ಬಹಳಷ್ಟು ಮಂದಿಗೆ ಬೆಳಗ್ಗೆ ಎದ್ದ ಕೂಡಲೇ ಕೈಯಲ್ಲೊಂದು ಕಪ್‌ ಚಹಾ ಇರಬೇಕು. ಚಹಾ ಕುಡಿಯದಿದ್ದರೆ ಬೆಳಗು ಬೆಳಗೇ ಅಲ್ಲ. ಏನೋ ಖಾಲಿ ಖಾಲಿ, ಏನನ್ನೋ ಕಳೆದುಕೊಂಡವರಂತಾಗಿ ಮನಸ್ಸು ವಿಲವಿಲನೆ ಒದ್ದಾಡುತ್ತದೆ. ಒಂದ್ಹತ್ತು ನಿಮಿಷವಾದರೂ ಕೂತು ಬಿಸಿ ಬಿಸಿ ಹಬೆಯಾಡುವ ಚಹಾವನ್ನು ನಿಧಾನಕ್ಕೆ ಗುಟುಕೇರಿಸುತ್ತಾ ಕುಡಿಯುತ್ತಿದ್ದರೆ ಸ್ವರ್ಗಕ್ಕೆ ಕಿಚ್ಚು ಹಚ್ಚೆಂದ ಎಂಬ ಸಮಾಧಾನ. ಬರೀ ಚಹಾವಷ್ಟೇ ಸಾಲದು, ಚಹಾದೊಳಗೆ ಅದ್ದಿ ತೆಗೆದು ಬಾಯಿಗಿಡಲು ಎರಡು ಬಿಸ್ಕತ್ತುಗಳೂ ಇರಬೇಕು ಎನ್ನುವ ರೂಢಿ ಇನ್ನೂ ಕೆಲವರದ್ದು. ಚಹಾ ಬಿಸ್ಕತ್ತು ತಿಂದ ಮೇಲೆಯೇ, ಮತ್ತೆ ನಿಧಾನವಾಗಿ ಬೆಳಗಿನ ತಿಂಡಿ ಸಮಾರಾಧನೆ ನಡೆಯೋದು ಅನ್ನುವ ಮಂದಿ ಹಲವರು. ಇಂಥ ಆಭ್ಯಾಸವಿರುವ ಮಂದಿ ಇಲ್ಲಿ ಕೇಳಿ. ಬೆಳಗ್ಗೆ ಎದ್ದ ಕೂಡಲೇ ಚಹಾ ಬಿಸ್ಕತ್ತು ಸವಿಯುವ ಮಂದಿ ನೀವಾಗಿದ್ದರೆ ಈಗಲೇ ಅಭ್ಯಾಸ ಬದಲಾಯಿಸಿಕೊಳ್ಳಿ. ಯಾಕೆಂದರೆ, ಬಿಸ್ಕತ್ತು ಬೆಳಗನ್ನು ಆರಂಭಿಸುವ ಅತ್ಯಂತ ಕೆಟ್ಟ ಆಯ್ಕೆಯಂತೆ!
ಈ ಕಾಂಬಿನೇಶನ್‌ ದೇಹದಲ್ಲಿ ಆರೋಗ್ಯಕ್ಕೆ ಸಂಬಂಧಿಸಿದಂತೆ ಹಲವು ಏರುಪೇರು ಮಾಡುತ್ತದಂತೆ. ಅಸಿಡಿಟಿ ಎಂದು ನೀವು ಒದ್ದಾಡುತ್ತಿದ್ದರೆ ಅದಕ್ಕೆಲ್ಲ ಮೂಲ ಕಾರಣ ಬೆಳಗಿನ ಈ ಬಿಸ್ಕತ್ತೇ ಆಗಿರಬಹುದಂತೆ. ಇನ್ನು ಹೊಟ್ಟೆ ಸಂಬಂಧಿ ತೊಂದರೆಗಳು, ತೂಕದಲ್ಲಿ ಏರಿಕೆ, ರಕ್ತದಲ್ಲಿ ಸಕ್ಕರೆಯ ಪ್ರಮಾಣದಲಿ ಏರುಪೇರು, ಪಚನ ತೊಂದರೆಗಳು ಮತ್ತಿತರ ಅನೇಕ ಸಮಸ್ಯೆಗಳ ಕಟ್ಟಿಟ್ಟ ಬುತ್ತಿ.
