ಶಿವಮೊಗ್ಗ: ಹಣ-ಆಸ್ತಿ ವಿಚಾರ ಬಂದರೆ ಬಂಧುಗಳು ಶತ್ರುಗಳಾಗಿ ಬಿಡುತ್ತಾರೆ. ಸದ್ಯ ಆಸ್ತಿ ವಿಚಾರಕ್ಕೆ ಸಹೋದರರಿಬ್ಬರು ವ್ಯಕ್ತಿಯನ್ನು ಬರ್ಬರವಾಗಿ ಹತ್ಯೆ (Murder Case) ಮಾಡಿದ್ದಾರೆ. ನಡುರಸ್ತೆಯಲ್ಲೇ ವ್ಯಕ್ತಿಗೆ ಮನಬಂದಂತೆ ಥಳಿಸಿ ರಸ್ತೆ ಬದಿಗೆ ಬಿಸಾಡಿ, ನಂತರ ಆತನ ಮೇಲೆ ಕಾರು ಹತ್ತಿಸಿ ಕೊಂದಿದ್ದಾರೆ. ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲೂಕಿನ ಚಿಪ್ಪಳ್ಳಿ ಬಳಿ ಕಳೆದ ಫೆ.29ರ ಸಂಜೆ ಈ ಘಟನೆ ನಡೆದಿತ್ತು.
ಆಸ್ತಿ ವಿಚಾರಕ್ಕೆ ಸಮೀರ್, ಇದಾಯತ್ ಎಂಬ ಸಹೋದರರು ಸೇರಿ ರಫೀಕ್ (45) ಎಂಬಾತನ ಮೇಲೆ ಕಾರು ಹತ್ತಿಸಿ ಕೊಂದಿದ್ದರು. ಜನರು ಓಡಾಡುವ ಸಮಯದಲ್ಲೇ ರಫೀಕ್‌ನನ್ನು ಹಿಡಿದು ಪ್ರಾಣಹೋಗುವಂತೆ ಥಳಿಸಿದ್ದರು. ಗಲಾಟೆ ನಂತರ ಕಾರಲ್ಲಿ ಕುಳಿತ ಸಮೀರ್, ಇದಾಯತ್ ರಸ್ತೆ ಬದಿಯಲ್ಲಿದ್ದ ರಫೀಕ್ ಮೇಲೆ ಕಾರು ಹತ್ತಿಸಿದ್ದರು. ಕಾರು ಹತ್ತಿಸಿ ಕೊಲ್ಲುವ ದೃಶ್ಯವನ್ನು ಅಲ್ಲಿದ್ದ ಇತರೆ ವಾಹನ ಸವಾರರು ವಿಡಿಯೊ ಮಾಡಿಕೊಂಡಿದ್ದರು.
ಗಂಭೀರವಾಗಿ ಗಾಯಗೊಂಡಿದ್ದ ರಫೀಕ್ ಸ್ಥಳದಲ್ಲೇ ಮೃತಪಟ್ಟಿದ್ದ. ಸ್ಥಳೀಯರ ಮಾಹಿತಿ ಮೇರೆಗೆ ಸ್ಥಳಕ್ಕಾಗಮಿಸಿದ್ದ ಪೊಲೀಸರು ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಿದ್ದರು, ಈ ಸಂಬಂಧ ಆನಂದಪುರ ಪೊಲೀಸರು ಪ್ರಕರಣವನ್ನು ದಾಖಲಿಸಿಕೊಂಡು ತನಿಖೆಯನ್ನು ನಡೆಸಿದ್ದರು.
