ಕೋಲ್ಕೊತಾ: ಆರ್ಸಿಬಿಯ ಬೌಲರ್ಗಳ ದೌರ್ಬಲ್ಯ ಹಾಗೂ ಬ್ಯಾಟ್ಸ್ಮನ್ಗಳ ಅಸ್ಥಿರ ಪ್ರದರ್ಶನದಿಂದಾಗಿ ಐಪಿಎಲ್ 16ನ ಆವೃತ್ತಿಯ (IPL 2023) 9ನೇ ಪಂದ್ಯದಲ್ಲಿ ಕೋಲ್ಕೊತಾ ನೈಟ್ ರೈಡರ್ಸ್ ವಿರುದ್ಧ 81 ರನ್ಗಳ ಹೀನಾಯ ಸೋಲಿಗೆ ಒಳಗಾಯಿತು. ಇದರೊಂದಿಗೆ ಮುಂಬಯಿ ಇಂಡಿಯನ್ಸ್ ವಿರುದ್ಧ ಪಂದ್ಯದಲ್ಲಿ ಎಂಟು ವಿಕೆಟ್ಗಳ ಗೆಲುವು ದಾಖಲಿಸಿದ್ದ ಫಾಫ್ ಡು ಪ್ಲೆಸಿಸ್ ಬಳಗದ ಖುಷಿ ಒಂದೇ ಪಂದ್ಯಕ್ಕೆ ಸೀಮಿತಗೊಂಡಿತು. ಕೆಕೆಅರ್ ಸ್ಪಿನ್ನರ್ಗಳ ದಾಳಿಯನ್ನು ಮೆಟ್ಟಿ ನಿಲ್ಲುವಲ್ಲಿ ಸಂಪೂರ್ಣ ವಿಫಲಗೊಂಡ ಆರ್ಸಿಬಿ ತಂಡದ ಬ್ಯಾಟರ್ಗಳು ಪಂದ್ಯದುದ್ದಕ್ಕೂ ಪೆವಿಲಿಯನ್ ಪರೇಡ್ ನಡೆಸಿ ಅಭಿಮಾನಿಗಳಿಗೆ ನಿರಾಸೆ ಮೂಡಿಸಿದರು.
ಇಲ್ಲಿ ಈಡನ್ ಗಾರ್ಡನ್ಸ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಕೋಲ್ಕೊತಾ ನೈಟ್ ರೈಡರ್ಸ್ ಬಳಗ ನಿಗದಿತ 20 ಓವರ್ಗಳಲ್ಲಿ 204 ರನ್ ಬಾರಿಸಿತು. ದೊಡ್ಡ ಗುರಿಯನ್ನು ಬೆನ್ನಟ್ಟಲು ಮುಂದಾದ ಆರ್ಸಿಬಿ ಸತತವಾಗಿ ವಿಕೆಟ್ ಕಳೆದುಕೊಂಡು 17.4 ಓವರ್ಗಳಲ್ಲಿ 123 ರನ್ಗಳಿಗೆ ಆಲ್ಔಟ್ ಆಗಿ ಸೋಲೊಪ್ಪಿಕೊಂಡಿತು.
ದೊಡ್ಡ ಗುರಿ ಬೆನ್ನಟ್ಟಲು ಹೊರಟ ಆರ್ಸಿಬಿ ಆರಂಭಿಕರಾದ ವಿರಾಟ್ ಕೊಹ್ಲಿ (21) ಹಾಗೂ ಫಾಫ್ ಡು ಪ್ಲೆಸಿಸ್ (23) ಎದುರಾಳಿ ಬೌಲರ್ಗಳಿಗೆ ಬೆದರಿದಂತೆ ಬ್ಯಾಟ್ ಮಾಡಿದರು. ಅವರು ಔಟಾದ ಬಳಿಕ ಆರ್ಸಿಬಿ ಸತತವಾಗಿ ವಿಕೆಟ್ ಕಳೆದುಕೊಂಡಿತು. ಮೈಕೆಲ್ ಬ್ರೇಸ್ವೆಲ್ (19), ಗ್ಲೆನ್ ಮ್ಯಾಕ್ಸ್ವೆಲ್ (5), ಹರ್ಷಲ್ ಪಟೇಲ್ (0), ಶಹಬಾಜ್ ಅಹಮದ್ (1), ದಿನೇಶ್ ಕಾರ್ತಿಕ್ (9) ಆರ್ಸಿಬಿ ಸೋಲಿಗೆ ಕಾರಣರಾದರು. ಕೊನೇ ಹಂತದಲ್ಲಿ ಡೇವಿಡ್ ವಿಲ್ಲಿ (20) ಹಾಗೂ ಆಕಾಶ್ದೀಪ್ (17) ಸ್ವಲ್ಪ ಹೊತ್ತು ಬ್ಯಾಟಿಂಗ್ ಮಾಡಿ ತಂಡದ ಮೊತ್ತ 100 ಗಡಿ ದಾಟುವಂತೆ ನೋಡಿಕೊಂಡರು.
