ನವದೆಹಲಿ: ದೆಹಲಿಯ ಗದ್ದಲದ ಬೀದಿಗಳಲ್ಲಿ ಇದೀಗ ದೆಹಲಿಯ ‘ಪರೋಟಾ ಗರ್ಲ್’ ಎಂದು ಪ್ರಸಿದ್ಧರಾಗಿರುವ ಮೀಟ್ ಪುಯ್ ಅವರು ಹೊಸ ಸಂಚಲನ ಮೂಡಿಸಿದ್ದಾರೆ. ಆಕೆ ತಯಾರಿಸಿದ ರುಚಿಕರವಾದ ಪರೋಟಾ ತಿನ್ನಲು ಗ್ರಾಹಕರು ಉದ್ದನೆಯ ಸರತಿ ಸಾಲುಗಳಲ್ಲಿ ಬರುತ್ತಿದ್ದಾರೆ. ದೆಹಲಿಯ ‘ಪರೋಟಾ ಗರ್ಲ್’ ಪಾಕಶಾಲೆಯ ಕೌಶಲ್ಯವು ಸಾಮಾಜಿಕ ಮಾಧ್ಯಮದಲ್ಲಿ ಸಖತ್ ವೈರಲ್ (Viral Video) ಆಗುತ್ತಿದೆ.
ಮೂಲತಃ ಥೈಲ್ಯಾಂಡ್ ಮೂಲದ ಪುಯ್, ಪರೋಟ ತಯಾರಿಕೆಯಲ್ಲಿ ತಮ್ಮ ನವೀನ ವಿಧಾನದಿಂದ ಸಾವಿರಾರು ಜನರ ಗಮನ ಸೆಳೆದಿದ್ದಾರೆ. ತಮ್ಮ ಸಹೋದರಿಯ ಸಹಾಯದೊಂದಿಗೆ, ಅವರು ದೆಹಲಿಯ ಬೀದಿಯಲ್ಲಿ ಆಹಾರದ ಗಾಡಿಯನ್ನು ನಿಭಾಯಿಸುತ್ತಿದ್ದಾರೆ. ಅಲ್ಲಿ ಅವರು ಬಾಳೆಹಣ್ಣಿನ ಪರೋಟ, ಮೊಟ್ಟೆ ಪರೋಟ, ಜ್ಯೂಸ್ ಸೇರಿದಂತೆ ಹಲವು ಬಗೆಯ ರುಚಿ ರುಚಿಯಾದ ಬಾಯಲ್ಲಿ ನೀರೂರಿಸುವಂತಹ ಭಕ್ಷ್ಯಗಳನ್ನು ತಯಾರಿಸುತ್ತಾರೆ.
ಇನ್ಸ್ಟಾಗ್ರಾಂನಲ್ಲಿ ‘ಪುಯ್ ರೊಟ್ಟಿ ಲೇಡಿ’ ಹ್ಯಾಂಡಲ್ ಅಡಿಯಲ್ಲಿ ಹಂಚಿಕೊಳ್ಳಲಾದ ಪುಯ್ ಅವರ ಪರೋಟ ತಯಾರಿಕೆಯ ವಿಡಿಯೊಗಳು ಹೆಚ್ಚು ವೈರಲ್ ಆಗುತ್ತಿವೆ. ಅವರು ಈ ವಿಡಿಯೊ ಪೋಸ್ಟ್ ಮಾಡಿದ ಕೆಲವೇ ಗಂಟೆಗಳಲ್ಲಿ ಲಕ್ಷಾಂತರ ವೀಕ್ಷಣೆಗಳನ್ನು ಗಳಿಸಿದೆ. ಇದನ್ನು ನೋಡಿದವರು ನಾನಾ ಬಗೆಯಲ್ಲಿ ಕಾಮೆಂಟ್‍ಗಳನ್ನು ಮಾಡುತ್ತಿದ್ದಾರೆ. ಆಕೆಗೆ ಹಲವರು