ಬೆಂಗಳೂರು: ಪ್ರಸ್ತುತ ಜೀವನ ವೆಚ್ಚ ಅಧಿಕವಾಗಿದ್ದು, ಮಧ್ಯಮ ವರ್ಗದವರು ಒಂದಲ್ಲ ಒಂದು ಕಾರಣಕ್ಕೆ ಸಾಲದ ಮೊರೆ ಹೋಗಬೇಕಾದ ಅನಿವಾರ್ಯತೆ ಎದುರಾಗಿದೆ. ಉದ್ಯೋಗ ನಷ್ಟ, ಮಕ್ಕಳ ಶೈಕ್ಷಣಿಕ ಉದ್ದೇಶ, ದುಬಾರಿ ವೈದ್ಯಕೀಯ ಖರ್ಚು ಹೀಗೆ ನಾನಾ ಕಾರಣಗಳಿಂದ ಸಾಲ ಪಡೆದುಕೊಳ್ಳಬೇಕಾಗುತ್ತದೆ. ಈ ಮಧ್ಯೆ ಬ್ಯಾಂಕ್‌ಗಳು ಆನ್‌ಲೈನ್‌ ಮೂಲಕ ಸಾಲಕ್ಕಾಗಿ ಅರ್ಜಿ ಸಲ್ಲಿಸುವ ಸೌಲಭ್ಯಗಳನ್ನೂ ಪರಿಚಯಿಸಿದೆ. ಇದರಿಂದ ಬ್ಯಾಂಕ್‌ಗೆ ಅಲೆದಾಡುವುದು ತಪ್ಪುತ್ತದೆ. ಕೂತಲ್ಲಿಂದಲೇ ಮೊಬೈಲ್‌ ಮೂಲಕ ಅರ್ಜಿ ಸಲ್ಲಿಸಬಹುದಾಗಿದೆ. ಆದರೆ ಇದನ್ನೇ ಬಂಡವಾಳ ಮಾಡಿಕೊಂಡಿರುವ ಸೈಬರ್‌ ವಂಚಕರು ಈ ಹೆಸರಿನಲ್ಲಿ ಟೋಪಿ ಹಾಕಲು ಮುಂದಾಗುತ್ತಾರೆ. ಹೀಗಾಗಿ ಈ ಬಗ್ಗೆ ಸಾಕಷ್ಟು ಎಚ್ಚರಿಕೆ ವಹಿಸಬೇಕು ಎಂದು ತಜ್ಞರು ಸಲಹೆ ನೀಡುತ್ತಾರೆ. ಹಾಗಾದರೆ ವಂಚನೆಯ ಕೂಪಕ್ಕೆ ಬೀಳದಿರಲು ಏನೆಲ್ಲ ಮುಂಜಾಗ್ರತಾ ಕ್ರಮ ಕೈಗೊಳ್ಳಬೇಕು? ಈ ಗೊಂದಲಕ್ಕೆ ಉತ್ತರ ನೀಡಲಿದೆ ಮನಿಗೈಡ್‌ (Money Guide).