ಕೋಲ್ಕೊತಾ ತಂಡದ ಬೌಲಿಂಗ್ ವಿಭಾಗದಲ್ಲಿ ವರುಣ್ ಚಕ್ರವರ್ತಿ 15 ರನ್ಗಳಿಗೆ 3 ವಿಕೆಟ್ ಕಬಳಿಸಿದರೆ, ಇಂಪ್ಯಾಕ್ಟ್ ಪ್ಲೇಯರ್ ಮೂಲಕ ಐಪಿಎಲ್ಗೆ ಪದಾರ್ಪಣೆ ಮಾಡಿದ ಸುಯಾಶ್ ಶರ್ಮಾ 30 ರನ್ಗಳಿಗೆ 3 ವಿಕೆಟ್ ಪಡೆದು ಮಿಂಚಿದರು. ಸುನೀಲ್ ನರೈನ್ 2 ವಿಕೆಟ್ ಉರುಳಿಸಿದರೆ ಶಾರ್ದುಲ್ ಠಾಕೂರ್ 1 ವಿಕೆಟ್ ಪಡೆದರು.
ಶಾರ್ದೂಲ್ ಠಾಕೂರ್ ಅಬ್ಬರ
ಅದಕ್ಕಿಂತ ಮೊದಲು ಬ್ಯಾಟ್ ಮಾಡಿದ ಕೋಲ್ಕೊತಾ ತಂಡದ ಪರ ಶಾರ್ದೂಲ್ ಠಾಕೂರ್ (68 ರನ್, 29 ಎಸೆತ, 9 ಫೋರ್, 3 ಸಿಕ್ಸರ್) ಅವರ ವಿಸ್ಫೋಟಕ ಬ್ಯಾಟಿಂಗ್ನೆ ನಡೆಸಿದರು. ಠಾಕೂರ್ಗೆ ಬೆಂಬಲವಾಗಿ ನಿಂತ ರಿಂಕು ಸಿಂಗ್ 33 ಎಸೆತಗಳಲ್ಲಿ 46 ರನ್ ಬಾರಿಸಿದ್ದಾರೆ. ಈ ಜೋಡಿ ಆರನೇ ವಿಕೆಟ್ಗೆ 112 ರನ್ ಬಾರಿಸುವ ಮೂಲಕ ಆರಂಭಿಕ ಮುನ್ನಡೆ ಪಡೆದಿದ್ದ ಆರ್ಸಿಬಿ ಹೆಚ್ಚು ಹೊತ್ತು ಖುಷಿ ಪಡದಂತೆ ನೋಡಿಕೊಂಡಿತು.
ಕೆಕೆಆರ್ ಆರಂಭಿಕ ಬ್ಯಾಟರ್ ವೆಂಕಟೇಶ್ ಅಯ್ಯರ್ ಅವರನ್ನು ಬೌಲ್ಡ್ ಮಾಡಿದ ಡೇವಿಡ್ ವಿಲ್ಲಿ ಆರ್ಸಿಬಿಗೆ ಉತ್ತಮ ಆರಂಭ ತಂದುಕೊಟ್ಟರು. 26 ರನ್ಗಳಿಗೆ ಮೊದಲ ವಿಕೆಟ್ ಕಳೆಕೊಂಡು ಕೋಲ್ಕೊತಾ ನಂತರದ ಎಸೆತದಲ್ಲಿ ಮನ್ದೀಪ್ ಸಿಂಗ್ ವಿಕೆಟ್ ಕೂಡ ಶೂನ್ಯಕ್ಕೆ ಔಟಾದರು. ಅವರು ಕೂಡ ವಿಲ್ಲಿ ಎಸೆತಕ್ಕೆ ಬೌಲ್ಡ್ ಆದರು. ನಾಲ್ಕನೇ ಕ್ರಮಾಂಕದಲ್ಲಿ ಆಡಲು ಬಂದ ನಾಯಕ ನಿತೀಶ್ ರಾಣಾ ಅವರು ಬ್ರೇಸ್ವೆಲ್ ಬೌಲಿಂಗ್ಗೆ ಔಟಾದರು. ಅವರ ಗಳಿಕೆ ಕೇವಲ ಒಂದು ರನ್. 89ಕ್ಕೆ 4 ವಿಕೆಟ್ ನಷ್ಟ ಮಾಡಿಕೊಂಡ ಕೋಲ್ಕೊತಾ ಆತಂಕಕ್ಕೆ ಬಿತ್ತು. ಸ್ಫೋಟಕ ಬ್ಯಾಟರ್ ಆ್ಯಂಡ್ರೆ ರಸೆಲ್ ಕೂಡ ಶೂನ್ಯಕ್ಕೆ ಔಟಾಗುವುದರೊಂದಿಗೆ ಆರ್ಸಿಬಿ ಪಾಳೆಯದಲ್ಲಿ ಸಂತೋಷ ಹೆಚ್ಚಿತು.
