ದಿನಪತ್ರಿಕೆ ಕೈಯಲ್ಲಿ ಹಿಡಿದು, ಪಕ್ಕದಲ್ಲೊಂದು ಹಬೆಯಾಡುವ ಚಹಾ ಇಟ್ಟುಕೊಂಡು ಬೆಳಗನ್ನು ಸ್ವಾಗತಿಸುವುದು ಸಾಮಾನ್ಯವಾಗಿ ಬಹುತೇಕರ ಅಭ್ಯಾಸ. ಹಿಂದಿಗಿಂತ ಈಗ ಯುವಜನರಲ್ಲಿ ಈ ಅಭ್ಯಾಸ ಕಡಿಮೆಯಾಗಿದೆಯಾದರೂ, ಹಲವರು ಈಗಲೂ ಹೀಗೊಂದು ಬೆಳಗಿನ ಕನಸು ಕಾಣುತ್ತಾರೆ. ಅದೇನೇ ಇರಲಿ, ಬೆಳಗಿನಲ್ಲಿ ತಾಜಾ ಆಗಿ ಬರುವ ಈ ಪತ್ರಿಕೆ ಸಂಜೆಯ ಹೊತ್ತಿಗೆ ಬೀದಿ ಬದಿಯ ತಿಂಡಿ ಮಾರುವವನ ಕೈಯಲ್ಲಿರುತ್ತದೆ. ಅಥವಾ, ಇನ್ನೆಲ್ಲೋ ರದ್ದಿಯಲ್ಲಿರುತ್ತದೆ. ಇಲ್ಲಿ ವಿಷಯ ಅದಲ್ಲ. ನಿತ್ಯವೂ ಓದುವ ಇಂಥಹ ಪೇಪರನ್ನು ಬಹುತೇಕರು ತಿಂಡಿ ತಿನ್ನಲೂ ಬಯಸುತ್ತಾರೆ. ರಸ್ತೆ ಬದಿಯ ತಿಂಡಿಯವನು ಅದೇ ಪೇಪರಿನಲ್ಲಿ ಬಜ್ಜಿಯನ್ನೋ, ಬೋಂಡಾವನ್ನೋ (eating food packed in newspaper) ಕಟ್ಟಿ ಕೊಡುತ್ತಾನೆ. ಯಕ್ಷಗಾನ ನೋಡಲು ಹೋದರು ಚುರುಮುರಿ ಅಂಗಡಿಯವನು ಪೇಪರನ್ನೇ ಕೋನ್‌ ಮಾಡಿ ಅದರಲ್ಲಿ ಚುರುಮುರಿ ಸುರಿದು ಕೊಡುತ್ತಾನೆ. ಬಿಸಿಬಿಸಿ ಶೇಂಗಾ ಮಾರುವವನು ಸಂಜೆಯ ಹೊತ್ತಿಗೆ ಇದೇ ಪೇಪರಿನಲ್ಲಿ ಶೇಂಗಾ ಕಟ್ಟಿ ಕೊಡುತ್ತಾನೆ. ಇವೆಲ್ಲ ನಮಗೆ ಹಳೆಯ ನೆನಪುಗಳನ್ನೋ ಜಾತ್ರೆಯ ಬಾಲ್ಯದ ಖುಷಿಗಳನ್ನೋ ನೆನಪಿಸುವುದು ನಿಜ. ಆದರೆ, ನಿಜವಾಗಿಯೂ ಹೀಗೆ ಪತ್ರಿಕೆಯಲ್ಲೇ ತಿನ್ನುವುದು ಒಳ್ಳೆಯದೇ? ಆರೋಗ್ಯಕರವೇ ಎಂದು ಯೋಚಿಸಿದ್ದೀರಾ? ಹೌದು. ಖಂಡಿತಾ ಒಳ್ಳೆಯದಲ್ಲ. ಬನ್ನಿ, ಪತ್ರಿಕೆಯಲ್ಲಿ ಆಹಾರವನ್ನಿಟ್ಟು ತಿನ್ನುವುದು ಯಾಕೆ ಒಳ್ಳೆಯದಲ್ಲ ಎಂಬುದನ್ನು ನೋಡೋಣ ಬನ್ನಿ.
- ಪತ್ರಿಕೆ ಮುದ್ರಣವಾಗಿ ಬರುವಾಗ ಆ ಪೇಪರಿನಲ್ಲಿ ಶಾಯಿಯ ಬಳಕೆಯಾಗಿರುತ್ತದೆ. ಶಾಯಿಯಲ್ಲಿ ರಸಾಯನಿಕಗಳಿವೆ. ಸೀಸ ಮತ್ತಿತರ ಅತ್ಯಂತ ಹಾನಿಕಾರಕ ವಿಷಕಾರಿ ರಸಾಯನಿಕಗಳೂ ಇವೆ. ಆಹಾರಗಳು ನೇರವಾಗಿ ಪತ್ರಿಕೆಯ ಈ ರಸಾಯನಿಕಗಳ ಜೊತೆ ಸಂಪರ್ಕ ಹೊಂದಿ ನಮ್ಮ ದೇಹ ಸೇರಿ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತವೆ.
