ಹೈದರಾಬಾದ್: ಐಪಿಎಲ್ 16ನೇ ಆವೃತ್ತಿಯ 34ನೇ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಎರಡನೇ ಜಯ ಲಭಿಸಿದೆ. ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ 7 ರನ್ನಿಂದ ಗೆದ್ದ ಡೇವಿಡ್ ವಾರ್ನರ್ ಪಡೆ ಸಂಭ್ರಮಿಸಿತು. ಇದೇ ವೇಳೆ ಸತತ ಮೂರನೇ ಸೋಲಿಗೆ ಒಳಗಾಯಿತು. ಅಕ್ಷರ್ ಪಟೇಲ್ (34) ಹಾಗೂ ಮನೀಶ್ ಪಾಂಡೆ (34) ಡೆಲ್ಲಿ ತಂಡದ ಗೆಲುವಿನ ರೂವಾರಿಗಳೆನಿಸಿಕೊಂಡರು. ಡೆಲ್ಲಿ ಬೌಲರ್ಗಳು ಸಣ್ಣ ಮೊತ್ತವನ್ನು ಕಾಪಾಡಿಕೊಳ್ಳುವುದಕ್ಕೆ ಯಶಸ್ವಿಯಾದರು.
ಇಲ್ಲಿನ ರಾಜೀವ್ಗಾಂಧಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ತನ್ನ ಪಾಲಿನ 20 ಓವರ್ಗಳಲ್ಲಿ 9 ವಿಕೆಟ್ ನಷ್ಟ ಮಾಡಿಕೊಂಡು 144 ರನ್ ಬಾರಿಸಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ಹೈದರಾಬಾದ್ ತಂಡ ತನ್ನ ಪಾಲಿನ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 137 ರನ್ ಬಾರಿಸಿ ಸೋಲೊಪ್ಪಿಕೊಂಡಿತು.
ಸಾಧರಣ ಮೊತ್ತದ ಗುರಿಯನ್ನು ಬೆನ್ನಟ್ಟಿದ ಹೈದರಾಬಾದ್ ತಂಡದ ಬ್ಯಾಟಿಂಗ್ ಕೂಡ ಉತ್ತಮವಾಗಿರಲಿಲ್ಲ. ಹ್ಯಾರಿ ಬ್ರೂಕ್ 7 ರನ್ಗಳಿಗೆ ಔಟಾದರೆ, ರಾಹುಲ್ ತ್ರಿಪಾಠಿ 15 ರನ್ಗೆ ವಿಕೆಟ್ ಒಪ್ಪಿಸಿದರು. ಇನ್ನೊಂದು ಬದಿಯಲ್ಲಿ ಮಯಾಂಕ್ ಅಗರ್ವಾಲ್ ರನ್ ಬಾರಿಸುತ್ತಾ ಗೆಲುವಿನ ವಿಶ್ವಾಸ ಮೂಡಿಸಿದರು. ಆದರೆ, 49 ರನ್ಗೆ ಔಟಾದ ಅವರು 1 ರನ್ನಿಂದ ಅರ್ಧ ಶತಕದಿಂದ ವಂಚಿತರಾದರು. ನಾಯಕ ಏಡೆನ್ ಮಾರ್ಕ್ರಮ್ 3 ರನ್ಗೆ ವಿಕೆಟ್ ಒಪ್ಪಿಸಿದರು. 85 ರನ್ಗೆ ಐದು ವಿಕೆಟ್ ಕಳೆದುಕೊಂಡ ಹೈದರಾಬಾದ್ ತಂಡಕ್ಕೆ ಕೊನೇ ಹಂತದಲ್ಲಿ ಹೆನ್ರಿಚ್ ಕ್ಲಾಸೆನ್ (31 ರನ್) ಭರವಸೆ ಮೂಡಿಸಿದರು. 19 ಎಸೆತದಲ್ಲಿ 3 ಫೋರ್ ಹಾಗೂ 1 ಸಿಕ್ಸರ್ ಅವರು ಬಾರಿಸಿದರು. ಬೌಲಿಂಗ್ನಲ್ಲಿ ಮೂರು ವಿಕೆಟ್ ಪಡೆದು ಮಿಂಚಿದ್ದ ವಾಷಿಂಗ್ಟನ್ ಸುಂದರ್ 24 ರನ್ ಬಾರಿಸಿ ಕೊನೇ ತನಕ ಕ್ರೀಸ್ ಕಾಯ್ದುಕೊಂಡರೂ ಗೆಲುವು ತಂದುಕೊಡಲು ಅವರಿಗೆ ಸಾಧ್ಯವಾಗಿಲ್ಲ.
ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಬೌಲರ್ಗಳಾದ ಆ್ಯನ್ರಿಚ್ ನೋರ್ಜೆ (33 ರನ್ಗಳಿಗೆ 2 ವಿಕೆಟ್), ಅಕ್ಷರ್ ಪಟೇಲ್ (21 ರನ್ಗಳಿಗೆ 2 ವಿಕೆಟ್) ಗೆಲುವಿಗೆ ತಮ್ಮ ಕೊಡುಗೆಗಳನ್ನು ಕೊಟ್ಟರು
ಡೆಲ್ಲಿಯ ಬ್ಯಾಟಿಂಗ್ ವೈಫಲ್ಯ
ಬ್ಯಾಟಿಂಗ್ ವೈಫಲ್ಯ ಕಾಣುತ್ತಿರುವ ಪೃಥ್ವಿ ಶಾ ಬದಲಿಗೆ ಇನಿಂಗ್ಸ್ ಆರಂಭಿಸಲು ಮುಂದಾದ ಫಿಲ್ ಸಾಲ್ಟ್ ಶೂನ್ಯಕ್ಕೆ ಔಟಾಗುವ ಮೂಲಕ ತಂಡದ ಹಿನ್ನಡೆಗೆ ಕಾರಣಾದರು. ಡೇವಿಡ್ ವಾರ್ನರ್ ಸ್ಫೋಟಿಸುವ ಲಕ್ಷಣ ತೋರಿದರೂ 21 ರನ್ಗೆ ವಿಕೆಟ್ ಒಪ್ಪಿಸಿದರು. ಮಿಚೆಲ್ ಮಾರ್ಷ್ 15 ಎಸೆತದಲ್ಲಿ 25 ರನ್ ಬಾರಿಸಿ ವಿಶ್ವಾಸ ಮೂಡಿಸಿದರೂ ನಟರಾಜನ್ ಎಸೆತಕ್ಕೆ ಎಲ್ಬಿಡಬ್ಲ್ಯು ಔಟಾದರು. ಸರ್ಫರಾಜ್ ಖಾನ್ 10 ರನ್ಗೆ ಔಟಾದರು. ಅಮನ್ ಹಕಿಮ್ 4 ರನ್ಗೆ ವಿಕೆಟ್ ಒಪ್ಪಿಸಿದರು.
62 ರನ್ಗಳಿಗೆ 5 ವಿಕೆಟ್ ನಷ್ಟಮಾಡಿಕೊಂಡ ಡೆಲ್ಲಿ ತಂಡಕ್ಕೆ ಮನೀಶ್ ಹಾಗೂ ಅಕ್ಷರ್ ಪಟೇಲ್ ಸ್ವಲ್ಪ ಮಟ್ಟಿಗೆ ಆಧಾರವಾದರು. 6ನೇ ವಿಕೆಟ್ಗೆ ಈ ಜೋಡಿ 71 ರನ್ ಬಾರಿಸಿ ಮರ್ಯಾದೆ ಕಾಪಾಡಿತು. ಅಕ್ಷರ್ 34 ಎಸೆತಗಳಲ್ಲಿ 34 ರನ್ ಬಾರಿಸಿ ಔಟಾದರೆ ಮನೀಶ್ 27 ಎಸೆತಗಳಲ್ಲಿ 34 ರನ್ ಬಾರಿಸಿದರು. ಮನೀಶ್ ಅನಗತ್ಯ ರನ್ಔಟ್ಗೆ ಬಲಿಯಾದ ಬಳಿಕ ತಂಡ ಮತ್ತೆ ಸಂಪೂರ್ಣವಾಗಿ ಪತನಗೊಂಡಿತು.