ಪ್ರಶಂಸೆ ಮತ್ತು ಮೆಚ್ಚುಗೆಯನ್ನು ವ್ಯಕ್ತಪಡಿಸಿದ್ದಾರೆ. ಈ ವಿಡಿಯೊದಲ್ಲಿ, ಪುಯ್ ಹಿಟ್ಟಿನಿಂದ ಕಾಗದದಷ್ಟು ತೆಳುವಾದ ಪರೋಟವನ್ನು ತಯಾರಿಸುತ್ತಿದ್ದಾರೆ. ಅದನ್ನು ಎಣ್ಣೆಯಲ್ಲಿ ಹುರಿಯುತ್ತಾರೆ, ನಂತರ ಮೊಟ್ಟೆಗಳು ಅಥವಾ ಬಾಳೆಹಣ್ಣುಗಳನ್ನು ಸೇರಿಸುತ್ತಾರೆ. ನಂತರ ಅದನ್ನು ಮಡಚಿ ಅದಕ್ಕೆ ಕ್ರೀಂ ಮತ್ತು ಉಪ್ಪನ್ನು ಸೇರಿಸಿ ಕಾಗದದಲ್ಲಿ ಸುತ್ತಿ ಗ್ರಾಹಕರಿಗೆ ನೀಡುತ್ತಾರೆ.
ವೈರಲ್ ವಿಡಿಯೊಗೆ ಅನೇಕರು ಕಾಮೆಂಟ್ ಮಾಡಿದ್ದು, ಅನೇಕರು ಕ್ವೀನ್ ಆಫ್ ಕುಕ್ ಬಿರುದು ನೀಡಬೇಕು ಎಂದು ಆಗ್ರಹಿಸಿದ್ದಾರೆ. ಕೆಲವರು ಅವರ ವ್ಯವಹಾರ ಚಾತುರ್ಯವನ್ನು ಹಾಡಿ ಹೊಗಳಿದ್ದಾರೆ. ಮೆಚ್ಚುಗೆಯ ನಡುವೆ, ಅವರ ಅಡುಗೆ ಕೌಶಲ್ಯಗಳ ಬಗ್ಗೆ ಚರ್ಚೆಗಳನ್ನು ಹುಟ್ಟುಹಾಕಿದೆ.
ಇದನ್ನೂ ಓದಿ: 5 ಲಕ್ಷ ರೂ. ಮೌಲ್ಯದ ವಜ್ರದ ಹಾರ ಕಸದ ರಾಶಿ ಸೇರಿದರೂ ವಾಪಸ್‌ ಸಿಕ್ಕಿತು!
ಈ ಹಿಂದೆ ದೆಹಲಿಯ ‘ವಡಾ ಪಾವ್ ಗರ್ಲ್’ ಎಂದು ಕರೆಯುತ್ತಿದ್ದ ಚಂದ್ರಿಕಾ ಗೇರ್ ದೀಕ್ಷಿತ್ ಅವರು ಭಾರೀ ಸಂಚಲನ ಮೂಡಿಸಿದ್ದರು. ಅವರು ಮುಂಬೈನ ನೆಚ್ಚಿನ ತಿಂಡಿ ವಡಾ ಪಾವ್ ಅನ್ನು ರಾಜಧಾನಿಯ ಬೀದಿಗಳಲ್ಲಿ ಮಾರಾಟ ಮಾಡುವ ಮೂಲಕ ಖ್ಯಾತಿಯನ್ನು ಗಳಿಸಿದರು. ಇದೀಗ ‘ಪರೋಟಾ ಗರ್ಲ್’ ಎಂದು ಪ್ರಸಿದ್ಧರಾಗಿರುವ ಮೀಟ್ ಪುಯ್ ಅವರು ಗ್ರಾಹಕರ ಮೆಚ್ಚುಗೆ ಗಳಿಸುತ್ತಿದ್ದಾರೆ.