ಚೆನ್ನೈ: ಟೀಮ್ ಇಂಡಿಯಾ ಮಾಜಿ ಕ್ಯಾಪ್ಟನ್ ಮಹೇಂದ್ರ ಸಿಂಗ್ ಧೋನಿಗೆ ದೊಡ್ಡ ಫ್ಯಾನ್ ಬೇಸ್ ಇದೆ. ಧೋನಿಯ ಪ್ರತಿಯೊಂದು ಶೈಲಿಯೂ ಅವರಿಗೆ ಇಷ್ಟ. ಆದರೆ, ಅವರು ಬಟರ್ ಚಿಕನ್ ತಿನ್ನುವ ರೀತಿ ರೀತಿ ಮಾತ್ರ ಎಲ್ಲರಿಗೂ ಇಷ್ಟವಾಗದು ಎಂದು ಅಂದುಕೊಳ್ಳಬಹುದು. ಯಾಕೆ ಗೊತ್ತಾ? ಸಾಮಾನ್ಯವಾಗಿ ನಾನ್ವೆಜ್ ಪ್ರಿಯರಿಗೆ ಬಟರ್ ಚಿಕನ್ ತಂದುಕೊಟ್ಟರೆ ಗ್ರೇವಿ ಮತ್ತು ಚಿಕನ್ ಒಟ್ಟೊಟ್ಟಿಗೆ ತಿನ್ನುತ್ತಾರೆ. ರೋಟಿ ಅಥವಾ ಚಪಾತಿ ಜತೆ ನೆಂಚಿಕೊಂಡು ತಿನ್ನುತ್ತಾರೆ. ಆದರೆ, ಧೋನಿಗೆ ಯಾರಾದರೂ ಬಟರ್ ಚಿಕನ್ ತಂದುಕೊಟ್ಟರೆ ಅದರಲ್ಲಿರುವ ತುಂಡುಗಳನ್ನು (ಪೀಸ್) ತಿನ್ನುವುದೇ ಇಲ್ಲವಂತೆ. ಕೇವಲ ಗ್ರೇವಿ ಮಾತ್ರ ಸೇವಿಸಿ ಸಂತೃಪ್ತಿ ಪಡುತ್ತಾರೆ. ಅಷ್ಟಕ್ಕೆ ಮುಗಿದಿಲ್ಲ ಅವರ ಕತೆ. ಒಂದು ವೇಳೆ ಬಟರ್ ಚಿಕನ್ನಲ್ಲಿರುವ ಕೋಳಿಯ ತುಣುಕನ್ನು ತಿಂದರೆ ರೋಟಿಯನ್ನು ಮುಟ್ಟುವುದೇ ಇಲ್ಲವಂತೆ. ಧೋನಿಯ ಈ ವಿಚಿತ್ರ ಅಭ್ಯಾಸವನ್ನು ಬಯಲು ಮಾಡಿದ್ದು ಐಪಿಎಲ್ನಲ್ಲಿ (IPL 2023) ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಸದಸ್ಯ ರಾಬಿನ್ ಉತ್ತಪ್ಪ.
ಐಪಿಎಲ್ 2023ನೇ ಆವೃತ್ತಿಗಾಗಿ ಸಿದ್ಧತೆ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಲೈವ್ ಸ್ಟ್ರೀಮಿಂಗ್ ಹಕ್ಕು ಪಡೆದುಕೊಂಡಿರುವ ಜಿಯೋ ಸಿನಿಮಾ ಪೂರ್ವಭಾವಿಯಾಗಿ ನಾನಾ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದೆ. ಅಂತೆಯೇ ರಾಬಿನ್ ಉತ್ತಪ್ಪ ಅವರನ್ನೂ ಕರೆಸಿ ಮಾತನಾಡಿದೆ. ಕಾರ್ಯಕ್ರಮದ ಹೆಸರು ಮೈ ಟೈಮ್ ವಿತ್ ಧೋನಿ, ಉತ್ತಪ್ಪ (My Time With Dhoni ft. Uthappa ). ಈ ಕಾರ್ಯಕ್ರಮದಲ್ಲಿ ಮಹೇಂದ್ರ ಸಿಂಗ್ ಧೋನಿಯ ಜತೆಗಿನ ಗೆಳೆತನವನ್ನು ರಾಬಿನ್ ಉತ್ತಪ್ಪ ಹಂಚಿಕೊಂಡಿದ್ದಾರೆ. ಇದೇ ವೇಳೆ ಅವರು ಧೋನಿಯ ಬಟರ್ ಚಿಕಿನ್ ಸೀಕ್ರೆಟ್ ಕೂಡ ಬಯಲು ಮಾಡಿದ್ದಾರೆ.
