ಹೈದರಾಬಾದ್: ಬರೀ ಹೆಣ್ಣುಮಕ್ಕಳೇ ಇರುವ, ಒಂಟಿ ಮಹಿಳೆಯರು ವಾಸಿಸುವ ಮನೆಗಳಿಗೆ ನುಗ್ಗಿ, ದರೋಡೆ ಮಾಡುವ ಪ್ರಕರಣಗಳು ನಗರಗಳಲ್ಲಿ ಇತ್ತೀಚೆಗೆ ಜಾಸ್ತಿಯಾಗಿವೆ. ಆದರೆ, ಹೈದರಾಬಾದ್‌ನಲ್ಲಿ (Hyderabad) ಮನೆಗೆ ನುಗ್ಗಿದ ಇಬ್ಬರು ದರೋಡೆಕೋರರ (Robbers) ವಿರುದ್ಧ ತಾಯಿ-ಮಗಳು ಹೋರಾಡಿ, ಅವರನ್ನು ಬಡಿದು ಮನೆಯಿಂದ ಓಡಿಸುವ ಮೂಲಕ ಶೌರ್ಯ ಮೆರೆದಿದ್ದಾರೆ. ಈ ವಿಡಿಯೊ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ (Viral Video) ಆಗಿದ್ದು, ತಾಯಿ-ಮಗಳ ಸಾಹಸವನ್ನು ಜನ ಕೊಂಡಾಡಿದ್ದಾರೆ.
ಹೈದರಾಬಾದ್‌ನ ರಸೂಪ್‌ಪುರದ ಪೈಗಾಹ್‌ ಕಾಲೋನಿಯಲ್ಲಿರುವ ಮನೆಗೆ ಇಬ್ಬರು ಕಳ್ಳರು ನುಗ್ಗಿದ್ದಾರೆ. ಶಸ್ತ್ರಸಜ್ಜಿತವಾಗಿಯೇ ಮನೆಗೆ ನುಗ್ಗಿದ ಅವರು, ತಾಯಿ-ಮಗಳನ್ನು ಕೊಂದು, ಮನೆಯಲ್ಲಿರುವ ನಗ-ನಾಣ್ಯಗಳನ್ನು ಕದ್ದೊಯ್ಯುವ ಉದ್ದೇಶ ಹೊಂದಿದ್ದರು ಎಂದು ತಿಳಿದುಬಂದಿದೆ. ಆದರೆ, ಇಬ್ಬರೂ ಕಳ್ಳರ ವಿರುದ್ಧ ತಾಯಿ-ಮಗಳು ಹೋರಾಡಿದ್ದಾರೆ. ಅವರಿಗೆ ಬಡಿದು, ಒದ್ದು ಮನೆಯಿಂದ ಓಡಿಸಿದ್ದಾರೆ. ಆ ಮೂಲಕ ಇಬ್ಬರೂ ಶೌರ್ಯ ಮೆರೆದಿದ್ದಾರೆ. ತಾಯಿ-ಮಗಳ ಹೊಡೆತ ತಾಳದ ಕಳ್ಳರು ಎದ್ನೋ, ಬಿದ್ನೋ ಎಂದು ಕಾಲ್ಕಿತ್ತಿದ್ದಾರೆ.
#WATCH | Hyderabad, Telangana: A mother and daughter fight back against two armed robbers who enter their residence to rob and kill them, in Paigah Colony, Rasoolpura.
— ANI (@ANI) March 22, 2024
(CCTV visuals, confirmed by Hyderabad Police) pic.twitter.com/QRiVGauYOo
ಮನೆಯ ಬಾಗಿಲಿನ ಬಳಿ ಕಳ್ಳನೊಬ್ಬ ಇಬ್ಬರ ಕೈಗೆ ಸಿಕ್ಕಿದ್ದಾನೆ. ಆತನು ಇಬ್ಬರ ಮೇಲೆ ಹಲ್ಲೆ ನಡೆಸಿ, ದರೋಡೆ ಮಾಡಲು ಮುಂದಾಗುತ್ತಲೇ ತಾಯಿ-ಮಗಳು ಆತನನ್ನು ಹಿಮ್ಮೆಟ್ಟಿಸಿದ್ದಾರೆ. ಅವನಿಗೆ ಹೊಡೆದು, ಬಡಿದು ಮನೆಯಿಂದ ಓಡಿಸಿದ್ದಾರೆ. ಮತ್ತೊಬ್ಬ ಕಳ್ಳನು ಮನೆಯೊಳಗೆ ಅವಿತು ಕೂತಿದ್ದು, ಇಬ್ಬರೂ ಮನೆಯೊಳಗೆ ಹೋಗಿ ಆತನಿಗೂ ನಾಲ್ಕು ಕೊಟ್ಟಿದ್ದಾರೆ. ಅವನೂ ಎದ್ನೋ-ಬಿದ್ನೋ ಎಂದು ಮನೆಯಿಂದ ಓಡಿ ಹೋಗಿದ್ದಾನೆ.
ಇದನ್ನೂ ಓದಿ: David Warner: ಬಗೆಬಗೆಯ ಅಡುಗೆ ಮಾಡಿದ ಡೇವಿಡ್ ವಾರ್ನರ್; ವಿಡಿಯೊ ವೈರಲ್
ಇಬ್ಬರೂ ದರೋಡೆಕೋರರನ್ನು ತಾಯಿ-ಮಗಳು ಕೂಡಿ ಹಿಮ್ಮೆಟ್ಟಿಸಿದ ದೃಶ್ಯವು ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಹೈದರಾಬಾದ್ ಪೊಲೀಸರು ಕೂಡ ಪ್ರಕರಣವನ್ನು ದೃಢಪಡಿಸಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಂತೂ ತಾಯಿ-ಮಗಳ ಧೈರ್ಯವನ್ನು ಕಂಡ ಜನ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