ಜೋಧಪುರ: ಸೀಮಾ ಹೈದರ್ ಮತ್ತು ಅಂಜು ಇತ್ತೀಚಿನ ದಿನಗಳಲ್ಲಿ ಸಿಕ್ಕಾಪಟ್ಟೆ ಸುದ್ದಿ ಮಾಡಿದವರು. ಅವರಿಬ್ಬರೂ ಭಾರತ ಹಾಗೂ ಪಾಕಿಸ್ತಾನಗಳ ವೈರತ್ವದ ಗಡಿ ಮೀರಿ ಮದುವೆಯಾದವರು. ಸೀಮಾ ಭಾರತಕ್ಕೆ ಬಂದಿದ್ದರೆ, ಅಂಜು ಪಾಕಿಸ್ತಾನಕ್ಕೆ ಹಾರಿದ್ದರು. ಇವೆರಡು ಪ್ರಕರಣಗಳು ಬೆಳಕಿಗೆ ಬರುತ್ತಿದ್ದಂತೆ ಅಂಥ ಇನ್ನೂ ಹಲವಾರು ಗಡಿ ಮೀರಿದ ಪ್ರೀತಿ ಬೆಳಕಿಗೆ ಬರುತ್ತಿವೆ. ಈ ಬಾರಿ ಪಾಕಿಸ್ತಾನದ ಮತ್ತೊಬ್ಬಳು ಮಹಿಳೆ (Cross border Love) ಭಾರತೀಯ ಯುವಕನ್ನು ಮದುವೆಯಾಗಿದ್ದಾರೆ. ಅವರೇ ಕರಾಚಿ ಮೂಲದ ಅಮೀನಾ. ಮದುವೆಗಾಗಿ ಭಾರತೀಯ ವೀಸಾ ಪಡೆಯಲು ವಿಫಲವಾದ ನಂತರ ಆನ್ಲೈನ್ನಲ್ಲಿ ಅರ್ಬಾಜ್ ಎಂಬುವನನ್ನು ಮದುವೆಯಾಗಲು ನಿರ್ಧರಿಸಿದ್ದಾರೆ.
ಅಮೀನಾ ಮತ್ತು ಅರ್ಬಾಜ್ ಅವರ ವಿವಾಹವು ಗಡಿಯಾಚೆಗಿನ ಸಂಬಂಧಗಳ ಮತ್ತೊಂದು ಕಥೆಯಾಗಿದೆ. ಪಾಕಿಸ್ತಾನಿ ಪ್ರಜೆ ಸೀಮಾ ಹೈದರ್ ತನ್ನ ನಾಲ್ಕು ಮಕ್ಕಳೊಂದಿಗೆ ಮೇ ತಿಂಗಳಲ್ಲಿ ಗ್ರೇಟರ್ ನೋಯ್ಡಾದಲ್ಲಿ ತನ್ನ ಸಂಗಾತಿ ಸಚಿನ್ ಮೀನಾ ಅವರೊಂದಿಗೆ ಇರಲು ನೇಪಾಳದ ಮೂಲಕ ಭಾರತಕ್ಕೆ ನುಸುಳಿದ್ದರು. ಮತ್ತೊಂದೆಡೆ, 35 ವರ್ಷದ ಅಂಜು ತನ್ನ ಪ್ರಿಯಕರ ನಸ್ರುಲ್ಲಾನನ್ನು ಭೇಟಿಯಾಗಲು ಪಾಕಿಸ್ತಾನದ ಖೈಬರ್ ಪಖ್ತುನ್ಖ್ವಾಗೆ ಪ್ರಯಾಣಿಸಿದ್ದರು.
ಲೈವ್ ಹಿಂದೂಸ್ತಾನ್ ವರದಿಯ ಪ್ರಕಾರ, ಜೋಧಪುರ ನಿವಾಸಿ ಅರ್ಬಾಜ್ ಅವರ ಕುಟುಂಬವು ಪಾಕಿಸ್ತಾನದಲ್ಲಿರುವ ಅಮೀನಾ ಅವರ ಕುಟುಂಬಕ್ಕೆ ಹತ್ತಿರದ ಸಂಬಂಧಿಗಳು. ಅವರ ಕುಟುಂಬದ ಸದಸ್ಯರೊಬ್ಬರು ಈಗಾಗಲೇ ನೆರೆಯ ದೇಶದ ಕನ್ಯೆಯೊಬ್ಬಳನ್ನು ಮದುವೆಯಾಗಿದ್ದಾರೆ.
