ಮೊಹಾಲಿ: ಐಪಿಎಲ್ 16ನೇ ಅವೃತ್ತಿಯ ಐಪಿಎಲ್ನ 38ನೇ ಪಂದ್ಯದಲ್ಲಿ ರನ್ಗಳ ಮಳೆಯೇ ಸುರಿಯಿತು. ದೊಡ್ಡ ಮೊತ್ತದ ಈ ಪಂದ್ಯದಲ್ಲಿ ಗೆಲುವು ಪ್ರವಾಸಿ ಲಕ್ನೊ ತಂಡದ ಪಾಲಾಯಿತು. ಆತಿಥೇಯ ಪಂಜಾಬ್ ತಂಡವೂ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿತು. ಆದರೆ, 258 ರನ್ಗಳ ಗುರಿಯನ್ನು ಭೇದಿಸಲು ಸಾಧ್ಯವಾಗದೇ 56 ರನ್ಗಳಿಂದ ಸೋಲೊಪ್ಪಿಕೊಂಡಿತು. ಈ ಮೂಲಕ ಲಕ್ನೊ ತಂಡ ಮತ್ತೆ ಗೆಲುವಿನ ಹಾದಿಗೆ ಮರಳಿದರೆ, ಪಂಜಾಬ್ ಬಳಗ ಸೋಲಿಗೆ ಸುಳಿಗೆ ಸಿಲುಕಿತು. ಇದು ಪಂಜಾಬ್ನ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ಹಾಲಿ ಆವೃತ್ತಿಯಲ್ಲಿ ದಾಖಲಾದ ಮೊದಲ 200 ಪ್ಲಸ್ ರನ್
ಇಲ್ಲಿನ ಸವಾಯ್ ಮಾನ್ಸಿಂಗ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಗೆದ್ದ ಆತಿಥೇಯ ಪಂಜಾಬ್ ತಂಡದ ನಾಯಕ ಶಿಖರ್ ಧವನ್ ಮೊದಲು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಆದರೆ, ತಮಗೆ ಸಿಕ್ಕ ಅವಕಾಶವನ್ನು ಅದ್ಭುತವಾಗಿ ಬಳಸಿಕೊಂಡ ಲಕ್ನೊ ಬ್ಯಾಟರ್ಗಳು ಮೈದಾನ ತುಂಬೆಲ್ಲ ಬೌಂಡರಿ ಸಿಕ್ಸರ್ಗಳ ಮಳೆ ಸುರಿಸಿದರು. ಇದರಿಂದಾಗಿ ನಿಗದಿತ 20 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 257 ರನ್ ಬಾರಿಸಿತು. ಗುರಿ ಬೆನ್ನಟ್ಟಿದ ಪಂಜಾಬ್ ತಂಡ 19 .5 ಓವರ್ಗಳಲ್ಲಿ 201 ರನ್ಗಳಿಗೆ ಆಲ್ಔಟ್ ಆಗಿ ಸೋಲೊಪ್ಪಿಕೊಂಡಿತು.
ಲಕ್ನೊ ತಂಡ ಗಳಿಸಿದ 257 ರನ್ಗಳ ಬೃಹತ್ ಮೊತ್ತ ಪೇರಿಸಿದೆ. ಇದು ಐಪಿಎಲ್ ಇತಿಹಾಸದಲ್ಲಿ ತಂಡವೊಂದು ಪೇರಿಸಿದ ಎರಡನೇ ಗರಿಷ್ಠ ಮೊತ್ತವಾಗಿದೆ. 2013ರಲ್ಲಿ ರಾಯಲ್ ಚಾಲೆಂಜರ್ಸ್ ತಂಡ ಗಳಿಸಿರುವ 263 ರನ್ ಈ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದೆ. ಲಕ್ನೊ ತಂಡದ ಪರ ಮಾರ್ಕ್ ಸ್ಟೊಯ್ನಿಸ್ (72) ಹಾಗೂ ಕೈಲ್ ಮೇಯರ್ಸ್(54) ರನ್ ಬಾರಿಸಿದರೆ ಆಯುಷ್ ಬದೋನಿ (43) ಹಾಗೂ ನಿಕೋಲಸ್ ಪೂರನ್ (45) ಕೂಡ ದೊಡ್ಡ ಮೊತ್ತ ಪೇರಿಸಲು ನೆರವಾದರು.
ಬ್ಯಾಟಿಂಗ್ ಆರಂಭಿಸಿದ ಲಕ್ನೊ ತಂಡದ ಪರ ನಾಯಕ ಕೆ. ಎಲ್ ರಾಹುಲ್ 12 ರನ್ಗಳಿಗೆ ಔಟಾಗುವ ಮೂಲಕ ನಿರಾಸೆ ಮೂಡಿದರು. ಆದರೆ, ವೆಸ್ಟ್ ಇಂಡೀಸ್ ಬ್ಯಾಟರ್ ಕೈಲ್ ಮೇಯರ್ಸ್ ತಮ್ಮ ಎಂದಿನ ಶೈಲಿಯಲ್ಲಿ ಅಬ್ಬರಿಸಿ 24 ಎಸೆತಗಳಲ್ಲಿ 4 ಸಿಕ್ಸರ್, 7 ಫೋರ್ಗಳ ಮೂಲಕ 54 ರನ್ ಬಾರಿಸಿದರು. ಮೂರನೇ ಕ್ರಮಾಂಕದಕ್ಕೆ ಬಡ್ತಿ ಪಡೆದುಕೊಂಡ ಆಯುಷ್ ಬದೋನಿ ಕೂಡ 24 ಎಸೆತಗಳಲ್ಲಿ 4 ಫೋರ್ ಹಾಗೂ 4 ಸಿಕ್ಸರ್ಗಳ ಮೂಲಕ 43 ರನ್ ಗಳಿಸಿ ದೊಡ್ಡ ಮೊತ್ತ ಪೇರಿಸುವ ಆಟಕ್ಕೆ ಬೆಂಬಲ ಕೊಟ್ಟರು.
ಸಿಡಿದ ಸ್ಟೊಯ್ನಿಸ್
ಮೇಯರ್ಸ್ ಔಟಾದ ಬಳಿಕ ಬ್ಯಾಟ್ ಹಿಡಿದು ಬಂದ ಆಸ್ಟ್ರೇಲಿಯಾದ ಆಲ್ರೌಂಡರ್ ಮಾರ್ಕ್ ಸ್ಟೊಯ್ನಿಸ್ ಪಂಜಾಬ್ ಬೌಲರ್ಗಳನ್ನು ಬಿಡುವಿಲ್ಲದೆ ದಂಡಿಸಿದರು. 5 ಸಿಕ್ಸರ್ ಹಾಗೂ 6 ಫೋರ್ಗಳ ನೆರವಿನಿಂದ 40 ಎಸೆತಗಳಲ್ಲಿ 72 ರನ್ ಬಾರಿಸಿದರು. ಅವರು 30 ಎಸೆತಗಳಲ್ಲಿ ಅವರು ಅರ್ಧ ಶತಕ ಬಾರಿಸಿದರು.
ಬದೋನಿ ಔಟಾದ ಬಳಿಕ ಕ್ರೀಸ್ಗೆ ಬಂದ ವಿಕೆಟ್ ಕೀಪರ್ ನಿಕೋಲಸ್ ಪೂರನ್ ಕೂಡ ಅಬ್ಬರಿಸಿದರು. 7 ಫೋರ್ ಒಂದು ಸಿಕ್ಸರ್ ನೆರವಿನಿಂದ 19 ಎಸೆತಗಳಲ್ಲಿ 45 ರನ್ ಬಾರಿಸಿದ ಅವರು ತಂಡದ ಮೊತ್ತ 250ರ ಗಡಿ ದಾಟುವಂತೆ ನೋಡಿಕೊಂಡರು. ಬ್ಯಾಟಿಂಗ್ನಲ್ಲಿ ಹಿಂಬಡ್ತಿ ಪಡೆದ ದೀಪಕ್ ಹೂಡ 6 ಎಸೆತಗಳಲ್ಲಿ 11 ರನ್ ಬಾರಿಸಿದರು.
ಭೇದಿಸಲಾಗದ ದೊಡ್ಡ ಗರಿ
ದೊಡ್ಡ ಮೊತ್ತದ ಗುರಿಯನ್ನು ಬೆನ್ನಟ್ಟಲು ಹೊರಟ ಪಂಜಾಬ್ ತಂಡವೂ ಉತ್ತಮವಾಗಿ ಬ್ಯಾಟ್ ಮಾಡಿತು. ಆದರೆ, ಓವರ್ಗೆ 12ಕ್ಕಿಂತಲೂ ಅಧಿಕ ರನ್ರೇಟ್ ಬೇಕಾಗಿದ್ದ ಕಾರಣ ಗೆಲುವು ಸುಲಭವಾಗಿರಲಿಲ್ಲ. ಆರಂಭಿಕರಾದ ಪ್ರಭ್ಸಿಮ್ರಾನ್ ಸಿಂಗ್ (9) ಹಾಗೂ ಶಿಖರ್ ಧವನ್ (1) ಔಟಾಗುವ ಮೂಲಕ ಹಿನ್ನಡೆಯೂ ಆಯಿತು. ಆದರೆ, ಅಥರ್ವ ಟೈಡೆ (66), ಸಿಕಂದರ್ ರಾಜಾ (36), ಲಿಯಾಮ್ ಲಿವಿಂಗ್ಸ್ಟನ್ (23), ಸ್ಯಾಮ್ ಕರ್ರನ್ (21), ಜಿತೇಶ್ ಶರ್ಮಾ (24) ಕೊಡುಗೆಗಳ ಮೂಲಕ ರನ್ ಶಿಖರವನ್ನು ಪಂಜಾಬ್ ತಂಡ ಏರಲು ಯತ್ನಿಸಿತು. ಆದರೆ, ದೊಡ್ಡ ಮೊತ್ತವನ್ನು ದಾಟಲಾಗದೇ ಸೋತಿತು.