ಲಖನೌ: ಬೌಲರ್ಗಳ ಪರಾಕ್ರಮ ಹಾಗೂ ಸಿಕಂದರ್ ರಾಜಾ (57) ಅವರ ಅರ್ಧ ಶತಕದ ನೆರವು ಪಡೆದ ಪಂಜಾಬ್ ಕಿಂಗ್ಸ್ ತಂಡ ಐಪಿಎಲ್ನ 21ನೇ ಪಂದ್ಯದಲ್ಲಿ ಲಕ್ನೊ ಸೂಪರ್ ಜೈಂಟ್ಸ್ ವಿರುದ್ಧ 2 ವಿಕೆಟ್ ವಿಜಯ ಸಾಧಿಸಿದೆ. ಇದರೊಂದಿಗೆ ಕಳೆದ ಎರಡು ಪಂದ್ಯಗಳ ಸೋಲಿನ ಬಳಿಕ ಪಂಜಾಬ್ ತಂಡ ಗೆಲುವಿನ ಹಳಿಗೆ ಮರಳಿತು. ಅತ್ತ ಹಿಂದಿನ ಪಂದ್ಯದಲ್ಲಿ ಆರ್ಸಿಬಿ ವಿರುದ್ಧ ಕೊನೇ ಎಸೆತದಲ್ಲಿ ಗೆಲುವು ಪಡೆದಿದ್ದ ಲಕ್ನೊ ತಂಡ, ತವರಿನ ಮೈದಾನದಲ್ಲಿ ಸೋಲು ನಿರಾಸೆ ಎದುರಿಸಿತು. ಕಾಯಂ ನಾಯಕ ಶಿಖರ್ ಧವನ್ ಅನುಪಸ್ಥಿತಿಯಲ್ಲಿ ತಂಡವನ್ನು ಮುನ್ನಡೆಸಿದ್ದ ಸ್ಯಾಮ್ ಕರ್ರನ್ ಗೆಲುವಿನ ದಡ ಮುಟ್ಟಿಸಿ ಸಂಭ್ರಮಿಸಿದರು.
ಭಾರತರತ್ನ ಅಟಲ್ಬಿಹಾರಿ ವಾಜಪೇಯಿ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಕೆ. ಎಲ್ ರಾಹುಲ್ ನೇತೃತ್ವದ ಲಖನೌ ಸೂಪರ್ ಜೈಂಟ್ಸ್ ತಂಡ ನಿಗದಿತ 20 ಓವರ್ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 159 ರನ್ ಬಾರಿಸಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ಪಂಜಾಬ್ ಕಿಂಗ್ಸ್ ಬಳಗ 19.3 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 161 ರನ್ ಬಾರಿಸಿ ಜಯ ಸಾಧಿಸಿತು.
ಸಾಧಾರಣ ಗುರಿಯನ್ನು ಬೆನ್ನಟ್ಟಲು ಹೊರಟ ಪಂಜಾಬ್ ತಂಡ ಉತ್ತಮ ಅರಂಭ ಪಡೆಯಲಿಲ್ಲ. ಆರಂಭಿಕರಾದ ಅಥರ್ವ ಥೈಡೆ ಶೂನ್ಯಕ್ಕೆ ಔಟಾದರೆ ಪ್ರಭ್ಸಿಮ್ರಾನ್ ಸಿಂಗ್ 4 ರನ್ಗಳಿಗೆ ವಿಕೆಟ್ ಒಪ್ಪಿಸಿದರು. ಮಧ್ಯಮ ಕ್ರಮಾಂಕದಲ್ಲಿ ಮ್ಯಾಥ್ಯೂ ಶಾರ್ಟ್ಸ್ (34) ಹಾಗೂ ಹರ್ಪ್ರೀತ್ ಸಿಂಗ್ (22) ಸ್ವಲ್ಪ ಹೊತ್ತು ಕ್ರೀಸ್ ಕಾಯ್ದುಕೊಂಡರು. ಬಳಿಕ ಐದನೇ ಕ್ರಮಾಂಕದಲ್ಲಿ ಆಡಲು ಬಂದ ಸಿಕಂದರ್ ರಾಜಾ ನಿಧಾನಗತಿಯಲ್ಲಿ ಇನಿಂಗ್ಸ್ ಕಟ್ಟಿದರು. ಅವರ 57 ರನ್ಗಳಲ್ಲಿ 4 ಫೋರ್ ಹಾಗೂ 3 ಸಿಕ್ಸರ್ಗಳು ಸೇರಿಕೊಂಡಿವೆ.
