ಪಟನಾ: ಬಿಹಾರ ಮಹಾ ಘಟ್ ಬಂಧನ್ ಸರ್ಕಾರದ ಮೊದಲನೇ ವಿಕೆಟ್ ಪತನವಾಗಿದೆ. ಇಲ್ಲಿನ ಕಾನೂನು ಸಚಿವರಾಗಿದ್ದ, ಆರ್ಜೆಡಿ ನಾಯಕ ಕಾರ್ತೀಕ್ ಕುಮಾರ್ (ಕಾರ್ತಿಕೇಯ ಸಿಂಗ್) ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ. ಇವರ ವಿರುದ್ಧ ಕಿಡ್ನ್ಯಾಪ್ ಕೇಸ್ ದಾಖಲಾಗಿತ್ತು. ಆಗಸ್ಟ್ 16ರಂದು ಕೋರ್ಟ್ಗೆ ಬಂದು ಶರಣಾಗುವಂತೆ ಅವರಿಗೆ ಸಮನ್ಸ್ ನೀಡಲಾಗಿತ್ತು. ಆದರೆ ಕಾರ್ತೀಕ್ ಕುಮಾರ್ ಕೋರ್ಟ್ಗೆ ಹೋಗದೆ, ಇತ್ತ ಸಚಿವರಾಗಿ ಪ್ರಮಾಣ ವಚನ ಸ್ವೀಕಾರ ಮಾಡಿದ್ದರು.
ಇಂಥ ಕ್ರಿಮಿನಲ್ ಕೇಸ್ ಹೊತ್ತಿರುವ ಸಚಿವನಿಗೇ ಕಾನೂನು ಇಲಾಖೆಯನ್ನು ನೀಡಲಾಗಿತ್ತು. ಇದನ್ನು ಬಿಜೆಪಿ ತೀವ್ರವಾಗಿ ಟೀಕಿಸಿದ್ದಲ್ಲದೆ, ಬಿಹಾರದಲ್ಲಿ ಮಹಾ ಘಟ್ ಬಂಧನ್ ಸರ್ಕಾರದ ಮೈತ್ರಿ ಪಕ್ಷವಾದ ಸಿಪಿಐಎಂಎಲ್ (Communist Party of India (Marxist-Leninist) Liberation) ಪಕ್ಷದ ಮುಖಂಡರೂ ಕೂಡ ಆಕ್ಷೇಪ ಎತ್ತಿದ್ದರು. ಕಾರ್ತೀಕ್ ಕುಮಾರ್ರನ್ನು ಕಾನೂನು ಸಚಿವನಾಗಿ ನೇಮಕ ಮಾಡಿದ್ದನ್ನು, ಇನ್ನೊಮ್ಮೆ ಪರಿಶೀಲನೆ ಮಾಡಿ ಎಂದು ನಿತೀಶ್ ಕುಮಾರ್ ಮತ್ತು ತೇಜಸ್ವಿ ಯಾದವ್ಗೆ ಒತ್ತಾಯಿಸಿದ್ದರು. ಹೀಗೆ ವಿರೋಧ ಹೆಚ್ಚಾದ ಬೆನ್ನಲ್ಲೇ ಕಾರ್ತೀಕ್ ಕುಮಾರ್ ಇಲಾಖೆಯನ್ನು ಬದಲು ಮಾಡಲಾಗಿತ್ತು. ಕಾನೂನು ಇಲಾಖೆ ವಾಪಸ್ ಪಡೆದು, ಸಕ್ಕರೆ ಉದ್ಯಮ ಇಲಾಖೆ ಕೊಡಲಾಗಿತ್ತು. ಇದರಿಂದ ಅಸಮಾಧಾನಗೊಂಡ ಕಾರ್ತೀಕ್ ಕುಮಾರ್ ರಾಜೀನಾಮೆ ಕೊಟ್ಟಿದ್ದಾರೆ. ಅವರ ರಾಜೀನಾಮೆಯನ್ನು ಸ್ವೀಕರಿಸಿದ ಮುಖ್ಯಮಂತ್ರಿ ನಿತೀಶ್ ಕುಮಾರ್, ಅದನ್ನು ರಾಜ್ಯಪಾಲರಿಗೆ ಕಳಿಸಿಕೊಟ್ಟಿದ್ದಾರೆ.
