ಲಖನೌ: ಐಪಿಎಲ್ 16ನೇ ಅವೃತ್ತಿಯ 43ನೇ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಲಕ್ನೊ ಸೂಪರ್ ಜಯಂಟ್ಸ್ ವಿರುದ್ಧ 18 ರನ್ಗಳಿಂದ ಗೆಲುವು ಸಾಧಿಸಿದೆ. ಈ ಮೂಲಕ ತವರಿನಲ್ಲಿ ಸೋಲಿಸಿದ್ದ ಸೇಡಿಗೆ ಪ್ರತ್ಯುತ್ತರ ನೀಡಿತು. ಈ ಜಯದ ಮೂಲಕ ಆಡಿರುವ 9 ಪಂದ್ಯಗಳಲ್ಲಿ ಐದು ವಿಜಯವನ್ನು ಕಾಣುವ ಮೂಲಕ ಅಂಕಪಟ್ಟಿಯಲ್ಲಿ ಐದನೇ ಸ್ಥಾನಕ್ಕೇರಿತು. ಅತ್ತ ಲಕ್ನೊ ಸೂಪರ್ ಜಯಂಟ್ಸ್ ತಂಡ ಮೂರನೇ ಸ್ಥಾನಕ್ಕೆ ಇಳಿಯಿತು.
ಭಾರತರತ್ನ ಶ್ರೀ ಅಟಲ್ಬಿಹಾರಿ ವಾಜಪೇಯಿ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಆರ್ಸಿಬಿ ತಂಡದ ನಾಯಕ ಫಾಫ್ ಡು ಪ್ಲೆಸಿಸ್ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ಮೊದಲು ಬ್ಯಾಟ್ ಮಾಡಿ ದೊಡ್ಡ ಮೊತ್ತ ಪೇರಿಸಿ ಗೆಲುವು ಸಾಧಿಸುವುದು ನಾಯಕನ ಯೋಜನೆಯಾಗಿತ್ತು. ಆದರೆ, ಆರ್ಸಿಬಿ ಬ್ಯಾಟರ್ಗಳು ಅದಕ್ಕೆ ತದ್ವಿರುದ್ಧವಾಗಿ ಆಡಿ 20 ಓವರ್ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 126 ರನ್ ಬಾರಿಸಿತು. ಗುರಿ ಬೆನ್ನಟ್ಟಿದ ಲಕ್ನೊ ತಂಡ 10. ಓವರ್ಗಳಲ್ಲಿ 108 ರನ್ಗಳಿಗೆ ಆಲ್ಔಟ್ ಆಯಿತು.
ಗುರಿ ಬೆನ್ನಟ್ಟಿ ಲಕ್ನೊ ತಂಡ ಅತ್ಯಂತ ಕಳಪೆ ಬ್ಯಾಟಿಂಗ್ ಮಾಡಿತು. 38 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಬಿತ್ತು. ಕೊನೇ ತನಕವೂ ತಂಡ ಚೇತರಿಸಿಕೊಳ್ಳದೇ ಆಲ್ಔಟ್ ಆಯಿತು. ಬೌಲಿಂಗ್ ಪಿಚ್ನ ಲಾಭ ಪಡೆದ ಆರ್ಸಿಬಿ ಬೌಲರ್ಗಳು ಸತತವಾಗಿ ವಿಕೆಟ್ ಉರುಳಿಸಿದರು. ಕೃಷ್ಣಪ್ಪ ಗೌತಮ್ ಲಕ್ನೊ ಪರ 23 ರನ್ ಬಾರಿಸಿ ಗರಿಷ್ಠ ಸ್ಕೋರರ್ ಎನಿಸಿಕೊಂಡರು. ಕೃಣಾಲ್ ಪಾಂಡ್ಯ 14 ರನ್ ಬಾರಿಸಿದರೆ, ಮಾರ್ಕ್ ಸ್ಟೊಯ್ನಿಸ್ 13 ರನ್ ಗಳಿಸಿದರು. ಅಮಿತ್ ಮಿಶ್ರಾ 19 ರನ್ ಕಲೆ ಹಾಕಿದರೆ ನವೀನ್ ಉಲ್ ಹಕ್ 13 ರನ್ ಬಾರಿಸಿದರು.
ಆರ್ಸಿಬಿ ತಂಡ ಉತ್ತಮ ಆರಂಭವನ್ನೇ ಪಡೆದಿತ್ತು. ವಿರಾಟ್ ಕೊಹ್ಲಿ (31) ಹಾಗೂ ಫಾಫ್ ಡು ಪ್ಲೆಸಿಸ್ ಮೊದಲ ವಿಕೆಟ್ಗೆ 62 ರನ್ ಗಳಿಸಿದರು. ಈ ಮೂಲಕ ಉತ್ತಮ ಮೊತ್ತ ಪೇರಿಸುವ ಸೂಚನೆ ಸಿಕ್ಕಿತು. ಆದರೆ, ಕೊಹ್ಲಿ ವಿಕೆಟ್ ಪತನಗೊಂಡ ಬಳಿಕ ಆರ್ಸಿಬಿಯ ಪತನ ಆರಂಭಗೊಂಡಿತು. ಅನುಜ್ ರಾವತ್ (9) ಗ್ಲೆನ್ ಮ್ಯಾಕ್ಸ್ವೆಲ್ (4) ಸುಯಾಶ್ ಪ್ರಭುದೇಸಾಯಿ (6) ಬೇಗೆ ವಿಕೆಟ್ ಕಳೆದುಕೊಂಡರು. ಈ ಮೂಲಕ ಆರ್ಸಿಬಿಯ ದೊಡ್ಡ ಮೊತ್ತದ ಕನಸಿಗೆ ಕಲ್ಲು ಬಿತ್ತು.
ದಿನೇಶ್ ಕಾರ್ತಿಕ್ 16 ರನ್ ಬಾರಿಸಿದರೂ ಮಹಿಪಾಲ್ ಲಾಮ್ರೋರ್ 3 ರನ್ ಬಾರಿಸಿ ಮತ್ತೆ ವೈಫಲ್ಯ ಕಂಡರು. ವಾನಿಂದು ಹಸರಂಗ 8 ರನ್ ಬಾರಿಸಿದರೆ, ಕರಣ್ ಶರ್ಮಾ 2 ರನ್ಗೆ ವಿಕೆಟ್ ಒಪ್ಪಿಸಿದರು. ಹೇಜಲ್ವುಡ್ 1 ರನ್ ಬಾರಿಸಿದರೆ, ಸಿರಾಜ್ ಶೂನ್ಯಕ್ಕೆ ಔಟಾದರು.
ಲಕ್ನೊ ತಂಡದ ಪರ ಬೌಲಿಂಗ್ನಲ್ಲಿ ನವೀನ್ ಉಲ್ ಹಕ್ 21 ರನ್ಗಳಿಗೆ 3 ವಿಕೆಟ್ ಉರುಳಿಸಿದರೆ ಅಮಿತ್ ಮಿಶ್ರಾ ಹಾಗೂ ರವಿ ಬಿಷ್ಣೋಯಿ ತಲಾ 2 ವಿಕೆಟ್ ಪಡೆದರು. ಕೆ. ಗೌತಮ್ 1 ವಿಕೆಟ್ ತಮ್ಮದಾಗಿಸಿಕೊಂಡರು.