ಪಟನಾ: ಬಿಹಾರದ ಆರ್ಜೆಡಿ (ರಾಷ್ಟ್ರೀಯ ಜನತಾ ದಳ್) ಪಕ್ಷದ ನಾಲ್ವರು ಪ್ರಮುಖ ನಾಯಕರ ಮನೆ ಮೇಲೆ ಇಂದು ಸಿಬಿಐ ದಾಳಿಯಾಗಿದೆ. ಹಿಂದೆ 2004ರಿಂದ 2009ರವರೆಗೆ ಲಾಲು ಪ್ರಸಾದ್ ಯಾದವ್ ಕೇಂದ್ರದಲ್ಲಿ ರೈಲ್ವೆ ಮಂತ್ರಿಯಾಗಿದ್ದಾಗ ನಡೆದ ‘ಉದ್ಯೋಗಕ್ಕಾಗಿ ಭೂಮಿ’ (Land For Job Case ಗೋಲ್ಮಾಲ್ ಕೇಸ್ನ ತನಿಖೆಯ ಭಾಗವಾಗಿ ಇಂದು ರೇಡ್ ಆಗಿದೆ. ಲಾಲು ಪ್ರಸಾದ್ ಯಾದವ್ರ ಇಡೀ ಕುಟುಂಬದ ವಿರುದ್ಧ ಇರುವ ಆರೋಪ ಇದು. ಅಷ್ಟೇ ಅಲ್ಲ, ಲಾಲುಗೆ ಆಪ್ತರಾಗಿದ್ದ ಹಲವರ ಹೆಸರೂ ಕೂಡ ಸಿಬಿಐ ಎಫ್ಐಆರ್ನಲ್ಲಿ ಉಲ್ಲೇಖವಾಗಿದೆ. ಕೇಸ್ನೊಂದಿಗೆ ಲಿಂಕ್ ಇದ್ದವರನ್ನೆಲ್ಲ ಸಿಬಿಐ ವಿಚಾರಣೆಗೆ ಒಳಪಡಿಸುತ್ತಿದೆ.
ಇಂದು ವಿಶ್ವಾಸಮತ ಯಾಚನೆ
ಬಿಹಾರದಲ್ಲಿ ಆಗಸ್ಟ್ 10ರಂದು ಮಹಾ ಘಟ್ ಬಂಧನ್ ಸರ್ಕಾರ ರಚನೆಯಾಗಿದೆ. ಜೆಡಿಯು ಮತ್ತು ಬಿಜೆಪಿ ಮೈತ್ರಿ ಮುರಿದು ಬಿದ್ದು, ಜೆಡಿಯು-ಆರ್ಜೆಡಿ-ಕಾಂಗ್ರೆಸ್ ಮತ್ತು ಇತರ ಪಕ್ಷಗಳನ್ನೊಳಗೊಂಡ ಸರ್ಕಾರವಿದು. ತನಗೆ 165 ಶಾಸಕರ ಬೆಂಬಲ ಇದೆ ಎಂದು ಸರ್ಕಾರ ರಚನೆ ಮಾಡುವ ಹೊತ್ತಲ್ಲಿ ಹೇಳಿಕೊಂಡಿದ್ದ ಸಿಎಂ ನಿತೀಶ್ ಕುಮಾರ್ ಇಂದು ಅಲ್ಲಿನ ವಿಧಾನಸಭೆಯಲ್ಲಿ ವಿಶ್ವಾಸ ಮತ ಯಾಚನೆ ಮಾಡಲಿದ್ದಾರೆ. ಆದರೆ ಇಂದೇ ಬೆಳಗ್ಗೆ ಆರ್ಜೆಡಿಯ ಪ್ರಮುಖ ನಾಲ್ವರು ನಾಯಕರ ಮನೆ ಮೇಲೆ ಸಿಬಿಐ ರೇಡ್ ಆಗಿದೆ.
