಯಲು ಗಂಡನ ಜತೆ ಬೈಕ್‌ನಲ್ಲಿ ಕುಳಿತು ಸ್ಕ್ಯಾನಿಂಗ್‌ ಸೆಂಟರ್‌ಗೆ (Scanning Center) ಹೊರಟಿದ್ದಾರೆ. ಅಷ್ಟು ಹೊತ್ತಿಗೆ ಯಮನಂತೆ ಹಿಂದಿನಿಂದ ಒಂದು ಲಾರಿ ಬಂದಿದೆ. ಒಂದೇ ಹೊಡೆತಕ್ಕೆ (Road accident) ಆ ಮಹಿಳೆ ನೆಲಕ್ಕೆ ಉರುಳಿ ಮೃತಪಟ್ಟಿದ್ದಾರೆ.
ಇಂಥಹುದೊಂದು ದುರಂತ ಸಂಭವಿಸಿದ್ದು, ಬಾಗಲಕೋಟೆ ಜಿಲ್ಲೆಯ (Bagalakote news) ಇಳಕಲ್‌ ನಗರದಲ್ಲಿ.. ಇಳಕಲ್‌ ನಗರದ ದರ್ಶನ್‌ ಲಾಡ್ಜ್‌ ಮುಂಭಾಗದಲ್ಲಿ ನಡೆದ ಅಪಘಾತದಲ್ಲಿ ನಡೆದ ಅಪಘಾತದಲ್ಲಿ ಮೃತಪಟ್ಟ ಮಹಿಳೆಯನ್ನು ಶಾಂತಾ ಲಕ್ಕಪ್ಪ ಗುಡಿ (30) ಎಂದು ಗುರುತಿಸಲಾಗಿದೆ.
ಲಕ್ಕಪ್ಪ ಅವರು ತಮ್ಮ ಪತ್ನಿ ಶಾಂತಾ ಅವರನ್ನು ಸ್ಕ್ಯಾನಿಂಗ್‌ ಮಾಡಿಸಲು ಕೂಡಲಸಂಗಮದಿಂದ ಇಳಕಲ್‌ ನಗರಕ್ಕೆ, ಕರೆ ತರುತ್ತಿದ್ದರು. ಅವರು ಬೈಕ್‌ನ್ನು ದರ್ಶನ್‌ ಲಾಡ್ಜ್‌ ಬಳಿ ನಿಲ್ಲಿಸಿ ರಸ್ತೆ ದಾಟಲು ಮುಂದಾದರು. ಆಗ ಒಮ್ಮೆಗೇ ಒಂದು ಲಾರಿ ಬಂದು ಅವರಿಗೆ ಡಿಕ್ಕಿ ಹೊಡೆದಿದೆ. ಲಾರಿ ಡಿಕ್ಕಿ ಹೊಡೆದ ಹೊಡೆತಕ್ಕೆ ಗರ್ಭಿಣಿ ಶಾಂತಾ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ತೀವ್ರ ಗಾಯಗೊಂಡಿದ್ದ ಪತಿ ಲಕ್ಕಪ್ಪ ಅವರನ್ನೂ ಬಾಗಲಕೋಟೆ ಖಾಸಗಿ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ.
ಅಪಘಾತ ನಂತರ ಚಾಲಕ ಹಾಗೂ ನಿರ್ವಾಹಕ ಲಾರಿಯನ್ನು ಸ್ಥಳದಲ್ಲೇ ಬಿಟ್ಟು ಪರಾರಿ‌ಯಾಗಿದ್ದಾರೆ. ಇಳಕಲ್ಲ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಶಾಂತಾ ಅವರ ಹೊಟ್ಟೆಗೆ ಬಲವಾದ ಏಟು ಬಿದ್ದಿದ್ದು, ಮಗುವಿಗೂ ಅಪಾಯ ಸಂಭವಿಸಿದೆ.
ಬೆಂಗಳೂರು-ಮೈಸೂರು ಹೆದ್ದಾರಿಯಲ್ಲಿ ಭೀಕರ ಅಪಘಾತ ಜಸ್ಟ್ ಮಿಸ್
ಮಂಡ್ಯ: ಬೆಂಗಳೂರು-ಮೈಸೂರು ಹೆದ್ದಾರಿಯಲ್ಲಿ ಭೀಕರ ಅಪಘಾತವೊಂದು ಕೂದಲೆಳೆ ಅಂತರದಲ್ಲಿ ತಪ್ಪಿದೆ. ಚಲಿಸುತ್ತಿದ್ದ ಟಿಪ್ಪರ್ ಟೈರ್ ಬ್ಲಾಸ್ಟ್ ಆಗಿದ್ದರಿಂದ ಅದರ ಟಯರ್‌ ಹೋಗಿ ಹಿಂದಿನಿಂದ ಬರುತ್ತಿದ್ದ ಕಾರಿಗೆ ಬಡಿಯುವುದು ಇನ್ನೇನು ಸ್ವಲ್ಪದರಲ್ಲಿ ತಪ್ಪಿದೆ. ಹೀಗಾಗಿ ಅನಾಹುತ ಸಂಭವಿಸಿಲ್ಲ. ಅಪಘಾತ ತಪ್ಪಿದ ಭಯಾನಕ ದೃಶ್ಯ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಮಂಡ್ಯದ ಉಮ್ಮಡಹಳ್ಳಿ ಗೇಟ್ ಬಳಿ ದುರಂತ ಸಂಭವಿಸಿದ್ದು, ಕಾರಿನಲ್ಲಿದ್ದ ಪ್ರಯಾಣಿಕರು ಅದೃಷ್ಟವಶಾತ್ ಬಚಾವಾಗಿದ್ದಾರೆ.
ಟಿಪ್ಪರ್ ಕಲ್ಲಿನ ಪುಡಿ ತುಂಬಿಕೊಂಡು ವೇಗವಾಗಿ ಹೋಗುತ್ತಿತ್ತು. ಆಗ ಒಮ್ಮಿಂದೊಮ್ಮೆಗೇ ಟಯರ್‌ ಬ್ಲಾಸ್ಟ್ ಆಗಿದ್ದರಿಂದ ಟಯರ್‌ನ ಒಂದು ಭಾಗ ಕಿತ್ತು ಬಂದಿದೆ. ಅದು ಹಿಂದೆ ಬರುತ್ತಿದ್ದ ಕಾರಿಗೆ ಬಡಿಯುತ್ತಿದ್ದರೆ ದೊಡ್ಡ ಅನಾಹುತ ಸಂಭವಿಸುತ್ತಿತ್ತು. ಅದೃಷ್ಟವಶಾತ್ ಅದು ಕಾರಿನ ಹಿಂಭಾಗ ಹೋಗಿ ಬಿದ್ದಿದೆ. ವಾಹನ ಸಂಚಾರ ಹೆಚ್ಚಿದ್ದರೆ ಸರಣಿ ಅಪಘಾತವೇ ಸಂಭವಿಸುತ್ತಿತ್ತು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.
ಇದನ್ನೂ ಓದಿ: Road Accident : ಬೈಕ್‌ ಓವರ್‌ಟೇಕ್‌ ವೇಳೆ ಟೆಂಪೊ ಪಲ್ಟಿ; ಕ್ರೀಡಾಕೂಟಕ್ಕೆ ಹೋಗುತ್ತಿದ್ದ 25 ವಿದ್ಯಾರ್ಥಿಗಳಿಗೆ ಗಾಯ