ಹೊಸದಿಲ್ಲಿ: ಚೀನಾದ ಸೈನಿಕರೊಂದಿಗೆ (china soldiers) ಭಾರತೀಯ ಯೋಧರು (Indian Soldiers) ಮೂರು ವರ್ಷದ ಹಿಂದೆ ಮುಖಾಮುಖಿ ಚಕಮಕಿ ನಡೆಸಿದ ಗಡಿ ನಿಯಂತ್ರಣ ರೇಖೆಯ (Line of Actual Control -LAC) ಸಮೀಪದಲ್ಲಿ ನಾಗರಿಕ ವಾಯುನಿಲ್ದಾಣ (Civilian Airport) ಸ್ಥಾಪಿಸುವ ಕೆಲಸವನ್ನು ನರೇಂದ್ರ ಮೋದಿ (PM Narendra Modi) ಸರ್ಕಾರ ಆರಂಭಿಸಿದೆ.
ಲಡಾಖ್‌ನ ನುಬ್ರಾ ಪ್ರದೇಶದ ಥೋಯಿಸ್ ವಾಯುನೆಲೆಯಲ್ಲಿ ಹೊಸ ನಾಗರಿಕ ಟರ್ಮಿನಲ್ ಕಟ್ಟಡವನ್ನು ನಿರ್ಮಿಸುವ ಕೆಲಸವನ್ನು ಸರ್ಕಾರ ಪ್ರಾರಂಭಿಸಿದೆ. ಇದು ಚೀನಾದೊಂದಿಗಿನ ವಾಸ್ತವಿಕ ನಿಯಂತ್ರಣ ರೇಖೆಗೆ (ಎಲ್‌ಎಸಿ) ಬಹಳ ಹತ್ತಿರದಲ್ಲಿದೆ.
ಥೋಯಿಸ್ ವಾಯುಸೇನಾ ನೆಲೆಯಾಗಿದ್ದು, ಸಶಸ್ತ್ರ ಪಡೆಗಳು ಪ್ರತ್ಯೇಕವಾಗಿ ಬಳಸುವ ರನ್‌ವೇಯನ್ನು ಹೊಂದಿದೆ. ಆದರೆ UDAN ಯೋಜನೆಯಡಿಯಲ್ಲಿ ಲೇಹ್‌ನಿಂದ ಕೆಲವು ನಾಗರಿಕ ವಿಮಾನಗಳು ಅಲ್ಲಿಗೆ ತೆರಳಿವೆ. ಆದಾಗ್ಯೂ, ಸರ್ಕಾರವು ಶೀಘ್ರದಲ್ಲೇ ಥೋಯಿಸ್‌ಗೆ ಹೆಚ್ಚಿನ ಪ್ರಯಾಣಿಕ ವಿಮಾನಗಳನ್ನು ಕರೆದೊಯ್ಯಲು ಯೋಜಿಸುತ್ತಿದೆ. ಥೋಯಿಸ್‌ನಲ್ಲಿ ಹೊಸ ಇಂಟಿಗ್ರೇಟೆಡ್ ಪ್ಯಾಸೆಂಜರ್ ಟರ್ಮಿನಲ್ ನಿರ್ಮಿಸಲು ಸಲಹೆಗಾರರನ್ನು ನೇಮಿಸಲು ಬಿಡ್‌ಗಳನ್ನು ಆಹ್ವಾನಿಸಿದೆ.
ಇದು ಲಡಾಖ್‌ನ ಎರಡನೇ ನಾಗರಿಕ ವಿಮಾನ ನಿಲ್ದಾಣವಾಗಲಿದೆ. ಗಡಿಯ ಸಮೀಪದಿಂದ ದೇಶದ ದೂರದ ಮೂಲೆಗಳ ನಾಗರಿಕರಿಗೆ ವಾಯು ಸಂಪರ್ಕವನ್ನು ೊದಗಿಸಲಿದೆ. ಪೂರ್ಣ ಯೋಜನೆಯ ಅಂದಾಜು ವೆಚ್ಚ 130 ಕೋಟಿ ರೂ. 5,300 ಚದರ ಮೀಟರ್ ವಿಸ್ತೀರ್ಣದೊಂದಿಗೆ, ಕೇಂದ್ರೀಯ ಹವಾನಿಯಂತ್ರಿತ ಡೊಮೆಸ್ಟಿಕ್ ಪ್ಯಾಸೆಂಜರ್ ಟರ್ಮಿನಲ್ ಕಟ್ಟಡ ಥೋಯಿಸ್‌ನಲ್ಲಿ ಬರುವ ನಿರೀಕ್ಷೆಯಿದೆ.