ನಮ್ಮ ಪರಿಸ್ಥಿತಿಯನ್ನು, ಅನಿವಾರ್ಯತೆಯನ್ನು ದುರುಪಯೋಗಿಸಿಕೊಂಡು ವಂಚಕರು ದುಡ್ಡಿನ ಆಮಿಷ ಒಡ್ಡಿ ಬಳಿಕ ನಮ್ಮಿಂದಲೇ ದೋಚುತ್ತಾರೆ. ಶೀಘ್ರವಾಗಿ ಆನ್‌ಲೈನ್‌ನಲ್ಲೇ ಸಾಲ ನೀಡುತ್ತೇವೆ ಎಂದು ನಂಬಿಸಿ ಹೆಚ್ಚಿನ ಮುಂಗಡ ಶುಲ್ಕಗಳು, ಅವಾಸ್ತವಿಕ ಬಡ್ಡಿದರಗಳು ಮತ್ತು ಷರತ್ತುಗಳ ಹೆಸರಿನಲ್ಲಿ ಹಗಲು ದರೋಡೆಗೆ ಇಳಿಯುತ್ತಾರೆ. ಇದನ್ನು ಲೋನ್‌ ಸ್ಕ್ಯಾಮ್‌ ಎಂದು ಕರೆಯುತ್ತೇವೆ. ನೀವು ಬಯಸಿದ ಸಾಲವನ್ನು ತ್ವರಿತವಾಗಿ ಮತ್ತು ಸುಲಭವಾಗಿ ಪಡೆಯಬಹುದು ಎಂಬ ಸುಳ್ಳು ಭರವಸೆಯೊಂದಿಗೆ ವಂಚಕರು ನಿಮ್ಮನ್ನು ಸಂಪರ್ಕಿಸುತ್ತಾರೆ. ಬಳಿಕ ಒಂದೊಂದೇ ಆಮಿಷವೊಡ್ಡಿ ಸುಲಿಗೆಗೆ ಇಳಿಯುತ್ತಾರೆ.
ಮೋಸ ಹೇಗೆ?
ವಂಚಕರು ಸಾಲ ಪಾವತಿಸುವ ಮುನ್ನ ಭದ್ರತೆಗಾಗಿ ಒಂದು ನಿರ್ದಿಷ್ಟ ಮೊತ್ತವನ್ನು ಮುಂಗಡವಾಗಿ ಕೇಳುತ್ತಾರೆ. ಅದನ್ನು ಎಂದಿಗೂ ಹಿಂದಿರುಗಿಸುವುದಿಲ್ಲ. ಜತೆಗೆ ಸಂಸ್ಕರಣಾ ಶುಲ್ಕ, ವಿಳಂಬ ಶುಲ್ಕ, ಬಡ್ಡಿ ಮತ್ತಿತರ ಕಾರಣಗಳ ಒಡ್ಡಿ ದೊಡ್ಡ ಮೊತ್ತವನ್ನೇ ಪೀಕಿಸುತ್ತಾರೆ. ಆಧುನಿಕ ತಂತ್ರಜ್ಞಾನದ ನೆರವು ಪಡೆದುಕೊಳ್ಳುವ ವಂಚಕರು ಎಸ್ಎಂಎಸ್, ಇಮೇಲ್ ಅಥವಾ ಫೋನ್ ಮೂಲಕ ಜನರನ್ನು ಸಂಪರ್ಕಿಸುತ್ತಾರೆ. ಹಣದ ಅಗತ್ಯವಿರುವವರು ಬೇಗನೇ ಈ ಕೂಪಕ್ಕೆ ಬೀಳುತ್ತಾರೆ. ಹಾಗಾದರೆ ಮೋಸ ಹೋಗದಂತಿರಲು ಏನು ಮಾಡಬೇಕು ಎನ್ನುವ ನಿಮ್ಮ ಆತಂಕ, ಗೊಂದಲಕ್ಕೆ ಇಲ್ಲಿದೆ ಉತ್ತರ.
ಇವನ್ನು ಗಮನಿಸಿ
- ಅನಧಿಕೃತ ಲೋನ್‌ ಅಪ್ಲಿಕೇಷನ್‌ಗಳು ಸಾಲದ ಷರತ್ತುಗಳನ್ನು ಮೊದಲೇ ಬಹಿರಂಗಪಡಿಸುವುದಿಲ್ಲ.
- ನಿಮ್ಮನ್ನು ಸಂಪರ್ಕಿಸಿದ ಸಂಸ್ಥೆ ನೋಂದಾಯಿಸಲ್ಪಟ್ಟಿದೆಯೇ ಎನ್ನುವುದನ್ನು ಗಮನಿಸಿ. ಸಂಸ್ಥೆಯು ಕಚೇರಿ ಅಥವಾ ಕಾನೂನುಬದ್ಧ ವೆಬ್‌ಸೈಟ್‌ ಹೊಂದಿದೆಯೇ ಎನ್ನುವದನ್ನು ಪರಿಶೀಲಿಸಿ.
