ವಾಶಿಮ್: ರಾಹುಲ್ ಗಾಂಧಿ ನೇತೃತ್ವದಲ್ಲಿ ನಡೆಯುತ್ತಿರುವ ಭಾರತ್ ಜೋಡೋ ಯಾತ್ರೆ ಸದ್ಯ ಮಹಾರಾಷ್ಟ್ರದಲ್ಲಿದೆ. ಇಲ್ಲಿನ ವಾಶಿಮ್ ಜಿಲ್ಲೆಯಲ್ಲಿ ಭಾರತ್ ಜೋಡೋ ಯಾತ್ರೆಯ ಸಭಾ ಕಾರ್ಯಕ್ರಮ ಆಯೋಜಿಸಿದ್ದ ವೇಳೆ ಕಾಂಗ್ರೆಸ್ ಒಂದು ಎಡವಟ್ಟು ಮಾಡಿಕೊಂಡಿದ್ದು, ಬಿಜೆಪಿಯವರು ಮತ್ತು ಜನಸಾಮಾನ್ಯರು ರಾಹುಲ್ ಗಾಂಧಿಯರನ್ನು ಟೀಕಿಸುತ್ತಿದ್ದಾರೆ. ‘ನಿಮಗೆ ಜವಾಬ್ದಾರಿಯೇ ಇಲ್ಲವಾ’ ಎಂದು ಪ್ರಶ್ನಿಸುತ್ತಿದ್ದಾರೆ.
ಭಾರತ್ ಜೋಡೋ ಯಾತ್ರೆ ಮಹಾರಾಷ್ಟ್ರ ಪ್ರವೇಶ ಮಾಡಿ ವಾರದ ಮೇಲಾಯಿತು. ಬುಧವಾರ ವಾಶಿಮ್ ಜಿಲ್ಲೆಯಲ್ಲಿ ಒಂದು ಸಮಾವೇಶ ಹಮ್ಮಿಕೊಳ್ಳಲಾಗಿತ್ತು. ಇಲ್ಲಿ ರಾಹುಲ್ ಗಾಂಧಿ ಸೇರಿ ಹಲವು ನಾಯಕರು ಜನರನ್ನು ಉದ್ದೇಶಿಸಿ ಮಾತನಾಡಿದರು. ರಾಹುಲ್ ಗಾಂಧಿ ಭಾಷಣ ಮುಕ್ತಾಯಗೊಳ್ಳುತ್ತಿದ್ದಂತೆ ನಿರೂಪಕರು, ಈಗ ರಾಷ್ಟ್ರಗೀತೆ ಪ್ರಸಾರವಾಗುತ್ತದೆ ಎಂದು ಮೈಕ್ನಲ್ಲಿ ಪ್ರಕಟಿಸಿದರು. ರಾಹುಲ್ ಗಾಂಧಿ ಕೂಡ ಮೈಕ್ ಬಳಿ ಬಂದು ಅಬ್ ರಾಷ್ಟ್ರಗೀತ್ (ಈಗ ರಾಷ್ಟ್ರಗೀತೆ) ಎಂದು ಹೇಳಿದರು. ವೇದಿಕೆ ಮೇಲೆ ಆಸೀನರಾಗಿದ್ದವರು, ನೆರೆದಿದ್ದ ಜನರೆಲ್ಲ ಎದ್ದುನಿಂತು, ಸಾವಧಾನ್ ಸ್ಥಿತಿಯಲ್ಲಿ ನಿಂತಿದ್ದಾರೆ. ಆದರೆ ಭಾರತದ ರಾಷ್ಟ್ರಗೀತೆ ಪ್ರಸಾರವಾಗದೆ, ನೇಪಾಳ ರಾಷ್ಟ್ರಗೀತೆ ಪ್ರಸಾರವಾಯಿತು. ನೇಪಾಳ ರಾಷ್ಟ್ರಗೀತೆ ಪ್ರಸಾರಕ್ಕೂ ಮೊದಲು ಒಂದು ಮ್ಯೂಸಿಕ್ ಪ್ರಸಾರವಾಗುತ್ತದೆ. ಆ ಮ್ಯೂಸಿಕ್ ಬಂದಾಗಲೂ ಅಲ್ಲಿದ್ದವರಿಗೆ ಅದು ಜನಗಣಮನ ಅಲ್ಲ ಎಂದು ಗೊತ್ತಾಗಲಿಲ್ಲ. ಹಾಡು ಬಂದಾಗಲೇ ಎಲ್ಲರೂ ಎಚ್ಚೆತ್ತುಕೊಂಡಿದ್ದಾರೆ. ರಾಹುಲ್ ಗಾಂಧಿ ಕೂಡ ನಿರೂಪಕನ ಬಳಿ, ‘ಏನಿದು?’ ಎಂದು ಕೇಳಿದ್ದಾರೆ. ತಕ್ಷಣವೇ ಆ ಹಾಡು ನಿಲ್ಲಿಸಿ, ಭಾರತದ ರಾಷ್ಟ್ರಗೀತೆ ಹಾಕಲಾಗಿದೆ.
ವಿಡಿಯೊ ಸಿಕ್ಕಾಪಟೆ ವೈರಲ್ ಆಗಿದೆ. ತಮಿಳುನಾಡು ಬಿಜೆಪಿ ನಾಯಕ ಅಮರ್ ಪ್ರಸಾದ್ ರೆಡ್ಡಿ ಈ ವಿಡಿಯೊವನ್ನು ಶೇರ್ ಮಾಡಿಕೊಂಡು ‘ರಾಹುಲ್ ಗಾಂಧಿಯವರೇ ಏನಿದು?’ ಎಂದು ಪ್ರಶ್ನೆ ಮಾಡಿದ್ದಾರೆ. ಹಾಗೇ, ವಿಡಿಯೊ ಶೇರ್ ಮಾಡಿಕೊಂಡ ಮಹಾರಾಷ್ಟ್ರ ಬಿಜೆಪಿ ನಾಯಕ ನಿತೇಶ್ ರಾಣೆ, ‘ಇದು ಪಪ್ಪುವಿನ ಕಾಮಿಡಿ ಸರ್ಕಸ್’ ಎಂದು ವ್ಯಂಗ್ಯವಾಡಿದ್ದಾರೆ. ವಿಡಿಯೊ ನೋಡಿದ ಜನರೂ ಆಕ್ಷೇಪ ಎತ್ತಿದ್ದಾರೆ. ಪ್ರಾರಂಭದಲ್ಲಿ ಹಾಡಿಗಿಂತಲೂ ಮುಂಚೆ ಅದ್ಯಾವುದೋ ಮ್ಯೂಸಿಕ್ ಪ್ರಸಾರವಾದಾಗಲೇ ಗೊತ್ತಾಗುತ್ತದೆ, ಅದು ರಾಷ್ಟ್ರಗೀತೆ ಅಲ್ಲ ಎಂದು. ಹಾಗಿದ್ದಾಗ್ಯೂ ಕಾಂಗ್ರೆಸ್ ನಾಯಕರು ತುಂಬ ಹೊತ್ತಿನ ನಂತರ ಅದು ರಾಷ್ಟ್ರಗೀತೆ ಅಲ್ಲ ಎಂದು ಅರಿತುಕೊಂಡರು ಎಂದು ಅನೇಕರು ಕಮೆಂಟ್ ಮಾಡಿದ್ದಾರೆ. ಇಲ್ಲಿಯವರೆಗೆ ಕಾಂಗ್ರೆಸ್ ಈ ಬಗ್ಗೆ ಯಾವುದೇ ಸ್ಪಷ್ಟನೆ ಕೊಟ್ಟಿಲ್ಲ.
ಇದನ್ನೂ ಓದಿ: ಭಾರತ್ ಜೋಡೋ ಯಾತ್ರೆಯಲ್ಲಿ ನಟಿ ಪೂನಮ್ ಕೈ ಹಿಡಿದು ಸಾಗಿದ ರಾಹುಲ್ ಗಾಂಧಿ; ವ್ಯಂಗ್ಯ ಮಾಡಿದ ಪ್ರೀತಿ ಗಾಂಧಿ ಟ್ರೋಲ್