ಎಲಾನ್ ಮಸ್ಕ್ ಸಿಇಒ ಆದಾಗಿನಿಂದಲೂ ಟ್ವಿಟರ್ ಒಂದಲ್ಲ ಒಂದು ಕಾರಣಕ್ಕೆ ಸುದ್ದಿಯಾಗುತ್ತಲೇ ಇದೆ. ಇಂದು ದೇಶದ ಪ್ರಮುಖ ಸುದ್ದಿ ಸಂಸ್ಥೆಯಾದ ಏಷ್ಯನ್ ನ್ಯೂಸ್ ಇಂಟರ್ನ್ಯಾಶನಲ್ (ANI) ಮತ್ತು ಎನ್ಡಿಟಿವಿ ಮೀಡಿಯಾಗಳ ಟ್ವಿಟರ್ ಖಾತೆಗಳೇ ಬ್ಲಾಕ್ ಆಗಿವೆ. ಎಎನ್ಐ ಸುದ್ದಿ ಸಂಸ್ಥೆಯ ಟ್ವಿಟರ್ ಖಾತೆ ಬ್ಲಾಕ್ ಆಗಿರುವ ಫೋಟೋವನ್ನು, ಎಎನ್ಐ ಸಂಪಾದಕರಾದ ಸ್ಮಿತಾ ಪ್ರಕಾಶ್ ಅವರು ತಮ್ಮ ವೈಯಕ್ತಿಕ ಟ್ವಿಟರ್ ಖಾತೆಯಲ್ಲಿ ಶೇರ್ ಮಾಡಿಕೊಂಡು ಈ ವಿಷಯ ತಿಳಿಸಿದ್ದಾರೆ.
‘ಯಾರೆಲ್ಲ ಎಎನ್ಐ ಸುದ್ದಿ ಸಂಸ್ಥೆಯನ್ನು ಟ್ವಿಟರ್ನಲ್ಲಿ ಫಾಲೋ ಮಾಡ್ತಿದ್ದೀರೋ, ಅವರಿಗೆ ಒಂದು ನಿರಾಸೆಯ ಸುದ್ದಿಯಿದೆ. 7.6 ಮಿಲಿಯನ್ಗಳಷ್ಟು ಫಾಲೋವರ್ಸ್ನ್ನು ಹೊಂದಿರುವ, ದೇಶದ ಅತಿದೊಡ್ಡ ನ್ಯೂಸ್ ಏಜೆನ್ಸಿಯ ಟ್ವಿಟರ್ ಖಾತೆಯನ್ನು ಟ್ವಿಟರ್ ಕಂಪನಿ ಬ್ಲಾಕ್ ಮಾಡಿದೆ. ಟ್ವಿಟರ್ ಅಕೌಂಟ್ ಕ್ರಿಯೇಟ್ ಮಾಡುವವರಿಗೆ ಕನಿಷ್ಠ 13ವರ್ಷವಾಗಿರಬೇಕು ಎಂಬ ನಿಯಮವನ್ನು ಉಲ್ಲಂಘಿಸಿದ್ದಕ್ಕಾಗಿ ಅಕೌಂಟ್ ಬ್ಲಾಕ್ ಮಾಡಿದ್ದಾಗಿ ನಮಗೆ ಇಮೇಲ್ ಸಂದೇಶ ಕಳಿಸಿದ್ದಾರೆ. ಮೊದಲು ನಮಗೆ ನೀಡಲಾಗಿದ್ದ ಗೋಲ್ಡ್ ಟಿಕ್ನ್ನು ವಾಪಸ್ ಪಡೆದು, ನೀಲಿ ಟಿಕ್ ಕೊಡಲಾಗಿತ್ತು. ಈಗ ಇಡೀ ಟ್ವಿಟರ್ ಖಾತೆಯನ್ನೇ ಲಾಕ್ ಮಾಡಲಾಗಿದೆ’ ಎಂದು ಸ್ಮಿತಾ ಪ್ರಕಾಶ್ ಹೇಳಿದ್ದಾರೆ. ಹಾಗೇ, ಎಲಾನ್ ಮಸ್ಕ್ ಅವರನ್ನೂ ಟ್ಯಾಗ್ ಮಾಡಿದ್ದಾರೆ. ಅದಾಗಿ ಕೆಲವೇ ಹೊತ್ತಿಗೆ ಎನ್ಡಿಟಿವಿ ಮಾಧ್ಯಮದ ಟ್ವಿಟರ್ ಅಕೌಂಟ್ ಕೂಡ ಲಾಕ್ ಆಗಿದೆ. ಅದರ ಫೋಟೋವನ್ನೂ ಸ್ಮಿತಾ ಅವರು ತಮ್ಮ ಟ್ವಿಟರ್ ಖಾತೆಯಲ್ಲಿ ಶೇರ್ ಮಾಡಿಕೊಂಡಿದ್ದಾರೆ.
‘ಟ್ವಿಟರ್ ಖಾತೆ ತೆರೆಯಲು ಕಡ್ಡಾಯವಾಗಿ 13ವರ್ಷ ಆಗಿರಬೇಕು. ಆದರೆ ನಿಮಗೆ 13 ವರ್ಷ ಆಗಿಲ್ಲ, ನೀವು ಈ ನಿಯಮ ಪಾಲನೆ ಮಾಡಿಲ್ಲ. ಹೀಗಾಗಿ ನಿಮ್ಮ ಅಕೌಂಟ್ನ್ನು ಲಾಕ್ ಮಾಡಲಾಗಿದ್ದು, ಶೀಘ್ರದಲ್ಲೇ ಟ್ವಿಟರ್ ಅಕೌಂಟ್ನ್ನು ತೆಗೆದು ಹಾಕಲಾಗುವುದು’ ಎಂದು ಎಎನ್ಐಗೆ ಕಳಿಸಿದ ಇಮೇಲ್ನಲ್ಲಿ ಉಲ್ಲೇಖವಾಗಿದೆ. ಇನ್ನು ಎನ್ಡಿಟಿವಿ ಮಾಧ್ಯಮದ ಅಕೌಂಟ್ ಕೂಡ ಲಾಕ್ ಆಗಿದೆ. ಆದರೆ ಆ ಸಂಸ್ಥೆ ಇನ್ನೂ ಈ ಬಗ್ಗೆ ಹೇಳಿಕೆ ಬಿಡುಗಡೆ ಮಾಡಿಲ್ಲ.
ಇದನ್ನೂ ಓದಿ: Elon Musk : ಟ್ವಿಟರ್ ವೈಯಕ್ತಿಕ ಖಾತೆಯಿಂದ ಎಲಾನ್ ಮಸ್ಕ್‌ಗೆ ತಿಂಗಳಿಗೆ 80 ಲಕ್ಷ ರೂ. ಆದಾಯ! ಇದು ಹೇಗೆ?