ಮೆಲ್ಬೋರ್ನ್: ಇಲ್ಲಿ ನಡೆದ ಫಾರ್ಮುಲಾ 2(formula 2) ರೇಸ್ನಲ್ಲಿ ಭಾರತದ ಯುವ ಚಾಲಕ ಕುಶ್ ಮೈನಿ(kush maini) ಅವರು ಮೂರನೇ ಸ್ಥಾನ ಪಡೆದರು. ಕ್ಯಾಂಪಸ್ ರೇಸಿಂಗ್ ತಂಡವನ್ನು ಪ್ರತಿನಿಧಿಸಿದ ಅವರು ಇದೇ ಮೊದಲ ಬಾರಿ ಫಾರ್ಮುಲಾ 2 ರೇಸ್ನಲ್ಲಿ ‘ಪೋಡಿಯಂ ಫಿನಿಶ್’ ಮಾಡಿದ ಸಾಧನೆ ಮಾಡಿದರು. ಎಂಪಿ ಮೋಟರ್ಸ್ಪೋರ್ಟ್ ತಂಡವನ್ನು ಪ್ರತಿನಿಧಿಸಿದ ಭಾರತದ ಜೆಹಾನ್ ದಾರೂವಾಲಾ 17ನೇ ಸ್ಥಾನಕ್ಕೆ ತೃಪ್ತಿಪಟ್ಟರು.
ಶನಿವಾರ ನಡೆದ ಈ ರೇಸ್ನಲ್ಲಿ ಕುಶ್ ಮೈನಿ ಗ್ರಿಡ್ನಲ್ಲಿ ಮೂರನೆಯವರಾಗಿ ಸ್ಪರ್ಧೆ ಆರಂಭಿಸಿದರು. ಹಲವು ಲ್ಯಾಪ್ಗಳವರೆಗೆ ಇದೇ ಸ್ಥಾನದಲ್ಲಿ ಮುಂದುವರಿದಿದ್ದ ಅವರನ್ನು ಡಿಎಎಂಎಸ್ ತಂಡದ ಆರ್ಥರ್ ಲೆಕ್ಲರ್ಕ್ ಅವರು ಹಿಂದಿಕ್ಕಿದರು. ಆದರೆ ಅಂತಿಮ ಹಂತದ ಕೆಲವು ಲ್ಯಾಪ್ಗಳ ರೇಸ್ ಬಾಕಿಯಿರುವಾಗ ವೇಗದ ರೇಸ್ ಮೂಲಕ ಮತ್ತೆ ಮೇಲುಗೈ ಸಾಧಿಸಿ ಮೂರನೇ ಸ್ಥಾನ ಪಡೆದರು.
ಇದನ್ನೂ ಓದಿ Moto GP : ಫೋರ್ಚುಗಲ್ನಲ್ಲಿ ಭಾನುವಾರ ಮೋಟೊ ಜಿಪಿ ಮೊದಲ ಸುತ್ತಿನ ಫೈನಲ್ ರೇಸ್
ಮೂರನೇ ಸ್ಥಾನ ಪಡೆದ ಬಳಿಕ ಮಾತನಾಡಿದ ಕುಶ್ ಮೈನಿ ಈ ಹಿಂದೆ ಹಲವು ಸಲ ಫಾರ್ಮುಲಾ 2 ರೇಸ್ನಲ್ಲಿ ಪೋಡಿಯಂ ಫಿನಿಶ್ನ ಸನಿಹ ಬಂದಿದ್ದರೂ ಇದನ್ನು ಫಿನಿಶ್ ಮಾಡುವಲ್ಲಿ ವಿಫಲನಾಗಿದ್ದೆ ಆದರೆ ಈ ಬಾರಿ ಈ ಕೊರಗನ್ನು ನೀಗಿಸಿದ್ದೇನೆ. ಈ ಸಾಧನೆ ಮಾಡಿರುವುದು ಸಂತಸ ತಂದಿದೆ. ಈ ಋತುವಿನಲ್ಲಿ ಇನ್ನೂ ಹಲವು ರೇಸ್ಗಳು ಇರುವುದರಿಂದ ಪ್ರದರ್ಶನದಲ್ಲಿ ಸ್ಥಿರತೆ ಕಾಪಾಡಿಕೊಳ್ಳುವುದು ಬಹು ಮುಖ್ಯ ಎಂದು ಹೇಳಿದರು.
ಈ ರೇಸ್ನಲ್ಲಿ ಎಂಪಿ ಮೋಟರ್ಸ್ಪೋರ್ಟ್ ತಂಡದ ಡೆನಿಸ್ ಹಾಗೆರ್ ಮತ್ತು ಹೈಟೆಕ್ ಪಲ್ಸ್ ಎಯ್ಟ್ ತಂಡದ ಜಾಕ್ ಕ್ರಾಫರ್ಡ್ ಕ್ರಮವಾಗಿ ಮೊದಲ ಎರಡು ಸ್ಥಾನಗಳನ್ನು ಪಡೆದುಕೊಂಡರು.