ವಿಜಯಪುರ: ವಿಜಯನಗರದಲ್ಲಿ ನಡೆದ ಹೇಯ ಕೃತ್ಯವೊಂದರಲ್ಲಿ, ವೃದ್ಧೆಯೊಬ್ಬರನ್ನು ಇಬ್ಬರು ಪಾತಕಿಗಳು ಮನೆಗೆ ಕರೆದೊಯ್ಯುವುದಾಗಿ ನಂಬಿಸಿ ಕರೆದೊಯ್ದು ಅತ್ಯಾಚಾರ ಎಸಗಿದ್ದಾರೆ.
ರಾತ್ರಿ ಆಟೋ ಹತ್ತಿದ 60ರ ಒಬ್ಬಂಟಿ ವೃದ್ಧೆಯ ಮೇಲೆ ಇಬ್ಬರು ಕಾಮುಕರು ಈ ಹೀನ ಕೃತ್ಯ ಎಸಗಿದ್ದಾರೆ. ವಿಜಯಪುರ ನಗರದ ಜಂಡಾಕಟ್ಟಿ ನಿವಾಸಿ ಸದ್ದಾಂ ಶೇಖ್ ಹಾಗೂ ಬಸವ ನಗರ ನಿವಾಸಿ ರವಿ ಎಂಬವರೇ ಈ ಪಾತಕಿಗಳು. ಮನೆಗೆ ಹೋಗಬೇಕು ಎಂದು ವಿಜಯಪುರ ನಗರದ ವಾಟರ್ ಟ್ಯಾಂಕ್ ಬಳಿ ಮಹಿಳೆ ನಿಂತಿದ್ದರು. ಅಷ್ಟರಲ್ಲಿ ಆಟೋವೊಂದರಲ್ಲಿ ಅಲ್ಲಿಗೆ ಬಂದ ಇಬ್ಬರು ಚಾಲಕರು, ಆಕೆಯನ್ನು ಮನೆಗೆ ಕರೆದೊಯ್ಯುವುದಾಗಿ ನಂಬಿಸಿ ಆಟೋದಲ್ಲಿ ಕೂರಿಸಿಕೊಂಡು ನಿರ್ಜನ ಪ್ರದೇಶಕ್ಕೆ ಒಯ್ದು ಅತ್ಯಾಚಾರವೆಸಗಿದ್ದಾರೆ.
ಫೆಬ್ರವರಿ 23ರ ರಾತ್ರಿ 9.30ರ ವೇಳೆಗೆ ಈ ಕೃತ್ಯ ನಡೆದಿದೆ. ರಾತ್ರಿ 10ರಿಂದ 11ರ ವರೆಗೆ ಅತ್ಯಾಚಾರ ಎಸಗಿ ವೃದ್ಧೆಯನ್ನು ಅಲ್ಲಿಯೇ ಬಿಟ್ಟು ಆರೋಪಿಗಳು ಪರಾರಿಯಾಗಿದ್ದರು. ವೃದ್ಧೆ ನರಳಾಡುವುದನ್ನು ಕಂಡು ಸ್ಥಳೀಯರು 112ಕ್ಕೆ ಕರೆಮಾಡಿ ಪೊಲೀಸರಿಗೆ ವಿಷಯ ಮುಟ್ಟಿಸಿದ್ದರು. ಸ್ಥಳಕ್ಕೆ ಹೋದ ಪೊಲೀಸರು ವೃದ್ಧೆಯನ್ನು ರಕ್ಷಿಸಿ ವಿಜಯಪುರ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ವೃದ್ಧೆ ನೀಡಿದ ಮಾಹಿತಿ ಹಾಗೂ ಮೊಬೈಲ್ ಟವರ್ ಲೊಕೇಷನ್ ಆಧರಿಸಿ ವಿಜಯಪುರ ಮಹಿಳಾ ಠಾಣೆ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದು, ತನಿಖೆ ನಡೆಸುತ್ತಿದ್ದಾರೆ.
ಇದನ್ನೂ ಓದಿ: Anbu Jothi Ashram : ಆಶ್ರಮದಲ್ಲಿರುವವರ ಮೇಲೆ ಅತ್ಯಾಚಾರ, ಹಿಂಸಾಚಾರ! ಇದು ಆಶ್ರಮವಲ್ಲ, ನರಕದ ಕಥೆ