ಮುಂಬಯಿ: ಐಪಿಎಲ್ನ ಅತ್ಯಂತ ಯಶಸ್ವಿ ತಂಡ ಎಂಬ ಪ್ರಸಿದ್ಧಿ ಪಡೆದಿರುವ ಮುಂಬೈ ಇಂಡಿಯನ್ಸ್ ಈ ಬಾರಿಯೂ ಪ್ಲೇ ಆಫ್ ಪ್ರವೇಶ ಪಡೆದಿದೆ. ಕಪ್ ಗೆಲ್ಲುವ ನೆಚ್ಚಿನ ತಂಡವಾಗಿ ಕಾಣಿಸಿಕೊಂಡಿದೆ. 15 ವರ್ಷಗಳ ಐಪಿಎಲ್ ಇತಿಹಾಸದಲ್ಲಿ ಮುಂಬೈ ತಂಡದ ಪ್ರದರ್ಶನ ಹೇಗಿತ್ತು, ಎಷ್ಟು ಬಾರಿ ತಂಡ ಫೈನಲ್ಗೆ ಲಗ್ಗೆ ಇಟ್ಟಿತ್ತು. ಈ ಬಾರಿ ತಂಡದ ಪ್ರದರ್ಶನ ಹೇಗಿದೆ ಎಂಬ ಸಂಪೂರ್ಣ ಮಾಹಿತಿ ಇಂತಿದೆ.
ಸಚಿನ್ ಸಾರಥ್ಯದಲ್ಲಿ ಮೊದಲ ಫೈನಲ್
ಮುಂಬೈ ಇಂಡಿಯನ್ಸ್ ತಂಡ ಐಪಿಎಲ್ನಲ್ಲಿ ಮೊದಲ ಬಾರಿಗೆ ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡೂಲ್ಕರ್ ಅವರ ನಾಯಕತ್ವದಲ್ಲಿ ಚೊಚ್ಚಲ ಬಾರಿಗೆ ಫೈನಲ್ ಪ್ರವೇಶಿಸಿತ್ತು. 2010ರಲ್ಲಿ ನಡೆದ ಮೂರನೇ ಆವೃತ್ತಿಯ ಐಪಿಎಲ್ ಟೂರ್ನಿ ಇದಾಗಿತ್ತು. ಮುಂಬೈಯ ಡಿ.ವೈ ಪಾಟೀಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಈ ಪಂದ್ಯ ನಡೆದಿತ್ತು. ಮೊದಲು ಬ್ಯಾಟಿಂಗ್ ನಡೆಸಿದ ಚೆನ್ನೈ 168 ರನ್ ಗಳಿಸಿತ್ತು. ಆದರೆ ಈ ಸಣ್ಣ ಮೊತ್ತವನ್ನು ಬೆನ್ನಟ್ಟುವಲ್ಲಿ ಎಡವಿದ ಮುಂಬೈ 22 ರನ್ ಅಂತರದಿಂದ ಸೋಲು ಕಂಡು ರನ್ನರ್ಅಪ್ ಸ್ಥಾನಕ್ಕೆ ತೃಪ್ತಿಪಟ್ಟಿತು. ಧೋನಿ ಅವರು ಚೊಚ್ಚಲ ಐಪಿಎಲ್ ಟ್ರೋಪಿ ಎತ್ತಿ ಹಿಡಿದರು.
ರೋಹಿತ್ ನಾಯಕತ್ವದಲ್ಲಿ ಮೊದಲ ಕಪ್ ಮತ್ತು ಸಚಿನ್ ಐಪಿಎಲ್ ವಿದಾಯ
ಮುಂಬೈ ಇಂಡಿಯನ್ಸ್ 2013ರಲ್ಲಿ ಚೊಚ್ಚಲ ಬಾರಿಗೆ ಐಪಿಎಲ್ ಟ್ರೋಫಿ ಗೆದ್ದಿತು. ರೋಹಿತ್ ಶರ್ಮ ಅವರ ನಾಯಕತ್ವದಲ್ಲಿ ತಂಡ ಚಾಂಪಿಯನ್ ಪಟ್ಟ ಅಲಂಕರಿಸಿತು. ಇದೇ ಆವೃತ್ತಿಯಲ್ಲಿ ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ಅವರು ಐಪಿಎಲ್ ಕ್ರಿಕೆಟ್ಗೆ ಸ್ಮರಣೀಯ ವಿದಾಯ ಹೇಳಿದ್ದರು. 2011 ಏಕದಿನ ವಿಶ್ವ ಕಪ್ ಗೆದ್ದ ಬಳಿಕ ಸಚಿನ್ ಅವರನ್ನು ಅಭಿನಂದಿಸಿದ ರೀತಿಯಲ್ಲಿಯೇ ಈ ಸಂದರ್ಭದಲ್ಲಿಯೂ ಗೌರವ ಸೂಚಿಸಲಾಗಿತ್ತು. ಫೂನಲ್ನಲ್ಲಿ ಚೆನ್ನೈ ತಂಡವನ್ನು ಮಗುಚಿ ಹಾಕುವ ಮೂಲಕ 2010 ಫೈನಲ್ಗೆ ಇಲ್ಲಿ ಸೇಡು ತೀರಿಸಿಕೊಂಡಿತು. ಇಲ್ಲಿಂದ ಮೇಲೆ ನಡೆದದ್ದು ಇತಿಹಾಸ. ಮುಂಬೈ 5 ಬಾರಿ ಚಾಂಪಿಯನ್ ಪಟ್ಟ ಅಲಂಕರಿಸಿತು.
