ಕೋಲ್ಕೊತಾ: ಬೌಲಿಂಗ್ ಹಾಗೂ ಬ್ಯಾಟಿಂಗ್ನಲ್ಲಿ ಪಾರಮ್ಯ ಸಾಧಿಸಿದ ಗುಜರಾತ್ ಟೈಟನ್ಸ್ ತಂಡ ಐಪಿಎಲ್ 16ನೇ ಅವೃತ್ತಿಯ 39ನೇ ಪಂದ್ಯದಲ್ಲಿ ಕೋಲ್ಕೊತಾ ನೈಟ್ ರೈಡರ್ಸ್ ತಂಡದ ವಿರುದ್ಧ ಏಳು ವಿಕೆಟ್ ಸುಲಭ ಜಯ ದಾಖಲಿಸಿದೆ. ಗುಜರಾತ್ ತಂಡದ ಮಧ್ಯಮ ಕ್ರಮಾಂಕದ ಬ್ಯಾಟರ್ ವಿಜಯ್ ಶಂಕರ್ 24 ಎಸೆತಗಳಲ್ಲಿ 51 ರನ್ ಬಾರಿಸಿ ಗೆಲುವಿನ ರೂವಾರಿ ಎನಿಸಿಕೊಂಡರು. ಬೌಲಿಂಗ್ನಲ್ಲಿ ಮೊಹಮ್ಮದ್ ಶಮಿ ಜಿಟಿ ಪರ ಮೂರು ವಿಕೆಟ್ ಕಬಳಿಸಿದರು. ಇದರೊಂದಿಗೆ ಹಾರ್ದಿಕ್ ಪಾಂಡ್ಯ ಬಳತ ಹ್ಯಾಟ್ರಿಕ್ ಜಯ ಸವಿಯುಂಡಿತು. ಕೆಕೆಆರ್ ತಂಡ ಮತ್ತೆ ಸೋಲಿನ ಸುಳಿಗೆ ಸಿಲುಕಿತು.
ಇಲ್ಲಿನ ಈಡನ್ ಗಾರ್ಡನ್ಸ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಗೆದ್ದು ಗುಜರಾತ್ ತಂಡದ ನಾಯಕ ಹಾರ್ದಿಕ್ ಪಾಂಡ್ಯ ಮೊದಲು ಫೀಲ್ಡಿಂಗ್ ಅಯ್ಕೆ ಮಾಡಿಕೊಂಡರು. ಅಂತೆಯೇ ಮೊದಲು ಬ್ಯಾಟಿಂಗ್ ಮಾಡಲು ಆಹ್ವಾನ ಪಡೆದ ಆತಿಥೇಯ ಕೆಕೆಆರ್ ತಂಡ ತನ್ನ ಪಾಲಿನ 20 ಓವರ್ಗಳು ಮುಕ್ತಾಯಗೊಂಡಾಗ 7 ವಿಕೆಟ್ ನಷ್ಟಕ್ಕೆ 179 ರನ್ ಬಾರಿಸಿತು. ಗುರಿ ಬೆನ್ನಟ್ಟಿದ ಗುಜರಾತ್ 17.5 ಓವರ್ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 180 ರನ್ ಬಾರಿಗೆ ಗೆಲುವು ಕಂಡಿತು.
ಗುರಿ ಬೆನ್ನಟ್ಟಲು ಆರಂಭಿಸಿದ ಗುಜರಾತ್ ತಂಡಕ್ಕೆ ವೃದ್ಧಿಮಾನ್ ಸಾಹ 10 ರನ್ಗೆ ಔಟಾಗುವ ಮೂಲಕ ಆರಂಭಿಕ ಹಿನ್ನಡೆ ಉಂಟಾಯಿತು. ಆದರೆ, ಶುಭಮನ್ ಗಿಲ್ ತಮ್ಮ ಎಂದಿನ ಶೈಲಿಯಲ್ಲಿ ಬ್ಯಾಟ್ ಬೀಸಿ 35 ಎಸೆತಗಳಲ್ಲಿ 49 ರನ್ ಬೀಸಿ ಒಂದು ರನ್ನಿಂದ ಅರ್ಧ ಶತಕದ ಸಾಧನೆಯಿಂದ ವಂಚಿತರಾದರು. ಮೂರನೇ ಕ್ರಮಾಂಕದಲ್ಲಿ ಆಡಿದ ನಾಯಕ ಹಾರ್ದಿಕ್ ಪಾಂಡ್ಯ 26 ರನ್ ಬಾರಿಸಿ ಔಟಾದರು. ಅವರ ಬೆನ್ನಲ್ಲೇ ಶುಭ್ಮನ್ ಗಿಲ್ ಕೂಡ ವಿಕೆಟ್ ಒಪ್ಪಿಸಿದರು. ಈ ವೇಳೆ ಗುಜರಾತ್ ತಂಡ 11.2 ಓವರ್ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 93 ರನ್ ಬಾರಿಸಿತ್ತು. ಬಳಿಕ ಜತೆಯಾದ ವಿಜಯ್ ಶಂಕರ್ ಹಾಗೂ ಆಪತ್ಬಾಂಧವ ಡೇವಿಡ್ ಮಿಲ್ಲರ್ ವೇಗದ ರನ್ ಗಳಿಕೆಗೆ ಒತ್ತು ಕೊಟ್ಟು ತಂಡಕ್ಕೆ ಬೇಗ ಜಯ ತಂದುಕೊಟ್ಟರು. ಮಿಲ್ಲರ್ 18 ಎಸೆತಗಳಲ್ಲಿ 32 ರನ್ ಬಾರಿಸಿದ್ದರು.
