ಮೋಹಾಲಿ: ಇಲ್ಲಿನ ಜಾತ್ರೆಯಲ್ಲಿ ನಿರ್ಮಿಸಲಾಗಿದ್ದ ಅಮ್ಯುಸ್‌ಮೆಂಟ್ ಪಾರ್ಕ್‌ನಲ್ಲಿ ದುರ್ಘಟನೆಯೊಂದು ಸಂಭವಿಸಿ, 10ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ಅಮ್ಯುಸ್‌ಮೆಂಟ್ ಪಾರ್ಕ್‌ನ ಸ್ಪಿನ್ನಿಂಗ್ ಸ್ವಿಂಗ್‌ನಲ್ಲಿ ಕುಳಿತು ಸಂತೋಷ ಪಡುತ್ತಿದ್ದವರು ಕ್ಷಣಾರ್ಧದಲ್ಲಿ ನೋವಿನಿಂದ ನರಳುವಂತಾಯಿತು. ಕಂಬದ ತುತ್ತ ತುದಿಗೆ ಹೋಗಿದ್ದ ಸ್ಪಿನ್ನಿಂಗ್ ಸ್ವಿಂಗ್ (Spinning Swing) ಕೆಳಕ್ಕೆ ರಭಸವಾಗಿ ಬಂದು, ನಿಯಂತ್ರಣ ತಪ್ಪಿ ನೆಲಕ್ಕೆ ಅಪ್ಪಳಿಸಿತು. ಪರಿಣಾಮ ಸ್ವಿಂಗ್‌ನಲ್ಲಿ ಕುಳಿತ್ತಿದ್ದ 50ಕ್ಕೂ ಅಧಿಕ ಜನರು ತಮ್ಮ ಕುರ್ಚಿಗಳಿಂದ ನೆಗೆದು ಬಿದ್ದರು. ಈ ಪೈಕಿ ಹಲವರಿಗೆ ಸಣ್ಣಪುಟ್ಟ ಗಾಯಗಳಾಗಿದ್ದು, ಗಂಭೀರವಾಗಿ ಗಾಯಗೊಂಡಿದ್ದ 10 ಜನರನ್ನು ಆಸ್ಪತ್ರೆ ದಾಖಲಿಸಲಾಗಿದೆ.
ಪಂಜಾಬ್‌ನ ಮೊಹಾಲಿಯಲ್ಲಿ ನಡೆದ ಜಾತ್ರೆಯಲ್ಲಿ ಜನರ ಮನರಂಜನೆಗಾಗಿ ಈ ಸ್ಪಿನ್ನಿಂಗ್ ಸ್ವಿಂಗ್ ಹಾಕಲಾಗಿತ್ತು. ಇದರಲ್ಲಿ ಕುಳಿತು ಮೋಜು ಮಾಡುತ್ತಿದ್ದ ಜನರು. ಸ್ಪಿನ್ನಿಂಗ್ ಸ್ವಿಂಗ್ ಮೇಲಕ್ಕೆ ಹೋಗಿ ಕೆಳಗಿಳಿಯುತ್ತಿದ್ದ ಹೊತ್ತಿನಲ್ಲಿ 50 ಅಡಿಗೂ ಅಧಿಕ ಎತ್ತರಿಂದ ನೇರವಾಗಿ ನೆಲಕ್ಕೆ ಅಪ್ಪಳಿಸಿತು. ಈ ಎಲ್ಲ ಭಯಾನಕ ಕ್ಷಣಗಳು ಸೆರೆಯಾಗಿರುವ ವಿಡಿಯೋ ವೈರಲ್ ಆಗಿದೆ. ಈ ಸ್ವಿಂಗ್ ಕುಸಿದ ನಂತರ ಜಾತ್ರೆಯ ಮೈದಾನದಲ್ಲಿ ಭಯ, ಗೊಂದಲದ ವಾತಾವರಣ ನಿರ್ಮಾಣವಾಗಿತ್ತು.
ಇದನ್ನೂ ಓದಿ | ನಾಗಿನ್‌ ಹಾರ್ನ್‌ ಸದ್ದಿಗೆ ರಸ್ತೆಯಲ್ಲೇ ಕುಣಿದ ಯುವಕರು, ವಿಡಿಯೋ ವೈರಲ್