- ಸಾಲ ವಿತರಿಸುವ ಮೊದಲು ಸಾಲ ಶುಲ್ಕವನ್ನು ಮುಂಗಡವಾಗಿ ಕೇಳಿದರೆ ಇದು ವಂಚನೆಯ ಜಾಲ ಎಂದರ್ಥ.
- ಇಂತಹ ಲೋನ್‌ ಸ್ಕ್ಯಾಮ್‌ಗಳು ಅತ್ಯಂತ ಕಡಿಮೆ ಬಡ್ಡಿದರವನ್ನು ಸೀಮಿತ ಅವಧಿಗೆ ಮಾತ್ರ ನೀಡುತ್ತವೆ.
ಈ ಮುಂಜಾಗ್ರತಾ ಕ್ರಮ ಕೈಗೊಳ್ಳಿ
- ಯಾವುದೇ ಕಾರಣಕ್ಕೂ ನಿಮ್ಮ ಕ್ರೆಡಿಟ್‌ / ಡೆಬಿಟ್‌ ಕಾರ್ಡ್‌ ವಿವರಗಳನ್ನು ಫೋನ್, ಇಮೇಲ್, ನೇರವಾಗಿ ಅಥವಾ ಇತರ ವಿಧಾನಗಳ ಮೂಲಕ ಯಾರೊಂದಿಗೂ ಹಂಚಿಕೊಳ್ಳಬೇಡಿ.
- ಸಾಲ ಒದಗಿಸುವ ಸಂಸ್ಥೆಯ ಕಚೇರಿ ವಿಳಾಸ ಮತ್ತು ವೆಬ್‌ಸೈಟ್‌ ಸಮರ್ಪಕವಾಗಿದೆಯಾ ಎನ್ನುವುದನ್ನು ಗಮನಿಸಿ.
- ಸಾಲ ನೀಡುವ ಕಂಪೆನಿಯ ಪೂರ್ವಾಪರ ತಿಳಿದುಕೊಳ್ಳಿ.
- ಯಾವುದೇ ಒಟಿಪಿ ಅಥವಾ ಇತರ ವೈಯಕ್ತಿಕ ಮಾಹಿತಿಯನ್ನು ಯಾರೊಂದಿಗೂ ಹಂಚಿಕೊಳ್ಳಬೇಡಿ. ಫೋನ್ ಪೇ, ಪೇಟಿಎಂ ಅಥವಾ ಗೂಗಲ್ ಪೇಯಂತಹ ಪ್ಲಾಟ್ ಫಾರ್ಮ್‌ಗಳು, ಅಧಿಕೃತ ಬ್ಯಾಂಕ್‌ಗಳು, ಆರ್‌ಬಿಐ ಅಂತಹ ಗೌಪ್ಯ ಅಥವಾ ವೈಯಕ್ತಿಕ ವಿವರಗಳನ್ನು ಎಂದಿಗೂ ಕೇಳುವುದಿಲ್ಲ.
- ವಂಚಕರು ಯಾವತ್ತೂ ಜನರನ್ನು ಆಕರ್ಷಿಸಲು ಅತಿಯಾದ ಕೊಡುಗೆಗಳನ್ನು ಪ್ರಕಟಿಸುತ್ತವೆ. ಈ ರೀತಿ ಕಂಡು ಬಂದರೆ ಕೂಡಲೇ ಎಚ್ಚೆತ್ತುಕೊಳ್ಳಿ.
ಇದನ್ನೂ ಓದಿ: Money Guide: ಕುಶಲಕರ್ಮಿಗಳಿಗೆ ನೆರವಾಗುವ ಪಿಎಂ ವಿಶ್ವಕರ್ಮ ಯೋಜನೆ; ಅರ್ಹತೆಗಳೇನು? ನೋಂದಣಿ ಹೇಗೆ?