ನನ್ನ ಮೊಮ್ಮಗ ಚಾರ್ಟರ್ಡ್ ಅಕೌಂಟೆಂಟ್ ಆಗಿದ್ದು, ಪಾಕಿಸ್ತಾನದ ಹುಡುಗಿಯನ್ನು ಮದುವೆಯಾಗಿದ್ದಾನೆ. ಅವರ ಸಂತೋಷವನ್ನು ನೋಡಿದ ಅಮೀನಾ ಅವರ ಕುಟುಂಬವು ನಮ್ಮ ಮಗನನ್ನು ಮದುವೆಯಾಗುವಂತೆ ಕೋರಿಕೊಂಡಿತು. ಅದನ್ನು ನಾವು ಒಪ್ಪಿಕೊಂಡಿದ್ದೇವೆ ” ಎಂದು ಅರ್ಬಾಜ್ ತಂದೆ ಮೊಹಮ್ಮದ್ ಅಫ್ಜಲ್ ಹೇಳಿದರು.
ಇದನ್ನೂ ಓದಿ : Anju Love Story: ನನ್ನ ಮಗಳು ಸತ್ತಂತೆ ಎಂದಿದ್ದ ತಂದೆಗೆ ಕರೆ ಮಾಡಿದ ಅಂಜು; ಆಕೆ ಹೇಳಿದ್ದೇನು?
ವರದಿಗಳ ಪ್ರಕಾರ ಅರ್ಬಾಜ್ ತನ್ನ ಮದುವೆ ಮೆರವಣಿಗೆಯೊಂದಿಗೆ ಜೋಧಪುರದ ಓಸ್ವಾಲ್ ಸಮಾಜ ಭವನವನ್ನು ತಲುಪಿದ್ದರು. ಅಲ್ಲಿ ಅವರು ತಮ್ಮ ಅಮಿನಾ ಅವರನ್ನು ವರ್ಚುವಲ್ ಮೂಲಕ ವಿವಾಹವಾದರು. ವೃತ್ತಿಯಲ್ಲಿ ಗುತ್ತಿಗೆದಾರರಾಗಿರುವ ವರನ ತಂದೆ ಮೊಹಮ್ಮದ್ ಅಫ್ಜಲ್, ಕಡಿಮೆ ಖರ್ಚಿನಲ್ಲಿ ಸರಳವಾಗಿ ಮದುವೆ ನಡೆಯಿತು ಎಂದು ಹೇಳಿದರು.
ಅಮೀನಾ ವೀಸಾಗೆ ಅರ್ಜಿ ಸಲ್ಲಿಸಲಿದ್ದಾರೆ. ನಾನು ಪಾಕಿಸ್ತಾನದಲ್ಲಿ ಮದುವೆಯಾಗಲಿಲ್ಲ. ಆಗಿದ್ದರೆ ಅದಕ್ಕೆ ಇಲ್ಲಿ ಮಾನ್ಯತೆ ಇರುತ್ತಿರಲಿಲ್ಲ. ಭಾರತವನ್ನು ತಲುಪಿದ ನಂತರ ನಾವು ಮರುಮದುವೆ ಮಾಡಬೇಕಾಗುತ್ತದೆ. ಪಾಕಿಸ್ತಾನದ ವಧುವಿಗೆ ಮದುವೆಯಾಗಲು ಭಾರತೀಯ ವೀಸಾ ಸಿಗುವುದಿಲ್ಲ. ಆದ್ದರಿಂದ, ನಾವು ಆನ್ಲೈನ್ನಲ್ಲಿ ಮದುವೆಯಾಗಿದ್ದೇವೆ. ಮೌಲ್ವಿಯಿಂದ ಪ್ರಮಾಣಪತ್ರವನ್ನು ಪಡೆದಿದ್ದೇವೆ. ಅದು ಕಾನೂನುಬದ್ಧವಾಗಿದೆ “ಎಂದು ವೃತ್ತಿಯಲ್ಲಿ ಡಿಟಿಪಿ ಆಪರೇಟರ್ ಆಗಿರುವ ಅರ್ಬಾಜ್ ಹೇಳಿದ್ದಾರೆ.
ಮದುವೆ ಆಗಿದ್ದರೂ ಅಮೀನಾ ಜೋಧಪುರದಲ್ಲಿ ತನ್ನ ಗಂಡನನ್ನು ಇನ್ನೂ ಭೇಟಿಯಾಗಿಲ್ಲ. ಅವಳು ಸಂಪೂರ್ಣ ವೀಸಾ ಮತ್ತು ವಲಸೆ ಪ್ರಕ್ರಿಯೆಯ ಮೂಲಕ ಹೋಗಬೇಕಾಗುತ್ತದೆ.