“ಕಟ್ಟಡವು ಆಧುನಿಕ ರಚನೆಗೆ ಹೊಂದಿಕೆಯಾಗುವ, ಸ್ಥಳೀಯ ವಾಸ್ತುಶಿಲ್ಪ, ಸಂಸ್ಕೃತಿ, ಕಲೆ ಮತ್ತು ಪರಂಪರೆಯನ್ನು ಬಿಂಬಿಸುವ, ಕಲಾತ್ಮಕವಾಗಿ ಇಷ್ಟವಾಗುವ ಮತ್ತು ಹಿತವಾದ ಒಳಾಂಗಣ ಅಲಂಕಾರವನ್ನು ಒದಗಿಸಬೇಕು. ಜನಸಂಖ್ಯಾಶಾಸ್ತ್ರ, ಪ್ರಯಾಣದ ಉದ್ದೇಶ, ವೆಚ್ಚ, ಆದ್ಯತೆಗಳು, ವೃತ್ತಿ ಮತ್ತು ಆದಾಯ ಗುಂಪಿನ ಪ್ರಕಾರ ವಿಮಾನ ನಿಲ್ದಾಣದ ಪ್ರದೇಶ ಮತ್ತು ಪ್ರಯಾಣಿಕರ ವಿವರವನ್ನು ನಿರ್ಣಯಿಸಲು ವಿವರವಾದ ಪ್ರಯಾಣಿಕರ ಸಮೀಕ್ಷೆಯನ್ನು ಸಹ ಕೈಗೊಳ್ಳಲಾಗುತ್ತದೆ” ಎಂದು ಬಿಡ್ ಡಾಕ್ಯುಮೆಂಟ್ ಉಲ್ಲೇಖಿಸಿದೆ.
ಸರ್ಕಾರವು 28 ಕನಾಲ್ ಭೂಮಿಯನ್ನು ಇದಕ್ಕಾಗಿ ಮಂಜೂರು ಮಾಡಿದ್ದು, ಅದರಲ್ಲಿ ನಾಗರಿಕ ವಿಮಾನಗಳಿಗೆ ಟರ್ಮಿನಲ್‌ಗಳು ಮತ್ತು ಇತರ ಸಂಬಂಧಿತ ಮೂಲಸೌಕರ್ಯಗಳು ಬರಲಿವೆ. ಸ್ಥಳೀಯ ಆರ್ಥಿಕತೆಯನ್ನು ಹೆಚ್ಚಿಸಲು ಥೋಯಿಸ್‌ನಲ್ಲಿ ನಾಗರಿಕ ವಿಮಾನ ನಿಲ್ದಾಣಕ್ಕಾಗಿ ಸ್ಥಳೀಯರ ಬಹುಕಾಲದ ಬೇಡಿಕೆಯಿದೆ. ಹೊಸ ಟರ್ಮಿನಲ್ ಕಟ್ಟಡವು ನಿರ್ಗಮನ ಮತ್ತು ಆಗಮನದ ಪ್ರದೇಶಗಳು, ಭದ್ರತಾ ನೆಲೆಯ ಪ್ರದೇಶಗಳು, ಸಿವಿಲ್ ಎನ್‌ಕ್ಲೇವ್‌ನಲ್ಲಿ ಇತರ ಸೌಲಭ್ಯಗಳನ್ನು ಹೊಂದಲಿದೆ. ಲಡಾಖ್ ಸಂಸದ ಜಮ್ಯಾಂಗ್ ತ್ಸೆರಿಂಗ್ ನಮ್ಗ್ಯಾಲ್ ಅವರು ಥೋಯಿಸ್‌ನಲ್ಲಿ ನಾಗರಿಕ ವಿಮಾನ ನಿಲ್ದಾಣಕ್ಕಾಗಿ ಒತ್ತಾಯಿಸಿದ್ದರು.
ಇದನ್ನೂ ಓದಿ: Ladakh Hanle: ಲಡಾಖ್‌ನ ಹನ್ಲೆಯಲ್ಲಿ ನಕ್ಷತ್ರ ಪುಂಜಗಳನ್ನು ನೋಡಿ! ಏನು ಅದ್ಭುತ!