ಮೊಹಾಲಿ: ಮಳೆ ಪೀಡಿತ ಪಂದ್ಯದಲ್ಲಿ ಬೌಲಿಂಗ್ ಮತ್ತು ಬ್ಯಾಟಿಂಗ್ನಲ್ಲಿ ಸಂಘಟಿತ ಪ್ರದರ್ಶನ ತೋರಿದ ಪಂಜಾಬ್ ಕಿಂಗ್ಸ್ ತಂಡ ಕೋಲ್ಕೊತಾ ನೈಟ್ ರೈಡರ್ಸ್ ವಿರುದ್ಧ ಡಕ್ವರ್ತ್ ಲೂಯಿಸ್ ನಿಯಮದ ಪ್ರಕಾರ 7 ರನ್ಗಳ ಗೆಲುವು ದಾಖಲಿಸಿದೆ. ಈ ಮೂಲಕ 16ನೇ ಆವೃತ್ತಿಯ (IPL 2023) ಐಪಿಎಲ್ನಲ್ಲಿ ಗೆಲುವಿನ ಶುಭಾರಂಭ ಕಂಡಿದೆ. ಇಲ್ಲಿನ ಪಂಜಾಬ್ ಕ್ರಿಕೆಟ್ ಅಸೋಸಿಯೇಷ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ಶನಿವಾರ ನಡೆದ ಐಪಿಎಲ್ನ ಡಬಲ್ ಹೆಡರ್ನ ಮೊದಲ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಪಂಜಾಬ್ ಕಿಂಗ್ಸ್ ನಿಗದಿತ 20 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 191 ರನ್ ಗಳಿಸಿತು. ರನ್ ಚೇಸ್ ಮಾಡಿದ ಕೋಲ್ಕೊತಾ ತಂಡ 16 ಓವರ್ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 146 ರನ್ ಬಾರಿಸಿತ್ತು. ಈ ವೇಳೆ ಆರಂಭವಾದ ಮಳೆ ನಿರಂತರವಾಗಿ ಸುರಿಯಿತು. ನಿಗದಿತ ಅವಧಿಯಲ್ಲಿ ಪಂದ್ಯ ಮುಕ್ತಾಯಗೊಳ್ಳದ ಕಾರಣ ಡಕ್ವರ್ತ್ ಲೂಯಿಸ್ ನಿಯಮದ ಪ್ರಕಾರ ಪಂಜಾಬ್ ತಂಡಕ್ಕೆ ಗೆಲುವು ದೊರಕಿತು.
ಗುರಿ ಬೆನ್ನಟ್ಟಿದ ಕೆಕೆಆರ್ ತಂಡಕ್ಕೆ ಎಡಗೈ ವೇಗಿ ಅರ್ಶ್ದೀಪ್ ಸಿಂಗ್ ಅವರು ಮನ್ದೀಪ್ ಸಿಂಗ್(2) ಮತ್ತು ಅಂಕುಲ್ ರಾಯ್(4) ವಿಕೆಟ್ ಕಿತ್ತು ಆರಂಭಿಕ ಆಘಾತ ನೀಡಿದರು. ಇದರ ಬೆನ್ನಲ್ಲೇ ರೆಹಮಾನುಲ್ಲ ಗುರ್ಬಜ್‌ ವಿಕೆಟ್ ಕೂಡ ಪತನಗೊಂಡಿತು. ತಂಡದ ಮೊತ್ತ 30 ರನ್ ದಾಟುವ ಮುನ್ನವೇ ಪ್ರಮುಖ ಮೂರು ವಿಕೆಟ್ ಕಳೆದುಕೊಂಡಿತು.