ಎಂಟು ಓವರ್ಗಳಲ್ಲಿ 110 ರನ್
11.3 ಓವರ್ಗಳಲ್ಲಿ89 ರನ್ಗಳಿಗೆ ಐದು ವಿಕೆಟ್ ಕಳೆದುಕೊಂಡ ಕೋಲ್ಕೊತಾ ದೊಡ್ಡ ಮೊತ್ತ ಪೇರಿಸಲು ಸಾಧ್ಯವೇ ಇಲ್ಲ ಎಂದು ಆರ್ಸಿಬಿ ಬಳಗ ಭಾವಿಸಿತ್ತು. ಆದರೆ, ಆ ಲೆಕ್ಕಾಚಾರವನ್ನು ಶಾರ್ದೂಲ್ ಹಾಗೂ ರಿಂಕು ಸಿಂಗ್ ಸುಳ್ಳಾಗಿಸಿದರು. ಕ್ರೀಸ್ಗೆ ಬಂದ ಶಾರ್ದೂಲ್ ನುರಿತ ಬ್ಯಾಟರ್ಗಳು ನಾಚುವಂತೆ ರನ್ ಗಳಿಸಿದರು. 20 ಎಸೆತಗಳಲ್ಲಿ ಅರ್ಧ ಶತಕ ಪೂರೈಸಿದ ಅವರು 29 ಎಸೆತಗಳಲ್ಲಿ 68 ರನ್ ಬಾರಿಸಿದರು. ಆರಂಭದಲ್ಲಿ ಹೆಚ್ಚು ನಿಧಾನವಾಗಿ ಆಡಿದ ರಿಂಕು ಸಿಂಗ್ ಕೂಡ ಬಳಿಕ ಫೋರ್, ಸಿಕ್ಸರ್ಗಳ ಮಳೆ ಸುರಿಸಿದರು. ಇವರಿಬ್ಬರ ಬ್ಯಾಟಿಂಗ್ ಅಬ್ಬರಕ್ಕೆ ಆರ್ಸಿಬಿ ಬೌಲರ್ಗಳು ನಿರುತ್ತರರಾದರು.
ಇದನ್ನೂ ಓದಿ : IPL 2023: ಆರ್ಸಿಬಿ ಈ ಬಾರಿಯೂ ಕಪ್ ಗೆಲ್ಲಲ್ಲ; ಎಬಿಡಿ ವಿಲಿಯರ್ಸ್ ಅಚ್ಚರಿಯ ಹೇಳಿಕೆ
ರಿಂಕು ಸಿಂಗ್ ಹಾಗೂ ಶಾರ್ದೂಲ್ ಬ್ಯಾಟಿಂಗ್ ಅಬ್ಬರಕ್ಕೆ ಕೊನೇ 48 ಎಸೆತಗಳಲ್ಲಿ ಕೋಲ್ಕೊತಾ ನೈಟ್ ರೈಡರ್ಸ್ ತಂಡ 110 ರನ್ ಬಾರಿಸಿತು. ಈ ಮೂಲಕ ಆರ್ಸಿಬಿ ಯೋಜನೆ ಬುಡಮೇಲಾಯಿತು. ಮೊದಲು ಉತ್ತಮ ಬೌಲಿಂಗ್ ಮಾಡಿದ್ದ ಆರ್ಸಿಬಿ ಬೌಳರ್ಗಳು ಬಳಿಕ ಅನಿಯಂತ್ರಿತ ರನ್ ಬಿಟ್ಟುಕೊಟ್ಟರು. 23 ಇತರ ರನ್ಗಳನ್ನು ಬಿಟ್ಟುಕೊಡುವ ಮೂಲಕ ಬೌಲಿಂಗ್ ದೌರ್ಬಲ್ಯವನ್ನು ಸಾಬೀತು ಪಡಿಸಿತು. ಇವೆಲ್ಲದರ ನಡುವೆ ಡೇವಿಡ್ ವಿಲ್ಲಿ (4 ಓವರ್, 16 ರನ್, 2 ವಿಕೆಟ್) ಉತ್ತಮ ಬೌಲಿಂಗ್ ಪ್ರದರ್ಶನ ನೀಡಿದರು. ಕರಣ್ ಶರ್ಮಾ 26 ರನ್ ನೀಡಿ 2 ವಿಕೆಟ್ ತಮ್ಮದಾಗಿಸಿಕೊಂಡರು.