ಚೆನ್ನೈ: ಡೇವೋನ್ ಕಾನ್ವೆ (92) ಸ್ಫೋಟಕ ಬ್ಯಾಟಿಂಗ್ ನೆರವು ಪಡೆದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಐಪಿಎಲ್ನ ಭಾನುವಾರದ ಡಬಲ್ ಹೆಡರ್ನ ಮೊದಲ ಪಂದ್ಯದಲ್ಲಿ 200 ರನ್ ಬಾರಿಸಿದೆ. ಇದರೊಂದಿಗೆ ಪ್ರವಾಸಿ ಪಂಜಾಬ್ ಕಿಂಗ್ಸ್ ತಂಡದ ಗೆಲುವಿಗೆ 201 ರನ್ಗಳ ಗುರಿ ಎದುರಾಗಿದೆ. ಆರಂಭದಿಂದಲೂ ಏಕ ರೀತಿಯಲ್ಲಿ ಬ್ಯಾಟಿಂಗ್ ಮಾಡಿಕೊಂಡು ಬಂದ ಆತಿಥೇಯ ತಂಡ ಎದುರಾಳಿ ತಂಡಕ್ಕೆ ದೊಡ್ಡ ಮೊತ್ತದ ಸವಾಲೊಡ್ಡುವಲ್ಲಿ ಯಶಸ್ವಿಯಾಯಿತು.
ಇಲ್ಲಿನ ಚಿದಂಬರಮ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕ ಮಹೇಂದ್ರ ಸಿಂಗ್ ಧೋನಿ ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ನಾಯಕನ ನಿರ್ಧಾರಕ್ಕೆ ಪೂರಕವಾಗಿ ಆಡಿದ ಚೆನ್ನೈ ತಂಡದ ಬ್ಯಾಟರ್ಗಳು 20 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 200 ರನ್ ಬಾರಿಸಿತು.
ಬ್ಯಾಟಿಂಗ್ ಆರಂಭಿಸಿದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಭದ್ರ ಅಡಿಪಾಯ ಪಡೆಯಿತು. ಡೆವೋನ್ ಕಾನ್ವೆ ಹಾಗೂ ಋತುರಾಜ್ ಗಾಯಕ್ವಾಡ್ (37) ಮೊದಲ ವಿಕೆಟ್ಗೆ 86 ರನ್ ಬಾರಿಸಿದರು. ಆದರೆ, 9.4 ಓವರ್ಲ್ಲಿ ಈ ಜೋಡಿ ಬೇರ್ಪಟ್ಟಿತು. ಸ್ಪಿನ್ನರ್ ಸಿಕಂದರ್ ರಾಜಾ ಎಸೆತಕ್ಕೆ ಗಾಯಕ್ವಾಡ್ ಸ್ಟಂಪ್ ಔಟ್ ಆದರು. ಬಳಿಕ ಆಡಲು ಬಂದ ಶಿವಂ ದುಬೆ ಎಂದಿನಂತೆ ಸ್ಪೋಟಕ ಬ್ಯಾಟಿಂಗ್ ಮಾಡಲು ಮುಂದಾದರು. 17 ಎಸೆತಕ್ಕೆ 28 ರನ್ ಬಾರಿಸಿದ ಅವರು ಸಿಕ್ಸರ್ ಬಾರಿಸಲು ಹೋಗಿ ಕ್ಯಾಚ್ ನೀಡಿ ನಿರ್ಗಮಿಸಿದರು. ಸ್ಪಿನ್ನರ್ ಮೊಯೀನ್ ಅಲಿ 10 ರನ್ಗೆ ಸೀಮಿತಗೊಂಡರು. ರವೀಂದ್ರ ಜಡೇಜಾ (12) ಕೂಡ ಹೆಚ್ಚು ಹೊತ್ತು ಕ್ರೀಸ್ನಲ್ಲಿ ನಿಲ್ಲಲಿಲ್ಲ.
ಕಾನ್ವೆ ಅಬ್ಬರ
ನ್ಯೂಜಿಲ್ಯಾಂಡ್ ತಂಡದ ಬ್ಯಾಟರ್ ಡೆವೋನ್ ಕಾನ್ವೆ ಆರಂಭದಿಂದಲೇ ಭರ್ಜರಿ ಬ್ಯಾಟಿಂಗ್ ನಡೆಸಿದರು. ಋತುರಾಜ್ ಜತೆ ಉತ್ತಮ ಜತೆಯಾಟ ನೀಡಿದ ಅವರು 30 ಎಸೆತಗಳಲ್ಲಿ ಅರ್ಧ ಶತಕ ಪೂರೈಸಿದರು. ಕೊನೇ ತನಕ ಔಟಾಗದೇ ಉಳಿದ ಅವರು 92 ರನ್ ಬಾರಿಸಿದರು. ಅವರು 8 ರನ್ಗಳಿಂದ ಕೊರತೆಯಿಂದ ಟೂರ್ನಿಯ ಎರಡನೇ ಶತಕ ಬಾರಿಸುವ ಅವಕಾಶದಿಂದ ವಂಚಿತರಾದರು. ಕಾನ್ವೆ ಇನಿಂಗ್ಸ್ನಲ್ಲಿ 16 ಫೋರ್ ಹಾಗೂ 1 ಸಿಕ್ಸರ್ ಸೇರಿಕೊಂಡಿದೆ.
ಧೋನಿ ಸಿಕ್ಸರ್
41 ವರ್ಷದ ನಾಯಕ ಮಹೇಂದ್ರ ಸಿಂಗ್ ಧೋನಿ ಚೆನ್ನೈ ಅಭಿಮಾನಿಗಳನ್ನು ಸತತ ಎರಡು ಸಿಕ್ಸರ್ಗಳ ಮೂಲಕ ರಂಜಿಸಿದರು. ಇನಿಂಗ್ಸ್ ಮುಕ್ತಾಯಕ್ಕೆ ಐದು ಎಸೆತಗಳು ಬಾಕಿ ಇರುವಾಗ ಬಂದ ಅವರು ನಾಲ್ಕು ಎಸೆಗಳನ್ನು ಬಳಸಿಕೊಂಡು 13 ರನ್ ಬಾರಿಸಿದರು, ಅದರಲ್ಲಿ ಎರಡು ಸಿಕ್ಸರ್ಗಳು ಸೇರಿಕೊಂಡಿವೆ.