ಗಾಂಧಿನಗರ: ಗುಜರಾತ್‌ನ ಜಾಮ್‌ನಗರದಲ್ಲಿ (Jamnagar) ಸ್ವರ್ಗವೇ ಧರೆಗಿಳಿದಿದೆ. ರಿಲಯನ್ಸ್‌ ಇಂಡಸ್ಟ್ರೀಸ್‌ ಮುಖ್ಯಸ್ಥ ಮುಕೇಶ್‌ ಅಂಬಾನಿ (Mukesh Ambani) ಪುತ್ರ ಅನಂತ್‌ ಅಂಬಾನಿ ಹಾಗೂ ರಾಧಿಕಾ ಮರ್ಚಂಟ್‌ ಅವರ ವಿವಾಹಪೂರ್ವ ಕಾರ್ಯಕ್ರಮಕ್ಕೆ (Anant Ambani-Radhika Merchant Pre-Wedding) ದೇಶ-ವಿದೇಶಗಳ ಸಾವಿರಾರು ಗಣ್ಯರು ಆಗಮಿಸಿದ್ದಾರೆ. ಜಾಮ್‌ನಗರದಲ್ಲಿ ಸಂಭ್ರಮ ಮನೆ ಮಾಡಿರುವ ಮಧ್ಯೆಯೇ ಮುಕೇಶ್‌ ಅಂಬಾನಿ ಅವರು ಕಣ್ಣೀರು ಹಾಕಿದ್ದಾರೆ.
ಅನಂತ್‌ ಅಂಬಾನಿ ಅವರು ವೇದಿಕೆ ಮೇಲೆ ಮಾತನಾಡುವಾಗ ಭಾವುಕರಾದರು. “ನೀವೆಲ್ಲರೂ ಎಂದುಕೊಂಡಂತೆ ನನ್ನ ಜೀವನವು ಹೂವಿನ ಹಾದಿಯಾಗಿರಲಿಲ್ಲ. ನಾನು ಕೂಡ ಜೀವನದಲ್ಲಿ ಹಲವು ನೋವುಗಳನ್ನು ಅನುಭವಿಸಿದ್ದೇನೆ. ಬಾಲ್ಯದಲ್ಲಿ ನನ್ನ ಆರೋಗ್ಯವು ಪದೇಪದೆ ಕೈಕೊಡುತ್ತಿತ್ತು. ಆಗೆಲ್ಲ, ನನ್ನ ತಂದೆ-ತಾಯಿಯು ಬೆನ್ನೆಲುಬಾಗಿ ನಿಂತರು. ನಾನು ಕಷ್ಟ ಅನುಭವಿಸುತ್ತಿದ್ದೇನೆ ಎಂಬ ಭಾವನೆ ಬರದಂತೆ ನೋಡಿಕೊಂಡರು. ಅವರಿಂದಾಗಿಯೇ ನಾನು ಸುಧಾರಣೆ ಕಂಡೆ” ಎಂದು ಅನಂತ್‌ ಅಂಬಾನಿ ಅವರು ಭಾವನಾತ್ಮಕವಾಗಿ ಮಾತನಾಡಿದರು. ಇದನ್ನು ಕೇಳಿದ ಮುಕೇಶ್‌ ಅಂಬಾನಿ ಅವರ ಕಣ್ಣಾಲಿಗಳು ಒದ್ದೆಯಾದವು.
Anant Ambani's emotional speech for Parents and guests.
— 🇮🇳 𝗡 𝗢 𝗜 𝗦 𝗘 ⚡ A L E R T S (@NoiseAlerts) March 2, 2024
Mukesh Ambani in tears.#AnantRadhikaWedding pic.twitter.com/tBg0Wh0XUx
ಮದುವೆ ಪೂರ್ವ ಸಮಾರಂಭದಲ್ಲಿ ಮಾತನಾಡುವ ವೇಳೆ ಅನಂತ್‌ ಅಂಬಾನಿ ಅವರು ತಾಯಿ ನೀತಾ ಅಂಬಾನಿಗೆ ವಿಶೇಷ ಧನ್ಯವಾದ ತಿಳಿಸಿದರು. “ನಾನು ಇಂದು ಏನಾಗಿದ್ದೇನೋ ಅದಕ್ಕೆಲ್ಲ ನನ್ನ ತಾಯಿಯೇ ಕಾರಣ. ನನ್ನ ಸೃಷ್ಟಿಕರ್ತಳೂ ಆಕೆಯೇ, ನನ್ನ ಜೀವನದ ಸುಧಾರಕಿಯೂ ಆಕೆಯೇ. ನನ್ನ ಮದುವೆ ಪೂರ್ವ ಕಾರ್ಯಕ್ರಮಕ್ಕೆ ತಾಯಿಯು ಕಳೆದ ಮೂರ್ನಾಲ್ಕು ತಿಂಗಳಿಂದ ಕಷ್ಟಪಡುತ್ತಿದ್ದಾರೆ. ನಿತ್ಯ ಅವರು 18-19 ತಾಸು ಕೆಲಸ ಮಾಡಿದ್ದಾರೆ. ಹಾಗಾಗಿ, ಅವರಿಗೆ ವಿಶೇಷ ಧನ್ಯವಾದಗಳು. ಕಾರ್ಯಕ್ರಮಕ್ಕೆ ಆಗಮಿಸಿದ ಎಲ್ಲರಿಗೂ ಧನ್ಯವಾದಗಳು” ಎಂದು ಅನಂತ್‌ ಅಂಬಾನಿ ಹೇಳಿದರು.
ರಾಧಿಕಾ ಮರ್ಚಂಟ್‌ ಅವರ ಕುರಿತು ಕೂಡ ಅನಂತ್‌ ಅಂಬಾನಿ ಮಾತನಾಡಿದರು. “ರಾಧಿಕಾ ಮರ್ಚಂಟ್‌ ಅವಳನ್ನು ನನ್ನ ಜೀವನದ ಸಂಗಾತಿಯನ್ನಾಗಿ ಪಡೆಯುತ್ತಿರುವುದಕ್ಕೆ ನಾನು ತುಂಬ ಅದೃಷ್ಟವಂತನಾಗಿದ್ದೇನೆ. ನಾನು ಹಾಗೂ ರಾಧಿಕಾ ಮರ್ಚಂಟ್‌ ಭೇಟಿಯಾಗಿ ಏಳು ವರ್ಷಗಳೇ ಕಳೆದವು. ಆದರೆ, ನಿನ್ನೆ ಮೊನ್ನೆಯಷ್ಟೇ ನಾವು ಭೇಟಿಯಾಗಿದ್ದೇವೆ ಎಂದು ಅನಿಸುತ್ತದೆ. ಅಷ್ಟರಮಟ್ಟಿಗೆ, ನನ್ನ ಮನಸ್ಸು, ಹೃದಯವನ್ನು ರಾಧಿಕಾ ಮರ್ಚಂಟ್‌ ಅಷ್ಟು ಬೆಚ್ಚಗೆ ಇರಿಸಿದ್ದಾಳೆ. ಆಕೆಗೂ ನಾನು ಆಭಾರಿ. ನನ್ನನ್ನು ಕುಟುಂಬದ ಸದಸ್ಯನನ್ನಾಗಿ ಸ್ವೀಕರಿಸಿದ ಆಕೆಯ ಕುಟುಂಬಸ್ಥರಿಗೂ ಆಭಾರಿ” ಎಂದರು.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