ಹೊಸದಿಲ್ಲಿ: L&T ಫೈನಾನ್ಸ್‌ ಕಂಪನಿಯ ಮೇಲೆ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ₹2.50 ಕೋಟಿ ದಂಡವನ್ನು ವಿಧಿಸಿದೆ. ಹಣಕಾಸಿನ ವಹಿವಾಟಿನಲ್ಲಿ ನಿರ್ದಿಷ್ಟ ನಿಬಂಧನೆಗಳ ನ್ಯೂನತೆಗಾಗಿ ಈ ದಂಡ ವಿಧಿಸಲಾಗಿದೆ.
ಮಾರ್ಚ್ 31, 2021 ಮತ್ತು ಮಾರ್ಚ್ 31, 2022ರ ನಡುವಿನ ಸಂಸ್ಥೆಯ ಹಣಕಾಸಿನ ಸ್ಥಿತಿಗತಿಯ ಪರಿಶೀಲನೆಯ ಬಳಿಕ RBI ನಿರ್ಧಾರ ಬಂದಿದೆ. RBI ಈ ಬಗ್ಗೆ L&T Finance Limitedಗೆ ನೋಟಿಸ್ ಜಾರಿ ಮಾಡಿದೆ. RBI ನಿರ್ದೇಶನಗಳನ್ನು ಅನುಸರಿಸದಿದ್ದಕ್ಕಾಗಿ ಏಕೆ ದಂಡ ವಿಧಿಸಬಾರದು ಎಂಬ ಕಾರಣವನ್ನು ನೀಡುವಂತೆ ಕಂಪನಿಗೆ ಸೂಚಿಸಿದೆ.
ಆರ್‌ಬಿಐ ಹೊರಡಿಸಿದ ಪತ್ರಿಕಾ ಪ್ರಕಟಣೆಯ ಪ್ರಕಾರ, ಬ್ಯಾಂಕಿಂಗ್ ಅಲ್ಲದ ಹಣಕಾಸು ಕಂಪನಿಗಳಿಗಾಗಿ ಇರುವ ನಿರ್ದಿಷ್ಟ ನಿಬಂಧನೆಗಳನ್ನು ಅನುಸರಿಸದ ಕಾರಣ ಈ ದಂಡ ವಿಧಿಸಲಾಗಿದೆ. ಠೇವಣಿ ರಹಿತ ಕಂಪನಿ ಮತ್ತು ಠೇವಣಿ ತೆಗೆದುಕೊಳ್ಳುವ ಕಂಪನಿ (ರಿಸರ್ವ್ ಬ್ಯಾಂಕ್) ನಿರ್ದೇಶನಗಳು- 2016, ಭಾರತೀಯ ರಿಸರ್ವ್ ಬ್ಯಾಂಕ್ ಕಾಯಿದೆ-1934ರ ಸಂಬಂಧಿತ ಸೆಕ್ಷನ್‌ಗಳ ಅಡಿಯಲ್ಲಿ ಆರ್‌ಬಿಐ ದಂಡ ವಿಧಿಸಿದೆ.
ಈ ನಿಯಂತ್ರಣ ಕ್ರಮದಿಂದ ಕಂಪನಿ ಮತ್ತು ಅದರ ಗ್ರಾಹಕರ ನಡುವಿನ ಯಾವುದೇ ವಹಿವಾಟುಗಳು ಅಥವಾ ಒಪ್ಪಂದಗಳ ಮೇಲೆ ಪರಿಣಾಮವಿಲ್ಲ. ಈ ತಪಾಸಣೆಯು ವಿವಿಧ ವರದಿಗಳ ಪರಿಶೀಲನೆ ಮತ್ತು ಪತ್ರವ್ಯವಹಾರವನ್ನು ಒಳಗೊಂಡಿತ್ತು. ತಪಾಸಣೆಯ ಸಮಯದಲ್ಲಿ, ಕಂಪನಿಯು ತನ್ನ ಚಿಲ್ಲರೆ ಸಾಲಗಾರರಿಗೆ ರಿಸ್ಕ್‌ ಫ್ಯಾಕ್ಟರ್‌ ಬಗ್ಗೆ ತಿಳಿಸಲು ವಿಫಲವಾಗಿದೆ ಮತ್ತು ಸಾಲದ ಅರ್ಜಿ ನಮೂನೆಗಳು ಅಥವಾ ಮಂಜೂರಾತಿ ಪತ್ರಗಳಲ್ಲಿ ವಿವಿಧ ಸಾಲಗಾರರ ವರ್ಗಗಳಿಗೆ ಅನ್ವಯಿಸುವ ವಿಭಿನ್ನ ಬಡ್ಡಿದರಗಳ ಬಗ್ಗೆ ವಿವರಿಸಿಲ್ಲ ಎಂದು ಗುರುತಿಸಲಾಗಿದೆ.
ದಂಡದ ಬಡ್ಡಿದರಗಳಲ್ಲಿನ ಬದಲಾವಣೆಗಳನ್ನು ಕಂಪನಿಯು ಸಾಲಗಾರರಿಗೆ ತಿಳಿಸಿಲ್ಲ. ಮಂಜೂರಾತಿ ಸಮಯದಲ್ಲಿ ತಿಳಿಸಿದ್ದಕ್ಕಿಂತ ಹೆಚ್ಚಿನ ವಾರ್ಷಿಕ ಬಡ್ಡಿ ದರವನ್ನು ವಿಧಿಸುವಾಗ ಸಾಲದ ನಿಯಮಗಳು ಮತ್ತು ಷರತ್ತುಗಳಲ್ಲಿನ ಬದಲಾವಣೆಗಳ ಸೂಚನೆ ನೀಡಲು ವಿಫಲವಾಗಿದೆ. ನೋಟೀಸ್‌ಗೆ ಕಂಪನಿಯ ಪ್ರತಿಕ್ರಿಯೆಯನ್ನು ಮೌಲ್ಯಮಾಪನ ಮಾಡಿದ ನಂತರ, RBI ನಿರ್ದೇಶನಗಳನ್ನು ಅನುಸರಿಸದ ಕಾರಣ ದಂಡ ಸಮರ್ಥನೀಯ ಎಂದು RBI ನಿರ್ಧರಿಸಿತು.
ಇದನ್ನೂ ಓದಿ: RBI Monetary Policy: ಆರ್‌ಬಿಐ ರೆಪೋ ದರ ಯಥಾಸ್ಥಿತಿ; ಸಾಲಗಾರರಿಗೆ ಬಡ್ಡಿ ಏರಿಕೆ ಬಿಸಿ ಇಲ್ಲ