ನವದೆಹಲಿ: ಭಾರತೀಯ ಸೇನೆಗೆ ಕಿರು ಅವಧಿಗೆ ಸೇರಲು ಜಾರಿಗೆ ತಂದಿರುವ ‘ಅಗ್ನಿಪಥ’ ಯೋಜನೆ (Agnipath Scheme) ಅಡಿಯಲ್ಲಿ ಸೇನೆ ಸೇರಿದ ಅಗ್ನಿವೀರ ಅಮೃತ್‌ಪಾಲ್‌ ಸಿಂಗ್‌ ಅವರು ಕಾರ್ಯನಿರ್ವಹಿಸುವಾಗಲೇ (On Duty) ಆತ್ಮಹತ್ಯೆ ಮಾಡಿಕೊಂಡಿದ್ದು, ಅವರಿಗೆ ಸೇನೆಯಿಂದ ಗೌರವ ನೀಡಿಲ್ಲ ಎಂಬ ವಿಷಯವೀಗ ರಾಜಕೀಯ ಬಣ್ಣಕ್ಕೆ ತಿರುಗಿದೆ. ಇದರ ಬೆನ್ನಲ್ಲೇ, ಭಾರತೀಯ ಸೇನೆಯು ಸ್ಪಷ್ಟನೆ ನೀಡಿದ್ದು, “ಅಗ್ನಿವೀರ ಅಮೃತ್‌ಪಾಲ್‌ ಸಿಂಗ್‌ (Amritpal Singh) ಸೇವೆಯಲ್ಲಿರುವಾಗಲೇ ಗುಂಡು ಹಾರಿಸಿಕೊಂಡು ಆತ್ಮಹತ್ಯೆ ಮಾಡಿಕೊಂಡ ಕಾರಣ ಸೇನಾ ಗೌರವ ನೀಡಿಲ್ಲ” ಎಂದು ತಿಳಿಸಿದೆ.
“ಅಗ್ನಿವೀರ ಅಮೃತ್‌ಪಾಲ್‌ ಸಿಂಗ್‌ ಅವರು ಡ್ಯೂಟಿಯಲ್ಲಿರುವಾಗಲೇ ಗುಂಡು ಹಾರಿಸಿಕೊಂಡು ಆತ್ಮಹತ್ಯೆ ಮಾಡಿಕೊಂಡುರುವುದು ಬೇಸರದ ಸಂಗತಿ. ಅವರ ಅಗಲಿಕೆಯಿಂದ ಭಾರತೀಯ ಸೇನೆಗೆ ನಷ್ಟವಾಗಿದೆ. ಆದರೆ, ಅವರಿಗೆ ಸೇನೆಯ ಗೌರವದ ಕುರಿತು ಜನರಲ್ಲಿ ಗೊಂದಲ ಮೂಡಿದೆ. ಅಮೃತ್‌ಪಾಲ್‌ ಸಿಂಗ್‌ ಅವರ ಶವವನ್ನು ಸೇನೆಯ ವಾಹನದಲ್ಲಿಯೇ ಅವರ ಹುಟ್ಟೂರಿಗೆ ಕಳುಹಿಸಲಾಗಿದೆ. ಅವರು ಸೇವೆಯಲ್ಲಿರುವಾಗಲೇ ಆತ್ಮಹತ್ಯೆ ಮಾಡಿಕೊಂಡ ಕಾರಣ ಸೇನೆಯಿಂದ ಗೌರವ ಸಲ್ಲಿಸಿಲ್ಲ” ಎಂಬುದಾಗಿ ಭಾರತೀಯ ಸೇನೆಯು ಭಾನುವಾರ (ಅಕ್ಟೋಬರ್‌ 15) ರಾತ್ರಿ ಸ್ಪಷ್ಟನೆ ನೀಡಿದೆ.
ಭಾರತೀಯ ಸೇನೆ ಸ್ಪಷ್ಟನೆ
"Unfortunate Death of Agniveer Amritpal Singh on 11 Oct 2023. It is a grave loss to the family and the Indian Army that Agniveer Amritpal Singh committed suicide by shooting himself while on sentry duty. In consonance with the existing practice, the mortal remains, after conduct… pic.twitter.com/p5I5KYXALf
— ANI (@ANI) October 15, 2023
“ಯೋಧರಿಗೆ ಸೇನೆಯ ಗೌರವ ನೀಡುವ ವಿಷಯದಲ್ಲಿ ಯಾವುದೇ ತಾರತಮ್ಯ ಇಲ್ಲ. ಆರ್ಮಿ ಆರ್ಡರ್‌ ಆಫ್‌ 1967ರ ಪ್ರಕಾರ ಆತ್ಮಹತ್ಯೆ ಮಾಡಿಕೊಂಡ ಯೋಧರಿಗೆ ಸೇನಾ ಗೌರವ ಸಿಗುವುದಿಲ್ಲ. 2001ರಿಂದ ಇದುವರೆಗೆ 100-140 ಯೋಧರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಅವರಿಗೆ ಯಾರಿಗೂ ಸೇನೆಯ ಗೌರವ ನೀಡಿಲ್ಲ” ಎಂದು ಭಾರತೀಯ ಸೇನೆ ಸ್ಪಷ್ಟಪಡಿಸಿದೆ.
