ಶಿಶುಗಳ ಅಕಾಲಿಕ (Preterm Birth) ಜನನದ ಬಗ್ಗೆ ನಾವು ಆಗಾಗ ಕೇಳುತ್ತಿರುತ್ತೇವೆ. ಗರ್ಭಧಾರಣೆಯ 37 ವಾರಗಳ ಪೂರ್ಣ ಅವಧಿಗೆ ಮೊದಲು ಜನಿಸಿದ ಶಿಶುಗಳನ್ನು ಈ ರೀತಿ ಹೇಳುತ್ತೇವೆ. 37 ವಾರ ಅಥವಾ ಅದಕ್ಕಿಂತ ಹೆಚ್ಚಿನ ಅವಧಿಯಲ್ಲಿ ಜನಿಸಿದ ಶಿಶುಗಳನ್ನು ಪೂರ್ಣಾವಧಿ ಶಿಶು ಎಂದು ವೈದ್ಯಕೀಯವಾಗಿ ಪರಿಗಣಿಸಲಾಗುತ್ತದೆ. ಅದರಲ್ಲೂ ಮಗು 28 ವಾರಗಳ ಮೊದಲು ಭೂಮಿ ಕಂಡರೆ ಅವುಗಳನ್ನು ಅತ್ಯಂತ ಅಕಾಲಿಕ ಎಂದು ವರ್ಗೀಕರಿಸಲಾಗುತ್ತದೆ. 28 ರಿಂದ 34 ವಾರಗಳ ನಡುವೆ ಜನಿಸಿದವರು ಮಧ್ಯಮ ಅಕಾಲಿಕವಾಗಿದ್ದರೆ, 34 – 37 ವಾರಗಳ ನಡುವೆ ಜನಿಸಿದ ಶಿಶುಗಳನ್ನು ಅವಧಿಪೂರ್ವ ಎಂದು ವರ್ಗೀಕರಿಸಲಾಗುತ್ತದೆ. ಗರ್ಭಧಾರಣೆಯ ಸಮಯದಲ್ಲಿ ತಾಯಿಯ ಆರೋಗ್ಯಕ್ಕೆ ಸಂಬಂಧಿಸಿದ ವಿವಿಧ ಅಂಶಗಳು ಅಥವಾ ಮಗುವಿನ ಮೇಲೆ ಪರಿಣಾಮ ಬೀರುವ ಸಮಸ್ಯೆಗಳು ಅಕಾಲಿಕ ಜನನಕ್ಕೆ ಕಾರಣವಾಗುತ್ತವೆ. ಅಧಿಕ ರಕ್ತದೊತ್ತಡ, ಅನಿಯಂತ್ರಿತ ಮಧುಮೇಹ, ನಾನಾ ಸೋಂಕುಗಳು ಅಥವಾ ಕಡಿಮೆ ಆಮ್ಲಜನಕ ಪೂರೈಕೆಗೆ ಕಾರಣವಾಗುವ ಭ್ರೂಣದ ತೊಂದರೆಗಳಿಂದಾಗಿ ಅಕಾಲಿಕ ಜನನ ಸಂಭವಿಸುತ್ತದೆ.
ಶಿಶುಗಳ ಮೇಲೆ ಆಗುವ ಪರಿಣಾಮವೇನು?
