ಹೊಸದಿಲ್ಲಿ: ಶ್ರೀಲಂಕಾದ ಕೊಲಂಬೊ ಬಂದರು (Sri Lanka Port, Colombo port) ಟರ್ಮಿನಲ್ ಯೋಜನೆಗೆ $553 ಮಿಲಿಯ (4,605 ಕೋಟಿ ರೂ.) ಹಣಕಾಸು ಒದಗಿಸುವುದಾಗಿ US ಇಂಟರ್ನ್ಯಾಷನಲ್ ಡೆವಲಪ್ಮೆಂಟ್ ಫೈನಾನ್ಸ್ ಕಾರ್ಪೊರೇಷನ್ (DFC) ಹೇಳಿದೆ. ಈ ಟರ್ಮಿನಲ್ ಭಾರತದ ಅದಾನಿ ಗ್ರೂಪ್‌ (Adani group) ನಿಯಂತ್ರಣದಲ್ಲಿದ್ದು, ಶ್ರೀಲಂಕಾದಲ್ಲಿ ಭಾರತದ ಇನ್ನಷ್ಟು ಉಪಸ್ಥಿತಿಗೆ ಮೂಲವಾಗಲಿದೆ.
ಭಾರತೀಯ ಬಿಲಿಯನೇರ್ ಗೌತಮ್ ಅದಾನಿ ಒಡೆತನದ ಅದಾನಿ ಗ್ರೂಪ್‌, ಕೊಲಂಬೊ ಬಂದರಿನ ಪಶ್ಚಿಮ ಕಂಟೇನರ್ ಟರ್ಮಿನಲ್‌ನಲ್ಲಿ 51% ಪಾಲನ್ನು ಹೊಂದಿದೆ. ಇಲ್ಲಿಯೇ ಚೀನಾ ಮರ್ಚೆಂಟ್ಸ್ ಪೋರ್ಟ್ ಹೋಲ್ಡಿಂಗ್ಸ್ ಕಂ ಲಿಮಿಟೆಡ್ ಕೂಡ ತಾನು ನಡೆಸುವ ಒಂದು ಟರ್ಮಿನಲ್ ಅನ್ನು ಸಹ ಹೊಂದಿದೆ. ಅದಾನಿ ಗ್ರೂಪ್‌ ಬಂದರುಗಳಿಂದ ಹಿಡಿದು ಖಾದ್ಯ ತೈಲಗಳವರೆಗೆ ಅದಾನಿ ಸಮೂಹ ಸಾಮ್ರಾಜ್ಯವನ್ನು ಹೊಂದಿದೆ.
ದ್ವೀಪರಾಷ್ಟ್ರ ಶ್ರೀಲಂಕಾ ಕಳೆದ ವರ್ಷ ದಿವಾಳಿ ಹಂತವನ್ನು ತಲುಪಿತು. 2022ರಲ್ಲಿ ಅದರ ವಿದೇಶಿ ವಿನಿಮಯ ಮೀಸಲು ದಾಖಲೆಯ ಕನಿಷ್ಠ ಮಟ್ಟಕ್ಕೆ ಇಳಿದ ನಂತರ ಅದರ ಆರ್ಥಿಕತೆಯು 7.8%ರಷ್ಟು ಸಂಕುಚಿತಗೊಂಡಿದ್ದು, ಏಳು ದಶಕಗಳಲ್ಲಿ ಅತ್ಯಂತ ಕೆಟ್ಟ ಆರ್ಥಿಕ ಬಿಕ್ಕಟ್ಟಿನಲ್ಲಿ ಮುಳುಗಿದೆ.