ಅಷ್ಟೇ ಅಲ್ಲ. ಇಡೀ ದಿನ ದೇಹಕ್ಕೆ ನಾವು ತೆಗೆದುಕೊಳ್ಳುವ ಆಹಾರದಲ್ಲಿರುವ ಪೋಷಕಾಂಶಗಳನ್ನು ದೇಹ ಸರಿಯಾಗಿ ಹೀರಿಕೊಳ್ಳದಂತೆ ಮಾಡುವ ಕೆಟ್ಟ ಗುಣವೂ ಇದಕ್ಕಿದೆ. ಪೋಷಕಾಂಶಗಳೆಲ್ಲವೂ ದೇಹಕ್ಕೆ ಸರಿಯಾಗಿ ಸೇರದೆ ನಷ್ಟವಾಗುವ ಸಾಧ್ಯತೆಗಳೂ ಹೆಚ್ಚು. ಇದೆಲ್ಲವೂ ಆಗುವುದು ಬಿಸ್ಕತ್ತಿನಲ್ಲಿರುವ ಸಕ್ಕರೆಯ ಅಂಶದಿಂದ. ಸಕ್ಕರೆಯ ಜೊತೆಗೆ ಬಿಸ್ಕತ್ತಿನಲ್ಲಿರುವುದು ಸಕ್ಕರೆ, ಗೋಧಿ ಹಾಗೂ ಸ್ಯಾಚುರೇಟೆಡ್‌ ಫ್ಯಾಟ್‌. ಇದು ಅಸಿಡಿಟಿ ತೊಂದರೆಗಳನ್ನು ಉಂಟುಮಾಡುತ್ತದೆ.
ಹೀಗೆ ಜೀರ್ಣಕ್ರಿಯೆ ಹಾಗೂ ಅಸಿಡಿಟಿ ಸಮಸ್ಯೆಗಳಿರುವ ಮಂದಿ ಬೆಳಗ್ಗೆ ಎದ್ದಕೂಡಲೇ ಚಹಾ ಬಿಸ್ಕತ್ತಿನ ಬದಲು ಏನನ್ನು ಸೇವಿಸಬಹುದು ಹಾಗೂ ಅವರಿಗೆ ಯಾವುದು ಉತ್ತಮ ಎಂಬುದನ್ನು ನೋಡೋಣ
೧. ಬಡೇಸೊಪ್ಪಿನ ನೀರು: ಸೋಂಪು ಅಥವಾ ಬಡೇಸೊಪ್ಪಿನ ನೀರು ಅಸಿಡಿಟಿ ಮತ್ತಿತರ ಸಮಸ್ಯೆಗಳನ್ನು ನಿವಾರಿಸುವ ತಾಕತ್ತನ್ನು ಹೊಂದಿದೆ. ಇದು ಜೀರ್ಣಕ್ರಿಯೆಯನ್ನು ಚುರುಕುಗೊಳಿಸುತ್ತದೆ.
೨. ಕೊತ್ತಂಬರಿ ನೀರು: ಹೊಟ್ಟೆ ಉಬ್ಬರಿಸಿದಂತಾಗುವುದು ಹಾಗೂ ಅಸಿಡಿಟಿ ಸಮಸ್ಯೆಗಳಿದ್ದರೆ ಅಂಥವರಿಗೆ ಕೊತ್ತಂಬರಿ ಕಾಳನ್ನು ನನೆನೆಸಿದ ನೀರೂ ಕೂಡಾ ಒಳ್ಳೆಯದು.
