ಶಿವಮೊಗ್ಗ: ಬಜರಂಗ ದಳ ಸಹ ಸಂಚಾಲಕ ಸುನಿಲ್ ನನ್ನನ್ನು ಪೀಡಿಸುತ್ತಿದ್ದ. ಈ ವಿಚಾರವನ್ನು ನಾನು ಅಣ್ಣನಿಗೆ ಹೇಳಿದ್ದೆ. ಹೀಗಾಗಿ ಅವನು ಸುನಿಲ್‌ನನ್ನು ಹೆದರಿಸಲು ಹೋಗಿರಬೇಕು: ಇದು ಸಮೀರ್ ಸೋದರಿ ನಭಾ ಶೇಖ್ (Shivamogga attack) ಹೇಳಿರುವ ಮಾತು.
ಸಾಗರದ ನೆಹರು ನಗರದಲ್ಲಿ ಸೋಮವಾರ ಬಜರಂಗ ದಳ ಸಹಸಂಚಾಲಕ ಸುನಿಲ್ ಎಂಬಾತನ ಮೇಲೆ ಸಮೀರ್ ಎಂಬಾತ ತಲವಾರು ಬೀಸಿದ್ದ. ಇದು ಸಾಗರದಲ್ಲಿ ಹಿಂದು-ಮುಸ್ಲಿಂ ಘರ್ಷಣೆಯ ವಿದ್ಯಮಾನ ಎಂದು ವ್ಯಾಖ್ಯಾನಿಸಲಾಗಿತ್ತು. ಅದರೆ, ಎಸ್‌ಪಿ ಮಿಥುನ್‌ ಕುಮಾರ್‌ ನೇತೃತ್ವದ ಪೊಲೀಸರ ತನಿಖೆ ವೇಳೆ ಬಯಲಾಗಿದ್ದೇ ಬೇರೆ.
ಸಮೀರ್‌ನ ಸೋದರಿಯನ್ನು ಸುನಿಲ್ ಚುಡಾಯಿಸುತ್ತಿದ್ದ. ಈಗಾಗಲೇ ಕೆಲವು ಬಾರಿ ಸಮೀರ್ ಹೀಗೆ ಮಾಡದಂತೆ ಸುನಿಲ್‌ಗೆ ಎಚ್ಚರಿಸಿದ್ದ. ಆದರೂ ಇದು ಮುಂದುವರಿದಿತ್ತು. ಈ ನಡುವೆ ಸೋಮವಾರ ಅವರಿಬ್ಬರು ಮುಖಾಮುಖಿಯಾದಾಗ ಹುಲ್ಲು ತರಲು ಹೊರಟಿದ್ದ ಸಮೀರ್ ಅದೇ ತಲವಾರು ಹಿಡಿದು ಹಲ್ಲೆಗೆ ಮುಂದಾಗಿದ್ದಾನೆ ಎಂದು ಅವರು ಎಸ್‌ಪಿ ತಿಳಿಸಿದ್ದರು.
ಈ ನಡುವೆ ವಿಸ್ತಾರ ನ್ಯೂಸ್‌ ಜತೆ ಮಾತನಾಡಿದ ಸಮೀರ್‌ನ ಸೋದರಿ ಸಭಾ ಶೇಖ್ ಸುನೀಲ್ ನನ್ನನ್ನು ಪೀಡಿಸುತ್ತಿದ್ದ ಎಂದಿದ್ದಾಳೆ.
ʻʻಸುನಿಲ್ ನನ್ನನ್ನು ಪೀಡಿಸುತ್ತಿದ್ದ. ಹಿಜಾಬ್ ತೆಗೆಯುವಂತೆ ಒತ್ತಾಯಿಸುತ್ತಿದ್ದ. ಕಳೆದ ವರ್ಷ ಹಿಜಾಬ್ ಗಲಾಟೆ ನಂತರ ಪೀಡನೆ ಹೆಚ್ಚಾಗಿತ್ತು. ನಾನು ಈ ವಿಷಯವನ್ನು ಅಣ್ಣನಿಗೆ ಹೇಳಿದ್ದೆʼʼ ಎಂದು ಸಭಾ ಶೇಖ್ ಹೇಳಿದ್ದಾರೆ.
ʻʻನನ್ನ ಅಣ್ಣ ಸಮೀರ್ ಯಾರನ್ನೂ ಹೊಡೆಯುವುದು, ಬಡಿಯುವುದು ಮಾಡಿದವನಲ್ಲ. ಆತ ಯಾವ ಸಂಘಟನೆಗೂ ಸೇರಿದವನಲ್ಲ. ಅವನ ವಿರುದ್ಧ ಇದುವರೆಗೂ ಯಾವುದೇ ಪ್ರಕರಣವಿಲ್ಲ. ಅವನು ನನ್ನ ವಿಚಾರಕ್ಕೆ ಸಂಬಂಧಿಸಿ ಸುನಿಲ್‌ನನ್ನು ಹೆದರಿಸಲು ಹೀಗೆ ಮಾಡಿರಬಹುದುʼʼ ಎಂದು ಸಭಾ ಶೇಖ್ ಹೇಳಿದ್ದಾರೆ.