ʼʼವೆಸ್ಟ್ ಕಂಟೈನರ್ ಟರ್ಮಿನಲ್ (ಡಬ್ಲ್ಯೂಸಿಟಿ) ಗಾಗಿ ಖಾಸಗಿ ವಲಯದ ಸಾಲಗಳಲ್ಲಿ $553 ಮಿಲಿಯನ್ ಹೂಡಿಕೆಯ ಬದ್ಧತೆಯು ನಮ್ಮ ನೌಕಾ ಸಾಮರ್ಥ್ಯವನ್ನು ವಿಸ್ತರಿಸಲಿದೆ. ಸಾಲದ ಮೊತ್ತಕ್ಕೆ ಹೆಚ್ಚಿನದನ್ನು ಸೇರಿಸದೇ ಅದು ಶ್ರೀಲಂಕಾಕ್ಕೆ ಹೆಚ್ಚಿನ ಸಮೃದ್ಧಿಯನ್ನು ತರಲಿದೆ. ಅದೇ ಸಮಯದಲ್ಲಿ ಈ ಪ್ರಾಂತ್ಯದಲ್ಲಿ ನಮ್ಮ ಮಿತ್ರರಾಷ್ಟ್ರಗಳ ಸ್ಥಾನಬಲವನ್ನು ಬಲಪಡಿಸಲಿದೆʼʼ ಎಂದು ಡಿಎಫ್‌ಸಿ ಸಿಇಒ ಸ್ಕಾಟ್ ನಾಥನ್ ಹೇಳಿದ್ದಾರೆ.
ಭಾರತವು ಕಳೆದ ವರ್ಷ ಶ್ರೀಲಂಕಾಕ್ಕೆ ಸುಮಾರು 4 ಶತಕೋಟಿ ಡಾಲರ್ ಸಾಲವನ್ನು ನೀಡಿದೆ. ಆರ್ಥಿಕ ಬಿಕ್ಕಟ್ಟಿನ ಕೆಟ್ಟ ಸಂದರ್ಭದಲ್ಲಿ ಇಂಧನ, ಔಷಧ ಮತ್ತು ರಸಗೊಬ್ಬರವನ್ನು ಆಮದು ಮಾಡಿಕೊಳ್ಳಲು ನಿರ್ಣಾಯಕ ಬೆಂಬಲವನ್ನು ನೀಡಿತು.
ದ್ವೀಪ ರಾಷ್ಟ್ರ ಶ್ರೀಲಂಕಾದಲ್ಲಿ ಪ್ರಭಾವ ವಿಸ್ತರಣೆಗಾಗಿ ಭಾರತ ಮತ್ತು ಚೀನಾ ಸ್ಪರ್ಧಿಸುತ್ತಿವೆ. ಎರಡೂ ದೇಶಗಳ ಕಾರ್ಯನಿರತ ಹಡಗು ಮಾರ್ಗಗಳ ಬಳಿ WCTಯ 34%ರಷ್ಟು ಮಾಲೀಕತ್ವವನ್ನು ಶ್ರೀಲಂಕಾದ ಜಾನ್ ಕೀಲ್ಸ್ ಹೋಲ್ಡಿಂಗ್ಸ್ ಸಂಸ್ಥೆ ಹೊಂದಿದೆ. ಉಳಿದದ್ದನ್ನು ಸರ್ಕಾರಿ ಚಾಲಿತ ಶ್ರೀಲಂಕಾ ಬಂದರು ಪ್ರಾಧಿಕಾರ (SLPA) ಹೊಂದಿದೆ.
ಟರ್ಮಿನಲ್‌ಗಾಗಿ ಡ್ರೆಡ್ಜಿಂಗ್ ಕಳೆದ ನವೆಂಬರ್‌ನಲ್ಲಿ ಪ್ರಾರಂಭವಾಯಿತು. ಮೊದಲ ಹಂತವು 2024ರ ಮೂರನೇ ತ್ರೈಮಾಸಿಕದಲ್ಲಿ ಪೂರ್ಣಗೊಳ್ಳಲಿದೆ ಮತ್ತು ಪೂರ್ಣ ಯೋಜನೆಯು 2025ರ ಅಂತ್ಯದ ವೇಳೆಗೆ ಪೂರ್ಣಗೊಳ್ಳಲಿದೆ.
ಇದನ್ನೂ ಓದಿ: Adani Power : ಭರ್ಜರಿ ಲಾಭದಲ್ಲಿದೆ ಅದಾನಿ ಪವರ್; ಆದಾಯ 9 ಪಟ್ಟು ಹೆಚ್ಚಳ