ಶಿವಮೊಗ್ಗ: ಹಣದ ವಿಚಾರಕ್ಕೆ ವಿವಾಹಿತ ಯುವಕನನ್ನು ಆತನ ಪತ್ನಿ ಎದುರೇ ಚೂರಿಯಿಂದ ಇರಿದು ಕೊಲೆ ಮಾಡಿದ ಘಟನೆ (Stabbing Case) ಜಿಲ್ಲೆಯ ಭದ್ರಾವತಿ ಪಟ್ಟಣದಲ್ಲಿ ಮಂಗಳವಾರ ಸಂಜೆ ನಡೆದಿದೆ. ಕೇಳಿದಷ್ಟು ಬಾಡಿಗೆ ಕೊಡಲಿಲ್ಲ ಎಂದು ಆಟೋ ಚಾಲಕನೊಬ್ಬ ಕೃತ್ಯ ಎಸಗಿದ್ದಾನೆ.
ಭದ್ರಾವತಿಯ ದೊಡ್ಡೇರಿ ನಿವಾಸಿ ಮೂಲತಃ ಬೆಂಗಳೂರಿನ ನರೇಂದ್ರ (30) ಮೃತ ವ್ಯಕ್ತಿ. ಈತ ಎಮ್ಮೆದೊಡ್ಡಿ ಲೇಪಾಕ್ಷಿಯವರ ತೋಟದಲ್ಲಿ ಕೆಲಸ ಮಾಡುತ್ತಿದ್ದ. ಆರೋಪಿ ಆಟೋ ಚಾಲಕ, ಸಿದ್ದಾಪುರ ತಾಂಡಾದ ಸುನೀಲ್ (30) ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ.
ಭದ್ರಾವತಿಯ ರೈಲ್ವೆ ಸ್ಟೇಷನ್ ಬಳಿ ದೊಡ್ಡೇರಿಗೆ ಹೋಗಲು ನರೇಂದ್ರ ಮತ್ತು ಆತನ ಪತ್ನಿ ಶಿಲ್ಪಾ 80 ರೂ. ಬಾಡಿಗೆಗೆ ಆಟೋ ಹತ್ತಿದ್ದರು. ದಾರಿ ಮಧ್ಯದಲ್ಲಿ ಬಟ್ಟೆ ಖರೀದಿಗೆ ಬಟ್ಟೆ ಅಂಗಡಿಗೆ ತೆರಳಿದ್ದರು. ಅಂಗಡಿ ಬಳಿ ತೆರಳಿದ ಆಟೋ ಚಾಲಕ ಸುನೀಲ, ನರೇಂದ್ರನಿಗೆ ಮದ್ಯ ಕುಡಿಯಲು 90 ರೂ. ಕೇಳಿದ್ದಾನೆ. ಅಷ್ಟೆ ಅಲ್ವಾ ಎಂದು ನರೇದ್ರ ಕರೆದುಕೊಂಡು ಹೋಗಿದ್ದಾನೆ. ಆಮೇಲೆ ಬಟ್ಟೆ ಅಂಗಡಿ ಬಳಿ ಬಂದ ಆಟೋ ಚಾಲಕ ದೊಡ್ಡೇರಿಗೆ ಹೋಗಲು ಇದ್ದಕ್ಕಿದ್ದಂತೆ 800 ರೂ. ಕೇಳಿದ್ದಾನೆ.
ಇದನ್ನೂ ಓದಿ | Viral Video : ಮಗಳನ್ನು ಹೆಗಲ ಮೇಲೆ ಹೊತ್ತೊಯ್ಯುತ್ತಿದ್ದ ತಂದೆಗೇ ಗುಂಡಿಟ್ಟ ದುಷ್ಕರ್ಮಿಗಳು!
