IPL 2023 : ಸಾಯಿ ಸುದರ್ಶನ್​ ಅಬ್ಬರದ ಬ್ಯಾಟಿಂಗ್​, 214 ರನ್​ಗಳ ಬೃಹತ್ ಮೊತ್ತ ಪೇರಿಸಿದ ಗುಜರಾತ್​ ಟೈಟನ್ಸ್​

ಅಹಮದಾಬಾದ್​: ಸಾಯಿ ಸುದರ್ಶನ್​ (96 ರನ್​, 47 ಎಸೆತ, 8 ಫೋರ್, 6 ಸಿಕ್ಸರ್​) ಹಾಗೂ​ ವೃದ್ಧಿಮಾನ್​ ಸಾಹ (54), ಬಾರಿಸಿದ ಅರ್ಧ ಶತಕಗಳ ನೆರವು ಪಡೆದ ಹಾಲಿ ಚಾಂಪಿಯನ್​ ಗುಜರಾತ್​ ಟೈಟನ್ಸ್​ ತಂಡ ಐಪಿಎಲ್​ 16ನೇ ಆವೃತ್ತಿಯ ಫೈನಲ್​ ಪಂದ್ಯದಲ್ಲಿ ಎದುರಾಳಿ ನಾಲ್ಕು ಬಾರಿಯ ಚಾಂಪಿಯನ್​ ಚೆನ್ನೈ ಸೂಪರ್​ ಕಿಂಗ್ಸ್​ ತಂಡಕ್ಕೆ 215 ರನ್​ಗಳ ಸವಾಲು ನೀಡಿದೆ. ಆರಂಭದಿಂದಲೂ ಸರಾಗವಾಗಿ ರನ್​ ಗಳಿಸುತ್ತಾ ಬಂದ ಗುಜರಾತ್​ ತಂಡ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತು.

ಇಲ್ಲಿನ ನರೇಂದ್ರ ಮೋದಿ ಕ್ರಿಕೆಟ್​ ಸ್ಟೇಡಿಯಮ್​​ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಚೆನ್ನೈ ತಂಡದ ನಾಯಕ ಮಹೇಂದ್ರ ಸಿಂಗ್ ಧೋನಿ ಮೊದಲು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಅಂತೆಯ ಮೊದಲು ಬ್ಯಾಟ್​ ಮಾಡಿದ ಗುಜರಾತ್ ತಂಡ ನಿಗದಿತ 20 ಓವರ್​ಗಳಲ್ಲಿ 4 ವಿಕೆಟ್​ ನಷ್ಟ ಮಾಡಿಕೊಂಡು 214 ರನ್​ ಬಾರಿಸಿತು.

See more

The 🏁 is 2️⃣1️⃣5️⃣. Trust the 🦁 to roar back! 🥳💪#IPL2023Final #CSKvGT #WhistlePodu #Yellove 🦁💛 pic.twitter.com/1xQOYcNtAq

— Chennai Super Kings (@ChennaiIPL) May 29, 2023

ಬ್ಯಾಟಿಂಗ್ ಆರಂಭಿಸಿದ ಗುಜರಾತ್​ ತಂಡ ಆರಂಭದಿಂದಲೇ ಸ್ಫೋಟಕ ಬ್ಯಾಟಿಂಗ್​ ಆರಂಭಿಸಿತು. ಶುಭ್​ಮನ್​ ಗಿಲ್​ (20 ಎಸೆತ 39 ರನ್​) ಹಾಗೂ ವೃದ್ಧಿಮಾನ್​ ಸಾಹ ಭರ್ಜರಿ ಬ್ಯಾಟಿಂಗ್ ನಡೆಸಿದರು. ಈ ಜೋಡಿ ಮೊದಲ ವಿಕೆಟ್​ಗೆ 7 ಓವರ್​ಗಳಿಗೆ 66 ರನ್​ ಬಾರಿಸಿತು. ಏಳನೇ ಓವರ್​ನ ಕೊನೇ ಎಸೆತಕ್ಕೆ ಧೋನಿ ಮಾಡಿದ ಕ್ಷಿಪ್ರ ಸ್ಟಂಪ್​ ಮೂಲಕ ಗಿಲ್​ ಔಟಾದರು. ಈ ಮೂಲಕ ಅವರ ಮತ್ತೊಂದು ಶತಕ ಬಾರಿಸುವ ನಿರೀಕ್ಷೆ ಸುಳ್ಳಾಯಿತು. ಹಾಲಿ ಆವೃತ್ತಿಯಲ್ಲಿ ಅವರ ಒಟ್ಟು ಸ್ಕೋರ್​ 890 ರನ್​ಗಳು. ಅಲ್ಲದೆ 2016ರಲ್ಲಿ ವಿರಾಟ್​ ಕೊಹ್ಲಿ ಬಾರಿಸಿದ್ದ 973 ರನ್​ಗಳ ದಾಖಲೆ ಹಾಗೆಯೇ ಉಳಿಯಿತು.