ಕಾರ್ತೀಕ್ ಕುಮಾರ್ ವಿರುದ್ಧ ಕಿಡ್ನ್ಯಾಪ್ ಕೇಸ್ ದಾಖಲಾಗಿದ್ದು 2014ರಲ್ಲಿ. ರಾಜೀವ್ ರಂಜನ್ ಎಂಬ ಬಿಲ್ಡರ್ನನ್ನು ಅಪಹರಿಸಿದ ಆರೋಪದಡಿ ಒಟ್ಟು 11 ಮಂದಿ ವಿರುದ್ಧ ಪಟನಾದ ಬಿಹ್ಟಾ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಅದೇ ಕೇಸ್ಗೆ ಸಂಬಂಧಪಟ್ಟ ವಿಚಾರಣೆ ಕೋರ್ಟ್ನಲ್ಲಿ ನಡೆಯುತ್ತಿದೆ. ತನ್ನ ಮೇಲಿನ ಆರೋಪ ಸುಳ್ಳು ಎಂದೇ ಕಾರ್ತೀಕ್ ಕುಮಾರ್ ಹೇಳುತ್ತ ಬಂದಿದ್ದರೂ, ಆಗಸ್ಟ್ 16ರೊಳಗೆ ಕೋರ್ಟ್ಗಾಗಲೀ, ಪೊಲೀಸ್ ಠಾಣೆಗಾಗಲೀ ಬಂದು ಶರಣಾಗಬೇಕು ಎಂದು ವಾರೆಂಟ್ನಲ್ಲಿ ಉಲ್ಲೇಖಿಸಲಾಗಿತ್ತು.
ಕಾರ್ತೀಕ್ ಕುಮಾರ್ ರಾಜೀನಾಮೆ ನೀಡುತ್ತಿದ್ದಂತೆ, ಬಿಜೆಪಿಯ ಸುಶೀಲ್ ಮೋದಿ ಟ್ವೀಟ್ ಮಾಡಿ, ‘ಮೊದಲ ವಿಕೆಟ್ ಪತನಾಗಿದೆ. ಹೀಗೆ ನೋಡುತ್ತಿರಿ, ಇನ್ನಷ್ಟು ವಿಕೆಟ್ಗಳು ಹೋಗುತ್ತಿರುತ್ತವೆ’ ಎಂದು ಹೇಳಿದ್ದಾರೆ. ಮಹಾ ಘಟ್ ಬಂಧನ್ ಸರ್ಕಾರದಲ್ಲಿನ ಶೇ. 72ರಷ್ಟು ಸಚಿವರ ವಿರುದ್ಧ ಕ್ರಿಮಿನಲ್ ಕೇಸ್ ಇರುವುದು ದೃಢಪಟ್ಟಿದೆ. ಅಂದರೆ ಸಂಪುಟ ಸೇರಿದ 31 ಸಚಿವರಲ್ಲಿ 27 ಮಂದಿ ತಮ್ಮ ವಿರುದ್ಧ ಕ್ರಿಮಿನಲ್ ಕೇಸ್ ದಾಖಲಾಗಿದ್ದಾಗಿ ಘೋಷಿಸಿಕೊಂಡಿದ್ದಾರೆ. ಹೀಗಾಗಿ ಒಂದೊಂದೇ ಕೇಸ್ಗಳು ಮುನ್ನೆಲೆಗೆ ಬಂದರೆ ನಿಶ್ಚಿತವಾಗಿಯೂ ಮಹಾ ಘಟ್ ಬಂಧನ್ ಸರ್ಕಾರಕ್ಕೆ ಆಪತ್ತು ತಪ್ಪಿದ್ದಲ್ಲ.
ಇದನ್ನೂ ಓದಿ: ಆಕೆಯನ್ನು ತೆಗೆಯದೆ ಇದ್ದರೆ ನಾನು ರಾಜೀನಾಮೆ ಕೊಡುತ್ತೇನೆ; ಮಹಾ ಘಟ್ ಬಂಧನ್ದಲ್ಲಿ ಜಗಳ !