ಕೋಲ್ಕೊತಾ: ನಿಕೋಲಸ್ ಪೂರನ್ ಅವರ (58) ಅವರ ಸ್ಫೋಟಕ ಬ್ಯಾಟಿಂಗ್ ಹಾಗೂ ಬೌಲರ್ಗಳ ಆಕ್ರಮಣಕಾರಿ ದಾಳಿಯ ನೆರವು ಪಡೆದ ಲಕ್ನೊ ಸೂಪರ್ ಜೈಂಟ್ಸ್ ತಂಡ ಐಪಿಎಲ್ 16ನೇ ಆವೃತ್ತಿಯ 68ನೇ ಪಂದ್ಯದಲ್ಲಿ ಕೋಲ್ಕೊತಾ ನೈಟ್ ರೈಡರ್ಸ್ ವಿರುದ್ಧ 1 ರನ್ ರೋಚಕ ವಿಜಯ ಸಾಧಿಸಿತು. ಇದರೊಂದಿಗೆ ಕೃಣಾಲ್ ಪಾಂಡ್ಯ ನೇತೃತ್ವದ ಲಕ್ನೊ ಬಳಗ ಲೀಗ್ ಹಂತದ ತನ್ನ 14 ಪಂದ್ಯಗಳಲ್ಲಿ 17 ಅಂಕಗಳನ್ನು ಸಂಪಾದಿಸಿ ಪ್ಲೇಆಫ್ ಸ್ಥಾನವನ್ನು ಖಚಿತಪಡಿಸಿಕೊಂಡಿತು. ಅತ್ತ ಕೆಕೆಆರ್ ತಂಡ ಲೀಗ್ ಹಂತದಲ್ಲೇ ತನ್ನ ಅಭಿಯಾನ ಮುಗಿಸಿತು. ಪಂದ್ಯದಲ್ಲಿ ಕೊನೇ ತನಕ ಹೋರಾಟ ಸಂಘಟಿಸಿದ ರಿಂಕು ಸಿಂಗ್ (67 ರನ್ 33 ಎಸೆತ, 6 ಫೋರ್, 4 ಸಿಕ್ಸರ್) ಹೋರಾಟ ವ್ಯರ್ಥವಾಯಿತು.
ಇಲ್ಲಿನ ಐತಿಹಾಸಿಕ ಈಡನ್ ಗಾರ್ಡನ್ಸ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಗೆದ್ದ ಕೆಕೆಆರ್ ತಂಡ ಮೊದಲು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. ಅಂತೆಯೇ ಮೊದಲು ಬ್ಯಾಟ್ ಮಾಡಿದ ಲಕ್ನೊ ತಂಡ ನಿಗದಿತ 20 ಓವರ್ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 176 ರನ್ ಗಳಿಸಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ಕೆಕೆಆರ್ ತಂಡ ರಿಂಕು ಸಿಂಗ್ ಅವರ ಏಕಾಂಗಿ ಹೋರಾಟದ ಹೊರತಾಗಿಯೂ ಒಂದು ರನ್ನಿಂದ ಸೋಲೊಪ್ಪಿಕೊಂಡಿತು. ಇದು ಕೂಡ ಹಾಲಿ ಆವೃತ್ತಿಯ ಐಪಿಎಲ್ನ ಲಾಸ್ಟ್ ಬಾಲ್ ಥ್ರಿಲ್ ಮ್ಯಾಚ್ ಎನಿಸಿಕೊಂಡಿತು.
