ಜೈಪುರ: ಬ್ಯಾಟಿಂಗ್ ಹಾಗೂ ಬೌಲಿಂಗ್ನಲ್ಲಿ ಸಂಘಟಿತ ಪ್ರದರ್ಶನ ನೀಡಿದ ಸನ್ರೈಸರ್ಸ್ ಹೈದರಾಬಾದ್ ತಂಡ ಐಪಿಎಲ್ 16ನೇ ಆವೃತ್ತಿಯ 52ನೇ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ವಿರುದ್ಧ ರೋಚಕ ನಾಲ್ಕು ವಿಕೆಟ್ ವಿಜಯ ಸಾಧಿಸಿತು. ಇದು ಕೂಡ ಹಾಲಿ ಆವೃತ್ತಿಯ ಐಪಿಎಲ್ನ ಮತ್ತೊಂದು ಲಾಸ್ಟ್ ಬಾಲ್ ಥ್ರಿಲ್ ಪಂದ್ಯ. ಈ ಸೋಲಿನೊಂದಿಗೆ ಜೋಸ್ ಬಟ್ಲರ್ ಬಾರಿಸಿದ ಅಮೋಘ 92 ರನ್ ಹಾಗೂ ನಾಯಕ ಸಂಜು ಸ್ಯಾಮ್ಸನ್ (ಅಜೇಯ 66) ಅರ್ಧ ಶತಕದ ಶ್ರಮ ವ್ಯರ್ಥಗೊಂಡಿತು.
ರಾಜಸ್ಥಾನ ತಂಡಕ್ಕೂ ಇದು ದುರದೃಷ್ಟದ ಸೋಲು. ಕೊನೇ ಓವರ್ನಲ್ಲಿ ಹೈದರಾಬಾದ್ ತಂಡದ ಗೆಲುವಿಗೆ 17 ರನ್ ಬೇಕಾಗಿತ್ತು. ಸಂದೀಪ್ ಶರ್ಮಾ ಕೊನೇ ಎಸೆತವನ್ನು ನೋ ಬಾಲ್ ಮಾಡುವ ಮೂಲಕ ಎಸ್ಆರ್ಎಚ್ ಗೆಲುವಿಗೆ ಅವಕಾಶ ಮಾಡಿಕೊಟ್ಟರು. ನೋ ಬಾಲ್ ಅಲ್ಲದಿದ್ದರೆ ರಾಜಸ್ಥಾನ್ ತಂಡಕ್ಕೆ ನಾಲ್ಕು ರನ್ಗಳ ಗೆಲುವು ಲಭಿಸುತ್ತಿತ್ತು. ಗೆಲುವು ಸಿಕ್ಕಿತು ಎಂದು ಆರ್ಆರ್ ತಂಡದ ಆಟಗಾರರು ಸಂಭ್ರಮಿಸುತ್ತಿದ್ದ ನಡುವೆಯೇ ಅಂಪೈರ್ ನೋ ಬಾಲ್ ಘೋಷಿಸಿದರು. ಸಿಕ್ಕ ಅವಕಾಶವನ್ನು ಸದ್ಬಳಕೆ ಮಾಡಿಕೊಂಡ ಎಸ್ಆರ್ಎಚ್ ಬ್ಯಾಟರ್ ಅಬ್ದುಲ್ ಸಮದ್ ಕೊನೇ ಎಸೆತವನ್ನು ಸಿಕ್ಸರ್ಗೆ ಅಟ್ಟಿ ಗೆಲುವು ತಂದುಕೊಟ್ಟರು. ಅದಕ್ಕಿಂತ ಮೊದಲ ಓವರ್ನಲ್ಲಿ ಕುಲ್ದೀಪ್ ಯಾದವ್ ಒಂದೇ ಓವರ್ನಲ್ಲಿ 24 ರನ್ ಬಿಟ್ಟುಕೊಟ್ಟಿದ್ದರು. ಆ ಓವರ್ನಲ್ಲಿ ಗ್ಲೆನ್ ಫಿಲಿಪ್ಸ್ 3 ಸಿಕ್ಸರ್ ಹಾಗೂ ಒಂದು ಫೋರ್ ಬಾರಿಸಿದ್ದರು. ಈ ಮೂಲಕ ಕೊನೇ 12 ಎಸೆತಕ್ಕೆ ಬೇಕಾಗಿದ್ದ 42 ರನ್ಗಳನ್ನು ಎಸ್ಆರ್ಎಚ್ ತಂಡ ಬಾರಿಸಿ ಗೆಲುವು ಸಾಧಿಸಿತು. ಹೀಗಾಗಿ ಎಸ್ಆರ್ಎಚ್ ತಂಡಕ್ಕೆ ಇದು ಅನಿರೀಕ್ಷಿತ ಗೆಲುವು.