ಎಸ್‌ಪಿ ಮಿಥುನ್‌ ಕುಮಾರ್‌ ಹೇಳಿದ್ದೇನು?
ಇದಕ್ಕಿಂತ ಮೊದಲು ಮಾಧ್ಯಮ ಗೋಷ್ಠಿಯಲ್ಲಿ ಮಾತನಾಡಿದ್ದ ಎಸ್‌ಪಿ ಮಿಥುನ್‌ ಕುಮಾರ್‌ ಘಟನೆಯ ಹಿನ್ನೆಲೆಯ ವಿವರ ನೀಡಿದರು.
ಸಾಗರದಲ್ಲಿ ನಡೆದಿರುವ ಘಟನೆ ವೈಯಕ್ತಿಕವಾದುದು. ಬಜರಂಗದಳದ ಸಹಸಂಚಾಲಕರಾಗಿರುವ ಸುನಿಲ್, ತನ್ನ ಸೋದರಿಯನ್ನು ಚುಡಾಯಿಸುತ್ತಿದ್ದ ಹಿನ್ನೆಲೆಯಲ್ಲಿ ಸಮೀರ್ ವೈಯಕ್ತಿಕ ದ್ವೇಷದಿಂದ ಈ ಕೃತ್ಯ ನಡೆಸಿದ್ದಾನೆ ಎಂದು ತಿಳಿಸಿದರು.
ಸುನಿಲ್ ಕಳೆದ ನಾಲ್ಕೈದು ತಿಂಗಳಿನಿಂದ ಚುಡಾಯಿಸುತ್ತಿದ್ದ. ಈ ವಿಷಯದಲ್ಲಿ ಸಮೀರ್ ಹಲವು ಬಾರಿ ಸುನಿಲ್‌ಗೆ ಎಚ್ಚರಿಕೆಯನ್ನೂ ನೀಡಿದ್ದ ಎನ್ನಲಾಗಿದೆ. ಇಷ್ಟಾಗಿಯೂ ಸುನಿಲ್, ಸಮೀರ್‌ನ ತಂಗಿಯ ಫೋನ್‌ ಕೂಡಾ ನಂಬರ್‌ ಕೂಡಾ ಕೇಳಿದ್ದ ಎನ್ನಲಾಗಿದೆ. ಹೀಗಾಗಿ ಸಮೀರ್, ಸುನಿಲ್ ವಿರುದ್ಧ ಸಿಕ್ಕಾಪಟ್ಟೆ ಸಿಟ್ಟಾಗಿದ್ದ ಎಂದು ಎಸ್‌ಪಿ ವಿವರಿಸಿದ್ದಾರೆ.
ʻʻಎರಡ್ಮೂರು ಬಾರಿ ಸಮೀರ್ ಸುನಿಲ್‌ಗೆ ಎಚ್ಚರಿಕೆ ನೀಡಿದ್ದ. ತಂಗಿಯ ವಿಷಯಕ್ಕೆ ಬರಬೇಡ ಎಂದು ಹೇಳಿದ್ದಾನೆ. ಆದರೆ, ಸುನಿಲ್ ಮತ್ತೆ ಮತ್ತೆ ತನ್ನ ಚಾಳಿ ಮುಂದುವರಿಸಿದ್ದ. ಸೋಮವಾರ ಸಮೀರ್ ಮೇಕೆಗೆ ಹುಲ್ಲು ತರಲೆಂದು ಹೊರಟಿದ್ದ. ಈ ಸಂದರ್ಭದಲ್ಲಿ ಸುನಿಲ್ ದ್ವಿಚಕ್ರ ವಾಹನದಲ್ಲಿ ಬಂದಿದ್ದ. ಆಗ ಹುಲ್ಲು ಕೊಯ್ಯಲೆಂದು ಹಿಡಿದಿದ್ದ ಕತ್ತಿಯನ್ನೇ ಹಿಡಿದು ಆತನ ಕಡೆಗೆ ಧಾವಿಸಿದ್ದ. ಈ ನಡುವೆ ಅವರಿಬ್ಬರು ಬೈದಾಡಿಕೊಂಡಿದ್ದಾರೆʼʼ ಎಂದು ಪೊಲೀಸರು ತಿಳಿಸಿದರು.
ಇದನ್ನೂ ಓದಿ | Shivamogga attack | ಸುನಿಲ್ ಕೊಲೆ ಯತ್ನಕ್ಕೆ ಟ್ವಿಸ್ಟ್‌: ಸಮೀರ್‌ನ ಸೋದರಿಯನ್ನು ಚುಡಾಯಿಸಿದ್ದೇ ಕಾರಣ ಎಂದ ಎಸ್‌ಪಿ