ಲಖನೌ: ಬಲಗೈ ಬ್ಯಾಟರ್ ಮಾರ್ಕ್ ಸ್ಪೊಯ್ನಿಸ್ (ಅಜೇಯ 89) ಅವರ ಸ್ಫೋಟಕ ಅರ್ಧ ಶತಕದ ಹಾಗೂ ಬೌಲರ್ಗಳ ಸಮರ್ಥ ನಿರ್ವಹಣೆಯ ಲಾಭ ಪಡೆದ ಲಕ್ನೊ ಸೂಪರ್ ಜೈಂಟ್ಸ್ ತಂಡ ಐಪಿಎಲ್ 16ನೇ ಆವೃತ್ತಿಯ 63ನೇ ಪಂದ್ಯದಲ್ಲಿ ಮುಂಬಯಿ ಇಂಡಿಯನ್ಸ್ ವಿರುದ್ಧ 5 ರನ್ಗಳ ರೋಚಕ ಜಯ ದಾಖಲಿಸಿತು. ಇದರೊಂದಿಗೆ ಇನ್ನೂ ಒಂದು ಪಂದ್ಯ ಬಾಕಿ ಇರುವಂತೆಯೇ ಲಕ್ನೊ ತಂಡದ ಅಂಕ 15ಕ್ಕೆ ಏರಿತು. ಹೀಗಾಗಿ ಆರ್ಸಿಬಿಯ ಪ್ಲೇಆಫ್ ಹಾದಿ ಇನ್ನಷ್ಟು ಕಠಿಣಗೊಂಡಿತು. ಅತ್ತ ಮುಂಬಯಿ ಇಂಡಿಯನ್ಸ್ ತಂಡ 14 ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ ನಾಲ್ಕನೇ ಸ್ಥಾನದಲ್ಲಿ ಉಳಿದು ಪ್ಲೇ ಆಫ್ ರೇಸ್ನಲ್ಲಿ ಉಳಿದುಕೊಂಡಿತು.
ಇಲ್ಲಿನ ಅಟಲ್ಬಿಹಾರಿ ವಾಜಪೇಯಿ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ಮಂಗಳವಾರ ನಡೆದ ಹಣಾಹಣಿಯಲ್ಲಿ ಟಾಸ್ ಗೆದ್ದ ಮುಂಬಯಿ ಇಂಡಿಯನ್ಸ್ ತಂಡದ ನಾಯಕ ಮೊದಲು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಅಂತೆಯೇ ಮೊದಲು ಬ್ಯಾಟ್ ಮಾಡಿದ ಲಕ್ನೊ ಸೂಪರ್ ಜೈಂಟ್ಸ್ ತಂಡ ನಿಗದಿತ 20 ಓವರ್ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ .177 ರನ್ ಬಾರಿಸಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ಮುಂಬಯಿ ತಂಡ ತನ್ ಪಾಲಿನ ಓವರ್ಗಳು ಮುಕ್ತಾಯಗೊಂಡ 5 ವಿಕೆಟ್ ಕಳೆದುಕೊಂಡು 172 ರನ್ ಬಾರಿಸಿ ಸೋಲೊಪ್ಪಿಕೊಂಡಿತು.
ಈ ಪಂದ್ಯ ಮೂರು ತಂಡಗಳ ಪಾಲಿಗೆ ಪ್ರಮುಖ ಎನಿಸಿಕೊಂಡಿತ್ತು. ಲಕ್ನೊ ಸೋತಿದ್ದರೆ ಆ ತಂಡದ ಪ್ಲೇಆಫ್ ಹಾದಿ ಕಠಿಣವಾಗುತ್ತಿತ್ತು ಹಾಗೂ ಆರ್ಸಿಬಿಗೆ ಹೆಚ್ಚು ವಿಶ್ವಾಸ ಮೂಡುತ್ತಿತ್ತು. ಆದರೆ, ಲಕ್ನೊ ತಂಡ ಗೆದ್ದ ಕಾರಣ ಆ ತಂಡದ ವಿಶ್ವಾಸ ಹೆಚ್ಚಾಗಿದೆ. ಕೃಣಾಲ್ ಬಳಗಕ್ಕೆ ಇನ್ನೊಂದು ಪಂದ್ಯ ಬಾಕಿ ಉಳಿದಿದ್ದು ಅದನ್ನು ಗೆದ್ದರೆ ಒಟ್ಟು 17 ಅಂಕ ಸಂಪಾದಿಸುವ ಮೂಲಕ ಪ್ಲೇಆಫ್ ಸ್ಥಾನ ಖಚಿತವಾಗಬಹುದು. ಅತ್ತ ಮುಂಬಯಿ ತಂಡ 14 ಅಂಕಗಳೊಂದಿಗೆ ಈಗ ನಾಲ್ಕನೇ ಸ್ಥಾನದಲ್ಲಿದೆ. ಜತೆಗೆ ನೆಟ್ರನ್ರೇಟ್ (-0.128) ಮೈನಸ್. ಜತೆಗೆ ಇನ್ನೊಂದೇ ಪಂದ್ಯ ಬಾಕಿ ಇದೆ. ಆರ್ಸಿಬಿಗೆ ಇನ್ನು ಎರಡು ಪಂದ್ಯಗಳು ಬಾಕಿ ಇದೆ. ಎರಡನ್ನೂ ಗೆದ್ದರೆ ಒಟ್ಟ ಅಂಕ 16 ಆಗುತ್ತದೆ. ನೆಟ್ರನ್ರೇಟ್ ಪ್ಲಸ್ ಇರುವ ಕಾರಣ ಆರ್ಸಿಬಿಗೆ ಅವಕಾಶಗಳು ಸಿಗಬಹುದು.
ಸೂರ್ಯಕುಮಾರ್ ಫೇಲ್
ಮುಂಬಯಿ ತಂಡದ ಪರ ನಂಬಿಕಸ್ತ ಬ್ಯಾಟರ್ ಸೂರ್ಯಕುಮಾರ್ ಯಾದವ್ ಫೇಲ್ ಆದರು. ಅವರು 9 ಎಸೆತಕ್ಕೆ 7 ರನ್ ಬಾರಿಸಿ ಔಟಾಗುವ ಮೂಲಕ ಮುಂಬಯಿ ತಂಡಕ್ಕೆ ಹಿನ್ನಡೆ ಉಂಟಾಯಿತು. ಕೊನೆಯಲ್ಲಿ ಮುಂಬಯಿ ಬ್ಯಾಟರ್ಗಳು ಬ್ಯಾಟಿಂಗ್ ನಡೆಸಲು ತಿಣುಕಾಡಿದ ಕಾರಣ ಸೋಲುಂಟಾಯಿತು. ಟಿಮ್ ಡೇವಿಡ್ 19 ಎಸೆತಕ್ಕೆ 32 ರನ್ ಬಾರಿಸಿದರೂ ಗೆಲುವು ತಂದುಕೊಡಲು ಸಾಧ್ಯವಾಗಲಿಲ್ಲ. ಅದಕ್ಕಿಂತ ಮೊದಲು ಆರಂಭಿಕ ಬ್ಯಾಟರ್ ಇಶಾನ್ ಕಿಶನ್ (59) ಅರ್ಧ ಶತಕ ಬಾರಿಸಿ ಗೆಲುವಿನ ವಿಶ್ವಾಸ ಮೂಡಿಸಿದ್ದರು. ಆದರೆ, ಉಳಿದ ಬ್ಯಾಟರ್ಗಳಿಂದ ಹೆಚ್ಚಿನ ನೆರವು ದೊರಕಲಿಲ್ಲ. ನಾಯಕ ರೋಹಿತ್ ಶರ್ಮಾ ಕಳೆಗುಂದಿದ ಬ್ಯಾಟಿಂಗ್ ನಡೆಸಿ 37 ರನ್ ಬಾರಿಸಿದರು.
ಬ್ಯಾಟಿಂಗ್ ಆರಂಭಿಸಿದ ಲಕ್ನೊ ಸೂಪರ್ ಜೈಂಟ್ಸ್ ತಂಡ ಹೀನಾಯ ಆರಂಭ ಪಡೆಯಿತು. ಆರಂಭಿಕರಾಗಿ ಬಡ್ತಿ ಪಡೆದ ಹೊರತಾಗಿಯೂ ದೀಪಕ್ ಹೂಡ 5 ರನ್ ಮಾತ್ರ ಗಳಿಸಿ ಔಟಾದರು. ಈ ಮೂಲಕ ಅವರು ಹಾಲಿ ಟೂರ್ನಿಯಲ್ಲಿ ಕಳಪೆ ಪ್ರದರ್ಶನ ನೀಡಿದರು. ತಮಗೆ ಸಿಕ್ಕ ಯಾವುದೇ ಅವಕಾಶವನ್ನೂ ಅವರು ಬಳಸಿಕೊಳ್ಳಲಿಲ್ಲ. ದಕ್ಷಿಣ ಆಫ್ರಿಕಾದ ವಿಕೆಟ್ಕೀಪರ್ ಬ್ಯಾಟರ್ ಕ್ವಿಂಟನ್ ಡಿ ಕಾಕ್ 16 ರನ್ ಗಳಿಸಿ ಔಟಾಗಿ ಪೆವಿಲಿಯನ್ ಹಾದಿ ಹಿಡಿದರು. ಮೂರನೇ ಕ್ರಮಾಂಕದಲ್ಲಿ ಬ್ಯಾಟ್ ಮಾಡಲು ಅವಕಾಶ ಪಡೆದ ಪ್ರೇರಕ್ ಮಂಕಡ್ ಗೋಲ್ಡನ್ ಡಕ್ ಆದರು. ತಾವೆದುರಿಸಿದ ಮೊದಲ ಎಸೆತದಲ್ಲಿಯೇ ವಿಕೆಟ್ಕೀಪರ್ಗೆ ಕ್ಯಾಚ್ ನೀಡಿ ನಿರ್ಗಮಿಸಿದರು. ಈ ವೇಳೆ ಆತಿಥೇಯ ತಂಡ 35 ರನ್ಗಳಿಗೆ 3 ವಿಕೆಟ್ ನಷ್ಟ ಮಾಡಿಕೊಂಡು ಸಂಕಷ್ಟಕ್ಕೆ ಬಿತ್ತು.
ಸ್ಟೊಯ್ನಿಸ್, ಕೃಣಾಲ್ ಅರ್ಧ ಶತಕದ ಜತೆಯಾಟ
ಆರಂಭಿಕ ಮುನ್ನಡೆ ಪಡೆದುಕೊಂಡ ಖುಷಿಯಲ್ಲಿದ್ದ ಮುಂಬಯಿ ತಂಡಕ್ಕೆ ನಾಲ್ಕನೇ ಕ್ರಮಾಕದಲ್ಲಿ ಆಡಲು ಇಳಿದ ನಾಯಕ ಕೃಣಾಲ್ ಪಾಂಡ್ಯ ಪ್ರತಿರೋಧ ಒಡ್ಡಲು ಆರಂಭಿಸಿದರು. ಅವರ ಜತೆ ಸೇರಿದ ಆಸ್ಟ್ರೇಲಿಯಾದ ಬಲಗೈ ಬ್ಯಾಟರ್ ಸ್ಟೊಯ್ನಿಸ್ ಕೂಡ ಮುಂಬಯಿ ಬೌಲರ್ಗಳ ಬೆವರಿಳಿಸಲು ಆರಂಭಿಸಿದರು. ಆರಂಭದಲ್ಲಿ ನಿಧಾನಗತಿಯಲ್ಲಿ ಬ್ಯಾಟಿಂಗ್ ಮಾಡಿದ ಈ ಜೋಡಿ ಮುಂದಿನ ಹಂತದಲ್ಲಿ ಸ್ಫೋಟಕ ಬ್ಯಾಟಿಂಗ್ ಮಾಡಲು ಮುಂದಾದರು. ಅದರಲ್ಲೂ ಸ್ಟೊಯ್ನಿಸ್ ಅಬ್ಬರದ ಬ್ಯಾಟಿಂಗ್ ನಡೆಸಿದರು.
42 ಎಸೆತಗಳನ್ನು ಎದುರಿಸು 1 ಸಿಕ್ಸರ್ ಹಾಗೂ 1 ಫೋರ್ ಸಮೇತ 49 ರನ್ ಬಾರಿಸಿದ್ದ ಕೃಣಾಲ್ ಪಾಂಡ್ಯ ಗಾಯಗೊಂಡು ಮೈದಾನ ತೊರೆಯುವಂತಾಯಿತು. ಈ ವೇಳೆ ತಂಡದ ಮೊತ್ತ 117ಕ್ಕೆ ಏರಿತ್ತು. ಈ ಬಳಿಕ ಏಕಾಏಕಿ ಸ್ಫೋಟಕ ಬ್ಯಾಟಿಂಗ್ ಮಾಡಲು ಆರಂಭಿಸಿದ ಸ್ಟೊಯ್ನಿಸ್ ತಮ್ಮ ಅರ್ಧ ಶತಕ ಪೂರೈಸಿದರು. ಅಲ್ಲದೆ, 47 ಎಸೆತಗಳನ್ನು ಎದುರಿಸಿ 8 ಸಿಕ್ಸರ್ ಹಾಗೂ 4 ಫೋರ್ ಮೂಲಕ 89 ರನ್ ಬಾರಿಸಿದರು. ಇವರ ಭರ್ಜರಿ ಬ್ಯಾಟಿಂಗ್ ಕಾರಣಕ್ಕೆ ಲಕ್ನೊ ತಂಡಕ್ಕೆ ದೊಡ್ಡ ಮೊತ್ತ ಪೇರಿಸಲು ಸಾಧ್ಯವಾಯಿತು. ಕೊನೆಯಲ್ಲಿ ನಿಕೋಲಸ್ ಪೂರನ್ 8 ಎಸೆತಕ್ಕೆ 8 ರನ್ ಬಾರಿಸಿದರು.
ಮುಂಬಯಿ ಪರ ಬೌಲಿಂಗ್ನಲ್ಲಿ ಜೇಸನ್ ಬ್ರೆಹ್ರೆನ್ಡಾರ್ಫ್ 30 ರನ್ ನೀಡಿ ಎರಡು ವಿಕೆಟ್ ಕಬಳಿಸಿದರು. ಪಿಯೂಷ್ ಚಾವ್ಲಾ ಕೂಡ ಒಂದು ವಿಕೆಟ್ ತಮ್ಮದಾಗಿಸಿಕೊಂಡರು.a