ಇಲ್ಲಿನ ಸವಾಯ್ ಮಾನ್ಸಿಂಗ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ಆಯೋಜನೆಗೊಂಡಿರುವ ಪಂದ್ಯದಲ್ಲಿ ರಾಜಸ್ಥಾನ್ ತಂಡದ ನಾಯಕ ಸಂಜು ಸ್ಯಾಮ್ಸನ್ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ಅದಕ್ಕೆ ಪೂರಕವಾಗಿ ಬ್ಯಾಟ್ ಮಾಡಿ ನಿಗದಿತ 20 ಓವರ್ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 214 ರನ್ ಬಾರಿಸಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ಎಸ್ಆರ್ಎಚ್ ತಂಡ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 217 ರನ್ ಬಾರಿಸಿ ಗೆಲುವು ಸಾಧಿಸಿತು.
ಬ್ಯಾಟಿಂಗ್ ಆರಂಭಿಸಿದ ರಾಜಸ್ಥಾನ್ ತಂಡ ಉತ್ತಮ ಆರಂಭವನ್ನೇ ಪಡೆಯಿತು. ಆದರೆ, ಯಶಸ್ವಿ ಜೈಸ್ವಾಲ್ 18 ಎಸೆತಕ್ಕೆ 35 ರನ್ ಬಾರಿಸಿ ಔಟಾದರು. ಎಂದಿನಂತೆ ಸ್ಫೋಟಕ ಬ್ಯಾಟಿಂಗ್ ಪ್ರದರ್ಶಿಸಿದರು. ಹೀಗಾಗಿ ಆರ್ಆರ್ ತಂಡ 54 ರನ್ಗಳಿಗೆ ಮೊದಲ ವಿಕೆಟ್ ಕಳೆದುಕೊಂಡಿತು. ಬಳಿಕ ಬಂದ ಆರಂಭದಲ್ಲಿ ನಿಧಾನಗತಿಯಲ್ಲಿ ಬ್ಯಾಟಿಂಗ್ ಮಾಡಿದರೂ ಎಸ್ಆರ್ಎಚ್ ಸ್ಪಿನ್ನರ್ಗಳ ವಿರುದ್ಧ ಸ್ಫೋಟಿಸಿದರು. ಕೊನೇ ತನಕ ಅಜೇಯರಾಗಿ ಉಳಿದ ಅವರು 38 ಎಸೆತಗಳಲ್ಲಿ 5 ಸಿಕ್ಸರ್ ಹಾಗೂ 4 ಫೋರ್ಗಳ ಸಮೇತ 66 ರನ್ ಬಾರಿಸಿದರು. ಅವರು ಅರ್ಧ ಶತ ಬಾರಿಸಲು 33 ಎಸೆತಗಳನ್ನು ಬಳಸಿಕೊಂಡಿದ್ದರು.
ಬಟ್ಲರ್ ಭರ್ಜರಿ ಬ್ಯಾಟಿಂಗ್
ಮೊದಲಿಗೆ ಸ್ವಲ್ಪ ಮಟ್ಟಿಗೆ ರಕ್ಷಣಾತ್ಮಕವಾಗಿ ಆಡಲು ಮುಂದಾದ ಜೋಸ್ ಬಟ್ಲರ್ ಕ್ರಮೇಣ ತಮ್ಮ ಬ್ಯಾಟಿಂಗ್ಗೆ ವೇಗ ಕೊಟ್ಟರು. ಸಂಜು ಸ್ಯಾಮ್ಸನ್ ಜತೆ ಸೇರಿಕೊಂಡ ಅವರು ಎಸ್ಆರ್ಎಚ್ ಬೌಲರ್ಗಳನ್ನು ಸತತವಾಗಿ ದಂಡಿಸಿದರು. 32 ಎಸೆತಗಳಲ್ಲಿ 50 ರನ್ ಬಾರಿಸಿದ ಅವರು 59 ಎಸೆತಗಳಲ್ಲಿ 95 ರನ್ ಮಾಡಿ ಮತ್ತೊಂದು ಶತಕದ ಸಾಧನೆ ಮಾಡುವ ಸೂಚನೆ ಕೊಟ್ಟರು. ಆದರೆ, ಭುವನೇಶ್ವರ್ ಕುಮಾರ್ ಎಸೆತ 19ನೇ ಓವರ್ನಲ್ಲಿ ಎಲ್ಬಿಡಬ್ಲ್ಯು ಆಗುವ ಮೂಲಕ ನಿರಾಸೆ ಎದುರಿಸಿದರು. ಕೊನೆಯಲ್ಲಿ ಶಿಮ್ರೋನ್ ಹೆಟ್ಮಾಯರ್ 5 ಎಸೆತಗಳಿಗೆ 7 ರನ್ ಬಾರಿಸಿದರು. ಭುವನೇಶ್ವರ್ ಮತ್ತು ಮಾರ್ಕೊ ಜೆನ್ಸನ್ ತಲಾ ಒಂದ ವಿಕೆಟ್ ತಮ್ಮದಾಗಿಸಿಕೊಂಡರು.