೩. ಆಲೊವೆರಾ ಜ್ಯೂಸ್‌: ಮಲಬದ್ಧತೆಯಂಥಾ ಸಮಸ್ಯೆಯಿದ್ದರೆ, ಬೆಳಗ್ಗೆದ್ದ ಕೂಡಲೇ ಶೌಚವೇ ದೊಡ್ಡ ಸಮಸ್ಯೆಯಾಗಿದ್ದರೆ ಅಂಥವರು ಬೆಳಗ್ಗೆ ಅಲೊವೆರಾ ಜ್ಯೂಸ್‌ ಕುಡಿಯಬಹುದು.
ಇದನ್ನೂ ಓದಿ: Health tips: ತಡರಾತ್ರಿ ತಿನ್ನುವುದು ಯಾಕೆ ಒಳ್ಳೆಯದಲ್ಲ ಗೊತ್ತೇ?
೪. ಎಳನೀರು ಹಾಗೂ ದಾಲ್ಚಿನಿ: ಎಳನೀರಿಗೆ ದಾಲ್ಚಿನಿ ಪುಡಿ ಹಾಕಿ ಕುಡಿಯುವುದರಿಂದ ಬೆಳಗ್ಗೆ ಎದ್ದ ಕೂಡಲೇ ಆರಂಭವಾಗುವ ಸಕ್ಕರೆ ಚಪಲತೆಯನ್ನು ಇದು ಕಡಿಮೆಗೊಳಿಸುತ್ತದೆ. ಇದು ಮಧುಮೇಹ ತೊಂದರೆ ಇರುವ ಮಂದಿಗೂ ಒಳ್ಳೆಯದು.
೫. ಎಳನೀರು ಹಾಗೂ ಹಲೀಂ ಬೀಜ: ಎಳನೀರಿನೊಂದಿಗೆ ಹಲೀಂಬೀಜವನ್ನು ನೆನೆಸಿ ಕುಡಿಯುವುದರಿಂದ ಚರ್ಮ ಹಾಗೂ ಕೂದಲ ಸಮಸ್ಯೆ ಇರುವ ಮಂದಿಗೂ ಉತ್ತಮವಂತೆ. ಇದರಲ್ಲಿರುವ ಕಬ್ಬಿಣದಂಶ ಕೂದಲು ಉದುರದಂತೆ ಕಾಪಾಡುತ್ತದಂತೆ.
ಅಭ್ಯಾಸಗಳು/ಚಟಗಳು ಬಹಳ ಜಿದ್ದಿ. ಅವು ಅಷ್ಟು ಸುಲಭವಾಗಿ ನಮ್ಮಿಂದ ಸೋಲೊಪ್ಪುವುದಿಲ್ಲ. ಆದರೆ, ಸೋಲಿಸಲು ನಮಗೆ ಮನಸ್ಸಿದ್ದರೆ ಚಹಾವನ್ನು ಬೆಳಗ್ಗೆ ಎದ್ದು ಕುಡಿಯುವುದರ ಬದಲಾಗಿ ದಿನದ ಬೇರೆ ಹೊತ್ತಿನಲ್ಲಾದರೂ ಕುಡಿಯಬಹುದು. ಎದ್ದ ಕೂಡಲೇ ಏನಾದರೊಂದು ಆರೋಗ್ಯಕರ ಅಭ್ಯಾಸವನ್ನು ರೂಢಿಸಿಕೊಳ್ಳಬಹುದು. ನಮಗೆ ಮನಸ್ಸಿದ್ದರೆ ಇದು ಕಷ್ಟವೇನಲ್ಲ! ಮನಸ್ಸು, ಹಠ ಬೇಕು ಅಷ್ಟೆ.
ಇದನ್ನೂ ಓದಿ: Health Tips: ನಮ್ಮ ಶಕ್ತಿಗುಂದಿಸುವ ಈ ವಿಷಯಗಳ ಬಗ್ಗೆ ಎಚ್ಚರ ವಹಿಸಿ!