ಹೊಸದಿಲ್ಲಿ: ರದ್ದಿ ಪೇಪರು ಹಾಗೂ ಹಳೆಯ ಅನುಪಯುಕ್ತ ಕಡತಗಳ ಮಾರಾಟದಿಂದಲೇ (selling scrap) ಎರಡು ಚಂದ್ರಯಾನ- 3 (Chandrayaan-3) ಮಿಷನ್‌ಗಳ ಬಜೆಟ್‌ನಷ್ಟು ಹಣವನ್ನು ಪ್ರಧಾನ ಮಂತ್ರಿ ನರೇಂದ್ರ ಮೋದಿ (PM Narendra Modi) ಸರ್ಕಾರ ಗಳಿಸಿದೆ!
ಚಂದ್ರನತ್ತ ಭಾರತದ ಯಶಸ್ವಿ ಚಂದ್ರಯಾನ-3 ಮಿಷನ್ ಬಜೆಟ್‌ ಸುಮಾರು 600 ಕೋಟಿ ರೂ. ರದ್ದಿ ಮಾರಿ ಕೇಂದ್ರ ಸರ್ಕಾರ ಗಳಿಸಿರುವುದು 1,163 ಕೋಟಿ ರೂಪಾಯಿ. ಕಡತಗಳಂತಹ ಸ್ಕ್ರ್ಯಾಪ್, ದೋಷಯುಕ್ತ ಕಚೇರಿ ಉಪಕರಣಗಳು, ಬಳಕೆಯಲ್ಲಿಲ್ಲದ ವಾಹನಗಳನ್ನು ಮಾರಾಟ ಮಾಡುವ ಮೂಲಕ ಇಷ್ಟು ಹಣವನ್ನು ಗಳಿಸಲಾಗಿದೆ.
ಇತ್ತೀಚಿನ ಸರ್ಕಾರದ ವರದಿಯ ಪ್ರಕಾರ ಅಕ್ಟೋಬರ್ 2021ರಿಂದ ಸರ್ಕಾರ ಸುಮಾರು 1,163 ಕೋಟಿ ರೂಪಾಯಿಗಳನ್ನು ಸ್ಕ್ರ್ಯಾಪ್ ಮಾರಾಟದಿಂದ ಗಳಿಸಿದೆ. ಇದರಿಂದ ಕೇಂದ್ರ ಸರ್ಕಾರಿ ಕಚೇರಿಗಳಲ್ಲಿ 96 ಲಕ್ಷ ಭೌತಿಕ ಕಡತಗಳನ್ನು ಕ್ಲಿಯರ್‌ ಮಾಡಲಾಗಿದೆ ಮತ್ತು ಸರ್ಕಾರಿ ಕಚೇರಿಗಳಲ್ಲಿ ಸುಮಾರು 355 ಲಕ್ಷ ಚದರ ಅಡಿ ಜಾಗವನ್ನು ಮುಕ್ತಗೊಳಿಸಲಾಗಿದೆ. ಇದು ಕಚೇರಿಗಳಲ್ಲಿನ ಕಾರಿಡಾರ್‌ಗಳನ್ನು ಸ್ವಚ್ಛಗೊಳಿಸಲು, ಮುಕ್ತ ಸ್ಥಳವನ್ನು ಮನರಂಜನಾ ಕೇಂದ್ರಗಳಾಗಿ ಮತ್ತು ಇತರ ಉಪಯುಕ್ತ ಉದ್ದೇಶಗಳಿಗಾಗಿ ಬಳಸಿಕೊಳ್ಳಲು ಕಾರಣವಾಗಿದೆ.
“16,000 ಕೋಟಿ ರೂ. ವೆಚ್ಚದ ರಷ್ಯಾದ ಚಂದ್ರನ ಮಿಷನ್ ವಿಫಲವಾಗಿದೆ. ನಮ್ಮ (ಚಂದ್ರಯಾನ-3) ಮಿಷನ್ ಕೇವಲ 600 ಕೋಟಿ ರೂ. ವೆಚ್ಚದ್ದು. ಚಂದ್ರ ಮತ್ತು ಬಾಹ್ಯಾಕಾಶ ಯಾನಗಳನ್ನು ಆಧರಿಸಿದ ಹಾಲಿವುಡ್ ಚಲನಚಿತ್ರಗಳಿಗೇ 600 ಕೋಟಿ ರೂ.ಗಿಂತ ಹೆಚ್ಚು ವೆಚ್ಚವಾಗುತ್ತದೆ” ಎಂದು ಈ ವರ್ಷದ ಆರಂಭದಲ್ಲಿ ಬಾಹ್ಯಾಕಾಶ ಕಾರ್ಯಾಚರಣೆ ಸಹಕಾರಿ ಸಚಿವ ಜಿತೇಂದ್ರ ಸಿಂಗ್ ಹೇಳಿದ್ದರು.