ಆರ್ಜೆಡಿ ಪ್ರತಿಭಟನೆ
ಲಾಲು ಪ್ರಸಾದ್ ಯಾದವ್ ಆಪ್ತರಲ್ಲಿ ಒಬ್ಬರಾದ ಸುನೀಲ್ ಸಿಂಗ್, ಸುಬೋಧ್ ರಾಯ್, ಅಷ್ಫಾಕ್ ಕರೀಮ್ ಮತ್ತು ಫೈಯಾಜ್ ಅಹ್ಮದ್ ಮನೆಗಳನ್ನು ಇಂದು ಸಿಬಿಐ ರೇಡ್ ಮಾಡಿದೆ. ಇವರೆಲ್ಲರೂ ಸದ್ಯದ ಬಿಹಾರ ಉಪಮುಖ್ಯಮಂತ್ರಿ ತೇಜಸ್ವಿ ಯಾದವ್ಗೆ ಕೂಡ ಆಪ್ತರು. ಇಂದು ಈ ನಾಯಕರ ಮನೆ ಮೇಲೆ ಸಿಬಿಐ ದಾಳಿಯಾಗುತ್ತಿದ್ದಂತೆ ಆರ್ಜೆಡಿಯ ಹಲವು ನಾಯಕರು ಪ್ರತಿಭಟನೆ ನಡೆಸುತ್ತಿದ್ದಾರೆ. ಬಿಹಾರ ವಿಧಾನಸಭೆ ಬಳಿ ಕುಳಿತು ಕೇಂದ್ರ ಸರ್ಕಾರದ ವಿರುದ್ಧ ಘೋಷಣೆ ಕೂಗುತ್ತಿದ್ದಾರೆ.
ತಮ್ಮ ನಿವಾಸದ ಮೇಲೆ ಸಿಬಿಐ ದಾಳಿ ಮಾಡಿದ್ದರ ಬಗ್ಗೆ ಪ್ರತಿಕ್ರಿಯೆ ನೀಡಿದ ಸುನೀಲ್ ಸಿಂಗ್, ‘ಈ ದಾಳಿಯನ್ನು ಉದ್ದೇಶಪೂರ್ವಕವಾಗಿಯೇ ಮಾಡಲಾಗಿದೆ. ಹೀಗೆಲ್ಲ ದಾಳಿ ಮಾಡಿಸಿದರೆ, ಶಾಸಕರು ಹೆದರಿಕೊಳ್ಳುತ್ತಾರೆ. ಬಿಜೆಪಿ ಪರವಾಗಿ ನಿಲ್ಲುತ್ತಾರೆ ಎಂದುಕೊಂಡುಬಿಟ್ಟಿದ್ದಾರೆ’ ಎಂದು ಕಿಡಿಕಾರಿದ್ದಾರೆ. ಹಾಗೇ, ಆರ್ಜೆಡಿಯ ರಾಜ್ಯಸಭಾ ಸಂಸದ ಮನೋಜ್ ಝಾ ಮಾತನಾಡಿ, ‘ಇಡಿ, ಐಟಿ, ಸಿಬಿಐ ದಾಳಿ ಮಾಡುತ್ತಿದೆ ಎಂದು ವ್ಯಾಖ್ಯಾನಿಸುವುದೇ ತಪ್ಪು. ನಿಜ ಹೇಳಬೇಕು ಎಂದರೆ ಇದು ಬಿಜೆಪಿ ಮಾಡುತ್ತಿರುವ ರೇಡ್. ತನಿಖಾ ದಳಗಳೆಲ್ಲ ಬಿಜೆಪಿ ಕೈಕೆಳಗೆ ಕೆಲಸ ಮಾಡುತ್ತಿವೆ. ಇಂದು ಬಿಹಾರ ವಿಧಾನಸಭೆಯಲ್ಲಿ ಮಹಾ ಘಟ್ ಬಂಧನ್ ಸರ್ಕಾರದ ವಿಶ್ವಾಸ ಮತ ಯಾಚನೆ ನಡೆಯಲಿದೆ. ಆರ್ಜೆಡಿ ಶಾಸಕರನ್ನು ಹೆದರಿಸಲೇ ಈ ದಾಳಿಯೂ ನಡೆದಿದೆ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: ಲಾಲು ಆಪ್ತ ಸುನೀಲ್ ಸಿಂಗ್ ಸೇರಿ ಆರ್ಜೆಡಿ ನಾಯಕರ ಮನೆ ಮೇಲೆ ಸಿಬಿಐ ದಾಳಿ