ಗಿಲ್​ ವಿಕೆಟ್​ ಪತನಗೊಂಡ ಬಳಿಕ ಆಡಲು ಬಂದ ಸಾಯಿ ಸುದರ್ಶನ್​ ತಮ್ಮ ಎಂದಿನ ಶೈಲಿಯಲ್ಲೇ ರನ್​ ಗಳಿಸಿದರು. ಏತನ್ಮಧ್ಯೆ, ವೃದ್ಧಿಮಾನ್ ಸಾಹ 36 ಎಸೆತಕ್ಕೆ ಅರ್ಧ ಶತಕ ಪೂರೈಸಿದರು. ಆದರೆ, 14ನೇ ಓವರ್​ನ ಕೊನೇ ಎಸೆತದಲ್ಲಿ ದೊಡ್ಡ ಹೊಡೆತ ಬಾರಿಸಲು ಮುಂದಾದ ಸಾಹ ವಿಕೆಟ್​ ಕೀಪರ್​ ಧೋನಿಗೆ ಕ್ಯಾಚ್​ ನೀಡಿ ನಿರ್ಗಮಿಸಿದರು.

See more

6️⃣4️⃣4️⃣4️⃣@sais_1509 on song 🔥🔥

Can he finish on a high for @gujarat_titans? 🤔

Follow the match ▶️ https://t.co/WsYLvLrRhp#TATAIPL | #Final | #CSKvGT pic.twitter.com/z7qL4Dav1w

— IndianPremierLeague (@IPL) May 29, 2023

ಸಾಹ ಔಟಾಗುತ್ತಿದ್ದಂತೆ ಸಾಯಿ ಸುದರ್ಶನ್​ ರನ್​ ಗಳಿಕೆ ವೇಗ ಹೆಚ್ಚಿಸಿದರು. ಅವರು ಸತತವಾಗಿ ಬೌಂಡರಿ ಸಿಕ್ಸರ್​ಗಳ ಮೂಲಕ 34 ಎಸೆತದಲ್ಲಿ ತಮ್ಮ ಅರ್ಧ ಶತಕ ಪೂರೈಸಿದರು. ಆ ಬಳಿಕವೂ ಅವರು ಸತತವಾಗ ಬೌಂಡರಿ ಸಿಕ್ಸರ್​ಗಳನ್ನು ಬಾರಿಸಿ ಚೆನ್ನೈ ಬೌಲರ್​ಗಳನ್ನು ಬೆಂಡೆತ್ತಿದರು. ಆದರೆ, 19ನೇ ಓವರ್​ ಮೂರನೇ ಎಸೆತಕ್ಕೆ ಎಲ್​ಬಿಡಬ್ಲ್ಯು ಆಗುವ ಮೂಲಕ ಶತಕದಿಂದ ವಂಚಿತರಾದರು.

ನಾಯಕ ಹಾರ್ದಿಕ್ ಪಾಂಡ್ಯ 12 ಎಸೆತಕ್ಕೆ 21 ರನ್ ಬಾರಿಸಿದರು. ಚೆನ್ನೈ ಪರ ಬೌಲಿಂಗ್​ನಲ್ಲಿ ಮಹೀಶ್ ಪತಿರಾಣಾ 44 ರನ್​ ನೀಡಿ 2 ವಿಕೆಟ್ ಉರುಳಿಸಿದರು. ರವೀಂದ್ರ ಜಡೇಜಾ ಮತ್ತು ದೀಪಕ್​ ಚಾಹರ್​ ತಲಾ ಒಂದು ವಿಕೆಟ್ ಕಬಳಿಸಿದರು.