ಮೊದಲಾಗಿ, ಅಕಾಲಿಕ ಶಿಶುಗಳು ತಮ್ಮ ಅಭಿವೃದ್ಧಿ ಹೊಂದದ ಹಲವು ಅಂಗಗಳಿಂದಾಗಿ ಸವಾಲುಗಳನ್ನು ಎದುರಿಸುತ್ತವೆ. ಅವುಗಳ ಶ್ವಾಸಕೋಶಗಳು ಸಂಪೂರ್ಣವಾಗಿ ರೂಪುಗೊಳ್ಳದಿರುವ ಸಾಧ್ಯತೆಗಳಿರುತ್ತವೆ, ಇದು ಉಸಿರಾಟದ ತೊಂದರೆ ಸಿಂಡ್ರೋಮ್ (respiratory distress syndrome) ಎಂದು ಕರೆಯಲ್ಪಡುವ ಸ್ಥಿತಿಗೆ ಕಾರಣವಾಗುತ್ತದೆ. ಅವರ ಶ್ವಾಸಕೋಶದಲ್ಲಿ ಶ್ವಾಸಕೋಶದ ವಿಸ್ತರಣೆಗೆ ಸಹಾಯ ಮಾಡುವ ಸರ್ಫಾಕ್ಟಂಟ್ ಇಲ್ಲದಿರುವುದರಿಂದ ಈ ಸಮಸ್ಯೆ ಎದುರಾಗುತ್ತದೆ, ಈ ಭಾಗವು ಸಾಮಾನ್ಯವಾಗಿ ಗರ್ಭಧಾರಣೆಯ 32 ರಿಂದ 34 ವಾರಗಳ ನಂತರ ಬೆಳೆಯುತ್ತದೆ. ಇಂಥ ಶಿಶುಗಳಿಗೆ ಸರಿಯಾಗಿ ಉಸಿರಾಡಲು ಅವರಿಗೆ ಉಸಿರಾಟದ ಬೆಂಬಲದ ಅಗತ್ಯವಿರುತ್ತದೆ ಮತ್ತು ಆಗಾಗ್ಗೆ ಬಾಹ್ಯ ಸರ್ಫಾಕ್ಟಂಟ್ ಅಗತ್ಯವಿರುತ್ತದೆ. ಪಕ್ವಗೊಳ್ಳದ ತ್ವಚೆಯಿಂದಾಗಿ ಶಿಶುವಿನ ದೇಹದ ತಾಪಮಾನ ಏರುಪೇರು ಮತ್ತು ತೇವಾಂಶಗಳನ್ನು ಬೇಗ ಕಳೆದುಕೊಳ್ಳುವ ಸಾಧ್ಯತೆಯಿರುತ್ತದೆ.ಶಿಶುವಿನ ರಕ್ತದಲ್ಲಿನ ಸಕ್ಕರೆ ಮಟ್ಟ ಸ್ಥಿರವಾಗಿ ಇರುವುದಿಲ್ಲ. ಸೂಕ್ಷ್ಮ ಚರ್ಮಗಳ ಕಾರಣಕ್ಕೆ ಸೋಂಕುಗಳಿಗೆ ಬೇಗ ಒಳಗಾಗುತ್ತಾರೆ. ಅಪಕ್ವ ಮೂತ್ರಪಿಂಡಗಳು ಉಪ್ಪು ಮತ್ತು ನೀರಿನಂಶವನ್ನು ಪರಿಣಾಮಕಾರಿಯಾಗಿ ನಿಯಂತ್ರಿಸುವ ಸಾಮರ್ಥ್ಯದ ಮೇಲೆ ಪರಿಣಾಮ ಬೀರುತ್ತವೆ. ಈ ಶಿಶುಗಳು ಸರಿಯಾಗಿ ಬೆಳೆಯದ ಜೀರ್ಣಾಂಗ ವ್ಯವಸ್ಥೆಯನ್ನು ಸಹ ಹೊಂದಿರುತ್ತವೆ, ಇದರಿಂದಾಗಿ ನಿಯಮಿತವಾಗಿ ಹಾಲನ್ನು ಜೀರ್ಣಗೊಳಿಸುವುದು ಮಗುವಿಗೆ ಸವಾಲಾಗುತ್ತದೆ. ಶಿಶು ತನ್ನ ತಾಯಿಯ ಹಾಲನ್ನು ಸಹಿಸಿಕೊಳ್ಳುವವರೆಗೆ, ಅದಕ್ಕೆ ರಕ್ತನಾಳ ಮೂಲಕ ಪೋಷಣೆಯನ್ನು ನೀಡಬೇಕಾಗುತ್ತದೆ.
ಪೂರ್ಣಾವಧಿಯ ಶಿಶುಗಳು ಎಂದರೆ, ಗರ್ಭಧಾರಣೆಯ 37 ವಾರಗಳನ್ನು ಪೂರ್ಣಗೊಳಿಸಿದ ನಂತರ ಜನಿಸಿದ ಮಕ್ಕಳಾಗಿರುತ್ತವೆ, ಸಮರ್ಪಕವಾಗಿ ಅಭಿವೃದ್ಧಿ ಹೊಂದಿದ ಅಂಗಗಳನ್ನು ಹೊಂದಿರುವ ಕಾರಣ ಪ್ರಪಂಚವನ್ನು ಎದುರಿಸಲು ಉತ್ತಮವಾಗಿ ಸಜ್ಜುಗೊಂಡಿರುತ್ತವೆ. ಅವರ ಶ್ವಾಸಕೋಶಗಳು ಸಂಪೂರ್ಣವಾಗಿ ರೂಪುಗೊಂಡಿರುತ್ತವೆ ಮತ್ತು ಚರ್ಮವು ಹೆಚ್ಚು ಪ್ರಬುದ್ಧವಾಗಿರುತ್ತದೆ, ಸೋಂಕುಗಳ ವಿರುದ್ಧ ಉತ್ತಮ ರಕ್ಷಣೆಯನ್ನು ಒದಗಿಸುತ್ತದೆ. ದೇಹದ ತಾಪಮಾನ ಮತ್ತು ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿಯಂತ್ರಿಸುವ ಹೆಚ್ಚಿನ ಸಾಮರ್ಥ್ಯವನ್ನು ಅದು ಹೊಂದಿರುತ್ತದೆ. ಅಕಾಲಿಕ ಶಿಶುಗಳಿಗೆ ಹೋಲಿಸಿದರೆ ಅವರ ಜೀರ್ಣಾಂಗ ವ್ಯವಸ್ಥೆಗಳು ನಿಯಮಿತ ಹಾಲಿನ ಸೇವನೆಯನ್ನು ನಿರ್ವಹಿಸಲು ಹೆಚ್ಚು ಸಿದ್ಧವಾಗಿವೆ.
