ಹೈದರಾಬಾದ್: ಮಯಾಂಕ್ ಮಾರ್ಕಂಡೆ (15 ರನ್ಗೆ 4 ವಿಕೆಟ್) ಮಾರಕ ಬೌಲಿಂಗ್ ಹಾಗೂ ರಾಹುಲ್ ತ್ರಿಪಾಠಿ (74 ರನ್ 48 ಎಸೆತ) ಅಜೇಯ ಅರ್ಧ ಶತಕದ ನೆರವಿನಿಂದ ಮಿಂಚಿದ ಸನ್ ರೈಸರ್ಸ್ ಹೈದರಾಬಾದ್ ತಂಡ, ಪಂಜಾಬ್ ಕಿಂಗ್ಸ್ ವಿರುದ್ಧದ ಐಪಿಎಲ್ ಪಂದ್ಯದಲ್ಲಿ ಎಂಟು ವಿಕೆಟ್ ಅಮೋಘ ಜಯ ದಾಖಲಿಸಿತು. ಇದು ಹಾಲಿ ಆವೃತ್ತಿಯಲ್ಲಿ ಎಸ್ಆರ್ಎಚ್ ಬಳಗಕ್ಕೆ ದೊರಕಿದ ಮೊದಲ ವಿಜಯ. ಅತ್ತ ಪಂಜಾಬ್ ಕಿಂಗ್ಸ್ ತಂಡ ಎರಡನೇ ಸೋಲಿಗೆ ಒಳಗಾಯಿತು. ಪಂದ್ಯದಲ್ಲಿ ಪಂಜಾಬ್ ತಂಡದ ಬ್ಯಾಟರ್ಗಳು ಕಳಪೆ ಪ್ರದರ್ಶನ ನೀಡಿದರೆ, ನಾಯಕ ಶಿಖರ್ ಧವನ್ ಏಕಾಂಗಿಯಾಗಿ ( 66 ಎಸೆತಗಳಲ್ಲಿ ಅಜೇಯ 99 ರನ್ ) ಹೋರಾಟ ನಡೆಸಿದರು. ಸೋಲಿನೊಂದಿಗೆ ಅವರ ಶ್ರಮ ವ್ಯರ್ಥವಾಯಿತು.
ಇಲ್ಲಿನ ರಾಜೀವ್ಗಾಂಧಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಐಪಿಎಲ್ 16ನೇ ಆವೃತ್ತಿಯ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ ಮಾಡಲು ಆಹ್ವಾನ ಪಡೆದ ಪಂಜಾಬ್ ಕಿಂಗ್ಸ್ ಬಳಗ ತನ್ನ ಪಾಲಿನ 20 ಓವರ್ಗಳಲ್ಲಿ 9 ವಿಕೆಟ್ ನಷ್ಟ ಮಾಡಿಕೊಂಡು 143 ರನ್ ಬಾರಿಸಿತು. ಗುರಿ ಬೆನ್ನಟ್ಟಿದ ಹೈದರಾಬಾದ್ ಬಳಗ 17.1 ಓವರ್ಗಳಲ್ಲಿ 2 ವಿಕೆಟ್ ಕಳೆದುಕೊಂಡು 145 ರನ್ ಬಾರಿಗೆ ಗೆಲುವು ಸಾಧಿಸಿತು.
ತ್ರಿಪಾಠಿ ಹೊಡೆತ ಈ ರೀತಿ ಇದೆ
ಸಾಧಾರಣ ಮೊತ್ತದ ರನ್ ಗುರಿ ಬೆನ್ನಟ್ಟಲು ಆರಂಭಿಸಿದ ಹೈದರಾಬಾದ್ ತಂಡವೂ ಉತ್ತಮ ಬ್ಯಾಟಿಂಗ್ ಪ್ರದರ್ಶ ನೀಡಲಿಲ್ಲ. ಹ್ಯಾರಿ ಬ್ರೂಕ್ 13 ರನ್ಗಳಿಗೆ ಔಟಾದರೆ, ಮಯಾಂಕ್ ಅಗರ್ವಾಲ್ 21 ರನ್ ಬಾರಿಸಿ ಮತ್ತೊಮ್ಮೆ ನಿರಾಸೆ ಮೂಡಿಸಿದರು. ಆದರೆ, ಬಳಿಕ ಜತೆಯಾದ ನಾಯಕ ಏಡೆನ್ ಮಾರ್ಕ್ರಮ್ (37 ರನ್) ಹಾಗೂ ರಾಹುಲ್ ತ್ರಿಪಾಠಿ ಮೂರನೇ ವಿಕೆಟ್ಗೆ 100 ರನ್ ಜತೆಯಾಟ ನೀಡಿ ಗೆಲುವು ತಂದುಕೊಟ್ಟರು.
ಮೊದಲು ಬ್ಯಾಟ್ ಮಾಡಿದ ಪಂಜಾಬ್ ಕಿಂಗ್ಸ್ ತಂಡ ಉತ್ತಮ ಆರಂಭ ಪಡೆಯಲಿಲ್ಲ. ಪ್ರಭ್ಸಿಮ್ರಾನ್ ಸಿಂಗ್ ಶೂನ್ಯಕ್ಕೆ ಔಟಾಗುವ ಮೂಲಕ ಆರಂಭಿಕ ಹಿನ್ನಡೆಗೆ ಕಾರಣರಾದರು. ಬಳಿಕ ಬಂದ ಮ್ಯಾಥ್ಯೂ ಶಾರ್ಟ್ಸ್ ಕೂಡ 1 ರನ್ಗೆ ಸೀಮಿತಗೊಂಡರು. ಸ್ಫೋಟಕ ಬ್ಯಾಟರ್ ಜಿತೇಶ್ ಶರ್ಮಾ ನಾಲ್ಕು ರನ್ಗೆ ಔಟಾದರು.
ಐದನೇ ಕ್ರಮಾಂಕದಲ್ಲಿ ಬ್ಯಾಟ್ ಮಾಡಲು ಬಂದ ಆಲ್ರೌಂಡರ್ ಸ್ಯಾಮ್ ಕರ್ರನ್ 22 ರನ್ ಬಾರಿಸಿ ಸ್ವಲ್ಪ ಹೊತ್ತು ಕ್ರಿಸ್ ಕಾಯ್ದುಕೊಂಡರು. ಆದರೆ, ಅವರ ಮಾರ್ಕಾಂಡೆ ಎಸೆತಕ್ಕೆ ಔಟಾದರು. ಅಲ್ಲಿಂದ ಬಳಿಕ ಪಂಜಾಬ್ ತಂಡದ ಪತನ ಶುರುವಾಯಿತು. ಸಿಕಂದರ್ ರಾಜಾ (5 ರನ್), ಶಾರುಖ್ ಖಾನ್ (4 ರನ್), ಹರ್ಪ್ರಿತ್ ಬ್ರಾರ್ (1 ರನ್), ರಾಹುಲ್ ಚಾಹರ್ (0 ), ನಥಾನ್ ಎಲ್ಲೀಸ್ (0) ಔಟಾದರು.
ಇದನ್ನೂ ಓದಿ : IPL 2022 : ವಿಜಯಕ್ಕಾಗಿ 6,6,6,6,6 ಬಾರಿಸಿ ಐಪಿಎಲ್ನಲ್ಲಿ ಹೊಸ ದಾಖಲೆ ಬರೆದ ರಿಂಕು ಸಿಂಗ್
ಹೈದರಾಬಾದ್ ತಂಡದ ಪರ ಉಮ್ರಾನ್ ಮಲಿಕ್ (32 ರನ್ ನೀಡಿ 2 ವಿಕೆಟ್) ಭುವನೇಶ್ವರ್ ಕುಮಾರ್ (33 ರನ್ಗಳಿಗೆ 1 ವಿಕೆಟ್ ಕೂಡ ಉತ್ತಮ ಬೌಲಿಂಗ್ ದಾಳಿ ನಡೆಸಿದರು.
ಧವನ್ ಅಬ್ಬರ
ಪಂಜಾಬ್ ತಂಡದ ನಾಯಕ ಶಿಖರ್ ಧವನ್ ಆರಂಭದಲ್ಲಿ ತಾಳ್ಮೆಯಿಂದ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. ಆದರೆ, ಕೊನೇ ವಿಕೆಟ್ ಉಳಿದಿರುವ ಹೊತ್ತಲ್ಲಿ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. 42 ಎಸೆತಗಳಲ್ಲಿ ಅರ್ಧ ಶತಕ ಪೂರೈಸಿದ ಅವರು ಮುಂದಿನ 24 ಎಸೆಗಳಲ್ಲಿ 49 ರನ್ ಬಾರಿಸಿದರು. 15ನೇ ಓವರ್ನಲ್ಲಿ ಪಂಜಾಬ್ನ 9ನೇ ವಿಕೆಟ್ ಉರುಳಿತ್ತು. ಆದರೆ ಧವನ್ ಆಲ್ಔಟ್ ಆಗಲು ಅವಕಾಶ ನೀಡಲಿಲ್ಲ.