ಬ್ಯಾಟಿಂಗ್ ಆರಂಭಿಸಿದ ಕೆಕೆಆರ್ ತಂಡ ದೊಡ್ಡ ಮೊತ್ತ ಪೇರಿಸುವ ಸುಳಿವು ನೀಡಿತು. ಜಗದೀಶನ್ 15 ಎಸೆತಗಳಿಗೆ 19 ರನ್ ಬಾರಿಸಿ ಔಟಾದರು. ಈ ವೇಳೆ ತಂಡದ ಮೊತ್ತ 21. ಮುಂಬಡ್ತಿ ಪಡೆದು ಬ್ಯಾಟ್ ಹಿಡಿದು ಬಂದ ಶಾರ್ದೂಲ್ ಠಾಕೂರ್ ಶೂನ್ಯಕ್ಕೆ ಔಟಾಗುವ ಮೂಲಕ ನಿರಾಸೆ ಮೂಡಿಸಿದರು. 47 ರನ್ಗಳಿಗೆ 2 ವಿಕೆಟ್ ನಷ್ಟಮಾಡಿಕೊಂಡ ಕಾರಣ ರನ್ ವೇಗ ಕುಂಠಿತವಾಯಿತು. ಸ್ಫೋಟಕ ಬ್ಯಾಟರ್ ವೆಂಕಟೇಶ್ ಅಯ್ಯರ್ 11 ರನ್ಗೆ ಔಟಾದರು. ಅವರು ಗುಜರಾತ್ ಬೌಲರ್ಗಳನ್ನು ಎದುರಿಸಲು ತಿಣುಕಾಡಿದರು. 14 ಎಸೆತದಲ್ಲಿ 11 ರನ್ ಬಾರಿಸಿ ಔಟಾಗಿ ಪೆವಿಲಿಯನ್ ಹಾದಿ ಹಿಡಿದರು. ನಾಯಕ ನಿತೀಶ್ ರಾಣಾ ನಾಲ್ಕು ರನ್ಗೆ ಔಟಾಗಿ ಬೇಸರ ಮೂಡಿಸಿದರು.
ಇದನ್ನೂ ಓದಿ : IPL 2023 : ಬೃಹತ್ ಗೆಲುವಿನ ಬಳಿಕ ಲಕ್ನೊ ತಂಡಕ್ಕೆ ಆಘಾತ; ಪ್ರಮುಖ ಆಲ್ರೌಂಡರ್ಗೆ ಗಾಯ
ಅಬ್ಬರಿಸಿದ ಗುರ್ಜಬ್
ಒಂದು ಕಡೆ ಸತತವಾಗಿ ವಿಕೆಟ್ ಪತನಗೊಳ್ಳುತ್ತಿದ್ದ ಹೊರತಾಗಿಯೂ ಆಫ್ಘನ್ ಬ್ಯಾಟರ್ ರಹಮನುಲ್ಲಾ ಗುರ್ಬಜ್ ಸ್ಫೋಟಕ ಬ್ಯಾಟಿಂಗ್ ನಡೆಸಿದರು. ಫೋರ್ ಸಿಕ್ಸರ್ಗಳ ಮಳೆ ಸುರಿಸಿ 27 ಎಸೆತಗಳಲ್ಲಿ ಅರ್ಧ ಶತಕ ಪೂರೈಸಿದರು. ನಂತರವೂ ಬ್ಯಾಟ್ ಬೀಸಿ 30 ಎಸೆಗಗಳಿಗೆ 81 ರನ್ ಕೊಡುಗೆ ಕೊಟ್ಟರು. ಯುವ ಬ್ಯಾಟರ್ ರಿಂಕು ಸಿಂಗ್ 19 ರನ್ಗಳಿಗೆ ಸೀಮಿತಗೊಂಡರು. ಅವರೂ ದೊಡ್ಡ ಹೊಡೆತಗಳಿಂದ ರನ್ ಗಳಿಸಲು ವಿಫಲರಾದರು. ಅಂತಿಮ ಹಂತದಲ್ಲಿ ರಸೆಲ್ ಸಿಡಿಲಬ್ಬರದ ಬ್ಯಾಟಿಂಗ್ ಮಾಡಿದ 34 ರನ್ಗಳ ಕೊಡುಗೆ ಕೊಟ್ಟರು. ಡೇವಿಡ್ ವೈಡ್ 8 ರನ್ ಗಳಿಸಿದರು.
ಗುಜರಾತ್ ಪರ ಬೌಲಿಂಗ್ನಲ್ಲಿ ಮೊಹಮ್ಮದ್ ಶಮಿ 33 ರನ್ ನೀಡಿ 3 ವಿಕೆಟ್ ಕಿತ್ತರೆ, ಜೋಶ್ ಲಿಟಲ್ ಹಾಗೂ ನೂರ್ ಅಹಮದ್ ತಲಾ 2 ವಿಕೆಟ್ ಕಬಳಿಸಿದರು.