ಬೆಂಗಳೂರು: ಈಗಿನ ಕೆಲವು ಯುವಜನರು ಬಾಯಿಯಲ್ಲಿ ಮಾತನಾಡುವುದಕ್ಕಿಂತ ಸನ್ನೆ ಭಾಷೆಯಲ್ಲೇ ಹೆಚ್ಚು ಮಾತನಾಡುತ್ತಾರೆ. ಹೀಗೆ ಕೈ ಭಾಷೆಯಲ್ಲಿ ಮಾತನಾಡಲು ಹೋದ ಯುವಕನೊಬ್ಬ ಚೆನ್ನಾಗಿ ಹೊಡೆತ ತಿಂದಿದ್ದಾನೆ.
ಘಟನೆ ನಡೆದಿರುವುದು ಯಲಹಂಕದಲ್ಲಿ. ಬಿಎಂಟಿಸಿ ಬಸ್‌ನ್ನು ಓವರ್‌ಟೇಕ್‌ ಮಾಡಿದ ಯುವಕನೊಬ್ಬ ಡ್ರೈವರ್‌ ಕಡೆಗೆ ನೋಡಿ ಮಧ್ಯದ ಬೆರಳು ತೋರಿಸಿದ್ದಾನೆ. ಮಧ್ಯದ ಬೆರಳು ತೋರಿಸುವುದು ಅಶ್ಲೀಲ ಸಂಜ್ಞೆ. ಇದನ್ನು ಕಂಡ ಬಿಎಂಟಿಸಿ ಬಸ್‌ ಡ್ರೈವರ್‌ನ ಸಿಟ್ಟು ನೆತ್ತಿಗೇರಿದೆ. ಆತ ಬೈಕನ್ನು ಬೆನ್ನಟ್ಟಿ ಅಡ್ಡಗಟ್ಟಿದ್ದಾನೆ. ಆಗ ಯುವಕನಿಗೂ ಸಿಟ್ಟು ಬಂದು ಆತ ನೇರವಾಗಿ ಬಸ್‌ನೊಳಗೆ ಹೊಕ್ಕಿದ್ದಾನೆ.
ಈ ಹಂತದಲ್ಲಿ ಚಾಲಕ ಆ ಸವಾರನನ್ನು ಹಿಡಿದು ಬಾರಿಸಿದ ಸಿನಿಮೀಯ ಸ್ಟೈಲಿಗೆ ಬಸ್ಸಿನಲ್ಲಿದ್ದವರೆಲ್ಲ ಬೆಚ್ಚಿ ಬಿದ್ದಿದ್ದಾರೆ. ಕೆಲವರಂತೂ ಕೂಗಾಡಿದ್ದಾರೆ. ಬಿಟ್ಟರೆ ಈ ಮನುಷ್ಯ ಇಲ್ಲೇ ಹೂತು ಹಾಕಿ ಬಿಡುತ್ತಾನೆ ಅನ್ನೋ ರೇಂಜಿಗಿತ್ತು ಹೊಡೆತ. ಇನ್ನು ಧಿಮಾಕಿನಿಂದ ಬಂದಿದ್ದ ಬೈಕ್ ಸವಾರನಂತೂ ಯಾಕಪ್ಪಾ ಕೈ ತೋರಿಸಿದೆ, ಒಮ್ಮೆ ಈತನ ಕೈಯಿಂದ ಬಿಡಿಸಿಕೊಂಡರೆ ಸಾಕು ಎನ್ನುವ ಹಾಗೆ ಒದ್ದಾಡುತ್ತಿದ್ದ. ಅಂತೂ ಕೊನೆಗೆ ಯಾರೂ ಬಂದು ಅವರಿಬ್ಬರನ್ನು ಬಿಡಿಸಿದರು.
ಬಸ್‌ನಲ್ಲಿ ಹಲ್ಲೆ ನಡೆಸಿದ್ದ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಘಟನೆ ಬಳಿಕ ಬಿಎಂಟಿಸಿಯ ಹಿರಿಯ ಅಧಿಕಾರಿಗಳು ಚಾಲಕನನ್ನು ಅಮಾನತು ಮಾಡಿದ್ದಾರೆ ಎಂದು ತಿಳಿದುಬಂದಿದೆ.
ಇದನ್ನೂ ಓದಿ | Aindrila Sharma | ನಟಿ ಐಂದ್ರಿಲಾ ಕಾಲಿಗೆ ಮುತ್ತಿಟ್ಟು ಅಂತಿಮ ವಿದಾಯ ಹೇಳಿದ ಬಾಯ್‌ಫ್ರೆಂಡ್‌: ವಿಡಿಯೊ ವೈರಲ್