ಅಗ್ನಿಪಥ ಯೋಜನೆ ಅಡಿಯಲ್ಲಿ ಭಾರತೀಯ ಸೇನೆಯ ನೈಟ್‌ ಕಾರ್ಪ್ಸ್‌ಗೆ (Knight Corps) ಅಮೃತ್‌ಪಾಲ್‌ ಸಿಂಗ್‌ ಸೇರಿದ್ದು, ಜಮ್ಮು-ಕಾಶ್ಮೀರದ ರಾಜೌರಿ ಜಿಲ್ಲೆಯಲ್ಲಿ ಕಾರ್ಯನಿರ್ವಹಿಸುವಾಗಲೇ ಗುಂಡು ಹಾರಿಸಿಕೊಂಡಿದ್ದಾರೆ. ಗಂಭೀರವಾಗಿ ಗಾಯಗೊಂಡಿದ್ದ ಅವರು ಬಳಿಕ ಮೃತಪಟ್ಟಿದ್ದಾರೆ ಎಂದು ಶನಿವಾರ (ಅಕ್ಟೋಬರ್‌ 14) ನೈಟ್‌ ಕಾರ್ಪ್ಸ್‌ ಮಾಹಿತಿ ನೀಡಿದೆ.
ರಾಘವ್‌ ಚಡ್ಡಾ ಆಕ್ರೋಶ
#WATCH | Delhi: AAP MP Raghav Chadha says, "..When Agniveer Amritpal was not given military honours by the BJP government, then the Punjab police decided to give state honours to him… This country is because of soldiers, not because of (political) leaders… We had said from… pic.twitter.com/8EW9xC2eKx
— ANI (@ANI) October 15, 2023
ಇದನ್ನೂ ಓದಿ: ಹುತಾತ್ಮ ತಂದೆಗೆ ಸೇನೆ ಬಟ್ಟೆ ಧರಿಸಿ ಸೆಲ್ಯೂಟ್‌ ಹೊಡೆದ 6 ವರ್ಷದ ಮಗ; ಕರುಳು ಕಿವುಚುವ ವಿಡಿಯೊ ವೈರಲ್‌
ಸೇನೆ ಗೌರವ ಕುರಿತು ವಿವಾದ ಏಕೆ?
ಅಗ್ನಿವೀರ ಅಮೃತ್‌ಪಾಲ್‌ ಸಿಂಗ್‌ ಪಂಜಾಬ್‌ನವರಾಗಿದ್ದು, ಅವರಿಗೆ ಸೇನೆಯ ಗೌರವ ಸಿಗದ ಕುರಿತು ಆಮ್‌ ಆದ್ಮಿ ಪಕ್ಷದ ಸಂಸದ ರಾಘವ್‌ ಚಡ್ಡಾ ಆಕ್ರೋಶ ವ್ಯಕ್ತಪಡಿಸಿದ್ದರು. “ಅಗ್ನಿವೀರ ಅಮೃತ್‌ಪಾಲ್‌ ಸಿಂಗ್‌ ಅವರಿಗೆ ಸೇನೆಯಿಂದ ಗೌರವ ಸಿಕ್ಕಿಲ್ಲ. ಹುತಾತ್ಮರಿಗೆ ಗೌರವ ನೀಡದ ಕೇಂದ್ರ ಸರ್ಕಾರಕ್ಕೆ ನಾಚಿಕೆಯಾಗಬೇಕು. ದೀಪಾವಳಿ ವೇಳೆ ಯೋಧರಿಗೆ ಸಿಹಿ ಹಂಚಿ, ಫೋಟೊ ತೆಗೆಸಿಕೊಂಡರೆ ಸಾಲದು, ಗೌರವವನ್ನೂ ನೀಡಬೇಕು” ಎಂದು ನರೇಂದ್ರ ಮೋದಿ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದರು.