ಕೋಲ್ಕೊತಾ: ರಹಮನುಲ್ಲಾ ಗುರ್ಬಜ್ (81 ರನ್, 39 ಎಸೆತ, 5 ಫೊರ್, 7 ಸಿಕ್ಸರ್) ಅವರ ಸ್ಫೋಟಕ ಬ್ಯಾಟಿಂಗ್ ನೆರವು ಪಡೆದ ಕೋಲ್ಕೊತಾ ನೈಟ್ ರೈಡರ್ಸ್ ತಂಡ ಐಪಿಎಲ್ 16ನೇ ಆವೃತ್ತಿಯ (IPL 2023) 39ನೇ ಪಂದ್ಯದಲ್ಲಿ ಎದುರಾಳಿ ಗುಜರಾತ್ ಟೈಟನ್ಸ್ ತಂಡಕ್ಕೆ 180 ರನ್ಗಳ ಗೆಲುವಿನ ಗುರಿಯನ್ನು ಒಡ್ಡಿದೆ. ಕೊನೆಯಲ್ಲಿ ರಸೆಲ್ 19 ಎಸೆತಗಳಲ್ಲಿ 34 ರನ್ ಬಾರಿಸಿದ್ದು ಬಿಟ್ಟರೆ ಉಳಿದವರು ಹೆಚ್ಚು ರನ್ ಬಾರಿಸದ ಕಾರಣ 200 ಗಡಿ ದಾಟಲು ಕೆಕೆಆರ್ ತಂಡಕ್ಕೆ ಸಾಧ್ಯವಾಗಲಿಲ್ಲ.
ಇಲ್ಲಿನ ಈಡನ್ ಗಾರ್ಡನ್ಸ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಗೆದ್ದು ಗುಜರಾತ್ ತಂಡದ ನಾಯಕ ಹಾರ್ದಿಕ್ ಪಾಂಡ್ಯ ಮೊದಲು ಫೀಲ್ಡಿಂಗ್ ಅಯ್ಕೆ ಮಾಡಿಕೊಂಡರು. ಅಂತೆಯೇ ಮೊದಲು ಬ್ಯಾಟಿಂಗ್ ಮಾಡಲು ಆಹ್ವಾನ ಪಡೆದ ಆತಿಥೇಯ ಕೆಕೆಆರ್ ತಂಡ ತನ್ನ ಪಾಲಿನ 20 ಓವರ್ಗಳು ಮುಕ್ತಾಯಗೊಂಡಾಗ 7 ವಿಕೆಟ್ ನಷ್ಟಕ್ಕೆ 179 ರನ್ ಬಾರಿಸಿತು.
ಬ್ಯಾಟಿಂಗ್ ಆರಂಭಿಸಿದ ಕೆಕೆಆರ್ ತಂಡ ದೊಡ್ಡ ಮೊತ್ತ ಪೇರಿಸುವ ಸುಳಿವು ನೀಡಿತು. ಜಗದೀಶನ್ 15 ಎಸೆತಗಳಿಗೆ 19 ರನ್ ಬಾರಿಸಿ ಔಟಾದರು. ಈ ವೇಳೆ ತಂಡದ ಮೊತ್ತ 21. ಮುಂಬಡ್ತಿ ಪಡೆದು ಬ್ಯಾಟ್ ಹಿಡಿದು ಬಂದ ಶಾರ್ದೂಲ್ ಠಾಕೂರ್ ಶೂನ್ಯಕ್ಕೆ ಔಟಾಗುವ ಮೂಲಕ ನಿರಾಸೆ ಮೂಡಿಸಿದರು. 47 ರನ್ಗಳಿಗೆ 2 ವಿಕೆಟ್ ನಷ್ಟಮಾಡಿಕೊಂಡ ಕಾರಣ ರನ್ ವೇಗ ಕುಂಠಿತವಾಯಿತು. ಸ್ಫೋಟಕ ಬ್ಯಾಟರ್ ವೆಂಕಟೇಶ್ ಅಯ್ಯರ್ 11 ರನ್ಗೆ ಔಟಾದರು. ಅವರು ಗುಜರಾತ್ ಬೌಲರ್ಗಳನ್ನು ಎದುರಿಸಲು ತಿಣುಕಾಡಿದರು. 14 ಎಸೆತದಲ್ಲಿ 11 ರನ್ ಬಾರಿಸಿ ಔಟಾಗಿ ಪೆವಿಲಿಯನ್ ಹಾದಿ ಹಿಡಿದರು. ನಾಯಕ ನಿತೀಶ್ ರಾಣಾ ನಾಲ್ಕು ರನ್ಗೆ ಔಟಾಗಿ ಬೇಸರ ಮೂಡಿಸಿದರು.
ಇದನ್ನೂ ಓದಿ : IPL 2023: ಪಂಜಾಬ್‌ ವಿರುದ್ಧ ಲಕ್ನೋ ಗೆದ್ದ ಬಳಿಕ ಐಪಿಎಲ್ ಅಂಕಪಟ್ಟಿ ಹೀಗಿದೆ
ಅಬ್ಬರಿಸಿದ ಗುರ್ಜಬ್
ಒಂದು ಕಡೆ ಸತತವಾಗಿ ವಿಕೆಟ್ ಪತನಗೊಳ್ಳುತ್ತಿದ್ದ ಹೊರತಾಗಿಯೂ ಆಫ್ಘನ್ ಬ್ಯಾಟರ್ ರಹಮನುಲ್ಲಾ ಗುರ್ಬಜ್ ಸ್ಫೋಟಕ ಬ್ಯಾಟಿಂಗ್ ನಡೆಸಿದರು. ಫೋರ್ ಸಿಕ್ಸರ್ಗಳ ಮಳೆ ಸುರಿಸಿ 27 ಎಸೆತಗಳಲ್ಲಿ ಅರ್ಧ ಶತಕ ಪೂರೈಸಿದರು. ನಂತರವೂ ಬ್ಯಾಟ್ ಬೀಸಿ 30 ಎಸೆಗಗಳಿಗೆ 81 ರನ್ ಕೊಡುಗೆ ಕೊಟ್ಟರು. ಯುವ ಬ್ಯಾಟರ್ ರಿಂಕು ಸಿಂಗ್ 19 ರನ್ಗಳಿಗೆ ಸೀಮಿತಗೊಂಡರು. ಅವರೂ ದೊಡ್ಡ ಹೊಡೆತಗಳಿಂದ ರನ್ ಗಳಿಸಲು ವಿಫಲರಾದರು. ಅಂತಿಮ ಹಂತದಲ್ಲಿ ರಸೆಲ್ ಸಿಡಿಲಬ್ಬರದ ಬ್ಯಾಟಿಂಗ್ ಮಾಡಿದ 34 ರನ್ಗಳ ಕೊಡುಗೆ ಕೊಟ್ಟರು. ಡೇವಿಡ್ ವೈಡ್ 8 ರನ್ ಗಳಿಸಿದರು.
ಗುಜರಾತ್ ಪರ ಬೌಲಿಂಗ್ನಲ್ಲಿ ಮೊಹಮ್ಮದ್ ಶಮಿ 33 ರನ್ ನೀಡಿ 3 ವಿಕೆಟ್ ಕಿತ್ತರೆ, ಜೋಶ್ ಲಿಟಲ್ ಹಾಗೂ ನೂರ್ ಅಹಮದ್ ತಲಾ 2 ವಿಕೆಟ್ ಕಬಳಿಸಿದರು.