ಇದಾದ ಬಳಿಕ ಸ್ಯಾಮ್ ಕರ್ರನ್ (6) ಹಾಗೂ ಜಿತೇಶ್ ಶರ್ಮಾ (2) ಬೇಗನೆ ವಿಕೆಟ್ ಒಪ್ಪಿಸಿದ ಕಾರಣ ಮತ್ತೆ ತಂಡಕ್ಕೆ ಹಿನ್ನಡೆ ಉಂಟಾಯಿತು. ಆದರೆ, ಶಾರುಖ್ ಖಾನ್ ಕೊನೆ ಹಂತದಲ್ಲಿ 10 ಎಸೆತಗಳಿಗೆ 23 ರನ್ ಬಾರಿಸಿ ಗೆಲುವು ತಂದುಕೊಟ್ಟರು.
ಇನಿಂಗ್ಸ್ ಆರಂಭಿಸಿದ ಲಕ್ನೊ ತಂಡ ಮೊದಲ ವಿಕೆಟ್ಗೆ 53 ರನ್ ಬಾರಿಸಿತು. ಕೈಲ್ ಮೇಯರ್ಸ್ 23 ಎಸೆತಗಳಿಗೆ 29 ರನ್ ಬಾರಿಸಿ ವಿಕೆಟ್ ಒಪ್ಪಿಸಿದರು. ಬಳಿಕ ಬಂದ ದೀಪಕ್ ಹೂಡ 2 ರನ್ಗಳಿಗೆ ಔಟಾದರು. ಅವರು ಜಿಂಬಾಬ್ವೆ ಆಲ್ರೌಂಡರ್ ಸಿಕಂದರ್ ರಾಜಾಗೆವಿಕೆಟ್ ಒಪ್ಪಿಸಿದರು. ಆಲ್ರೌಂಡರ್ ಕೃಣಾಲ್ ಪಾಂಡ್ಯ (18) ಕೂಡ ಹೆಚ್ಚು ಹೊತ್ತು ಕ್ರಿಸ್ನಲ್ಲಿ ನಿಲ್ಲಲಿಲ್ಲ. ಆರ್ಸಿಬಿ ವಿರುದ್ಧ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿದ್ದ ನಿಕೊಲಸ್ ಪೂರನ್ ಶೂನ್ಯ ಸುತ್ತಿದರು.
ರಾಹುಲ್ ಅರ್ಧ ಶತಕ
ಕಳೆದ ಕೆಲವು ತಿಂಗಳಿಂದ ಕಳಪೆ ಬ್ಯಾಟಿಂ ಪ್ರದರ್ಶನ ನೀಡುತ್ತಿದ್ದ ಕೆ. ಎಲ್ ರಾಹುಲ್ ಈ ಪಂದ್ಯದಲ್ಲಿ ಅರ್ಧ ಶತಕ ಬಾರಿಸಿ ಕೊರಗು ನೀಗಿಸಿಕೊಂಡರು. ಆರಂಭದಲ್ಲಿ ನಿಧಾನಗತಿಯಲ್ಲಿ ಆಡಿದ ಅವರು 40 ಎಸೆತಗಳನ್ನು ಎದುರಿಸಿ ಅರ್ಧ ಶತಕ ಪೂರೈಸಿದರು. ಬಳಿಕ ಸ್ವಲ್ಪ ವೇಗ ವೃದ್ಧಿಸಿಕೊಂಡು 56 ಎಸೆತಗಳಲ್ಲಿ 74 ರನ್ ಬಾರಿಸಿ ಔಟಾದರು. ಮಾರ್ಕ್ ಸ್ಟೋಯ್ನಿಸ್ 11 ಎಸೆತಗಳಲ್ಲಿ 15 ರನ್ ಗಳಿಸಿದರು.
ಇದನ್ನೂ ಓದಿ : IPL 2023: ಕನ್ನಡಿಗ ವೈಶಾಕ್ ಬೌಲಿಂಗ್ ದಾಳಿಗೆ ತತ್ತರಿಸಿದ ಡೆಲ್ಲಿ; ಆರ್ಸಿಬಿಗೆ 23 ರನ್ ಜಯ
ಪಂಜಾಬ್ ತಂಡದ ಪರ ಬೌಲಿಂಗ್ನಲ್ಲಿ ಸ್ಯಾಮ್ ಕರ್ರನ್ 29 ರನ್ ನೀಡಿ 3 ವಿಕೆಟ್ ಕಬಳಿಸಿದರು. ಕಗಿಸೊ ರಬಾಡ 34 ರನ್ ವೆಚ್ಚದಲ್ಲಿ 2 ವಿಕೆಟ್ ಉರುಳಿಸಿದರು.