ಮುಂಬೈ ತಂಡ ನಡೆದು ಬಂದ ಹಾದಿಯೇ ರೋಚಕ
ಇತರ ತಂಡಗಳಿಗೆ ಹೋಲಿಸಿದರೆ ಮುಂಬೈ ತಂಡ ಪ್ರತಿ ಆವೃತ್ತಿಯ ಐಪಿಎಲ್ನಲ್ಲಿಯೂ ನಡೆದ ಬಂದ ಹಾದಿಯೇ ವಿಭಿನ್ನ. ಆರಂಭದಲ್ಲಿ ಸತತ ಸೋಲು ಕಂಡು ಇನ್ನೇನು, ತಂಡ ಟೂರ್ನಿಯಿಂದ ಹೊರಬೀಳುತ್ತದೆ ಎನ್ನುವಷ್ಟರಲ್ಲಿ ಫಿನಿಕ್ಸ್ನಂತೆ ಎದ್ದು ನಿಂತು ಗೆಲ್ಲಲೇ ಬೇಕಾದ ಎಲ್ಲ ಪಂದ್ಯಗಳನ್ನು ಗೆದ್ದು ಫೈನಲ್ಗೆ ಲಗ್ಗೆ ಇಡುತ್ತದೆ. ಈ ಬಾರಿಯೂ ತಂಡದ ಪ್ರದರ್ಶನ ಇದೇ ರೀತಿ ಇದೆ. ಹೀಗಾಗಿ ಈ ಬಾರಿಯೂ ಕಪ್ ಗೆಲ್ಲಲಿದೆಯಾ ಎಂದು ಕಾದು ನೋಡಬೇಕಿದೆ.
ಬೆಸ ಸಂಖ್ಯೆ ಮುಂಬೈಗೆ ಅದೃಷ್ಟ
ಮುಂಬೈ ತಂಡಕ್ಕೂ ಬೆಸ ಸಂಖ್ಯೆಗೂ ಮಹತ್ವದ ನಂಟು ಇದೆ. ಬೆಸ ಸಂಖ್ಯೆಯಲ್ಲಿ ಈ ತಂಡ ಪ್ರತಿ ಬಾರಿಯೂ ಕಪ್ ಗೆದ್ದಿದೆ. 2013ರಲ್ಲಿ ಚಾಂಪಿಯನ್ ಪಟ್ಟ ಅಲಂಕರಿಸಿದ ಮುಂಬೈ ಆ ಬಳಿಕ 2015, 2017, 2019, 2020 ಕಪ್ ಗೆದ್ದಿದೆ. ಇದೀಗ 2023ರಲ್ಲಿಯೂ ಮುಂಬೈ ಕಪ್ ಗೆಲ್ಲಲಿದೆ ಎನ್ನುವ ಭವಿಷ್ಯವಾಣಿಯೊಂದು ಈಗಾಗಲೇ ಕ್ರಿಕೆಟ್ ಪ್ರಿಯರು ನುಡಿಯಲು ಆರಂಭಿಸಿದ್ದಾರೆ. ಈ ಬಾರಿಯೂ ಮುಂಬೈ ಗೆದ್ದರೆ ಬೆಸ ಸಂಖ್ಯೆ ಮುಂಬೈಗೆ ಅದೃಷ್ಟ ಎನ್ನುವುದು ಮತ್ತೊಮ್ಮೆ ಸಾಭೀತಾಗಲಿದೆ.
ಇದನ್ನೂ ಓದಿ IPL 2023: ಲಕ್ನೋಗೆ ಒಲಿದೀತೆ ಈ ಬಾರಿ ಲಕ್?
ಬುಮ್ರಾ ಅಲಭ್ಯ ತಂಡಕ್ಕೆ ಹಿನ್ನಡೆ
ಪ್ರಧಾನ ಬೌಲರ್ ಜಸ್ಪ್ರೀತ್ ಬುಮ್ರಾ ಅವರ ಅಲಭ್ಯತೆ ಮುಂಬೈಗೆ ಪ್ರತಿ ಪಂದ್ಯದಲ್ಲಿಯೂ ಕಾಡುತ್ತಿದೆ. ಇಲ್ಲಿಯ ವರೆಗೆ ತಂಡ ಬ್ಯಾಟಿಂಗ್ ಬಲದಿಂದಲೇ ಗೆಲುವು ಸಾಧಿಸಿದೆ. ಹೀಗಾಗಿ ಮುಂಬೈಗೆ ಈ ಬಾರಿ ಬೌಲಿಂಗ್ನದ್ದೇ ಚಿಂತೆಯಾಗಿದೆ. ಜೋಫ್ರಾ ಆರ್ಚರ್ ಅವರು ತಂಡದಲ್ಲಿದ್ದರೂ ಅವರು ಮತ್ತೆ ಗಾಯಕ್ಕೆ ಸಿಲುಕಿ ಅರ್ಧದಲ್ಲೇ ಟೂರ್ನಿಯಿಂದ ಹೊರಬಿದ್ದರು. ಬ್ಯಾಟಿಂಗ್ ವೈಫಲ್ಯ ಕಂಡಿದ್ದ ರೋಹಿತ್ ಶರ್ಮ ಮತ್ತು ಕ್ಯಾಮರೂನ್ ಗ್ರೀನ್ ಅವರು ಮಹತ್ವದ ಘಟ್ಟದಲ್ಲೇ ಬ್ಯಾಟಿಂಗ್ ಫಾರ್ಮ್ಗೆ ಮರಳಿರುವುದು ತಂಡಕ್ಕೆ ಆನೆ ಬಲ ಬಂದಂತಾಗಿದೆ.