ಸ್ಯಾನ್​ಫ್ರಾನ್ಸಿಸ್ಕೋದ 2023ನೇ ಸಾಲಿನ 50 ಪ್ರಭಾವಿ ಮಹಿಳೆಯರಲ್ಲೊಬ್ಬರು ಭಾರತ ಮೂಲದ ಸ್ನೇಹಾ ನರಹಳ್ಳಿ; ಪ್ರಶಸ್ತಿ ಘೋಷಣೆ

ಉದ್ಯಮ, ಮನರಂಜನೆ, ಕ್ರೀಡೆ, ವೈದ್ಯಕೀಯ, ಕಾನೂನು ಸೇರಿ ವಿವಿಧ ಕ್ಷೇತ್ರಗಳಲ್ಲಿ ಅಲ್ಲದೆ, ತಾಯ್ತನ, ಮನೆ ನಡೆಸುವಲ್ಲೂ ಸಾಧನೆ ಮಾಡಿದ ಮಹಿಳೆಯರನ್ನು ಗುರುತಿಸಿ, ಅವರ ಬಗ್ಗೆ ಸುದ್ದಿಗಳನ್ನು ನೀಡುವ ಸಂಸ್ಥೆ Women We Admire, ಇದೀಗ ಸ್ಯಾನ್​ ಫ್ರಾನ್ಸಿಸ್ಕೋದ 2023ನೇ ಸಾಲಿನ 50 ಸಾಧಕ ಮಹಿಳೆಯರನ್ನು ಗುರುತಿಸಿ, ಪ್ರಶಸ್ತಿ ಘೋಷಣೆ ಮಾಡಿದೆ. ಕ್ಯಾಲಿಫೋರ್ನಿಯಾ ರಾಜ್ಯದ ಸ್ಯಾನ್​ ಫ್ರಾನ್ಸಿಸ್ಕೋದಲ್ಲಿರುವ Women We Admire, ಸ್ಯಾನ್​ ಫ್ರಾನ್ಸಿಸ್ಕೋ ಮತ್ತು ಅದರ ಸುತ್ತಲಿನ ಪ್ರದೇಶಗಳ ಮಹಿಳೆಯರನ್ನು ಪ್ರತಿ ವರ್ಷ ಗುರುತಿಸಿ ಪ್ರಶಸ್ತಿಗೆ ಆಯ್ಕೆ ಮಾಡುತ್ತಾರೆ. ಈ Women We Admireನ್ನು ಮಿಂಡಿ ಗ್ರಾಸ್ಮನ್ ಎಂಬುವರು ಮುನ್ನಡೆಸುತ್ತಿದ್ದಾರೆ. ಇವರು ಹೆಲ್ತ್​ ಆ್ಯಂಡ್​ ಫಿಟ್ನೆಸ್​ ಸಂಸ್ಥೆ ಡಬ್ಲ್ಯೂಡಬ್ಲ್ಯೂ ಇಂಟರ್​ನ್ಯಾಶನಲ್​ನ ಮಾಜಿ ಸಿಇಒ.

Women We Admire ಈ ಸಲ ಗುರುತಿಸಿದ ಸ್ಯಾನ್​ಫ್ರಾನ್ಸಿಸ್ಕೋದ 50 ಮಹಿಳಾ ನಾಯಕಿಯರಲ್ಲಿ ಭಾರತದ ಸ್ನೇಹಾ ನರಹಳ್ಳಿ ಕೂಡ ಒಬ್ಬರು. ಸೆಫೊರಾ (SEPHORA) ಸೌಂದರ್ಯ ವಸ್ತುಗಳ ಉತ್ಪಾದಕ ಕಂಪನಿಯ ವೈಸ್​ ಪ್ರೆಸಿಡೆಂಟ್ ಮತ್ತು ಪ್ರಾಡಕ್ಟ್​ ಹೆಡ್​ ಆಗಿದ್ದಾರೆ. ತಂತ್ರಜ್ಞಾನದಲ್ಲಿ ಪಳಗಿದ ನಾಯಕಿ. ಉತ್ಪಾದನೆಯಲ್ಲಿ ನಾವೀನ್ಯತೆ ಮತ್ತು ಸರಳೀಕೃತ ವಿಧಾನವನ್ನು ಅನುಸರಿಸಿ, ಉದ್ಯಮವನ್ನು ಅಭಿವೃದ್ಧಿ ಮಾಡುವಲ್ಲಿ ಪರಿಣತರು. ಹುಟ್ಟಿದ್ದು ಭಾರತದಲ್ಲಿ, ಇವರ ತಂದೆ-ತಾಯಿ ಇಬ್ಬರೂ ಸಾಹಿತಿಗಳು. ಸ್ನೇಹಾ ಕೂಡ ಇತ್ತೀಚೆಗೆ Not the Loudest Person in the Room ಎಂಬ ಹೆಸರಿನ ಪುಸ್ತಕ ಬರೆದಿದ್ದಾರೆ. ಸ್ನೇಹಾ ನರಹಳ್ಳಿ ಅವರು ಈ ಪುಸ್ತಕದಲ್ಲಿ ತಮ್ಮ ಜೀವನ, ತಾವು ಸಾಗಿ ಬಂದ ಹಾದಿಯ ಬಗ್ಗೆಯೇ ಬರೆದಿದ್ದಾರೆ.

ಇದನ್ನೂ ಓದಿ: ಆತಂಕ ನಿಜವಾಯ್ತು! ಉದ್ಯೋಗ ಕಸಿಯುತ್ತಿರುವ ChatGPT, ಚಾಟ್‌ಬಾಟ್ ನಿಯೋಜಿಸುತ್ತಿರುವ ಅಮೆರಿಕನ್ ಕಂಪನಿಗಳು

ಬದಲಾವಣೆ ಮಾಡಬೇಕು ಎಂದು ಹೊರಟಾಗ ಮೊದಲು ಮಾಡಬೇಕಿರುವ ಕೆಲಸ ಅರಿವು ಮೂಡಿಸುವುದು. ಯಾವುದೇ ಕ್ಷೇತ್ರದಲ್ಲಿ ಮಹಿಳೆಯರು ಎದುರಿಸುವ ಪಕ್ಷಪಾತವನ್ನು ತೊಡೆದು ಹಾಕಲು, ಮೊದಲು ಅವರಲ್ಲಿ ಆ ಬಗ್ಗೆ ತಿಳಿವಳಿಕೆ ಮೂಡಿಸಬೇಕು. ನಂತರ ಈ ಪಕ್ಷಪಾತವನ್ನು ತೊಡೆದುಹಾಕಲು ಸಾಧ್ಯ ಎಂದು ಅವರು ಹೇಳುತ್ತಾರೆ. ಅಷ್ಟೇ ಅಲ್ಲ, ‘ಕತ್ತಿಗಿಂತಲೂ ಲೇಖನಿ ಹರಿತವಾದ ಆಯುಧ’ ಎಂದು ಅವರು ನಂಬುತ್ತಾರೆ.