ಸ್ಕ್ರ್ಯಾಪ್ ಮಾರಾಟದಿಂದ 1,163 ಕೋಟಿ ರೂಪಾಯಿ ಆದಾಯದ ಅಂಕಿ ಅಂಶವು ಪಿಎಂ ಮೋದಿಯವರ ಸರ್ಕಾರದ ಸ್ವಚ್ಛತೆಯ ಕಾರ್ಯಕ್ರಮವು ಎಷ್ಟು ದೊಡ್ಡ ಮತ್ತು ಮಹತ್ವದ್ದಾಗಿದೆ ಎಂಬುದನ್ನು ತೋರಿಸಿದೆ. ಆಡಳಿತ ಸುಧಾರಣಾ ಮತ್ತು ಸಾರ್ವಜನಿಕ ಕುಂದುಕೊರತೆಗಳ ಇಲಾಖೆ ಈ ಅಭಿಯಾನದ ನೇತೃತ್ವ ವಹಿಸಿದೆ.
ಈ ವರ್ಷ ಸರ್ಕಾರ ಸ್ಕ್ರ್ಯಾಪ್ ಮಾರಾಟದಿಂದ ಗಳಿಸಿದ 556 ಕೋಟಿ ರೂಪಾಯಿಗಳಲ್ಲಿ ಸುಮಾರು 225 ಕೋಟಿ ರೂಪಾಯಿಗಳನ್ನು ರೈಲ್ವೇ ಸಚಿವಾಲಯದಿಂದಲೇ ಗಳಿಸಿದೆ. ಇತರ ಪ್ರಮುಖ ಆದಾಯಗಳೆಂದರೆ ರಕ್ಷಣಾ ಸಚಿವಾಲಯ 168 ಕೋಟಿ ರೂ., ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ 56 ಕೋಟಿ ರೂ. ಮತ್ತು ಕಲ್ಲಿದ್ದಲು ಸಚಿವಾಲಯ 34 ಕೋಟಿ ರೂ. ಈ ವರ್ಷ ಮುಕ್ತಗೊಳಿಸಲಾದ ಒಟ್ಟು 164 ಲಕ್ಷ ಚದರ ಅಡಿ ಜಾಗದಲ್ಲಿ ಗರಿಷ್ಠ ಜಾಗವನ್ನು ಕಲ್ಲಿದ್ದಲು ಸಚಿವಾಲಯದಲ್ಲಿ 66 ಲಕ್ಷ ಚದರ ಅಡಿ ಮತ್ತು ಭಾರೀ ಕೈಗಾರಿಕೆ ಸಚಿವಾಲಯ 21 ಲಕ್ಷ ಚದರ ಅಡಿಗಳಲ್ಲಿ ಮುಕ್ತಗೊಳಿಸಲಾಗಿದೆ. ನಂತರ ರಕ್ಷಣಾ ಸಚಿವಾಲಯ 19 ಲಕ್ಷ ಚದರ ಅಡಿಗಳಲ್ಲಿ ಮುಕ್ತವಾಗಿದೆ.
ಈ ವರ್ಷ ಸುಮಾರು 24 ಲಕ್ಷ ಕಡತಗಳನ್ನು ಹೊರಹಾಕಲಾಗಿದೆ. ಗರಿಷ್ಠ ವಿದೇಶಾಂಗ ವ್ಯವಹಾರಗಳ ಸಚಿವಾಲಯದಲ್ಲಿ (3.9 ಲಕ್ಷ ಕಡತಗಳು) ನಂತರ ಸೇನಾ ವ್ಯವಹಾರಗಳ ಇಲಾಖೆ (3.15 ಲಕ್ಷ ಕಡತಗಳು) ಕ್ಲಿಯರ್‌ ಮಾಡಲಾಗಿದೆ. ಸ್ವಚ್ಛತಾ ಅಭಿಯಾನದ ಪ್ರಭಾವದಿಂದಾಗಿ ಒಟ್ಟಾರೆ ಇ-ಫೈಲ್ ಅಳವಡಿಕೆಯು ಸರ್ಕಾರದಲ್ಲಿ ಸುಮಾರು 96%ಕ್ಕೆ ಬೆಳೆದಿದೆ. ಈ ವರ್ಷ ಸುಮಾರು 2.58 ಲಕ್ಷ ಕಚೇರಿ ಸ್ಥಳಗಳನ್ನು ಅಭಿಯಾನದಲ್ಲಿ ಒಳಪಡಿಸಲಾಗಿದೆ.
ಇದನ್ನೂ ಓದಿ: ಚಂದ್ರಯಾನ 3ಗೆ ಬಿಡಿಭಾಗ ಪೂರೈಸಿ ಶತಕೋಟ್ಯಧೀಶರಾದ ಮೈಸೂರು ಉದ್ಯಮಿ; ಯಾರಿವರು?