ಆರಂಭಿಕ ಆಘಾತಕ್ಕೆ ಸಿಲುಕಿದ ತಂಡಕ್ಕೆ ವೆಂಕಟೇಶ್ ಅಯ್ಯರ್ ಮತ್ತು ನಾಯಕ ನಿತೀಶ್ ರಾಣಾ ರಕ್ಷಣಾತ್ಮಕ ಆಟವಾಡುವ ಮೂಲಕ ಆಸರೆಯಾದರು. ಆದರೆ ಈ ಜೋಡಿಯೂ ದೊಡ್ಡ ಮೊತ್ತದ ಜತೆಯಾಟ ನಡೆಸುವಲ್ಲಿ ವಿಫಲವಾಯಿತು. ಇದರಲ್ಲಿ ನಿತೀಶ್ ರಾಣಾ ಅವರ ಬ್ಯಾಟಿಂಗ್ ಕೊಂಚ ಬಿರುಸಿನಿಂದ ಕೂಡಿತ್ತು. 17 ಎಸೆತಗಳಲ್ಲಿ 24 ರನ್ ಬಾರಿಸಿದರು. ಸ್ಫೋಟಕ ಬ್ಯಾಟಿಂಗ್ಗೆ ಹೆಸರುವಾಸಿಯಾದ ವೆಂಕಟೇಶ್ ಅಯ್ಯರ್ ಈ ಪಂದ್ಯದಲ್ಲಿ ಎಸೆತವೊಂದಕ್ಕೆ ರನ್ ಗಳಿಸಿದರು. ವಿಂಡೀಸ್ ಕ್ರಿಕೆಟಿಗ ಆ್ಯಂಡ್ರೆ ರಸೆಲ್ ಒಂದು ಹಂತದಲ್ಲಿ ಸಿಕ್ಸರ್ ಮತ್ತು ಬೌಂಡರಿ ಬಾರಿಸಿ ಡೇಂಜರಸ್ ಆಗುವ ಸೂಚನೆ ನೀಡಿದರು. ಆದರೆ ಸ್ಯಾಮ್ ಕರನ್ ಅವರ ಓವರ್ನಲ್ಲಿ ಸಿಕ್ಸರ್ ಬಾರಿಸುವ ಪ್ರಯತ್ನದಲ್ಲಿ ಸಿಕಂದರ್ ರಾಜಾ ಅವರಿಗೆ ಕ್ಯಾಚ್ ನೀಡಿ ವಿಕೆಟ್ ಕೈಚೆಲ್ಲಿದರು. ರಸೆಲ್ 19 ಎಸೆತದಲ್ಲಿ 35 ರನ್ ಬಾರಿಸಿದರು.
ಅರ್ಧಶತಕ ಬಾರಿಸಿದ ಭಾನುಕ ರಾಜಪಕ್ಷ
ಇದಕ್ಕೂ ಮುನ್ನ ಬ್ಯಾಟಿಂಗ್ ನಡೆಸಿದ ಪಂಜಾಬ್ ಪರ ಶ್ರೀಲಂಕಾ ಕ್ರಿಕೆಟಿಗ ಭಾನುಕ ರಾಜಪಕ್ಷ ಅವರು ಅರ್ಧಶತಕ ಬಾರಿಸಿ ಮಿಂಚಿದರು. 32 ಎಸೆತ ಎದುರಿಸಿದ ಅವರು 5 ಬೌಂಡರಿ ಮತ್ತು 2 ಸಿಕ್ಸರ್ ನೆರವಿನಿಂದ 50 ರನ್ಗಳಿಸಿ ಉಮೇಶ್ ಯಾದವ್ಗೆ ವಿಕೆಟ್ ಒಪ್ಪಿಸಿದರು.
ಇನಿಂಗ್ಸ್ ಆರಂಭಿಸಿದ ನಾಯಕ ಶಿಖರ್ ಧವನ್ ಮತ್ತು ಪ್ರಭಾಸಿಮ್ರಾನ್ ಸಿಂಗ್ ತಂಡಕ್ಕೆ ಉತ್ತಮ ಆರಂಭ ನೀಡಿದರು. ಆದರೆ ಈ ಜೋಡಿ ಹೆಚ್ಚು ಕಾಲ ಕ್ರೀಸ್ನಲ್ಲಿ ಇರಲು ಟಿಮ್ ಸೌಥಿ ಬಿಡಲಿಲ್ಲ 23 ರನ್ ಗಳಿಸಿದ್ದ ಪ್ರಭಾಸಿಮ್ರಾನ್ ಸಿಂಗ್ ವಿಕೆಟ್ ಕಿತ್ತು ಕೆಕೆಆರ್ಗೆ ಮೊದಲ ಯಶಸ್ಸು ತಂದು ಕೊಟ್ಟರು. ವಿಶೇಷವೆಂದರೆ ತಂಡದ ಮೊದಲ ವಿಕೆಟ್ನ 23ರನ್ ಪ್ರಭಾಸಿಮ್ರಾನ್ ಸಿಂಗ್ ಅವರೇ ಬಾರಿಸಿದರು. ಅಲ್ಲಿಯ ವರೆಗೆ ಧವನ್ ಖಾತೆ ತೆರೆದಿರಲಿಲ್ಲ. ಈ ವಿಕೆಟ್ ಪತನ ಬಳಿಕ ಆಡಲಿಳಿದ ಭಾನುಕ ರಾಜಪಕ್ಷ ಆರಂಭದಿಂದಲೇ ಬಿರುಸಿನ ಬ್ಯಾಟಿಂಗ್ ನಡೆಸಿದರು. ಶಿಖರ್ ಧವನ್ ಜತೆಗೂಡಿ ಉತ್ತಮ ಇನಿಂಗ್ಸ್ ಕಟ್ಟಿದ ಭಾನುಕ ರಾಜಪಕ್ಷ ದ್ವಿತೀಯ ವಿಕೆಟ್ಗೆ 86 ರನ್ಗಳ ಜತೆಯಾಟ ನಡೆಸಿದರು.
