ಮುಂಬಯಿ: ಮತ್ತೊಂದು ಬಾರಿ ತನ್ನ ದೌರ್ಬಲ್ಯ ಪ್ರದರ್ಶಿಸಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಐಪಿಎಲ್ 16ನೇ ಅವೃತ್ತಿಯ 54ನೇ ಪಂದ್ಯದಲ್ಲಿ ಮುಂಬಯಿ ಇಂಡಿಯನ್ಸ್ ವಿರುದ್ಧ 6 ವಿಕೆಟ್ ಹೀನಾಯ ಸೋಲಿಗೆ ಒಳಗಾಯಿತು. ಇದರೊಂದಿಗೆ ಹಾಲಿ ಆವೃತ್ತಿಯಲ್ಲಿ ಸತತ ಎರಡನೇ ಸೋಲಿಗೆ ಒಳಗಾಗಿ ಪ್ಲೇಆಫ್ ಹಾದಿಯನ್ನು ಕಠಿಣ ಮಾಡಿಕೊಂಡಿತು. ಸೋಲಿನೊಂದಿಗೆ ಆರ್ಸಿಬಿ ಐಪಿಎಲ್ ಅಂಕಪಟ್ಟಿಯಲ್ಲಿ ಏಳನೇ ಸ್ಥಾನಕ್ಕೆ ಇಳಿದರೆ, ಮುಂಬಯಿ ಇಂಡಿಯನ್ಸ್ ಮೂರನೇ ಸ್ಥಾನಕ್ಕೆ ಏರಿತು.
ವಾಖೆಂಡೆ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಆರ್ಸಿಬಿ ತಂಡ ಟಾಸ್ ಸೋತು ಮೊದಲು ಬ್ಯಾಟಿಂಗ್ಗೆ ಆಹ್ವಾನ ಪಡೆಯಿತು. ಅಂತೆಯೇ ನಿಗದಿತ 20 ಓವರ್ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 199 ರನ್ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ಮುಂಬಯಿ ತಂಡ 16.3 ಓವರ್ಗಳಲ್ಲಿ 4 ವಿಕೆಟ್ಗೆ 200 ರನ್ ಬಾರಿಸಿ ಗೆಲುವು ಪಡೆಯಿತು.
ಇದರೊಂದಿಗೆ ಆರ್ಸಿಬಿ ಪರ ವಫಾಫ್ ಡು ಪ್ಲೆಸಿಸ್ (65) ಹಾಗೂ ಗ್ಲೆನ್ ಮ್ಯಾಕ್ಸ್ವೆಲ್ (68) ಬಾರಿಸಿದ್ದ ಅರ್ಧ ಶತಕಗಳು ವ್ಯರ್ಥಗೊಂಡವು. ದುರ್ಬಲ ಬೌಲಿಂಗ್ ವಿಭಾಗವೇ ಆರ್ಸಿಬಿ ಸೋಲಿನ ನೇರ ಹೊಣೆ ಹೊತ್ತುಕೊಂಡಿತು. ಮುಂಬಯಿ ಬ್ಯಾಟರ್ಗಳಿಗೆ ಯಾವುದೇ ಹಂತದಲ್ಲಿ ಪ್ರತಿರೋಧ ಒಡ್ಡಲು ಆರ್ಸಿಬಿ ಬೌಲರ್ಗಳು ಸಾಫಲ್ಯ ಕಾಣಲಿಲ್ಲ.
ಗುರಿ ಬೆನ್ನಟ್ಟಿದ ಮುಂಬಯಿ ತಂಡ ಆರಂಭದಲ್ಲೇ ರೋಹಿತ್ ಶರ್ಮಾ (7) ವಿಕೆಟ್ ಕಳೆದುಕೊಂಡರೂ, ಇಶಾನ್ ಕಿಶನ್ 21 ಎಸೆತಗಳಲ್ಲಿ ಬಾರಿಸಿದ 42 ರನ್ಗಳ ಬಲದಿಂದ ಉತ್ತಮ ಆರಂಭ ಪಡೆಯಿತು. ಅದಾದ ಬಳಿಕ ಆಡಲು ಬಂದ ಸೂರ್ಯಕುಮಾರ್ ಯಾದವ್ ಅಬ್ಬರದ ಬ್ಯಾಟಿಂಗ್ ನಡೆಸಿ 35 ಎಸೆತಕ್ಕೆ 83 ರನ್ ಬಾರಿಸಿದರು. ಯುವ ಬ್ಯಾಟರ್ ನೇಹರ್ ವಧೇರಾ 34 ಎಸೆತಗಳಿಗೆ 52 ರನ್ ಬಾರಿಸಿ ಗೆಲುವು ತಂದುಕೊಟ್ಟರು. ಈ ಜೋಡಿ ಮೂರನೇ ವಿಕೆಟ್ಗೆ 142 ರನ್ ಬಾರಿಸಿ ಮುಂಬಯಿ ತಂಡದ ಜಯವನ್ನು ಸುಲಭಗೊಳಿಸಿತು.
ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಆರ್ಸಿಬಿ ತಂಡಕ್ಕೆ ವಿರಾಟ್ ಕೊಹ್ಲಿ 1 ರನ್ಗೆ ಔಟಾಗುವ ಮೂಲಕ ಆರಂಭಿಕ ಹಿನ್ನಡೆ ಉಂಟಾಯಿತು. ಬಳಿಕ ಆಡಲು ಬಂದ ಅನುಜ್ ರಾವತ್ 6 ರನ್ಗೆ ವಿಕೆಟ್ ಒಪ್ಪಿಸಿ ಮತ್ತೊಮ್ಮೆ ಹಿನ್ನಡೆಗೆ ಒಳಗಾದರು. ಈ ವೇಳೆ ಜತೆಯಾದ ನಾಯಕ ಫಾಫ್ ಡು ಪ್ಲೆಸಿಸ್ (65) ಹಾಗೂ ಗ್ಲೆನ್ ಮ್ಯಾಕ್ವೆಲ್ ಅಬ್ಬರದ ಆಟ ಪ್ರದರ್ಶಿಸಿದರು. ಈ ಜೋಡಿ ಅಬ್ಬರದ ಹೊಡೆತಗಳ ಮೂಲಕ ಮೂರನೇ ವಿಕೆಟ್ಗೆ 120 ರನ್ ಪೇರಿಸಿತು. ಪ್ಲೆಸಿಸ್ 30 ಎಸೆತಗಳಲ್ಲಿ ಅರ್ಧ ಶತಕ ಪೂರೈಸಿದಲ್ಲದೆ, 41 ಎಸೆತಗಳಲ್ಲಿ 3 ಸಿಕ್ಸರ್ ಹಾಗೂ 5 ಫೋರ್ ಸಮೇತ 65 ರನ್ ಬಾರಿಸಿದರು. ಮ್ಯಾಕ್ಸ್ವೆಲ್ 25 ಎಸೆತಗಳನ್ನು ಬಳಸಿಕೊಂಡು ಅರ್ಧ ಶತಕ ಬಾರಿಸಿದಲ್ಲದೆ, 33 ಎಸೆತಗಳಲ್ಲಿ 4 ಸಿಕ್ಸರ್ ಹಾಗೂ 8 ಫೋರ್ಗಳ ಸಮೇತ 68 ರನ್ ಬಾರಿಸಿದರು.
ಇದನ್ನೂ ಓದಿ : Virat kohli : ರನ್ಗಳಿಸಲು ವಿರಾಟ್ ಕೊಹ್ಲಿಗೆ ಹೊಸ ತಂತ್ರ ಹೇಳಿಕೊಟ್ಟ ರವಿ ಶಾಸ್ತ್ರಿ
ಸತತ ವಿಕೆಟ್ ಪತನ
ಮ್ಯಾಕ್ಸ್ವೆಲ್ ಹಾಗೂ ಪ್ಲೆಸಿಸ್ ಕ್ರೀಸ್ನಲ್ಲಿ ಇರುವ ತನಕ ಗೆಲುವಿಗೆ ಅನಿವಾರ್ಯವಾಗಿರುವ 220 ಪ್ಲಸ್ ರನ್ ದಾಖಲಾಗುವ ಸೂಚನೆ ಇತ್ತು. ಆದರೆ ಅವರಿಬ್ಬರು ಔಟಾದ ಬಳಿಕ ಆರ್ಸಿಬಿ ತನ್ನ ಚಾಳಿ ಮುಂದುವರಿಸಿತು. ಇಂಪ್ಯಾಕ್ಟ್ ಪ್ಲೇಯರ್ ರೂಪದಲ್ಲಿ ಆಡಲು ಬಂದಿದ್ದ ಅವರು 1 ರನ್ ಬಾರಿಸಿ ನಿರಾಸೆಯಿಂದ ಪೆವಿಲಿಯನ್ಗೆ ಮರಳಿದರು. ದಿನೇಶ್ ಕಾರ್ತಿಕ್ ಒಂದು ಜೀವದಾನ ಪಡದುಕೊಂಡು 18 ಎಸೆತಗಳಿಗೆ 30 ರನ್ ಬಾರಿಸಿದರೂ, ಕೇದಾರ್ ಜಾಧವ್ ಹಾಗೂ ವಾನಿಂದು ಹಸರಂತ ತಲಾ 12 ರನ್ ಬಾರಿಸಿದರು.
ಮುಂಬಯಿ ಪರ ಜೇಸನ್ ಬೆಹ್ರೆನ್ಡಾರ್ಫ್ 3 ವಿಕೆಟ್ ಉರುಳಿಸಿದರೆ, ಕ್ಯಾಮೆರಾನ್ ಗ್ರೀನ್, ಕ್ರಿಸ್ ಜೊರ್ಡಾನ್ ಹಾಗೂ ಕುಮಾರ್ ಕಾರ್ತಿಕೇಯ ತಲಾ ಒಂದು ವಿಕೆಟ್ ಗೆದ್ದರು.