ಇದನ್ನೂ ಓದಿ : IPL 2023: ಗಿಟಾರ್ ಹಿಡಿದು ಕುಣಿದ ಧೋನಿ; ವಿಡಿಯೊ ವೈರಲ್
ತಿನ್ನುವ ವಿಚಾರಕ್ಕೆ ಬಂದಾಗ ಮಹೇಂದ್ರ ಸಿಂಗ್ ಧೋನಿ ದೊಡ್ಡ ಗೆಳೆಯರ ಬಳಗವನ್ನು ಹೊಂದಿದ್ದರು. ಸುರೇಶ್ ರೈನಾ, ಇರ್ಫಾನ್ ಪಠಾಣ್, ಆರ್ ಪಿ ಸಿಂಗ್, ಪಿಯೂಶ್ ಚಾವ್ಲಾ. ಮುನಾಫ್ ಪಟೇಲ್ ಜತೆಗೆ ಸೇರಿಕೊಂಡು ಬಗೆಬಗೆಯ ಭಕ್ಷ್ಯಗಳನ್ನು ಆರ್ಡರ್ ಮಾಡುತ್ತಿದ್ದರು. ಇವರೆಲ್ಲರ ನಡುವೆ ಧೋನಿ ವಿಭಿನ್ನ ವ್ಯಕ್ತಿಯಾಗಿದ್ದರು. ಹೇಗೆಂದರೆ ಬಟರ್ ಚಿಕನ್ ಅನ್ನು ಚಿಕನ್ ಇಲ್ಲದೇ ತಿನ್ನುತ್ತಿದ್ದರು. ರೋಟಿ ತಿಂದರೆ ಚಿಕನ್ ತಿನ್ನಲ್ಲ, ಚಿಕನ್ ತಿಂದರೆ ರೋಟಿ ತಿನ್ನುತ್ತಿರಲಿಲ್ಲ ಎಂದು ರಾಬಿನ್ ಉತ್ತಪ್ಪ ಹೇಳಿದ್ದಾರೆ.
ಯಾವ ಹೆಸರಿನಿಂದ ಬೇಕಾದರೂ ಕರೆಯಬಹದು
ಮಹೇಂದ್ರ ಸಿಂಗ್ ಧೋನಿ ಹಿರಿಯ ಆಟಗಾರ. ಅವರ ವರ್ಚಸ್ಸು ಕೂಡ ಜಾಸ್ತಿಯಿದೆ. ಹೀಗಾಗಿ ಅವರನ್ನು ಯಾವ ರೀತಿ ಕರೆಯಬೇಕು ಎಂಬುದು ಕಿರಿಯ ಆಟಗಾರರಿಗೆ ಎನಿಸುತ್ತದೆ. ಆದರೆ, ಧೋನಿ ಮಾತ್ರ ಈ ವಿಚಾರದಲ್ಲಿ ಧಾರಾಳಿ. ನಿಮಗೆ ಹೇಗೆ ಬೇಕೊ, ಹಾಗೆ ಕರೆಬಹುದು ಎಂದು ಸಂಪೂರ್ಣ ಸ್ವಾತಂತ್ರ್ಯ ನೀಡುತ್ತಿದ್ದರು. ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಪರವಾಗಿ ಆಡುವ ವೇಳೆ ರಾಬಿನ್ ಉತ್ತಪ್ಪ ಮಹೇಂದ್ರ ಸಿಂಗ್ ಧೋನಿಯ ಬಳಿ, ನಿಮ್ಮನ್ನು ಎಲ್ಲರೂ ಮಹೀ ಬಾಯ್ ಎಂದು ಕರೆಯುತ್ತಾರೆ. ನಾನು ಹಾಗೆಯೇ ಕರೆಯಬಹುದೇ ಎಂದು ಪ್ರಶ್ನಿಸುತ್ತಾರೆ. ಆಗ ಧೋನಿ, ನಿಮಗೆ ಹೇಗೆ ಇಷ್ಟವೋ ಹಾಗೆ ಕರೆಯಿರಿ. ನನಗೆ ಯಾವುದೇ ಆಕ್ಷೇಪ ಇಲ್ಲ. ಮಹೀ ಎಂದು ಕರೆದರೂ ಸಾಕ ಎಂದು ಹೇಳಿದ್ದೆರಂತೆ.