ಶಿಖರ್ ಧವನ್ 29 ಎಸೆತ ಎದುರಿಸಿ 40 ರನ್ ಬಾರಿಸಿದರು. ಜಿತೇಶ್ ಶರ್ಮಾ 21 ರನ್ಗೆ ಆಟ ಮುಗಿಸಿದರು. ಧವನ್ ಮತ್ತು ರಾಜಪಕ್ಷ ವಿಕೆಟ್ ಪತನದ ಬಳಿಕ ಒಂದು ಹಂತದಲ್ಲಿ ಪಂಜಾಬ್ ತಂಡದ ಸ್ಕೋರ್ ವೇಗ ಕುಂಟಿತಗೊಂಡಿತು. ಆದರೆ ಅಂತಿಮ ಕ್ಷಣದಲ್ಲಿ ಬಿಸರುಸಿನ ಬ್ಯಾಟ್ ಬೀಸಿದ ಇಂಗ್ಲೆಂಡ್ ಟಿ20 ವಿಶ್ವ ಕಪ್ ತಂಡದ ಹೀರೊ ಸ್ಯಾಮ್ ಕರನ್ ಮತ್ತು ಜಿಂಬಾಬ್ವೆ ತಂಡದ ಅನುಭವಿ ಆಟಗಾರ ಸಿಕಂದರ್ ರಾಜಾ ತಂಡದ ಮೊತ್ತವನ್ನು ಹಿಗ್ಗಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಸಿಕಂದರ್ ರಾಜಾ ತಲಾ ಒಂದು ಬೌಂಡರಿ ಮತ್ತು ಸಿಕ್ಸರ್ ಬಾರಿಸಿ 19 ರನ್ ಬಾರಿಸಿದರು. ಇದು ಅವರ ಐಪಿಎಲ್ ಪದಾರ್ಪಣ ಪಂದ್ಯವಾಗಿದೆ. ಸ್ಯಾಮ್ ಕರನ್ 17 ಎಸೆತ ಎದುರಿಸಿ 26 ರನ್ ಗಳಿಸಿ ಅಜೇಯರಾಗಿ ಉಳಿದರು.
ಇದನ್ನೂ ಓದಿ IPL 2023: ಧೋನಿ ಗಾಯದ ಬಗ್ಗೆ ಮಾಹಿತಿ ನೀಡಿದ ತಂಡದ ಕೋಚ್ ಸ್ಟೀಫ‌ನ್‌ ಫ್ಲೆಮಿಂಗ್‌
ಕೆಕೆಆರ್ ಪರ ಉಮೇಶ್ ಯಾದವ್ ಒಂದು ವಿಕೆಟ್ ಕಿತ್ತರೂ 27 ರನ್ ಬಿಟ್ಟುಕೊಟ್ಟರು. ವರುಣ್ ಚಕ್ರವರ್ತಿ ಮತ್ತು ಸುನೀಲ್ ನಾರಾಯಣ್ ತಲಾ ಒಂದು ವಿಕೆಟ್ ಪಡೆದರು. ಟಿಮ್ ಸೌಥಿ 2 ವಿಕೆಟ್ ಕಲೆಹಾಕಿದರು. ಆದರೆ 54 ರನ್ ಬಿಟ್ಟುಕೊಟ್ಟು ದುಬಾರಿಯಾಗಿ ಕಂಡುಬಂದರು.
ಸಂಕ್ಷಿಪ್ತ ಸ್ಕೋರ್: ಪಂಜಾಬ್ ಕಿಂಗ್ಸ್: 20 ಓವರ್ಗಳಲ್ಲಿ 5 ವಿಕೆಟ್ಗೆ 191 (ಶಿಖರ್ ಧವನ್ 40, ಭಾನುಕ ರಾಜಪ್ಷ 50, ಸ್ಯಾಮ್ ಕರನ್ ಅಜೇಯ 26, ಟಿಮ್ ಸೌಥಿ 54ಕ್ಕೆ 2, ಉಮೇಶ್ ಯಾದವ್ 27ಕ್ಕೆ 1)