ಬಟ್ಟೆ ಬದಲಿಸಿಕೊಂಡು ಎಸ್ಕೇಪ್‌
ಇನ್ನೂ ರಫೀಕ್‌ನನ್ನು ಹತ್ಯೆ ಮಾಡಿದ ಆರೋಪಿಗಳು, ಮುರುಘಾ ಮಠದ ಆವರಣಕ್ಕೆ ಬಂದಿದ್ದರು. ಪೊಲೀಸರಿಗೆ ಯಾವ ಸಾಕ್ಷಿಯು ಸಿಗಬಾರೆಂದು ಸಾಗರ ತಾಲೂಕಿನ ಆನಂದಪುರದಲ್ಲಿರುವ ಮುರುಘಾ ಮಠದ ಆವರಣದಲ್ಲಿ ಬಟ್ಟೆ ಬದಲಿಸಿಕೊಂಡಿದ್ದರು. ಆದರೆ ಬಟ್ಟೆ ಬದಲಿಸಿಕೊಂಡ ದೃಶ್ಯವೆಲ್ಲವೂ ಸಿಸಿ ಕ್ಯಾಮೆರಾದಲ್ಲಿ ಸೆರೆಯಾಗಿತ್ತು. ಘಟನೆ ನಂತರ ಆರೋಪಿಗಳು ಪರಾರಿ ಆಗಿದ್ದರು. ನಂತರ ತನಿಖೆಗಿಳೀದ ಪೊಲೀಸರು ಆರೋಪಿಗಳನ್ನು ಬಂಧಿಸಿ ತನಿಖೆಗೆ ಒಳಪಡಿಸಿದಾಗ, ಇದು ಕುಟುಂಬದವರೇ ಆಸ್ತಿಗಾಗಿ ಮಾಡಿದ ಕೊಲೆ ಎಂದು ತಿಳಿದು ಬಂದಿದೆ.
ಇದನ್ನೂ ಓದಿ:Blackmail Case : ಮಹಿಳೆಗೆ ನಗ್ನ ಫೋಟೊ ಕಳಿಸಿ ಹಣ ದೋಚಿದ ಇನ್ಸ್ಟಾಗ್ರಾಮ್‌ ಗೆಳೆಯ!
ತಂಗಿಯನ್ನು ಪ್ರೀತಿಸುತ್ತಿದ್ದ ಯುವಕನಿಗೆ ಚಾಕು ಹಾಕಿದ ಅಣ್ಣ
ಶಿವಮೊಗ್ಗ : ತಂಗಿಯನ್ನು ಪ್ರೀತಿಸುತ್ತಿದ್ದ ಎಂಬ (Love Case) ಕಾರಣಕ್ಕೆ ಅಣ್ಣನೊಬ್ಬ ಯುವಕನಿಗೆ ಚಾಕು ಇರಿದಿದ್ದಾನೆ. ಶಿವಮೊಗ್ಗ ಜಿಲ್ಲೆಯ (Shivamogga News) ಶಿಕಾರಿಪುರ ತಾಲೂಕಿನ ಶಿರಾಳಕೊಪ್ಪದಲ್ಲಿ ಈ ಘಟನೆ ನಡೆದಿದೆ. ಸಲ್ಮಾನ ಅಲಿಯಾಸ್‌ ಗೂಡು (24) ಚಾಕು ಇರಿತಕ್ಕೊಳಗಾದವನು.
ನಿನ್ನೆ ಗುರುವಾರ ತಡರಾತ್ರಿ ಶಿರಾಳಕೊಪ್ಪದಲ್ಲಿ ಘಟನೆ ನಡೆದಿದ್ದು, ಪ್ರಕರಣ ಸಂಬಂಧ ಪೊಲೀಸರು ಆರೋಪಿಯನ್ನು ವಶಕ್ಕೆ ಪಡೆದಿದ್ದಾರೆ. ಸಲ್ಮಾನ್‌ ಯುವತಿಯೊಬ್ಬಳನ್ನು ಪ್ರೀತಿಸುತ್ತಿದ್ದ. ಆದರೆ ಇದು ಯುವತಿ ಅಣ್ಣನಿಗೆ ಇಷ್ಟವಿರಲಿಲ್ಲ ಎನ್ನಲಾಗಿದೆ. ಇದರಿಂದಲೇ ಸಿಟ್ಟಾದ ಯುವತಿ ಅಣ್ಣ, ರಾತ್ರಿ ವೇಳೆ ಸಲ್ಮಾನ್‌ನನ್ನು ಮಾತಾಡಿಸುವ ನೆಪದಲ್ಲಿ ಚಾಕುವಿನಿಂದ ಇರಿದಿದ್ದಾನೆ.
ತೀವ್ರ ರಕ್ತಸ್ರಾವವಾಗಿದ್ದ ಸಲ್ಮಾನ್‌ನನ್ನು ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಆರೋಪಿಯನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಲಾಗುತ್ತಿದ್ದು, ಶಿರಾಳಕೊಪ್ಪ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