ಸೋಶಿಯಲ್ ಮೀಡಿಯಾದಲ್ಲಿ ಆಗಾಗ ಯಾವುದ್ಯಾವುದೋ ವಿಡಿಯೊಗಳು ಪೋಸ್ಟ್ ಆಗುತ್ತಿದ್ದು, ಒಂದೊಂದು ವಿಡಿಯೊ ವೀಕ್ಷಕರಿಗೆ ಬಹಳಷ್ಟು ಮನೋರಂಜನೆಯನ್ನು ನೀಡುತ್ತದೆ. ಇದೀಗ ವಧು ವರರ ವಿಡಿಯೊವೊಂದು ಇನ್ ಸ್ಟಾಗ್ರಾಂನಲ್ಲಿ ಹರಿದಾಡುತ್ತಿದ್ದು, ಸಖತ್ ವೈರಲ್(Viral video) ಆಗಿದೆ. ಮದುವೆ ಎನ್ನುವುದು ಒಂದು ಸಿಹಿ ಗಳಿಗೆ ಆದರೆ ಇಲ್ಲೊಬ್ಬ ವರನಿಗೆ ಮಾತ್ರ ಮದುಮೆ ದಿನವೇ ಕಪಾಳಮೋಕ್ಷವಾಗಿದೆ.
ಮದುವೆ ಎನ್ನುವುದು ಒಂದು ಶುಭ ದಿನ. ಈ ದಿನ ವಧು ವರರಿಗೆ ಮರೆಯಲಾಗದ ಸುದಿನ. ಹಾಗಾಗಿ ಈ ದಿನವನ್ನು ಸಂಭ್ರಮಿಸಲು ವಧುವರರಿಂದ ಹಲವಾರು ಆಚರಣೆಗಳನ್ನು ಮಾಡಲಾಗುತ್ತದೆ. ಅದರಲ್ಲಿ ವಧು-ವರರು ಒಬ್ಬರಿಗೊಬ್ಬರು ಸಿಹಿ ತಿನ್ನಿಸುವ ಆಚರಣೆ ಕೂಡ ಇದೆ. ಇದೀಗ ಈ ಸಿಹಿ ತಿನ್ನಿಸುವ ವೇಳೆ ವಧು ವರರ ನಡುವೆ ಜಗಳವೊಂದು ನಡೆದಿದೆ..
ಸಿಹಿ ತಿನ್ನಿಸುವಾಗ ವಧು ವರನಿಗೆ ಕಪಾಳ ಮೋಕ್ಷ ಮಾಡಿರುವ ವಿಡಿಯೊ ಇನ್ ಸ್ಟಾಗ್ರಾಂನಲ್ಲಿ ವೈರಲ್ ಆಗಿದೆ. ಈ ವಿಡಿಯೊದಲ್ಲಿ ವರನೊಬ್ಬ ವಧುವಿನ ಮೇಲೆ ಯಾವುದೋ ವಿಚಾರಕ್ಕೆ ಕೋಪಗೊಂಡಿರುವ ಕಾರಣ ಸಿಹಿ ತಿನ್ನಿಸುವಾಗ ಬಲವಂತವಾಗಿ ಆಕೆಯ ಬಾಯಿಗೆ ತುಂಬಿದ್ದಾನೆ. ಆ ವೇಳೆ ವರನ ಈ ನಡವಳಿಕೆಯನ್ನು ಸಹಿಸದ ವಧು ಆತನ ಕಪಾಳಕ್ಕೆ ಮೂರು ಬಾರಿ ಹೊಡೆದಿದ್ದಾಳೆ. ಮತ್ತು ಆತ ತಿನ್ನಿಸಿದ ಸಿಹಿತಿಂಡಿಯನ್ನು ಉಗಿದಿದ್ದಾಳೆ.
ಮದುವೆಯ ಸಂಭ್ರಮದ ನಡುವೆ ವಧು ವರರ ಈ ಗಲಾಟೆ ಕಂಡು ಅಕ್ಕಪಕ್ಕ ನಿಂತಿದ್ದ ಬಂಧುಗಳು ಗಾಬರಿಯಾಗಿದ್ದಾರೆ. ಹಾಗೂ ವರ ತನ್ನ ಪತ್ನಿಯ ಮುಖ ನೋಡುತ್ತಾ ನಿಂತಿರುವಾಗ ಈ ವಿಡಿಯೊ ಮುಗಿದಿದೆ. ಈ ಘಟನೆ ಎಲ್ಲಿ ನಡೆದಿದೆ ಎಂಬುದು ತಿಳಿದುಬಂದಿಲ್ಲ. ಹಾಗೇ ವಧು ವರರ ಹೆಸರು ಕೂಡ ತಿಳಿದುಬಂದಿಲ್ಲ. ಆದರೆ ಈ ಘಟನೆಯಿಂದ ವೀಕ್ಷಕರಿಗೆ ಮನೋರಂಜನೆ ಸಿಕ್ಕಿದ್ದರೂ ಕೂಡ ವಧು ವರನ ವೈವಾಹಿಕ ಜೀವನದಲ್ಲಿ ಸಮಸ್ಯೆಯಾಗುವುದಂತು ಖಂಡಿತ ಎಂದು ಅನೇಕರು ಅಭಿಪ್ರಾಯ ಪಟ್ಟಿದ್ದಾರೆ. ವರನ ಮುಖ ನೋಡಿದರೆ, ಅಯ್ಯೋ ಪಾಪ ಅನಿಸುತ್ತದೆ!