ಯಾದಗಿರಿ: ತನ್ನ ಹಾಗೂ ಪತ್ನಿಯ ನಡುವಿನ ಜಗಳವನ್ನು ಬಗೆಹರಿಸಲು ಸಂಬಂಧಿಕರನ್ನು ಮನೆಗೆ ಕರೆಸಿ ನಾಲ್ವರಿಗೆ ಬೆಂಕಿ ಹಚ್ಚಿರುವ ದುರಂತ ಘಟನೆಯಲ್ಲಿ ಈಗ ಮತ್ತಿಬ್ಬರು ಮೃತಪಟ್ಟಿದ್ದಾರೆ. ಇದರಿಂದ ಘಟನೆಯಲ್ಲಿ ಗಾಯಗೊಂಡಿದ್ದ ನಾಲ್ವರೂ ಮೃತಪಟ್ಟಂತಾಗಿದೆ.
ಪತಿ ಹಾಗೂ ಪತ್ನಿ ನಡುವಿನ ಜಗಳವನ್ನು ಸರಿಪಡಿಸಿ ಸಂಸಾರವನ್ನು ಒಂದುಮಾಡಬೇಕೆಂದು ಸಂಬಂಧಿಕರು ಬಂದಿದ್ದರು. ಮನೆಗೆ ಬಂದ ಸಂಬಂಧಿಕರ ಜತೆ ಕೆಲಹೊತ್ತು ಮಾತನಾಡಿದ ಶರಣಪ್ಪ, ಇದ್ದಕ್ಕಿದ್ದಂತೆ ನಾಲ್ವರನ್ನೂ ಮನೆಯಲ್ಲಿ ಕೂಡಿ ಹಾಕಿದ. 5 ಲೀಟರ್‌ ಪೆಟ್ರೋಲ್ ಸುರಿದು ನಾಲ್ವರಿಗೆ ಬೆಂಕಿ ಹಚ್ಚಿದ್ದ.
ಈ ದುರಂತದಲ್ಲಿ ಒಬ್ಬ ವ್ಯಕ್ತಿ ಸ್ಥಳದಲ್ಲೇ ಮೃತಪಟ್ಟಿದ್ದರು. ಉಳಿದ ಮೂವರನ್ನು ಸ್ಥಳಕ್ಕೆ ಆಗಮಿಸಿದ ಸ್ಥಳೀಯರು ಕೂಡಲೇ ಆಸ್ಪತ್ರಗೆ ದಾಖಲಿಸಿದ್ದರು. ಈ ವೇಳೆಗಾಗಲೆ ನಾಗೇಶ್‌ ಚೆನ್ನಪ್ಪ(35) ಎಂಬುವರು ಮೃತಪಟ್ಟಿದ್ದರು. ನಂತರ ಬುಧವಾರ ರಾತ್ರಿ ಸಿದ್ದರಾಮಪ್ಪ ಹಾಗೂ ಗುರುವಾರ(ಜೂನ್‌ 30) ಬೆಳಗ್ಗೆ ಮುತ್ತಪ್ಪ ಚಿಕಿತ್ಸೆ ಫಲಿಸದೆ ಮೃತಪಟ್ಟಿದ್ದಾರೆ.
ಹುಣಸಗಿ ತಾಲೂಕಿನ ನಾರಾಯಣಪುರದಲ್ಲಿ ಈ ದುರಂತ ಘಟನೆ ನಡೆದಿದ್ದು, ಆರೋಪಿ ಶರಣಪ್ಪನನ್ನ ಪೊಲೀಸರು ಬಂಧಿಸಿದ್ದಾರೆ.
ಇದನ್ನೂ ಓದಿ: ಜಗಳ ಬಿಡಿಸಿ ಎಂದು ಕರೆದು ನಾಲ್ವರಿಗೆ ಬೆಂಕಿ ಇಟ್ಟ: ಇಬ್ಬರ ಸಾವು, ಮತ್ತಿಬ್ಬರು ಗಂಭೀರ