- ಪತ್ರಿಕೆ ಪ್ರಿಂಟ್‌ ಆದ ಮೇಲೆ ನಾನಾ ಕೈಗಳನ್ನು ದಾಟಿಕೊಂಢೂ ಆದು ನಿಮ್ಮ ಮನೆಗೋ, ಅಂಗಡಿಗೋ ಬಂದಿರುತ್ತದೆ. ಈ ಮಧ್ಯೆ ಸಾಕಷ್ಟು ಬ್ಯಾಕ್ಟೀರಿಯಾ, ರೋಗ ಹರಡುವ ಸೂಕ್ಷ್ಮಾಣುಜೀವಿಗಳು ಕೂಡಾ ಪತ್ರಿಕೆಗೆ ಅಂಟಿಕೊಂಡಿರುವ ಸಾಧ್ಯತೆ ಹೆಚ್ಚು. ಆಗ ಸಹಜವಾಗಿಯೇ ಅವು ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತವೆ.
- ಪತ್ರಿಕೆಯನ್ನು ಕೆಲವು ಕಾಲ ಯಾವುದೋ ಅನಾರೋಗ್ಯಕರ ಜಾಗದಲ್ಲಿ ಇಟ್ಟಿರಬಹುದು. ಎಲ್ಲೆಲ್ಲೋ ಧೂಳಿನಲ್ಲಿ ಬಿದ್ದುಕೊಂಡಿರಬಹುದು. ಗೋಡೌನಿನಲ್ಲಿ, ರದ್ದಿ ಅಂಗಡಿಯಲ್ಲಿ ಇತ್ಯಾದಿ ಧೂಳು ಮೆತ್ತಿಕೊಂಡಿರುವ ಜಾಗದಲ್ಲಿದ್ದ ಪೇಪರಿನಲ್ಲಿ ಸುತ್ತಿಕೊಂಡು ತಿನ್ನುವುದರಿಂದ, ಅದರ ಮೂಲಕ ಆಹಾರವೂ ಕೊಳಕಾಗುತ್ತದೆ. ಆರೋಗ್ಯ ಹಾಳಾಗುತ್ತದೆ.
- ಕೆಲವು ಮಂದಿಗೆ ಪತ್ರಿಕೆಯಲ್ಲಿ ಬಳಸಿದ ಶಾಯಿ ಹೊಟ್ಟೆ ಸೇರುವ ಮೂಲಕ ಕೂಡಲೇ ಅಲರ್ಜಿಯಂತಹ ಸಮಸ್ಯೆಗಳೂ ಬರಬಹುದು.
- ಪತ್ರಿಕೆಗಳಲ್ಲಿ ಖಂಡಿತ ಫುಡ್‌ಗ್ರೇಡ್‌ನ ಯಾವುದೇ ಉತ್ಪನ್ನಗಳನ್ನು ಬಳಕೆ ಮಾಡಿರುವುದಿಲ್ಲ. ಹಾಗಾಗಿ, ಖಂಡಿತವಾಗಿಯೂ, ರಸಾಯನಿಕಗಳು ಆಹಾರದ ಮೂಲಕ ದೇಹ ಸೇರಿದರೆ, ಏನಾದರೊಂದು ಸಮಸ್ಯೆಗಳು ನಮ್ಮ ದೇಹಕ್ಕೆ ರವಾನೆಯಾಗುತ್ತದೆ.
- ಪದೇ ಪದೇ ಹೀಗೆ ಪತ್ರಿಕೆ ಬಳಸುವುದರಿಂದ ಪತ್ರಿಕೆಯ ರಸಾಯನಿಕಗಳು ಹೊಟ್ಟೆ ಸೇರಿ ಒಟ್ಟಾಗಿ, ಬೇರೇನಾದರೂ ಆರೋಗ್ಯದ ಸಮಸ್ಯೆಗಳಿದ್ದರೆ, ವ್ಯತಿರಿಕ್ತವಾಗಿ ಪರಿಣಾಮ ಬೀರಿ ಆ ಸಮಸ್ಯೆಯೂ ಉಲ್ಬಣಿಸಬಹುದು.
ಹಾಗಾಗಿ ಯಾವುದೇ ಆಹಾರವಿರಲಿ, ಎಣ್ಣೆತಿಂಡಿಯಿರಲಿ, ಪತ್ರಿಕೆಯಲ್ಲಿ ಹಕಿಖಿ ತಿನ್ನುವುದು ಖಂಡಿತ ಆರೋಗ್ಯಕ್ಕೆ ಒಳ್ಳೆಯದನ್ನು ಮಾಡುವುದಿಲ್ಲ. ಹೀಗಾಗಿ ಪತ್ರಿಕೆಯ ಬಳಕೆಯನ್ನು ಆಗಹಾರದ ಉಪಯೋಗದಲ್ಲಿ ಬಳಸುವುದನ್ನು ನಿಲ್ಲಿಸಿ. ಆರೋಗ್ಯಕರ ಹಾದಿಗಳನ್ನು ಹುಡುಕಿಕೊಳ್ಳಬಹುದು.
ಇದನ್ನೂ ಓದಿ: Bone Health In Winter: ಚಳಿಗಾಲದಲ್ಲಿ ಮೂಳೆಗಳ ಆರೋಗ್ಯ ಕಾಪಾಡಿಕೊಳ್ಳುವುದು ಹೇಗೆ?