ಪಾಕಿಸ್ತಾನ ಕ್ರಿಕೆಟ್ ಆಟಗಾರ, ತಂಡದ ಮಾಜಿ ಕ್ಯಾಪ್ಟನ್ ಸಯೀದ್ ಅನ್ವರ್ ಅವರು ಭಾರತದ ಪ್ರಧಾನಿ ನರೇಂದ್ರ ಮೋದಿ ಮತ್ತು ಗೃಹ ಸಚಿವ ಅಮಿತ್ ಶಾ ವಿರುದ್ಧ ವಾಗ್ದಾಳಿ ನಡೆಸಿದ ವಿಡಿಯೊವೊಂದು ವೈರಲ್ ಆಗುತ್ತಿದೆ. ಪ್ರಧಾನಿ ನರೇಂದ್ರ ಮೋದಿಯವರನ್ನು ಸೈತಾನ್ (ದೆವ್ವ) ಎಂದು ಕರೆದರು. ‘ಎಷ್ಟೇ ಸಲ ನೀವು ಮುಸ್ಲಿಮರ ಅಜಾನ್ (ಪ್ರಾರ್ಥನೆಗಾಗಿ ಮುಸ್ಲಿಂ ಸಮುದಾಯದವರನ್ನು ಕರೆಯುವುದು) ವೇಳೆ ನಿಮ್ಮ ಭಾಷಣವನ್ನು ನಿಲ್ಲಿಸಿದರೂ ಕೂಡ ನೀವೊಬ್ಬ ದೆವ್ವ ಹಿಡಿದ ಹಿಂದುವಾಗಿಯೇ ಉಳಿಯುತ್ತೀರಿ’ ಎಂದು ಅನ್ವರ್ ಹೇಳಿರುವುದನ್ನು ವಿಡಿಯೊದಲ್ಲಿ ಕೇಳಬಹುದು. ಹಾಗೇ, ಗೃಹ ಸಚಿವ ಅಮಿತ್ ಶಾ ಅವರ ವಿರುದ್ಧವೂ ಅನ್ವರ್ ವಾಗ್ದಾಳಿ ನಡೆಸಿದ್ದಾರೆ.
ಪ್ರಧಾನಿ ನರೇಂದ್ರ ಮೋದಿ ಅವರು ಈ ಹಿಂದೆ ಮುಸ್ಲಿಂ ನಾಯಕರು ತಮಗೆ ತೊಡಿಸಲು ಬಂದ ಟೋಪಿಯನ್ನು ಧರಿಸಲು ನಿರಾಕರಿಸಿದ್ದರು. ಅದಾದ ಬಳಿಕ ಗುಜರಾತ್ನಲ್ಲಿ ಭಾಷಣ ಮಾಡುತ್ತಿದ್ದ ವೇಳೆ ಆಜಾನ್ ಕೇಳುತ್ತಿದ್ದಂತೆ ಸ್ವಲ್ಪ ಕಾಲ ಭಾಷಣ ನಿಲ್ಲಿಸಿ, ಆಜಾನ್ ಮುಗಿಯುತ್ತಿದ್ದಂತೆ ಮಾತು ಮುಂದುವರಿಸಿದ್ದರು. ಅದೇ ರೀತಿ ಗೃಹ ಸಚಿವ ಅಮಿತ್ ಶಾ ಅವರು ಕಳೆದ ವರ್ಷ ಜಮ್ಮು-ಕಾಶ್ಮೀರದ ಬಾರಾಮುಲ್ಲಾ ಜಿಲ್ಲೆಯಲ್ಲಿ ಭಾಷಣ ಮಾಡುತ್ತಿದ್ದಾಗ, ಆಜಾನ್ ಕೂಗುತ್ತಿದ್ದಂತೆ ತಮ್ಮ ಮಾತು ನಿಲ್ಲಿಸಿದ್ದರು. ಪ್ರಧಾನಿ ನರೇಂದ್ರ ಮೋದಿ ಮತ್ತು ಅಮಿತ್ ಶಾ ಅವರ ಈ ನಡೆಯನ್ನು ಸಾರ್ವಜನಿಕರು ಪ್ರಶಂಸಿಸಿದ್ದರು. ಆದರೆ ಅದೇ ವಿಷಯವನ್ನು ಇಟ್ಟುಕೊಂಡು ಸಯೀದ್ ಅನ್ವರ್ ಅವರು ಮೋದಿ ಮತ್ತು ಅಮಿತ್ ಶಾ ವಿರುದ್ಧ ಮಾತನಾಡಿದ್ದಾರೆ. ಇಬ್ಬರೂ ದೆವ್ವ ಹಿಡಿದ ಹಿಂದುಗಳು ಎಂದಿದ್ದಾರೆ.
ಸಯೀದ್ ಅನ್ವರ್ ಅವರು ಪಾಕಿಸ್ತಾನದ ನಿವೃತ್ತ ಕ್ರಿಕೆಟ್ ಆಟಗಾರ. ಏಕದಿನ ಮತ್ತು ಟೆಸ್ಟ್ ಪಂದ್ಯಗಳಿಗೆ ಕ್ಯಾಪ್ಟನ್ ಆಗಿದ್ದರು. 1989ರಿಂದ 2003ರವರೆಗೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡಿದ್ದಾರೆ. ಸದ್ಯ ಪಾಕಿಸ್ತಾನದಲ್ಲಿ ಆರ್ಥಿಕ ಪರಿಸ್ಥಿತಿ ತೀವ್ರ ಹದಗೆಟ್ಟಿದೆ. ಇತ್ತೀಚೆಗೆ ವ್ಯಕ್ತಿಯೊಬ್ಬರು ತಮಗೆ ನರೇಂದ್ರ ಮೋದಿಯಾದರೂ ಪ್ರಧಾನಿಯಾಗಿ ಸಿಬೇಕಿತ್ತು ಎಂದು ಹೇಳಿದ್ದ ವಿಡಿಯೊ ವೈರಲ್ ಆಗಿತ್ತು. ಅದರ ಬೆನ್ನಲ್ಲೇ ಸೈಯೀದ್ ಅನ್ವರ್ ಅವರು ಪ್ರಧಾನಿಗೆ ಬೈದ ವಿಡಿಯೊ ವೈರಲ್ ಆಗಿದೆ.