ಅವಧಿಪೂರ್ವ ಶಿಶುಗಳ ಸವಾಲುಗಳು ಮತ್ತು ಆರೈಕೆ
ಈ ಸಮಸ್ಯೆಗಳ ಹೊರತಾಗಿ, ಅಕಾಲಿಕ ಶಿಶುಗಳು ತಮ್ಮ ಅಪಕ್ವ ಮಿದುಳಿನಿಂದಾಗಿ ಅಪ್ನಿಯಾ (ಉಸಿರಾಟದಲ್ಲಿ ಅಡೆತಡೆ) ಅನುಭವಿಸಬಹುದು ಮತ್ತು ಮೆದುಳಿನ ರಕ್ತಸ್ರಾವಕ್ಕೆ ಒಳಗಾಗಬಹುದು. ಆದಾಗ್ಯೂ, ವೈದ್ಯಕೀಯ ಸುಧಾರಣೆಗಳು ನವಜಾತ ಶಿಶುವಿನ ಚಿಕಿತ್ಸೆಯಲ್ಲಿ ಪೋಷಕರನ್ನು ಒಳಗೊಂಡ ಕುಟುಂಬ- ಕೇಂದ್ರಿತ ಆರೈಕೆಯನ್ನು ಪರಿಚಯಿಸಿವೆ. ತಾಯಂದಿರು ತಮ್ಮ ಶಿಶುಗಳನ್ನು ಎನ್ಐಸಿಯು (ನವಜಾತ ತೀವ್ರ ನಿಗಾ ಘಟಕ) ದಲ್ಲಿ ನೋಡಲು ಮತ್ತು ಸಂವಹನ ನಡೆಸಲು ಅವಕಾಶ ನೀಡಲಾಗುತ್ತದೆ. ಈ ವಿಧಾನವು ಮಗುವಿನ ಚೇತರಿಕೆಗೆ ಪ್ರೇರಣೆ ನೀಡುತ್ತದೆ. ಪೋಷಕರ ಆತಂಕವನ್ನು ಕಡಿಮೆಗೊಳಿಸುತ್ತದೆ. ವಿದ್ಯಾವಂತ ಪೋಷಕರು ತಮ್ಮ ಅವಧಿಪೂರ್ವ ಶಿಶುಗಳು ಎದುರಿಸುತ್ತಿರುವ ಸವಾಲುಗಳನ್ನು ಅರ್ಥಮಾಡಿಕೊಳ್ಳಲು ಮತ್ತು ನಿರ್ವಹಿಸಲು ಉತ್ತಮವಾಗಿ ಸಜ್ಜುಗೊಂಡಿರುತ್ತಾರೆ ಎಂಬುದು ಸತ್ಯ.