ಅಷ್ಟು ಹಣ ಯಾಕೆ ಕೊಡಬೇಕು ಎಂದು ನರೇಂದ್ರ ಮತ್ತು ಪತ್ನಿ ಶಿಲ್ಪಾ ಆಟೋ ಇಳಿದು ಹೋಗಿದ್ದಾರೆ. ಅಷ್ಟಕ್ಕೆ ಕುಪಿತಗೊಂಡ ಆಟೋ ಚಾಲಕ ನೀವು ಭದ್ರಾವತಿ ಬಿಟ್ಟು ಹೇಗೆ ಹೋಗುತ್ತಿರಾ ಎಂದು ಗದರಿಸಿದ್ದಾನೆ. ತನ್ನೊಡನೆ ನಾಲ್ಕು ಜನ ಯುವಕರನ್ನು ಕರೆದುಕೊಂಡು ಬಂದು ಹಳೇ ಸೇತುವೆ ಮೇಲೆ ಹರಿತವಾದ ಆಯುಧದಿಂದ ಮನಸೋ ಇಚ್ಛೆ ಚುಚ್ಚಿದ್ದಾನೆ ಎಂದು ಮೃತ ಯುವಕನ ಪತ್ನಿ ಶಿಲ್ಪಾ ಹೇಳಿದ್ದಾರೆ. ಗಾಯಾಳು ನರೇಂದ್ರನನ್ನು ಶಿವಮೊಗ್ಗದ ಮೆಗ್ಗಾನ್ ಆಸ್ಪತ್ರೆಗೆ ತರುವಷ್ಟರಲ್ಲಿ ಕೊನೆಯುಸಿರೆಳೆದಿದ್ದಾನೆ. ಮೃತ ನರೇಂದ್ರಗೆ ಇಬ್ಬರು ಪುಟ್ಟ ಹೆಣ್ಣು ಮಕ್ಕಳಿದ್ದಾರೆ. ಹಳೇ ಪೇಟೆ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.
ಕಾರಿನ ಚಕ್ರದಡಿ ಸಿಲುಕಿದ್ದರೂ ನಿಲ್ಲಿಸದೆ 100 ಅಡಿ ದೂರ ಎಳೆದೊಯ್ದ ಕ್ರೂರಿ
ಚಿಕ್ಕಮಗಳೂರು : ಚಿಕ್ಕಮಗಳೂರು ನಗರದ ಬೈಪಾಸ್ ರಸ್ತೆಯ ರಾಷ್ಟ್ರೀಯ ಹೆದ್ದಾರಿ 173 ರಲ್ಲಿ ಭೀಕರ ರಸ್ತೆ ಅಪಘಾತ (Road Accident) ನಡೆದಿದ್ದು, ಸಿಸಿ ಕ್ಯಾಮೆರಾದಲ್ಲಿ (CCtv Footage) ಸೆರೆಯಾಗಿದೆ. ಕಾರೊಂದು ಬೈಕ್‌ಗೆ ಡಿಕ್ಕಿ ಹೊಡೆದು ಸವಾರನನ್ನು 100 ಅಡಿ ದೂರ ಎಳೆದೊಯ್ದಿರುವ (Hit And Run Case) ಘಟನೆ ನಡೆದಿದೆ.
ಹಿಂದಿನಿಂದ ಅತಿ ವೇಗದಲ್ಲಿ ಬಂದ ಕಾರು ಬೈಕ್‌ಗೆ ಡಿಕ್ಕಿ ಹೊಡೆದಿದೆ. ಗುದ್ದಿದ ರಭಸಕ್ಕೆ ಬೈಕ್‌ನಲ್ಲಿ ಬೆಂಕಿ ಹತ್ತಿಕೊಂಡಿದೆ. ಆದರೂ ಬಿಡದೆ ಮಾರು ದೂರ ಎಳೆದೊಯ್ದು ಕ್ರೌರ್ಯ ಮೆರೆದಿದ್ದಾನೆ.
ಇದನ್ನೂ ಓದಿ: Independence Day 2023 : ವೇದಿಕೆಯಲ್ಲಿ ಕುಸಿದ ಸಚಿವ ಮಹದೇವಪ್ಪ; ತಲೆಸುತ್ತಿ ಬಿದ್ದ ಮಹಿಳಾ ಪಿಎಸ್‌ಐ
ಸೋಮವಾರ ರಾತ್ರಿ 10 ಗಂಟೆ ಸುಮಾರಿಗೆ ಘಟನೆ ನಡೆದಿದ್ದು, ಬೈಕ್ ಸವಾರ ಪವಾಡದ ರೀತಿಯಲ್ಲಿ ಪಾರಾಗಿದ್ದಾನೆ. ರಸ್ತೆಯಲ್ಲಿ ಉಜ್ಜಿಕೊಂಡು ಹೋದರು ಪುನಃ ರಿವರ್ಸ್‌ ಬಂದು ಕಾರು ಚಾಲಕ ಪರಾರಿ ಆಗಿದ್ದಾನೆ. ರಸ್ತೆ ಬದಿ ನಿಂತಿದ್ದ ಜನರು ಅಟ್ಟಾಡಿಸಿಕೊಂಡು ಹೋಗುತ್ತಿರುವ ದೃಶ್ಯ ಸೆರೆಯಾಗಿದೆ. ಗಾಯಾಳು ಬೈಕ್ ಸವಾರರನ್ನು ಸ್ಥಳೀಯರು ಆಸ್ಪತ್ರೆಗೆ ದಾಖಲು ಮಾಡಿದ್ದಾರೆ.