ದೊಡ್ಡ ಮೊತ್ತವನ್ನು ಬೆನ್ನಟ್ಟಲು ಶುರು ಮಾಡಿದ ಕೆಕೆಅರ್ ತಂಡ ಜೇಸನ್ ರಾಯ್ (45) ಹಾಗೂ ವೆಂಕಟೇಶ್ ಅಯ್ಯರ್ (24) ಮೂಲಕ ಉತ್ತಮ ಆರಂಭ ಪಡೆಯಿತು. ಈ ಜೋಡಿ ಮೊದಲ ವಿಕೆಟ್ಗೆ 61 ರನ್ ಪೇರಿಸಿತು. ಆದರೆ ಆ ಬಳಿಕ ನಿತೀಶ್ ರಾಣಾ (8 ರನ್) ಹಾಗೂ ರಹ್ಮನುಲ್ಲಾ ಗುರ್ಬಜ್ (10 ರನ್) ಔಟಾಗುವ ಮೂಲಕ ಸತತವಾಗಿ ವಿಕೆಟ್ ಕಳೆದುಕೊಂಡಿತು. ಈ ವೇಳೆ ಕ್ರೀಸ್ಗೆ ಬಂದ ರಿಂಕು ಸಿಂಗ್ ಆರಂಭದಲ್ಲಿ ನಿಧಾನಗತಿಯಲ್ಲಿ ಆಡಿ ಕೊನೇ ತನಕವೂ ವಿಕೆಟ್ ಕಳೆದುಕೊಳ್ಳದಂತೆ ನೋಡಿಕೊಂಡರು. ಆದರೆ, ಉಳಿದ ಆಟಗಾರರ ಬೆಂಬಲ ದೊರೆಯದ ಕಾರಣ ಕೆಕೆಆರ್ ತಂಡಕ್ಕೆ ಕೇವಲ ಒಂದು ರನ್ ಸೋಲಾಯಿತು.
ಮೊದಲು ಬ್ಯಾಟ್ ಮಾಡಲು ಆರಂಭಿಸಿದ ಎಲ್ಎಸ್ಜಿ ತಂಡಕ್ಕೆ ಕರಣ್ ಶರ್ಮಾ 3 ರನ್ಗೆ ಔಟಾಗುವ ಮೂಲಕ ಆರಂಭಿಕ ಹಿನ್ನಡೆ ಉಂಟಾಯಿತು. ಆದರೆ, ಪ್ರೇರಕ್ ಮಂಕಡ್ (26) ಹಾಗೂ ಮತ್ತೊಬ್ಬ ಆರಂಭಿಕ ಬ್ಯಾಟರ್ ಕ್ವಿಂಟನ್ ಡಿ ಕಾಕ್ (28) ಸ್ವಲ್ಪ ಹೊತ್ತು ಬ್ಯಾಟಿಂಗ್ ಮಾಡಿ 41 ರನ್ಗಳ ಜತೆಯಾಟ ನೀಡಿದರು. ಆದರೆ ಪ್ರೇಕರ್ ಔಟಾದ ಬಳಿಕ ಕೀಸ್ಗೆ ಇಳಿದ ಸ್ಫೋಟಕ ಬ್ಯಾಟರ್ ಮಾರ್ಕ್ ಸ್ಪೋಯ್ನಿಸ್ ಶೂನ್ಯ ಸುತ್ತುವ ಮೂಲಕ ಮತ್ತೊಂದು ಬಾರಿ ಆಘಾತ ಎದುರಾಯಿತು.
ಆಯುಷ್, ನಿಕೋಲಸ್ ಸೂಪರ್ ಆಟ
ನಾಯಕ ಕೃಣಾಲ್ ಪಾಂಡ್ಯ 9 ರನ್ಗೆ ಔಟಾಗುವ ಜತೆ ಕ್ವಿಂಟನ್ ಡಿ ಕಾಕ್ ನಿರಾಸೆಯಿಂದ ಪೆವಿಲಿಯನ್ಗೆ ಮರಳಿದರು. ಈ ವೇಳೆ ಲಕ್ನೊ ತಂಡಕ್ಕೆ 5 ವಿಕೆಟ್ ನಷ್ಟಕ್ಕೆ 73 ರನ್ ಬಾರಿಸಿತು. ಬಳಿಕ ಕ್ರಿಸ್ನಲ್ಲಿ ತಳವೂರಿದ ಆಯುಷ್ ಬದೋನಿ (25) ಹಾಗೂ ನಿಕೋಲಸ್ ಪೂರನ್ ಸ್ಕೋರ್ ಬೋರ್ಡ್ ಹಿಗ್ಗಿಸಿದರು. ಈ ಜೋಡಿ ಆರನೇ ವಿಕೆಟ್ಗೆ 74 ರನ್ ಸೇರಿಸಿದರು. ಸ್ಪಿನ್ನರ್ ನರೈನ್ಗೆ ವಿಕೆಟ್ ಒಪ್ಪಿಸುವ ಮೂಲಕ ಬದೋನಿ ಔಟಾದರು.