ಬೆಂಬಲ ಮತ್ತು ಚಿಕಿತ್ಸೆ
ಅವಧಿಪೂರ್ವ ಶಿಶುಗಳನ್ನು ನೋಡಿಕೊಳ್ಳಲು ವಿಶೇಷ ಕೇಂದ್ರಗಳು ಬೇಕಾಗುತ್ತವೆ ಮತ್ತು ಅದು ಸಮಯ ತೆಗೆದುಕೊಳ್ಳುತ್ತದೆ. ಉದಾಹರಣೆಗೆ, 28 ವಾರಗಳಲ್ಲಿ ಜನಿಸಿದ ಶಿಶುಗಳು ತಮ್ಮ ತಾಯಂದಿರನ್ನುಸ ಸೇರಲು ಮೊದಲು ಆರರಿಂದ ಎಂಟು ವಾರಗಳನ್ನು ಎನ್ಐಸಿಯುನಲ್ಲಿ ಕಳೆಯಬೇಕಾಗುತ್ತದೆ. ಹೆರಿಗೆಯ ನಂತರ ಪೋಷಕರು ಆತಂಕಗಳನ್ನು ಎದುರಿಸಬೇಕಾಗುತ್ತದೆ. ಅದಕ್ಕಾಗಿಯೇ ಇರುವ ಸಮಾಲೋಚನೆ ತಂಡಗಳು ಮತ್ತು ವೈದ್ಯಕೀಯ ತಂತ್ರಜ್ಞಾನದ ಪ್ರಗತಿಗಳು ಈ ಭಯವನ್ನು ಕಡಿಮೆಗೊಳಿಸಲು ಸಹಾಯ ಮಾಡುತ್ತದೆ. 500 ರಿಂದ 600 ಗ್ರಾಂಗಳಷ್ಟು ಹಗುರವಾಗಿ ಜನಿಸಿದ ಸಣ್ಣ ಶಿಶುಗಳನ್ನು ಸಹ ನೋಡಿಕೊಳ್ಳುವಷ್ಟು ಮಟ್ಟಿಗೆ ವಿಜ್ಞಾನವು ಅದ್ಭುತ ಪ್ರಗತಿ ಸಾಧಿಸಿದೆ.
ಅಕಾಲಿಕ ಮತ್ತು ಪೂರ್ಣಾವಧಿಯ ಜನನಗಳನ್ನು ಅರ್ಥಮಾಡಿಕೊಳ್ಳುವುದರಿಂದ, ಶಿಶುಗಳು ಮತ್ತು ಅವರ ಕುಟುಂಬಗಳು ಅನುಭವಿಸುವ ಸವಾಲುಗಳಿಗೆ ನೆರವು ನೀಡಲು ಸಹಾಯ ಮಾಡುತ್ತದೆ. ಅಕಾಲಿಕ ಶಿಶುಗಳು ತಮ್ಮ ಅಭಿವೃದ್ಧಿ ಹೊಂದದ ಅಂಗಗಳಿಂದಾಗಿ ಹಲವಾರು ಸವಾಲುಗಳನ್ನು ಎದುರಿಸುತ್ತಿದ್ದರೆ, ಪೂರ್ಣಾವಧಿಯ ಶಿಶುಗಳು ಗರ್ಭದ ಹೊರಗಿನ ಜಗತ್ತಿಗೆ ಪರಿವರ್ತನೆಯನ್ನು ನಿಭಾಯಿಸಲು ಉತ್ತಮವಾಗಿ ಸಜ್ಜುಗೊಳ್ಳುತ್ತವೆ. ಅವರ ಹೆಚ್ಚು ಅಭಿವೃದ್ಧಿ ಹೊಂದಿದ ಅಂಗಗಳು ಗರ್ಭಾಶಯದ ಹೊರಗಿನ ಜೀವನಕ್ಕೆ ಸುಗಮ ಹೊಂದಾಣಿಕೆಯಾಗುತ್ತದೆ. ಅಕಾಲಿಕ ಜನನಕ್ಕೆ ಸಂಬಂಧಿಸಿದ ಅಪಾಯಗಳನ್ನು ಕಡಿಮೆ ಮಾಡುತ್ತವೆ.
ವೈದ್ಯಕೀಯ ಆರೈಕೆ ಮತ್ತು ಕುಟುಂಬ ಪಾಲ್ಗೊಳ್ಳುವಿಕೆ ಮೂಲಕ ಅಕಾಲಿಕ ಶಿಶುಗಳಿಗೆ ಉತ್ತಮ . ಪೋಷಕರನ್ನು ಜ್ಞಾನದೊಂದಿಗೆ ಸಬಲೀಕರಣಗೊಳಿಸುವುದು ಮತ್ತು ಆರೈಕೆ ಪ್ರಕ್ರಿಯೆಯಲ್ಲಿ ಅವರನ್ನು ತೊಡಗಿಸಿಕೊಳ್ಳುವುದು ಈ ವಿಶೇಷ ಶಿಶುಗಳ ಯೋಗಕ್ಷೇಮದಲ್ಲಿ ಮಹತ್ವದ ಪಾತ್ರ ವಹಿಸುತ್ತದೆ.
ಇದನ್ನೂ ಓದಿ: Skin Care Tips: ವಯಸ್ಸಾದರೂ ಚರ್ಮ ಫಳಫಳ ಹೊಳೆಯುತ್ತಿರಬೇಕೆ? ಈ ಆಹಾರ ಕಡಿಮೆ ಮಾಡಿ!